Mudi Nzambi utabalela bampudi matshi

Bantu badi tumama mbatue ku miliyo 70 pa buloba bujima, ba bungi badi bayukila mu umue wa ku miakulu ya tumama mipite pa 200 idiku. Bia dibungama, bantu badi bakula batu benzela tumama malu mu mushindu mubi anu bu mudibi bileja kuinshi eku:

• “Pa buloba bujima, badi balengulula manême a tumama ne a bantu badi ne lutatu lua kumvua.”​​—Association nationale des sourds (États-Unis).

• “Bantu badi tumama mu matunga adi malubuluke ke batu bapele ba menemene, kabatu babalongesha, kabatu bapeta midimu, anyi malu makuabu mudibi bikengela to.”​​—Fédération mondiale des sourds.

Mmunyi mutu Nzambi umona tumama? Bible utu wamba tshinyi bua tumama? Ntshinyi tshitu Bantemu ba Yehowa benza bua kuambuluisha tumama lelu?

Mutu Nzambi umona tumama

Bible udi uleja ne: Yehowaa Nzambi utu utabalela tumama. Mmusue bua tuikale tubenzela malu bimpe ne tuikale tulonga malu adiye musue.

Mvese: “Kuena ne bua kuela mpudi matshi mulawu.”​​—Lewitiki 19:14.

Mvese: “Nzambi kena ne kansungansunga to.”​​—Bienzedi 10:34.

Mvese: “Yezu uvua unyunguluka . . . , uyisha lumu luimpe lua Bukalenge.”​​—Matayi 9:35.

Mvese: Yezu uvua “ufikisha too ne bampudi matshi ku diumvua ne tumama ku diakula.”​​—Mâko 7:37.

Mvese: “Matshi a bampudi matshi neajikuke.”​​—Yeshaya 35:5.

Diumvuija: Yehowa ukavua mulaye ne: bampudi matshi nebumvue.​​—Yeshaya 29:18.

Mutu Bantemu ba Yehowa bambuluisha bampudi matshi lelu

Bantemu ba Yehowa badi bamanyisha bampudi matshi mukenji wa Nzambi wa ditekemena pa buloba bujima. Ntshinyi tshitudi tuenza bua kukumbaja mudimu eu? Tutu tupatula Bible ne filme ya kulonga nayi Bible mu miakulu ya tumama mipite pa 100. Tutu kabidi tulongolola tulasa tua malu a mu Bible ne bisangilu bia bena kristo mu muakulu wa tumama. Muntu yonso udi musue diambuluisha dia Nzambi udi mua kubuelamu kayi ufuta makuta to. Bua tshinyi? Bualu Yezu wakamba ne: “Nuvua bapete tshianana, nufile tshianana.”​​—Matayi 10:8.

Udi mua kubuela bua kuambula malu aa mu tshiamu tshiebe mu:

Site wa JW.ORG. Tuaku pa kazubu ka muakulu kadi kuulu paudi ubuela mu site au bua kupeta malu a bungi mu muakulu wa tumama uudi musue.

Programe wa JW Library. Ela programe udibu kabayi bafutshila makuta eu mu tshiamu tshiebe, dîba adi neupete mushindu wa kuambula filme anyi kuyitangila mu miakulu ya tumama mipite pa 100.

Bintu bietu bia kulongeshangana nabi malu a mu Bible

Bible wa muakulu wa tumama. Bible wa Nkudimuinu wa bulongolodi bupiabupia wa muakulu wa tumama wa bena Amerike ke Bible wa kumpala udibu bapatule mujima mu muakulu wa tumama. Bakadi bapatule Bible wa Nkudimuinu wa bulongolodi bupiabupia eu mujima anyi tshitupa tshiende mu miakulu ya tumama ya bungi; badi benda bamupatula kabidi mu miakulu mikuabu ya tumama tshidimu tshionso etshi. (Bua kumanya miakulu ikadi ne Bible eu ne kumulondesha mu Enternete, tangila kazubu ka “Bible wa Nkudimuinu wa bulongolodi bupiabupia mu muakulu wa tumama.”)

• Tangila filme wa Bible wa Nkudimuinu wa bulongolodi bupiabupia ukadiku mujima mu muakulu wa tumama wa bena Amerike bua kumanya mudimu utu wenzeka bua kupatula Bible mu muakulu wa tumama.

• Bua kuakaja mushindu webe wa kubala Bible, ela programe wa JW Library mu tshiamu tshiebe. Programe eu udi wambuluisha bua kupeta mvese misunguluke iudi ukeba mu Bible wa muakulu wa tumama.

• Dmytro ne Vita mbampudi matshi; kadi bana badibu balele badi bumvua. Mona muvua kulondesha dibala dia Bible wa muakulu wa tumama kubambuluishe.

Filme idi ilongesha malu a mu Bible. Bantemu ba Yehowa mbapatule filme mu miakulu ya tumama bua kuambuluisha bantu bua kumvua mibelu idi Bible ufila ne kuyitumikila. Mbapatule filme ayi bua . . .

• Dibaka ne dîku

• Bansonga ne bana ba bitende

• Bana

Dilonga dia Bible dia nuenda nuyukila bamonangane mpala ne mpala. Longa Bible mu muakulu wa tumama. Bakuambuluishe kudi mulongeshi bua kulonga mu mushindu uudi musue. Lomba bua kulonga Bible kuyi ufuta makuta.

Jeson Senajonon mmusombele mu Philippines. Mona muvua dilonga dia Bible dimuambuluishe bua kudia bulunda bushême ne Yehowa.

Mario Antúnez uvua mfumu wa tshitendelelu kampanda mu Honduras. Mona muvuaye mupete mandamuna a nkonko ya mu Bible ivuaye udiela anu mudiye mulonde mu tshiena-bualu tshia ne: “Mvua ne nkonko ya bungi kadi mandamuna makese.”

Bisangilu ne bibilu binene. Tutu ne bisumbu bia muakulu wa tumama ne tusumbu tukese pa buloba bujima. Bampudi matshi batu badisangishamu lumingu luonso bua kulonga ne kutendelela Nzambi. Tshidimu tshionso etshi, tutu tulongolola kabidi bibilu binene mu muakulu wa tumama mutubu balongesha malu a Nzambi. Mu bisangilu bietu, tutu kabidi tuambuluisha bantu badi kabayi bamona ne bumvua. Batu balongolola bua bikale babakuata ku bianza benda babakuisha muakulu wa tumama bua bumvue bidibu bamba mu bisangilu. Tutu kabidi tupatuila bana betu aba mikanda mu muakulu wa bampofu. Katutu tulomba makuta bua mikanda ayi to.

• Keba tshisumbu tshia pabuipi nebe.

• Manya malu a bungi adi atangila mpuilu ne mpungilu itutu tuenza tshidimu tshionso.

• Buela mu Tshivulukilu tshia lufu lua Yezu. Ntshibilu tshia mushinga tshia ku tshidimu.

José Luis Ayal mmusombele mu Mexique. Mmuledibue mpudi matshi, yeye kulua kabidi mpofu. Mona muvuabu bamuambuluishe bua kulua mulongeshi muimpe wa Bible.