Wakenza bualu abu nansha muvuabi bikole

ABALAHAMA uvua wenda uya bitekete bitekete mutangile kuvua Yehowa mumuambile bua kuya. Luendu alu luvua lua matuku makese, kadi luvua luendu lukole luvuaye katshia kayi muanji kuenza to.

Mu mutu muende muvua anu bualu buvua Yehowa mumuambile bua kuenza ebu: “Angata koku muanebe, muanebe umuepele uudi munange bikole, Izaka, uye ku buloba bua Moliya, umulambule kuinaku bu mulambu wa kuosha, pa mukuna ungakuleja.” Yehowa uvua mumanye ne: Abalahama uvua munange Izaka bikole. Kadi bua tshinyi wakamulomba bua amulambulaye? Nkuepi kuvua Abalahama mua kupetela dikima ne ditabuja bua kumutumikila?

Bible udi ubikila Abalahama ne: “Tatu wa bantu bonso badi ne ditabuja.” (Lomo 4:11) Abalahama ukavua muleje ditabuja dikole kumpala mene kua bualu ebu, ne Yehowa ukavua mumuambuluishe bua kudikolesha. Bidimu bia bungi kumpala, Nzambi ukavua muambile Abalahama ne: uvua ne bua kubutula bantu babi ba mu tshimenga tshia Sodoma ne Amola. Pamuapa bu muvua Lota mu Sodoma, Abalahama wakapampakana. Ke yeye kuebeja Yehowa ni uvua bushuwa mua kubutula bantu bakane pamue ne bantu babi. Yehowa wakamulongesha ne lutulu luonso ne: yeye musangane bantu bakane nansha bakese mu bimenga abi kavua ne bua kubibutula to. (Gen. 18:16-33) Abalahama wakashala anu muvuluke dilongesha edi: Yehowa mmuakane ne mmuena luse.

Pakapita tshikondo, Yehowa wakenzela Abalahama ne Sala bualu bua dikema: wakenza bua balele muana wa balume, Izaka, nansha mukavua Sala ne bidimu 90, Abalahama ne bidimu 100! Abalahama wakalonga kabidi ne: kakuena bualu budi Yehowa kayi mua kukumbaja to; udi ne bukole bua kupeshilula too ne tshintu tshikavua tshifue muoyo. (Lomo 4:18, 19) Dilongesha adi padi, kakadipua muoyo to.

Mpindieu panyima pa bidimu bu 25, Abalahama uvua mua kuikala uvuluka malongesha au pavuaye mu njila mutangile ku Moliya. Uvua pamuapa mudiambile ne: nansha Izaka mufue, Yehowa uvua ne bukole ne dijinga dia kumupeshilula muoyo! (Eb. 11:19) Ditekemena adi diakamupetesha dikima dia kutungunuka ne luendu luende.

Pakavua Abalahama pabuipi ne muaba uvua Yehowa mumuambile bua kuya, muwumuenene pa bule, wakambila bena mudimu bende bua bamuindile pavuaye yeye ne Izaka babanda ku mukuna bua kuya kufila mulambu. Mushindu uvuaye muakule uvua uleja muvuaye mutuishibue ne: bubidi buabu bavua ne bua kupingana. Pakafikabu pa mukuna, dîba diakakumbana bua kuenzaye tshivua Yehowa mumulombe. Nansha mutshivua Izaka nsonga ne makanda a bungi, wakalekela tatuende ukavua mukulakaje umusuika maboko ne mikolo ne umuteka pa tshioshelu. Abalahama ukavua pa kuenza tshidi tatu yonso muimpe kayi mua kuenza to. Pakelaye kele kavuaye naku mu tshianza muulu, wakumvua dîyi dia muanjelu dimuambila ne: “Kuenzedi nsongalume bibi” to.

Nanku Nzambi wakela Abalahama kalumbandi bua ditabuja diende ne bua muvuaye mumutumikile. Wakamuambuluila bualu buvuaye mumulaye bua kuvudija ndelanganyi yende ne kuenza bua “bisamba bionso bia pa buloba” bibeneshibue bua muvuaye muleje ditabuja dikole.

Yehowa udi wenda wenza bua bualu buvuaye mulaye Abalahama abu bukumbane. Pakumbanabu, nebutuadile bantu mabenesha a kashidi. Muyuki wa bualu bua Abalahama eu udi uleja kabidi tshivua Yehowa ne bua kuenza bua kusungila bantu ba lulamatu bonso. Anu muvua Abalahama mudiakaje bua kulambula muanende uvuaye munange bikole, Yehowa uvua mudiakaje pende bua kufila Muanende mulela umuepele, Yezu Kristo, bua muntu yonso apete nsombelu muimpe matuku atshilualua. (Yone 3:16) Nanku, patudi tuela meji a muvua Abalahama mudiakaje bua kulambula muanende ne tuela meji a tshikavuaye pa kudipangisha, tudi tumona mudi Yehowa mutunange bikole menemene.

Tuetu tuela meji a malu a Yehowa atudi balonge ne akadiye mutuenzele, ditabuja dietu nedikole anu bu dia Abalahama. Ditabuja dietu diodi dikole, netupete dikima dia bungi. Lelu, Nzambi kakutulomba bua tumulambule bana betu bu muvuaye mulombe Abalahama to, kadi utshidi utulomba bua tumutumikile. Nansha yeye mutulombe tshinyi, tuikalayi batuishibue ne: tuetu bamueyemene ne bamutumikile ne dikima, neatubeneshe mu mushindu utudi katuyi belele meji to!

Bala bualu ebu mu:

• Genese 22:1-19

• Ebelu 11:11, 12, 17-19

Lukonko lua kuelela meji:

Anu mutudi balonge mu nshapita eu, mmushindu kayi uvua Abalahama muenze malu ne dikima?

Buela mu buondoke

1. 1. Ntshinyi tshidi tshileja ne: Abalahama uvua muntu mulelela? (g 5/12 18, kazubu; it “Abalahama” §22-23-wcgr) A

   Andamuna

   

Keba malongesha

• Mmunyi muvua ditekemena dipeteshe Abalahama dikima? Mmunyi mudi kutuishila mêsu pa malu atudi batekemene mua kutupetesha dikima? C

  Andamuna

  

• Mmunyi mutudi petu mua kuenza malu ne dikima bu Abalahama ne kufila mulambu . . .

  • patudi tupeta mpunga wa kuyisha? (Eb. 13:15)

    Andamuna

  • patudi ne bua kuangata mapangadika adi atangila bintu bia ku mubidi? (Nsu. 3:9)

    Andamuna

  • patudi tumanya ne: bena Kristo netu badi dijinga ne diambuluisha? (Filip. 4:18)

    Andamuna

• Mmu mushindu kayi mukuabu muudi pebe mua kuenza malu ne dikima bu Abalahama?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Abalahama anyi Izaka pabishibuabu ku lufu?

  Andamuna

Bia kutangila kabidi

Mona muvua malu adi malonda mu muyuki eu menzeke.

Nuidikije ditabuja diabu​—Abalahama, Tshitupa 2 (11:10)

Ntshinyi tshiakavuija Abalahama mulunda wa Yehowa? Ntshinyi tshiudi mua kuenza bua kukolesha bulunda buebe ne Yehowa?

“Yehowa wakamubikila ne: ‘Mulunda wanyi’” (w16.02 3-8)