Bantemu ba Yehowa batu benza tshibilu tshia dibaka mushindu kayi?
Bantemu ba Yehowa batu batamba kuenza difesto dimpe dikese dia muyuki muîpi wa malu a mu Bible mu bibilu biabu bia dibaka. Panyima pa muyuki au, bena dibala badi mua kutuilangana muaba kampanda ne bantu badibu babikile mu tshibilu tshiabu tshia dibaka bua kudia biakudia.a Yezu wakabuela mu difesto dia nanku mu tshimenga tshia Kana ku ntuadijilu kua mudimu wende wa kuyisha.—Yone 2:1-11.
Tshibilu tshia dibaka tshitu tshienzeka mushindu kayi?
Tshitupa tshia mushinga mukole tshia tshibilu etshi mmuyuki wa dibaka utu muena mudimu wa Nzambi wa mu Bantemu ba Yehowa wenza mu minite mitue ku 30. Muyuki muimpe udi ukolesha au utu utamba kuleja mudi Bible mua kuambuluisha bena dibaka bua kuikala ne dinanga ne disanka bia kashidi mu dibaka diabu.—Efeso 5:33.
Mu matunga a bungi, mbulamatadi utu wanyishila bena mudimu ba Nzambi ba mu Bantemu ba Yehowa bua kufundisha mabaka ne kuajadika. Nanku lua ku ndekelu kua muyuki, bena dibaka badi benza mitshipu ya dibaka. Badi mua kuelangana kabidi mpeta. Pashishe muena mudimu wa Nzambi udi wamba ne: ndi mbabikila mpindieu ne: mbaselangane.
Mu matunga makuabu, mikenji idi ilomba bua bantu baselangane ku biro bia mbulamatadi. Bena dibaka badi benza nanku matuku makese kumpala kua muyuki wa dibaka. Bikalabu kabavua benze mitshipu ya dibaka ku biro bia mbulamatadi, badi mua kuyenza lua ku ndekelu kua muyuki wa dibaka. Bikalabu bakavua bayenze, badi mua kusungula bua kuyambulula bu mimana kuenza. Muyuki udi ujika ne disambila dia kulomba Nzambi bua abeneshe badi baselangane.
Bantemu ba Yehowa batu benza bibilu biabu bia dibaka muaba kayi?
Bantemu ba Yehowa ba bungi batu basungula bua kuenza tshibilu tshiabu tshia dibaka ku Nzubu wa Bukalenge pikalayiku.b Bena dibaka bobu balongolole difesto pashishe, badi basungula muaba mukuabu wa kudienza.
Mbanganyi badi mua kubuelamu?
Tshibilu tshia dibaka tshiotshi tshienzeke ku Nzubu wa Bukalenge, pa tshibidilu bantu bonso badi mua kubuelamu, mmumue ne: Bantemu ne badi kabayi Bantemu. Bena dibaka bobu balongolole difesto pashishe, badi basungula bantu badi mua kubuelamu.
Kudi mvuadilu udibu benzeja bantu bua kuvuala anyi?
Padi tshibilu tshia dibaka tshienzeka ku Nzubu wa Bukalenge, kakuena mvuadilu kampanda musunguluke udibu benzeja bantu bua kuvuala to. Nansha nanku, Bantemu ba Yehowa batu badienzeja bikole bua kutumikila mibelu ya mu Bible ya mua kuvuala ne bupuekele ne kanemu. Bena dibaka batu banyisha bikole padi bantu bonso badibu babikile mu tshibilu tshiabu tshia dibaka batumikila mibelu ayi. (1 Timote 2:9) Bidi kabidi nanku bua difesto dia dibaka, bikala bena dibaka balongolole difesto adi.
Batu bapesha bena dibaka tudo anyi?
Bible udi utukankamija bua tuikale tupeshangana bintu. (Misambu 37:21) Bantemu ba Yehowa batu banange kufila anyi kuangata tudo tua dituku dia difesto dia dibaka. (Luka 6:38) Kadi Bantemu ba Yehowa kabatu balomba tudo anyi batela patoke mêna a bantu badi babapeshatu to. (Matayi 6:3, 4; 2 Kolinto 9:7; 1 Petelo 3:8) Kuenza nanku kudi kubengangana ne tshidi Bible wamba ne nkufuane kutonda bantu badibu babikile mu tshibilu.
Batu bakumakaja vere kumpala kua kunua maluvu anyi?
Bible ki mmukandike dikumakaja vere anyi diyididisha kumpala kua kunua maluvu to; kadi bamue bena dibaka badi mua kulomba benyi babu bua kabakumakaji vere kumpala kua kunua maluvu bua kubenga kulenduisha bantu bakuabu.—Lomo 14:21.
Batu bela bena dibaka losa anyi bintu bikuabu pambidi anyi?
Tòo. Miaba mikuabu, bantu batu bela badi baselangane losa pambidi anyi bintu bikuabu bia buena ebi. Badi bela meji ne: nebitutshishe bena dibaka dikasa dimpe, nebibapeteshe disanka, ne nebibambuluishe bua kulala matuku a bungi. Kadi Bantemu ba Yehowa kabatu benza bilele bidi mu diumvuangana ne bitabataba to. Bantemu ba Yehowa kabatu bajingila bakuabu “dikasa dimpe,” to bualu kuenza nanku kudi kubengangana ne mêyi manene a mu Bible.—Yeshaya 65:11.
Nekuikale biakudia ne maluvu anyi?
Mu tshibilu tshia dibaka, kabatu bapesha bantu biakudia anyi maluvu ku Nzubu wa Bukalenge to. Panyima pa tshibilu tshia ku Nzubu wa Bukalenge, bamue bena dibaka batu basungula bua kuenza difesto mudibu mua kupesha bantu biakudia anyi maluvu. (Muambi 9:7) Bobu bangate dipangadika dia kufila maluvu makole, nebatabalele bua baafile bungi bukumbane ne nebaapeshe anu bantu bakadi bakumbane bua kuanua.—Luka 21:34; Lomo 13:1, 13.
Nekuikale mijiki anyi maja anyi?
Bena dibaka bobu balongolole difesto, badi mua kusungula bua kuikale mijiki ne maja. (Muambi 3:4) Badi basungula mijiki mimpe idibu basue ne idi ipetangana ne bilele bia kuabu. Mu tshibilu tshia dibaka tshitu tshienzeka ku Nzubu wa Bukalenge, batu batamba kuimba mijiki idi ne biena-bualu bia malu a mu Bible.
Bantemu ba Yehowa batu basekelela mufikilu wa dibaka anyi?
Mêyi manene a mu Bible kena akankamija bantu bua kusekelela mifikilu ya dibaka ne kena abakandika bua kuyisekelela to. Bantemu ba Yehowa badi mu dibaka ke badi bangata dipangadika dia kusekelela mufikilu wa dibaka diabu anyi kubenga kuwusekelela. Bobu bangate dipangadika dia kusekelela mufikilu wa dibaka diabu, badi mua kuwusekelela anu bobu nkayabu anyi ne balunda babu ne bena mu dîku diabu.
a Bilele, ngenzelu wa malu, ne mikenji bisunguluke bidi bitangila bibilu bia dibaka bidi mua kushilangana bilondeshile muaba.
b Kabatu bafuta muena mudimu wa Nzambi udi wenza muyuki wa tshibilu tshia dibaka to. Batu bapesha badi baselangana Nzubu wa Bukalenge tshianana.