Bua tshinyi Nzambi wakalekela bashipa bena Yuda miliyo ne miliyo? Kavua mupangishe bualu bua nanku bua tshinyi?

Bantu ba bungi batu badiela nkonko eyi batu bumvua bibi bia dikema bualu bavua bafuishe balunda ne balela babu ba pa muoyo. Batu anu bakeba mandamuna a nkonko eyi, kadi batu bakeba kabidi busambi. Bakuabu batu bamona dishipa dia bena Yuda bu bualu budi bubi bupite malu onso akadi muntu muenze, ne mbikole bua bobu kuitabuja Nzambi.

Malu atubu babuejakaja bua Nzambi ne dishipa dia bena Yuda

Bulelela bua bualu: Bantu bavua ne ditabuja dia bungi bakebeja Nzambi bua tshinyi uvua mulekele makenga. Tshilejilu, muprofete Habakuka wakebeja Nzambi ne: “Bua tshinyi udi ummueneshisha malu mabi? Ne bua tshinyi udi ulekela dikengeshangana? Bua tshinyi kabutu ne malu a tshikisu bidi kumpala kuanyi? Ne bua tshinyi matandu ne diluishangana bidi bivula?” (Habakuka 1:3) Pamutu pa Nzambi kutandisha Habakuka, mmufundishe nkonko ivuaye mumuele mu Bible bua bantu bonso bayibale.

Bulelela bua bualu: Nzambi mmukine malu mabi ne ntatu idiwu akebesha. (Nsumuinu 6:16-19) Mu tshikondo tshia Noa, “muoyo wende wakabungama” bualu malu a tshikisu avua mavule pa buloba. (Genese 6:5, 6) Kakuyi mpata, Nzambi udi kabidi umvua bibi menemene bua muvuabu bashipe bena Yuda miliyo ne miliyo.​—Malaki 3:6.

Bulelela bua bualu: Nzambi uvua mulekele bua babutule Yelushalema kudi bena Lomo mu bidimu lukama bia kumpala. (Matayi 23:37-24:2) Katshia anu pine apu, Nzambi katu usungula tshisamba kampanda bua kutshienzela bualu buimpe anyi kutshinyoka to. Ku mêsu kua Nzambi, “kakuena dishilangana pankatshi pa bena Yuda ne bantu ba bisamba bikuabu.”​—Lomo 10:12, Mukanda wa Mvidi Mukulu (Mishonyi).

Bulelela bua bualu: Nansha mutu Nzambi kayi ukebesha makenga, utu imue misangu ualekela bua tshitupa tshîpi.​—Yakobo 1:13; 5:11.

Bua tshinyi Nzambi wakalekela bashipa bena Yuda miliyo ne miliyo?

Nzambi wakalekela bashipa bena Yuda miliyo ne miliyo bua bualu bumue bumue budiye mulekele makenga too ne lelu eu: mbua kujikija bilumbu bivua bijuke kukadi bidimu bia bungi. Bible udi uleja patoke ne: bua mpindieu, Diabolo ngudi ulombola buloba ki nNzambi to. (Luka 4:1, 2, 6; Yone 12:31) Malu malelela abidi a mu Bible adi mua kumvuija bua tshinyi Nzambi uvua mulekele bua bashipe bena Yuda miliyo ne miliyo.

1. Nzambi wakafuka bantu ne budikadidi bua kusungula bua kuenza tshidi tshimpe ne tshidi tshibi. Nzambi uvua muambile bantu ba kumpala, Adama ne Eva tshivuaye musue bua benze, kadi kavua mubenzeje bua kumutumikilabu to. Bakapangadija bobu nkayabu bua kudisunguila tshidi tshimpe ne tshidi tshibi, dipangadika diabu dibi (ne mapangadika mabi adi bantu bangate mu kupita kua bidimu) akakebela bukua bantu buonso ntatu mibi mitambe. (Genese 2:17; 3:6; Lomo 5:12) Ke tshidi mukanda mukuabu ujadika mu mêyi aa: “Makenga a bungi adi pa buloba lelu eu mmakebesha kudi dikuata dietu dia mudimu bibi ne budikadidi bua kudisunguila tshidi tshimpe ne tshidi tshibi budi Nzambi mutupeshe.” (Statement of Principles of Conservative Judaism) Pamutu pa Nzambi kubanyenga budikadidi abu, mmupeshe bantu tshipolu tshia dîba bua batete kudienzela malu nkayabu.

2. Nzambi udi ne bukole bua kujikija kanyinganyinga konso kakebesha kudi dishipa dia bena Yuda, ne neakajikije. Nzambi mmulaye bua kubisha bantu miliyo ne miliyo ku lufu, too ne bena Yuda bavuabu bashipe abu. Neajikije kabidi kanyinganyinga kadi bantu bavua bapanduke ku bualu abu bumvua padibu babuvuluka. (Yeshaya 65:17; Bienzedi 24:15) Bua mushindu utu Nzambi munange bantu, neakumbaje milayi eyi.​—Yone 3:16.

Bantu ba bungi bavua bapanduke ku bualu abu bavua bakumbane bua kulama dijabuja diabu ne kumona ne: muoyo udi ne mushinga pakamanyabu tshidi tshisake Nzambi bua kulekela makenga ne tshienzaye bua kuajikija.