Wakenza malu ne dikima bua kushala ne lulamatu

BANTU balume babidi baluate bia mvita bakabanda kakuna kakole ka mabue mu lubilu. Bavua baya kuela tshisumbu tshinene tshia basalayi bena Peleshete mvita. Yonatana, muana wa Shaula mukalenge wa kumpala wa Isalele, ke uvua kumpala kua mulongo. Bavua bamulonda kudi nsongalume uvua mumuambuile bia mvita. Yonatana uvua mumukankamije ne: “Kakuena tshintu tshidi mua kupangisha Yehowa bua kupandisha bantu nansha ne bantu ba bungi anyi ne bakese” to. Panyima pa katantshi kakese, Yehowa wakaleja muvua mêyi a Yonatana au malelela pakabambuluishaye bua bashipe basalayi ba bena Peleshete batue ku 20. Pashishe kuambuluishaye Isalele mujima bua kutshimuna bena Peleshete mu mushindu wa dikema.

Bualu abu budi bujadika muvua Yonatana ne dikima dia bungi. Kadi wakenza kabidi malu ne dikima misangu mikuabu mu nsombelu wende. Uvua ne lulamatu kudi bakuabu, bualu abu buvua bulomba dikima. Yonatana uvua ne lulamatu kudi tatuende Shaula. Kadi Shaula wakalua muntu mubi, katshiyi kabidi utumikila Yehowa to. Yonatana wakenza malu ne dikima, kulamataye Yehowa bikole kupita muvuaye mulamate tatuende.

Panyima pa bidimu bia bungi, pakavua Yonatana pamuapa ne bidimu bipatshila ku 50, wakadia bulunda ne Davidi uvua muana kudiye ku bidimu 30. Davidi utshivua muana eu, utshivua ushipelaku Goleyata tshilobo tshia bena Peleshete. Pamuapa Shaula ne bena Isalele bonso bakakema bua bualu abu, kumutumbishabu bua tshivuaye muenze atshi. Yonatana wakumvuila Davidi mukawu anyi? Tòo. Wakapesha Davidi bia mvita biende, kumupesha ne buta buende bua mikete. Divua dipa dia dikema bualu bidi bimueneka ne: Yonatana uvua mukupi wa mikete wa kalanda musenga. Nansha muvua Yonatana mukulumpe kudi Davidi, bakadia tshipungidi bua kushala balunda bua kashidi; bubidi buabu kushalabu batshinemeka.

Shaula uvua pende muanji kunanga Davidi. Kadi katupa kakese pashishe wakamumvuila mukawu, kumukinaye. Uvua musue bua Yonatana alonde dikasa diende. Kadi Yonatana wakashala mulunda wa Davidi wa lulamatu, nansha mukavua Yehowa musungule Davidi bua alue mukalenge muibidi wa Isalele pa muaba wende. Pavua Shaula musue kushipa Davidi, Yonatana wakamuakuila. Bivua bimulombe dikima dia bungi bua kumuakuila. Shaula utshivua muluanganyi wa mvita wa makanda nansha mukavuaye mukulakaje. Dimue dituku, pavua Yonatana muakuile kabidi mulunda wende Davidi, Shaula wakamukupa difuma; kukupaye muanende difuma! Difuma adi diakapangila Yonatana, kadi Yonatana wakabungama bikole bua muvua tatuende musue kumushipa. Wakaya kuambila Davidi ne: Shaula uvua mudisuike bua kumushipa. Kulejabi muvuaye mulunda wa lulamatu wa Davidi. Yonatana wakalomba kabidi Davidi bua ashale kutabalela dîku diende bu bobu mua kumushipa.

