Dikosa dia mishiku dia mbulamatadi nedijike anyi?

Dikosa mishiku dia bakokeshi ba mbulamatadi ntshilumbu tshidi tshikuata bukua matunga ne tshidi ne bipeta bibi menemene.a Tshilejilu, munkatshi mua tshipupu tshia COVID-19, bakafunda bakokeshi ba mbulamatadi ba matunga mashilashilangane bua muvuabu badivuije babanji ne makuta avuabu bafile bua kuambuluisha bantu mu tshipupu atshi. Dikosa mishiku adi diakapangisha bantu luondapu luvua lukengela, ke bualu kayi bantu ba bungi bavua bafue ne bakenge bikole.

Bipeta bibi bia dikosa dia mishiku dia mbulamatadi mbinene menemene. David Cameron, kavula mbedi wa kale wa bukalenge bua Royaume-Uni wakamba ne: “Dikosa dia mishiku ndifuane butatande bunene budi bukuate matunga onso ne buajingakane.’’

Kadi tudi batuishibue ne: mu matuku makese emu dikosa dia mishiku dia mbulamatadi dionso nedijike. Bua tshinyi tudi tuamba nanku? Tangila tshidi Bible wamba tshikala Nzambi mua kuenza.

Mutudi bamanye ne: Nzambi neajikije dikosa dia mishiku

Bible udi wamba dîyi dia Nzambi edi: “Meme, Yehowa, ndi munange kulumbuluisha kuakane; ndi nkina buivi ne malu adi kaayi makane.”b (Yeshaya 61:8) Padi bantu batatshishibua kudi bienzedi bia bantu bakuabu bia malu a dikosa dia mishiku, Nzambi mmumanye. (Nsumuinu 14:31) Nzambi udi ulaya ne: “Bu mudibu bakengesha bakengi . . ., nenjuke bua kuenza bualu.”​​—Misambu 12:5.

Nzambi neenze tshinyi? Kakulongolola makalenge adiku lelu eu to, neaumbushe bua kuteka bukalenge buende bua mu diulu budibu babikila ne: “Bukalenge bua Nzambi.” (Mâko 1:14, 15; Matayi 6:10) Bible udi wamba ne: ‘Nzambi wa mu diulu neajadike bukalenge bukuabu buikala mua kuzaza makalenge makuabu aa onso ne nebuatuishe ku ndekelu, ne buobu nkayabu nebushalaku kashidi.’ (Danyele 2:44) Nunku ke muikala Nzambi mua kujikija dikosa dia mishiku ditudi tumona lelu eu.

Bukalenge budi kabuyi ne dikosa dia mishiku

Bua tshinyi tudi batuishibue ne: Bukalenge bua Nzambi budi mbulamatadi wende kabuakunyanguka nansha kakese? Bua malu adi alonda aa:

1. 1. Bukokeshi. Bukokeshi bua Bukalenge abu budi bufumina kudi Nzambi Wa Bukole Buonso.​​—Buakabuluibua 11:15.

   Bua tshinyi bidi ne mushinga: Mbulamatadi ya bana ba bantu idi ipetela makuta kudi bena ditunga bua yoyi kuenza mudimu wayi. Misangu ya bungi bidi bifikisha ku dikosa dia mishiku, buivi, ne disaka bantu bua kuenza bualu kampanda. Kadi Bukalenge bua Nzambi buobu budi bupetela diambuluisha kudi Nzambi Wa Bukole Buonso; nanku nebuikale misangu yonso ne mushindu wa kukumbajila bantu bikalabu mua kukokesha majinga abu.​​—Misambu 145:16.

2. 2. Mfumu. Nzambi mmuteke Yezu Kristo bu Mfumu wa Bukalenge buende.​​—Danyele 7:13, 14.

   Bua tshinyi bidi ne mushinga: Nansha bamfumu ba muoyo muimpe menemene ba bana ba bantu badi mua kubasaka ku dienza malu mabi. (Muambi 7:20) Kadi Yezu yeye wakaleja ne: kabena mua kumukosa mishiku to. (Matayi 4:8-11) Bualu bukuabu, udi misangu yonso wenzela bantu badiye ukokesha malu ne dinanga dia bushuwa ne mmusue diakalenga diabu menemene.​​—Misambu 72:12-14.

3. 3. Mikenji. Mikenji ya Bukalenge bua Nzambi mmipuangane, idi isankisha too ne bantu badi bayitumikila.​​—Misambu 19:7, 8.

   Bua tshinyi bidi ne mushinga: Misangu ya bungi mikenji ya bana ba bantu itu mikole bua kuyumvua, itu inemena bantu bujitu, kabatu bayitumikila to; ke tshidi tshifikisha ku dikosa dia mishiku. Kadi mikenji ya Nzambi ki mmikole to; mmiela bua diakalenga dietu. (Yeshaya 48:17, 18) Kabidi, mikenji eyi idi itangila bienzedi ne malu adi mu meji. (Matayi 22:37, 39) Bu mudi Nzambi umona tshidi mu muoyo wa bantu, udi mua kuenza bua batumikile mikenji ayi eku ubumvuila.​​—Yelemiya 17:10.

Tudi tukulomba ulonge malu makuabu a mulayi wa mu Bible udi wakula bua tshikondo tshikala kakuyi mbulamatadi wa dikosa dia mishiku.

• Bala tshiena-bualu tshia “Bukalenge bua Nzambi: Mbulamatadi udi kayi ne dikosa dia mishiku” bua kumanya malu makuabu asatu adi aleja ne: Bukalenge bua Nzambi kabuakunyanguka to.

• Tangila filme wa Bukalenge bua Nzambi ntshinyi? bua kumanya malu makuabu a Bukalenge bua Nzambi ne malu aluabu kuenza pa buloba.

• Teta dilonga dietu dia Bible dia nuenda nuyukila kuyi ufuta bua kumona mudi milayi ya mu Bible mua kukuambuluisha.