37 DANYELE
‘Kakadinyanga to’
DANYELE uvua musombele kule menemene ne tshimenga tshiabu tshia Yuda. Bena Babilona bavua bakuate bena mu dîku diabu ne bena mu mêku makuabu a bungi baye nabu ku Babilona. Bakenza ngondo bu inayi bua kufikaku. Pashishe basalayi ba mukalenge Nebukadenesâ bakasungula Danyele ne bansongalume bakuabu bua baye kusombela mu dibalasa diende. Bavua bumbuke bua kashidi mu mêku abu. Danyele uvua mulunda wa bansonga basatu aba: Hananiya, Mishaele, ne Azaya. Bavua pabu bena Isalele. Bakatuadija kubalongesha bua balue bu bena Babilona.
Pavua Danyele kule ne bena mu dîku diabu ne tshimenga tshiabu, wakatuilangana ne nsombelu ivua miambe kutekesha lulamatu luende kudi Yehowa
Pakafikabu mu dibalasa adi, mukalenge Nebukadenesâ wakateka Ashepanaza uvua mfumu wa bena mudimu ba mu lubanza luende bua ikale utangila bansonga abu, kumuambilaye bua abashintulule mêna. Mêna a bungi a mu tshiena-Ebelu avua atumbisha Nzambi mulelela. Tshilejilu, dîna “Danyele” didi diumvuija ne: “Nzambi mmulumbuluishi wanyi.” Kadi mêna a bungi a bena Babilona avua atumbisha nzambi yabu ya dishima. Wakinyika Danyele ne: Beleteshasâ. Dîna divua diumvuija ne: “Kuba muoyo wa mukalenge.” Tshivua disambila divuabu benzela nzambi wa dishima Bele. Mukalenge uvua ujinga kabidi bua bansongalume abu batuadije kuela meji ne kuenza malu anu bu bena Babilona. Nanku, wakatumina bena mudimu bende dîyi bua babalongeshe mua kuakula tshiena Kasada ne mua kutshifunda bua bikale bakumbane bua kuenza mudimu mu dibalasa diende. Ashepanaza uvua kabidi utangila mudimu wa dibalongesha. Ntshinyi tshikuabu tshivua Nebukadenesâ ukeba bua Danyele ne bena diende benze?
Wakatuma dîyi bua bikale badia biakudia biende bitambe buimpe ne banua mvinyo wende mushême. Pamuapa bamue bansonga bavua banange mushindu uvuabu ne bua kubadiisha au. Kadi Danyele uvua mumone ne: yeye ne balunda bende basatu abu bavua ne bua kuikala badimuke. Bua tshinyi?
Danyele uvua mumanye ne: mikenji ya Yehowa kayivua ibanyishila bua kudia nyama ivua kayiyi mikosa mutu to. Ivua kabidi ibakandika bimue biakudia bivua bena Babilona badia bualu bivua bilambula nzambi ya dishima. Bu yeye munue mvinyo wa bungi uvua mua kupanga mua kuangata mapangadika mimpe. Nanku uvua mua kuikala mumone ne: bena Babilona bavua babapesha biakudia abi ne mvinyo au bua bashipe mikenji ya Yehowa.a
Danyele uvua ne bua kuikala musambile ne muyukile ne balunda bende basatu abu bua kukeba tshia kuenza. “Wakadisuika mu muoyo wende” bua kusankisha Yehowa. Pashishe wakalomba Ashepanaza ne kanemu bua kabadi biakudia bivua mukalenge ubapesha to. Yehowa wakenza bua Ashepanaza itabe dilomba dia Danyele. Nansha muvuaye muditabe, wakamuambila muvuaye utshina ne: bobu kabayi badie biakudia abi tshimuenekelu tshiabu tshivua mua kunyanguka. Ashepanaza uvua mumanye ne: mukalenge uvua mua kumuela tshilumbu pambidi bu tshimuenekelu tshiabu tshinyanguke. Danyele kakakokangana nende to. Kadi wakalomba muntu uvua ubalama ne: “Ndi nkusengelela ne: utete bena mudimu bebe bua matuku dikumi, batupeshe ndambu wa midioko bua kudia ne mâyi bua kunua; pashishe ufuanyikije tshimuenekelu tshietu ne tshia bansongalume badi badia biakudia bitambe buimpe bia mukalenge.” Yeye kuitaba!
