NKONKO IDI BANSONGA BADIELA
Ntshinyi tshingenza mulunda wanyi yeye munnyingalaje?
Tshia kumanya
Kakutu bulunda butu kabuyi ne ntatu to. Bu mutudi bantu bapange bupuangane, mulunda muimpe pamuapa nansha muntu uudi wangata bu mulunda webe wa pa muoyo udi mua kuenza bualu anyi kuamba dîyi didi dikutapa ku muoyo. Nansha wewe pebe udi mupange bupuangane. Mu kuamba kuimpe, kabitu bianji kukufikila pebe bua kutapangana ku muoyo anyi?—Yakobo 3:2.
Badi mua kututapa ku muoyo bipepele ku diambuluisha dia Enternete. Tshilejilu, nsonga wa tshitende mukuabu diende David udi wamba ne: “Paudi ubuela mu Enternete, umona foto ya mulunda webe mu difesto kampanda, udi mua kubanga kusamisha mutu udiebeja bua tshinyi kabavua bakubikile wewe. Udi mua kubungama, udimona muedibue mâyi ku makasa.”
Udi mua kumanya tshia kuenza bua kujikija bilumbu.
Tshiudi mua kuenza
Dikonkonona. Bible udi wamba ne: “Kuikadi ufiika munda lukasa, bualu difiika dia munda ntshimanyinu tshia mutshimbakane.”—Muambi 7:9, dimanyisha.
“Imue misangu tutu tulua kumona panyima pa matuku ne: bualu butuvua bafikile munda kabuvua nansha bua nsongo to.”—Alyssa.
Elabi meji: Utu ne tshiji tshia lukasa anyi? Kuena mua kulonga mua kutamba kulengulula bilema bia bakuabu anyi?—Muambi 7:21, 22.
Masanka adi muntu utu ubuikidilangana upeta. Bible udi wamba ne: “Mbulengele . . . bua kulengulula tshilema.”—Nsumuinu 19:11.
“Nansha kuoku kuikale bualu buudi mua kufikila munda, mbimpe anu ubuikidile udi mukuenzele bibi au; kushadi umubaluila bualu abu ukeba ne: ikale ukulomba luse dîba dionso diudi ubuvuluka to. Wewe mumane kufuila muntu luse, kuakudi kabidi bua bualu abu to.”—Mallory.
Elabi meji: Bualu abu budi ne mushinga menemene? Kuena mua kufuila muntu luse bua kukeba ditalala anyi?—Kolosayi 3:13.
Kukokangana dîba dionso ne mulunda wetu bua kalu konso, nkuenza anu bu kukangula tshiibi tshia nzubu ne kutshikanga dîba dionso tulekela mashika abuela kadi pabi bikengela ne: muikale luya.
Ela meji a mukuabu. Bible udi wamba ne: “Panudi kanuyi nutangila anu malu enu nkayenu, kadi nutangila kabidi malu a bakuabu.”—Filipoyi 2:4.
“Padi balunda banangangane ne banemekangana, nekuikale malu a bungi abasake bua kujikija bilumbu biabu ne lukasa bualu bulunda buabu nebuikale bukadi bushême. Mbenze malu a bungi bua kubushêmesha, nunku kabakujinga bua bufue to.”—Nicole.
Elabi meji: Kuena mua kukeba tshidi tshimpe mu bidi mukuebe wamba anyi?—Filipoyi 2:3.
Tshia kukuata: Wewe mumanye mua kudikanda padibu bakutape ku muoyo nebikuambuluishe pawalua muntu mukole. Kuenaku mua kutuadija kuenza nanku anu mpindieu anyi?