1 Kolinto 10:13​—“Nzambi ngua lulamatu”

“Kakuena diteta didi dinukuate ditu kadiyi dikuata bantu bonso. Kadi Nzambi ngua lulamatu, ne kakulekela bua nutetshibue ne diteta dinudi kanuyi mua kutantamena, kadi mu diteta adi yeye nealongolole kabidi njila wa kupatukila, bua numone mua kunanukila mu diteta adi.”​—1 Kolinto 10:13, Nkudimuinu wa bulongolodi bupiabupia.

“Kakuena diteta diakunukuata didi kadî dikuata muntu yonso; kadi Nzambi udi mua kueyemenyibua, ngudi kai witabusha bua nuenu nutetshibue ne diteta didi dinuhita bukole; kadi halua diteta, yeye neanuenzele nshila wa kuhandukila, bua nuenu numanye mua kutantamana mu diteta.”​—1 Kolinto 10:13, Mukanda wa Nzambi.

Diumvuija dia 1 Kolinto 10:13

Mvese eu udi wakula bua ngikadilu mulenga wa Nzambi, mmumue ne: lulamatu luende. Batendeledi ba Nzambi ba lulamatu mbatuishibue ne: neabambuluishe, nangananga padibu mu ntatu anyi mateta.

“Kakuena diteta didi dinukuate ditu kadiyi dikuata bantu bonso.” Batendeledi ba Nzambi badi mua kutetshibua bua kuenza bualu budiye mukine. Mateta a nanku, nansha mudiwu makole ki nga pa buawu to bualu adi akuata bantu bonso.a Ke bualu kayi batendeledi ba Nzambi mbatuishibue ne: bobu pabu badi mua kutantamena mateta a mushindu au.

“Nzambi ngua lulamatu.” Yehowab Nzambi ngua kueyemena. Utu anu ukumbaja mulayi wende wa ne: kakulekela bantu badi bamunange, bamulamate ne bamutumikila to. (Dutelonome 7:9; Misambu 9:10; 37:28) Nanku bantu badi bamutendelela mbatuishibue ne: neakumbaje kabidi milayi mikuabu mimpe ibidi idi ilonda mu mvese au.

“Kakulekela bua nutetshibue ne diteta dinudi kanuyi mua kutantamena.” Nzambi udi udileja muena lulamatu padiye kayi wanyisha bua ntatu itukolele menemene, tupanga mua kuyitantamena to. Mmumanye mikalu ya batendeledi bende bonso.​—Misambu 94:14.

“Mu diteta adi yeye nealongolole kabidi njila wa kupatukila, bua numone mua kunanukila mu diteta adi.” Nzambi udi mua kujikijila batendeledi bende lutatu kampanda anyi kubapesha tshidibu bakengela bua kulunanukila. Tshilejilu, udi mua kubalombola ku diambuluisha dia nyuma muimpe, kubasamba ku diambuluisha dia Bible, anyi kubambuluisha ku butuangaji bua bena Kristo nabu.​—Yone 14:26; 2 Kolinto 1:3, 4; Kolosayi 4:11.

Malu adi 1 Kolinto 10:13 wakuila

Mvese eu udi mu mukanda uvua mupostolo Paulo mufundile bena Kristo ba mu Kolinto. Wakabalongesha tshivuabu kabayi ne bua kuenza ku diambuluisha dia bualu bua bena Isalele wa kale. (1 Kolinto 10:11) Watela mateta a bungi avua bena Isalele bapete, bu mudi ditendelela dia mpingu ne dienda dia masandi. (1 Kolinto 10:6-10) Bamue ba kudibu kabakakandamena mateta au to. Nunku wakavuluija bena Kolinto bua kubenga kudieyemena, bela meji ne: bobu kabena mua kutetshibua to. (1 Kolinto 10:12) Kadi wakabakankamija ne mêyi adi mu 1 Kolinto 10:13. Batendeledi ba Nzambi ba lulamatu badi mua kutantamena lutatu kayi luonso.

Tangila kafilme aka bua kumona kadiosha ka mukanda wa Kolinto.