6 LEBEKA
Wakaya kuvuaye kayi mumanye to
LEBEKA wakaya ku tshina tshia mâyi muambule mulondo wa mâyi. Dîba dikavua dibuela, tshikondo tshivuabu basuna mâyi a kulama butuku. Uvua usuna mâyi dituku dionso. Kadi dituku adi, wakamona tshisumbu tshia benyi ne tumelu tuabu pabuipi ne tshina tshia mâyi. Nansha nanku wakaya ku tshina atshi, kuwujaye mulondo wende ne mâyi.
Pakawambulaye mutangile kumbelu, mukulakaje mukuabu wa mu tshisumbu tshia benyi atshi wakaya lubilu kudiye kumuambilaye ne: “Mpesha koku tumâyi tua kunua mu mulondo webe amu.” Lebeka wakambuluisha benyi abu ne muoyo mujima, kayi welakana to. Kuambaye ne: “Nuaku, mukalenge wanyi.” Wakapuekesha mulondo wende wa mâyi, kumupeshaye mâyi, yeye kuanua too ne pakajika nyota yende.
Lebeka wakadifila kabidi bua kusunyina tumelu dikumi tuvua tuambule benyi abu mâyi. Tatu au kushalaye musombe wenda ukatshila, utangila nsongakaji muimpe kumona au muvuaye uya lubilu usuna mâyi ne uwuja tshinuinu tshia nyama misangu ne misangu too ne pakajikija nyama minene ayi nyota yayi. Pashishe kumuebejaye ne: “Udi muana wa nganyi? Mu nzubu mua tatuebe mudiku muaba utudi mua kulala butuku ebu anyi?” Lebeka wakaya nabu kuabu kayi welakana to, bobu kulalaku butuku abu. Wakelela kabidi nyama yabu biakudia.
Lebeka kavua mumanye ne: Yehowa ke uvua muenze bua atuilangane ne muntu au to. Mukulakaje au, uvua pamuapa Eliyezê, uvua muntu wa kueyemena wa ku babende. Kukavua matuku a bungi avua mfumuende Abalahama mumulombe bua enze luendu lua mbingu ya bungi bua aye kuselela muanende Izaka mukaji. Izaka uvua mupianyi wa bintu biende. Abalahama uvua mumulombe bua mukaji uvuaye ne bua kusungula ikale wa mu dîku dia batendeledi ba Yehowa. Eliyezê ukavua mulombe Yehowa bua amuambuluishe. Uvua musambile bua mukaji uvua Nzambi usunguila Izaka abakidile bimpe. Lebeka uvua ufuma ku dibakidila bimpe!
Kabivua bipepele bua Lebeka kuambuluisha bantu bavuaye kayi mumanye abu to. Mbushuwa ne: tshikondo atshi kuakidila benyi kakuvua ne njiwu to. Kadi lelu, bantu ba bungi ‘mbena luonji, kabayi banange malu mimpe’ to. (2 Tim. 3:1, 3) Nansha nanku, Lebeka uvua tshilejilu tshimpe tshia diakidila benyi kudi bantu ba tshikondo atshi bua mutshivuaye nsonga. Bivua bimulombe dikima dia bungi bua kuakidila benyi abu. Kadi wakalua kabidi kuenza malu ne dikima mu nsombelu mikuabu.
Pakatula benyi abu kuabu, wakamanya tshivuabu benzele luendu lule alu. Betuele tatuende wa Lebeka ne Labana tutuende wa Lebeka bakabikila Eliyezê bua kuela nende tshianza mukana. Kadi wakanji kubalomba bua abambile kendela kende. Kubalejaye muvua Yehowa muenze bua apetangane ne Lebeka. Betuele ne Labana bakamona muvua Yehowa mumuambuluishe, kuambabu ne: “Ebu bualu mbua kudi Yehowa.”
Pakamanya Lebeka ne: Nzambi uvua musue bua aye kule ne dîku diabu ne bamusele kudi muntu uvuaye kayi mumanye, wakenza tshinyi?