Bu muvua Shaula ukeba kushipa Davidi, Davidi wakatuadija kunyemakana. Shaula ne tshiluilu tshiende bakatungunuka ne kulondakaja Davidi, kumufikishabi bua ikale uya ubuela miaba ya kusokomena. Yonatana wakadisangisha nabu anyi? Bible kena wamba nanku to, ne bidi mene bimueneka ne: kakadisangisha nabu to. Umue musangu, Yonatana wakapeta lumu lua muaba uvua mulunda wende Davidi musokome, kuyaye bua kumonangana nende. Bible udi wamba ne: Yonatana wakaya kudiye bua “kumuambuluisha bua kupeta bukole mu Yehowa.” Wakambila Davidi ne: “Kutshinyi to, bualu tatuanyi Shaula kakukupeta to; newikale mukalenge wa Isalele, ne meme nengikale mukulondele.” Pashishe bobu kushiyangana; tshivua musangu wa ndekelu wakamonanganabu.

Panyima pa matuku makese, Yonatana uvua ku luseke lua tatuende baluangana ne baluishi babu balelela bena Peleshete, kulejabi muvuaye ne lulamatu kudi Yehowa. Kadi bu mukavua Shaula mulue mutontolodi, wakaya kukeba diambuluisha kudi muntu mukaji mukuabu muena mbuku. Yehowa katshivua kabidi nende to. Mu mvita ayi, bakatapa mukalenge Shaula bibi menemene, pashishe yeye nkayende kudishipa. Bakashipa bana bende basatu mu mvita dituku adi, Yonatana uvua mu bavuabu bashipe abu.

Davidi wakanyingalala bikole. Wakenza kasala bua kudila mulunda wende wa pa muoyo au ne kuleja muvuaye mumunange. Wakakabikila ne: “Buta,” pamuapa bualu uvua uvuluka buta buvua Yonatana mumupeshe bidimu bia bungi kumpala. Wakafunda ne: “Ndi ne kanyinganyinga kakole buebe wewe muanetu Yonatana; uvua ne mushinga wa bungi ku mêsu kuanyi.” Wakashala mulame tshipungidi tshivuabu badie ne Yonatana. Pakaluaye mukalenge, wakakeba bua kumanya ni kutshivua muena mu dîku dia Yonatana ne muoyo, kupetaye muanende uvua ne bulema. Muana au uvua Mefibosheta. Wakamuangata, kumutekaye pabuipi nende mu Yelushalema, kutuadijaye kumutabalela.

Bala bualu ebu mu:

• 1 Samuele 13:2, 19-23; 14:1-15; 16:21; 18:1-9; 19:4-6; 20:1-42; 23:16-18; 28:6-8; 31:1-6

• 2 Samuele 1:17-27; 9:1-7

Lukonko lua kuelela meji:

Mmushindu kayi uvua Yonatana muenze malu ne dikima?

Buela mu buondoke

1. 1. Bena Peleshete bavua banganyi? (w95 1/2 31)

   Andamuna

2. 2. Mmunyi mudi muaku “pima” ujadika mudi bualu ebu bulelela? (w05 15/3 29) A

   Andamuna

   

Todd Bolen/BiblePlaces.com

1. 4. Ntshinyi tshivua Davidi muenze bua kulama mutshipu uvuabu benze ne Yonatana wa kutabalela bena mu dîku dia Yonatana? (w02 15/2 14 § 9-10)

   Andamuna

Keba malongesha

• Yonatana wakalamata Yehowa bikole kupita muvuaye mulamate Shaula. Ndîba kayi didibi mua kutulomba bua kuleja mutudi balamate Yehowa bikole kupita bantu bakuabu? C

  Andamuna

  

• Ntshinyi tshidi bualu bua Davidi ne Yonatana butulongesha bua . . .

  • bulunda?

    Andamuna

  • didipuekesha?

    Andamuna

  • lulamatu?

    Andamuna

• Mmu mushindu kayi mukuabu muudi pebe mua kuenza malu ne dikima bu Yonatana?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Yonatana pabishibuaye ku lufu?

  Andamuna

Bia kutangila kabidi

Ntshinyi tshivua tshienze bua Yonatana ne Davidi badie bulunda bukole? Mmunyi mutudi petu mua kudia bulunda bukole nanku lelu?

“Tungunukayi ne kunangangana bikole” (w21.01 20-25)

Ambuluisha bana bebe bua bamanye malu avua matulukile Yonatana ne malongesha adibu mua kupeta.

“Yonatana” (Fishi ya bantu ba mu Bible ya mu jw.org-wcgr)