Bintu bia mushinga bidi bileja malu a dîku dia Kusserow

Tshikondo tshivua mbulamatadi wa bena Nazi ukokesha mu Allemagne, bakakengesha bena mu dîku dia muanetu Kusserow 13 bikole menemene bualu bavua Bantemu ba Yehowa ne bavua babenge bua kubuela mu busalayi. Umue wa mu dîku dia muanetu au wakasangisha bimpe bimpe bintu bivua bileja malu avuabu batuilangane nawu. Uvua musangishe bintu bipite pa 1 000. Mu bintu abi muvua foto, bimfuanyi bizola, mikanda ivua bamue ba kudibu bafunde bua kulaya nayi bantu kumpala kua kubashipabu, mikanda ya bibawu bia lufu, ne mikanda ivua ne malu masokoka a bena Gestapo (basalayi ba bena Allemagne batu benza mudimu mu bilamba bia patupu). Kudi tshilumbu ku tubadi patudi tuakula apa tshia muaba udibu mua kulamina bintu bionso bivuabu basangishe abi.

Bua mpindieu bintu bia mushinga bivuabu basangishe ebi bidi mu nzubu wa dilamina bintu bia kale wa Bundeswehr wa tshiluilu tshia mu Allemagne, mu tshimenga tshia Dresde. Kadi kasumbu ka malu a mikenji ka Bantemu ba Yehowa ka mu Allemagne (Jehovas Zeugen in Deutschland) ke kadi menemene ne bukenji bua kulama bintu abi. Anu muvuabu bamanyishe mu tshibejibeji kampanda (The New York Times), Paul-Gerhard, muana wa balume wa mukala wa muanetu Kusserow uvua muambe ne: “Bavua bashipe batutuanyi babidi bualu bavua babenge bua kuenza mudimu wa busalayi. Nunku buanyi meme, kabiena bikengela bintu bidi bileja malu adi mafikile dîku dietu bikale mu nzubu wa dilamina bintu bia kale wa basalayi to.”

Anu mukavuabu batumanyishe mu jw.org, Bantemu ba Yehowa mbenze muabu muonso bua kupetangana ne bena mu nzubu wa dilamina bintu bia kale au mu ditalala. Kadi bobu kabayi bapetangane, kabadi ka malu a mikenji ka mu Karlsruhe nekamanyishe dipangadika didiku kangate bua bualu ebu mu dia 26/6/2026.

Bua kumanya malu makuabu a muvua bena mu dîku dia muanetu Kusserow bashale anu ne lulamatu kudi Yehowa nansha pavuabu babakengesha kudi mbulamatadi wa bena Nazi, tangila filme wa Les triangles violets.