“Bukalenge buanyi ki mbua pa buloba ebu to”

Bukalenge buvua Yezu wakuila nebuenze bualu budi mbulamatadi ya bantu kayiyi mua kuenza ebu: nebutujikijile ntatu yonso itudi nayi lelu eu bua kashidi. Mmunyi mudi malu avua Yezu muambe ne muenze ajadika bualu ebu?

Tshivua Yezu muambe

• “Bukalenge buanyi ki mbua pa buloba ebu to.” (Yone 18:36) Yezu uvua muleje patoke ne: bukokeshi buvuaye nabu bua kukokesha kabuvua bufumina kudi bantu anyi ku ngenyi ya bena malu a tshididi to, kadi buvua bufumina kudi Nzambi.

• “Tatu wetu udi mu diulu, . . . Bukalenge buebe bulue. Disua diebe dienzeke kabidi pa buloba muomumue ne mu diulu.” (Matayi 6:9, 10) Mu disambila diende lumu ditubu babikila ne: Disambila dia Tatu wetu, Yezu wakalongesha bayidi bende bua kushala batekemene ne: anu Bukalenge bua Nzambi ke buajikija ntatu pamutu pa kueyemena mbulamatadi ya bana ba bantu. Ndekelu wa bionso, Bukalenge ebu nebupingane pa muaba wa mbulamatadi ayi ne nebupeteshe bantu ditalala dia kashidi pa buloba.—Danyele 2:44.

Bua kumanya malu makuabu adi atangila Bukalenge abu ne tshialuabu kuenza, tangila kafilme ka Bukalenge bua Nzambi ntshinyi?

Tshivua Yezu muenze

• “Bu muvua Yezu mumanye ne: bavua bakeba kulua kumukuata bua kumuteka mukalenge, wakumbuka kabidi kuyaye ku mukuna anu yeye nkayende.” (Yone 6:15) Yezu wakabenga bua kuitaba bukokeshi buvuabu bamupeshe mu malu a tshididi, kubengaye ne muoyo mujima bua kubuelakana mu malu au. Pavua bantu bakeba kumuteka Mukalenge, wakabenga wosha ne munu muiku.

Tshilejilu tshia Yezu tshidi tshiambuluisha bena Kristo bua kumona malu a tshididi mushindu kayi? Bua kumanya malu makuabu, bala tshiena-bualu tshia “Mbimpe bitendelelu kubuelakanabi mu malu a tshididi anyi?”