Ku ndekelu kua matuku dikumi, tshimuenekelu tshiabu tshivua tshimpe tshipite tshia bansongalume bakuabu! Bua bualu abu, bakabitabila bua batungunuke ne kudia midioko ne kunua mâyi. Atshi ke tshiakajadikila Danyele ne balunda bende ne: Yehowa uvua mubabeneshe bua muvuabu ne ditabuja ne dikima. Kabakapua bualu abu muoyo to.
Nshapita udi ulonda nealeje muvua balunda basatu ba Danyele balue kutuilangana ne nsombelu mukole uvua muambe kutekesha dikima diabu. Danyele wakatuilangana pende ne ntatu ivua miambe kutekesha dikima diende. Tshilejilu, pavua Yehowa muloteshe Nebukadenesâ bilota, Danyele wakamumvuijabi ne dikima dionso nansha muvuaye mukalenge wa tshikisu, kumuambilaye ne: malu mabi avua ne bua kumuenzekela yeye ne bukalenge buende. Panyima pa bidimu bia bungi, pakavua Beleshasâ mukalenge, Danyele wakamumvuija mifundu ya ku tshimanu nansha muvuayi yamba ne: Beleshasâ uvua ne bua kufua. Pakavua Danyele mukulakaje bikole, bakamuela mu buina bua ntambue ivua ne nzala. Mu nsombelu yonso ayi, Danyele wakenza malu ne dikima anu muvuaye muenze patshivuaye muana. Wakafua ne bidimu bitue ku 100. Bua dikima diende adi, muanjelu wa Yehowa wakamubikila ne: “muntu wa mushinga mukole”!
Bala bualu ebu mu:
Lukonko lua kuelela meji:
Mmushindu kayi uvua Danyele muenze malu ne dikima?
Buela mu buondoke
1. Danyele 1:1 udi ubengangana ne Yelemiya 25:1 anyi? (dp 18-19 §14-15)
2. Ntshinyi tshidi tshijadika ne: Nebukadenesâ uvua muenzele ‘nzambi wende tshibutshilu’ mu Babilona? (Dan. 1:2; dp 33 §6) A
© The Trustees of the British Museum. Licensed under CC BY-NC-SA 4.0. Source. Modifications: Box added.
Tshimfuanyi tshia A: Mifundu ya Nebukadenesâ yakula bua “nzubu wa tshibutshilu” uvua mu ntempelo wa nzambi Melodaka
3. “Bakuidi bena majimbu” bavua ne mudimu kayi? (Dan. 1:20; it “Majimbu” §2-6-wcgr) B
Tshimfuanyi tshia B: Dibue dia mu Babilona diumvuija mua “kuondopa” mubedi uvuabu bela meji ne: bavua bamubunde kudi mukishi
4. Mmidioko kayi ivua Danyele ne balunda bende basatu mua kuikala badie? (Dan. 1:12; dp 40 §25)
Keba malongesha
Mmunyi mudi bansonga mua kuidikija Danyele padibu kabayi pamue ne bena mu mêku abu?
Mbualu kayi buvua buambuluishe Danyele bua kuenza malu ne dikima? (Dan. 1:8) Mmunyi mutudi mua kumuidikija? C
Tshimfuanyi tshia C
Mmu mushindu kayi mukuabu muudi mua kuidikija dikima dia Danyele?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Danyele pabishibuaye ku lufu?
Bia kutangila kabidi
Tangila filme udi uleja muvua malu adi Bible ulonda aa menzeke.
Katupa ka filme wa Danyele uvua ne ditabuja matuku ende onso a muoyo (Tshitupa tshia 1) (13:07)
Mmunyi mudi bansonga mua kuenza malu ne dikima ne kuikala bena lulamatu anu bu Danyele?
“Tshidi tshilejilu tshia Danyele tshitulongesha” (w23.08 2-7)