Ntshinyi tshiakenza Lebeka? Abalahama ukavua muleje ne: mukaji uvua Eliyezê ne bua kupeta uvua mua kubenga bua kupingana nende mu Kanâna. Nanku bidi bimueneka ne: uvua mua kuitaba bua kuya anyi kubenga kuya. Pakatshiabu, Eliyezê wakalomba bua aye musangu umue ne Lebeka. Bena mu dîku dia Lebeka bakamuebeja ni uvua musue kuya nabu. Yeye kubambila ne: “Ndi musue kuya.” Wakitaba bua kushiyangana nabu ne kuya kule menemene nansha muvuaye kayi mumanye ni uvua mua kumonangana kabidi nabu. Tshivua tshimupeteshe dikima ntshinyi? Bidi bimueneka ne: yeye pende uvua mujingulule ne: ke tshivua Yehowa musue bua enze.
Bamane kuenda pa tumelu mbingu ya bungi, bakafika mu tshitudilu tshia Abalahama mu Kanâna. Pakavua kuîsu kufiika, Lebeka wakamona muntu wendakana mu mpata; uvua muyamu bua kuelangana meji. Uvua Izaka. Uvua ne bidimu 40 ne uvua uditeka pa muaba wa bakuabu. Utshivua mu tshinyongopelu tshia mamuende Sala ukavua ne bidimu bisatu ku buloba. Pakambilabu Lebeka ne: muntu au uvua Izaka, wakadijika tshilamba kuîsu bua kuleja muvuaye mumuitabe bu bayende. Lebeka uvuaku mua kunanga Izaka muvua Nzambi musue ne kuikala ne dikima dia kumuambuluisha bua akumbaje mudimu wende wa mfumu wa dîku anyi? Bible udi uleja ne: ke tshiakenzaye. Katshia ku ntuadijilu kua dibaka diabu, Izaka uvua umumona bu dipa dia kudi Yehowa. Tshidi Bible wamba etshi tshidi tshijadika bualu abu: “Yeye kumunanga bikole, nunku Izaka wakasambibua panyima pa lufu lua mamuende.”
Bala bualu ebu mu:
Lukonko lua kuelela meji:
Mmushindu kayi uvua Lebeka muenze malu ne dikima?
Buela mu buondoke
1. Mmunyi muakumvua Eliyezê pakapeta Abalahama bana? Ntshinyi tshidi tshileja ne: kavua mumvue mukawu to? (Gen. 15:2-4; 24:12; w97 1/1 30 §2)
2. Bua tshinyi Abalahama uvua musue bua mukaji wa Izaka aye kusombela mu Kanâna pamutu pa Izaka kuya kusombela mu musoko wa ba Lebeka? (w97 1/1 30 §3)
3. Bua tshinyi bavua bapeshe Lebeka ne bena mu dîku diabu bintu? (it “Lebeka” §4-wcgr)
4. Lebeka uvua muenze luendu lua mushindu kayi pavuaye mumbuke mu Halana muye mu Negebe mu musoko wa ba Izaka? (wp16.3 15 §1) A
www.LifeintheHolyLand.com
Tshimfuanyi tshia A: Kuvua tshikondo tshivua bantu ba bungi basombele mu tshipela tshia Negebe. Muvua kabidi mashinde avuabu badishila nyama ya bungi ya Abalahama
Keba malongesha
Tshivua Abalahama, Lebeka, ne Izaka benze bua kusungula wa kubuela nende mu dibaka tshidi tshitulongesha tshinyi? (Gen. 24:2, 3; 27:46–28:1)
Lebeka uvua mukaji wa kanemu, muenji wa mudimu, ne muakididi wa benyi. Mmunyi mudi bana betu ba bakaji mua kumuidikija? B
Tshimfuanyi tshia B
Mmunyi muudi mua kuenza malu ne dikima bu Lebeka?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Lebeka pabishibuaye ku lufu?
Bia kutangila kabidi
Mona muvua Lebeka mutungunuke ne kuenza malu ne dikima pavuabu bamusele ne pakavuaye mulele bana.
“Lebeka: mukaji muenji wa mudimu uvua utshina Nzambi” (w04 15/4 8-11)
Tshilejilu tshia Lebeka tshidi tshilongesha bana tshinyi?
“Ngikadilu milenga ya Lebeka” (Tangila tshiena-bualu tshia ku Enternete tshia “Bimfuanyi ne midimu”-wcgr)