“Bantu bakane kumpala kua Nzambi”

ZEKÂYA uvua umue wa ku bakuidi ba bungi ba mu ndelanganyi ya Alona. Dimue dituku, uvua ne mudimu munene wa kuosha musenga pa tshioshelu tshia or tshia mu ntempelo. Uvua mudimu wa pa buawu bualu muakuidi uvua mua kuwenza ku ntempelo anu musangu umue mu nsombelu wende mujima. Bua bualu abu, yeye ne mukajende Elizabeta bavua pamuapa ne disanka dia bungi dituku adi.

Bible udi wamba ne: Zekâya ne Elizabeta bavua “bakane kumpala kua Nzambi.” Bakavua ne bidimu bia bungi mu dibaka diabu ne Yehowa uvua mubabeneshe mu mishindu ya bungi. Kadi kuvua tshintu tshivuabu bapangile tshivuabu bajinga bamba kufua. Kabavua balele to. Tshikondo atshi, pavua bantu ba Nzambi bapanga kulela, bivua bibatonda bikole. Zekâya ne Elizabeta bakavua bakulakaje bikole, bikale ne “bidimu bia bungi menemene.” Nansha nanku, bakatungunuka ne kulomba Yehowa muana, batuishibue ne: uvua ne bua kuteleja milombo yabu nansha muvuabi bimueneka ne: kabavua mua kulela to.

Pavua Zekâya mubuele mu muaba wa tshijila wa mu ntempelo, bantu bavua basambila pambelu. Muanjelu wakamumuenekela, muimane pabuipi ne tshioshelu tshia musenga wa manananshi. Wakamuambila ne: Nzambi uvua muteleje milombo yende ne Elizabeta uvua ne bua kumulelela muana wa balume. Uvua ne bua kumuinyika ne: Yone. Pavua Yone ukola, uvua ne bua kupeta tshisumi mu mudimu wa Yehowa tshia buena tshivua natshi Eliya. Uvua ne bua kuenza mudimu munene wa kuambuluisha bantu bua balongolole mioyo yabu bua kuitaba mukenji wa Bukalenge bua Nzambi uvua Yezu ne bua kulua kubapesha.

Kadi Zekâya kavua mutuishibue ne: mêyi a muanjelu au avua mua kukumbana to. Nunku, wakamulomba tshijadiki tshia ne: avua mua kukumbana. Kadi muanjelu wakamupingaja mu njila, kumuambilaye ne: “Meme ndi Gabaliele, utu wimana pabuipi kumpala kua Nzambi.” Zekâya kavua ne bua kuela mêyi a muanjelu wa Yehowa au mpata to. Kadi bu muvuaye muele mpata, wakamuambila ne: uvua ne bua kushala kamama too ne pavua mulayi wa Nzambi au ukumbana. Pakapatukaye mu muaba wa tshijila, wakatuadija kuakuisha bantu ne bianza, ubumvuija tshivua tshimuenzekele.

Zekâya wakapeta mushindu wa kumvuija Elizabeta ne: uvua ne bua kulela. “Panyima pa matuku,” Elizabeta wakimita. Wakashala musombe pa nkayende ngondo itanu. Kadi mu ngondo wende muisambombo, mulela wende Mariya, muana wa Eli wa mu Nazaleta, wakalua kumutangila. Pakabuelaye mu nzubu, muana uvua munda mua Elizabeta wakatumpika ne disanka. Elizabeta wakuwujibua tente ne nyuma muimpe, kumanyaye ne: Mariya uvua ne difu ne muana uvuaye ne bua kulela uvua ne bua kulua Masiya. Bua bualu abu, wakabikila Mariya ne: “Mamuende wa Mukalenge wanyi.” Elizabeta kakumvuila Mariya mukawu to, kadi wakamukankamija umuambila ne: Yehowa uvua ne bua kumuambuluisha.

