Yeshaya 41:10​—‘Kutshinyi, bualu bua ndi nebe’

“Kutshinyi to, bualu ndi nebe. Kupampakanyi to, bualu ndi Nzambi webe. Nenkukoleshe, eyowa, nenkuambuluishe, nenkukuate bushuwa ne tshianza tshianyi tshia balume tshia buakane.”​—Yeshaya 41:10, Nkudimuinu wa bulongolodi.

‘Kutshinyi, bualu bua ndi nebe; kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe; bulelela, nenkujadike ne tshianza tshianyi tshia balume tshia buakane buanyi.’​—Yeshaya 41:10, Mukanda wa Nzambi.

Diumvuija dia Yeshaya 41:10

Yehowaa Nzambi udi ujadikila batendeledi bende ba lalumatu ne: udi ubacmbuluisha, nansha bobu batuilangane ne nsombelu kayi.

“Ndi nebe.” Yehowa udi wambila batendeledi bende tshidibu kabayi ne bua kutshinyina. Bualu kabena nkayabu to. Bualu udi umona malu makole adibu batuilangana nawu ne udi uteleja masambila abu, nunku mbienze anu bu ne: udi anu ku luseke luabu aku.​—Misambu 34:15; 1 Petelo 3:12.

“Ndi Nzambi webe.” Yehowa udi utukijija batendeledi bende padiye ubavuluija ne: udi anu udimona bu Nzambi wabu, ne udi ubitaba bu batendeledi bende. Badi ne bua kuikala bashindike ne: kakuena bualu nansha bumue buapangisha Nzambi bua kubambuluisha to.​—Misambu 118:6; Lomo 8:32; Ebelu 13:6.

“Nenkukoleshe, eyowa, nenkuambuluishe, nenkukuate bushuwa ne tshianza tshianyi tshia balume tshia buakane.” Yehowa udi wambulula lungenyi lumue mu mishindu isatu bua kuleja patoke ne: neabambuluishe bushuwa. Mmukuate mudimu ne tshimfuanyi tshia tshianza bua kupatula lungenyi lua mudiye wenza malu padi bantu bende bakeba diambuluisha. Muntu yeye mudishinde panshi, Nzambi udi mua kumuoluela tshianza tshiende tshia balume bua kumujula.​—Yeshaya 41:13.

Mushindu munene udi Nzambi ukolesha batendeledi bende ne ubambuluisha nkupitshila ku Bible Dîyi diende. (Yoshua 1:8; Ebelu 4:12) Tshilejilu, Dîyi dia Nzambi didi difila mibelu mimpe ya meji kudi bantu badi ne ntatu, bu mudi bupele, masama, anyi difuisha. (Nsumuinu 2:6, 7) Nzambi udi kabidi mua kuenza malu ne nyuma wende muimpe, anyi bukole buenzeji bua kupesha batendeledi bende dikanda dikumbane dia ku mubidi ne dia mu lungenyi bua kutantamena ntatu.​—Yeshaya 40:29; Luka 11:13.

Malu adi Yeshaya 41:10 wakuila

Mêyi aa avua makoleshe bena Yuda bavua ne lulamatu bavua mu bupika mu Babilona. Yehowa ukavua mulaye ne: lua ku ndekelu kua bupika bua bena Yuda, bantu bavua ne bua kumvua lumu lua dilua dia muntu uvua ne bua kubutula Babilona ne bimenga bivua bimunyunguluke. (Yeshaya 41:2-4; 44:1-4) Pavua bena mu Babilona ne bisamba bivua bimunyunguluke mua kuzakala bua buôwa bua ngumu ayi, kabivua mua kutonda bena Yuda to, bualu Yehowa uvua ne bua kubakuba. Misangu isatu mijima uvua anu ubakolesha ne mêyi a ne: “kutshinyi to.”​—Yeshaya 41:5, 6, 10, 13, 14.

Nansha muvua mêyi adi mu Yeshaya 41:10 atangila tshia kumpala bena Yuda bavua mu bupika mu Babilona, Yehowa wakenza bua mêyi au ikale mu Bible bua kukolesha batendeledi bende bonso. (Yeshaya 41:10; 40:8; Lomo 15:4) Udi ubambuluisha lelu eu anu muvuaye muambuluishe bantu bende kale.