Ndekelu wa bionso, pakalela Elizabeta, balela bende ne bena mutumba bakadisangisha, kumuambilabu bua inyike muana au dîna dia tatuende. Kadi Elizabeta uvua mumanye mêyi avua muanjelu muambile bayende a ne: “Neumuinyike dîna ne: Yone.” Nunku, wakabambila ne: “Tòo, kadi nebamuinyike ne: Yone.” Kabiakabasankisha to. Bua bualu abu, bakebeja Zekâya. Bu muvuaye kayi anu mua kuakula, wakafunda pa kabaya ne: “Yone ke dîna diende.” Diakamue, kutuadijaye kuakula.

Pashishe, Zekâya wakuwula tente ne nyuma muimpe, kuambaye mêyi a buprofete. Wakapesha bantu ba Nzambi ditekemena dia ne: Yehowa uvua ne bua kubafuila luse ne kubasungila. Kubamanyishaye ne: muanende Yone uvua ne bua ‘kudianjila kumpala kua Yehowa bua kulongolola njila yende.’ Ke tshiakenzeka. Yone mubatiji wakadianjidila Masiya, wambuluisha bantu bua balongolole mioyo yabu bua kuitaba mukenji wa Bukalenge bua Nzambi uvua Yezu ne bua kulua kubamanyisha.

Yezu wakalongesha bantu ba Nzambi mushindu mupiamupia wa kuenzela bantu bavua kabayi bena Kristo malu ne mua kuenzela bantu bavua babaluisha. Bidimu bia bungi kumpala, bantu ba Nzambi ba bungi bavua ne dikima ne bakaluangana mvita ne bena lukuna ba Yehowa. Kadi Yehowa katshivua kabidi musue kumona bantu bende baluangana to. Nansha nanku, batshidi dijinga ne dikima. Bantu bavua bitaba Masiya bavua ne bua kuambila bakuabu malu a Yehowa ne lumu luimpe lua Yezu anu bu muvua Zekâya ne Elizabeta benze.

Bala bualu ebu mu:

• Luka 1:5-25, 36-45, 57-80

Lukonko lua kuelela meji:

Mmushindu kayi uvua Zekâya ne Elizabeta benze malu ne dikima?

Buela mu buondoke

1. 1. Zekâya ne Elizabeta bavua bapange bupuangane. Bua tshinyi Bible udi wamba ne: bavua “bantu bakane”? (Luka 1:6; w02 1/6 16 §14)

   Andamuna

1. 3. Gabaliele wakambila Zekâya bua kuinyika muanende ne: Yone. Dîna Yone didi diumvuija tshinyi? (it “Yone” §1-wcgr)

   Andamuna

2. 4. Zekâya wakashala kamama ne mpudi matshi anyi? (w08 15/3 30 §6)

   Andamuna

Keba malongesha

• Balabi bena Yuda ba mu matuku a Zekâya bavua banyishila muntu mulume bua kushipa dibaka pavua mukajende kayi ulela to. Kadi Zekâya kakashipa dibaka to. Ntshinyi tshidi tshilejilu tshiende tshilongesha balume? B

  Andamuna

  

• Elizabeta wakatumikila tshivua bayende mumuambile pamutu pa kuenza tshivua balela ne bena mutumba bamuambila bua kuenza. (Luka 1:58-61) Tshilejilu tshiende tshidi tshilongesha bakaji badi mu mabaka tshinyi?

  Andamuna

• Mmunyi muudi mua kuenza malu ne dikima bu Zekâya ne Elizabeta?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Bikalabi ne: Zekâya ne Elizabeta nebabishibue ku lufu pa buloba, mbualu kayi bungabebeja?a

  Andamuna

Bia kutangila kabidi

Mona muakatuadijilula Zekâya kuakula ne muakatumbishaye Nzambi.

“Yone ke dîna diende” (6:59)

Mmunyi muakapeta Mariya bukole bua kudi Yehowa pavuaye muye kumona Elizabeta? Ndilongesha kayi ditudi tupeta?

“‘Neakukoleshe’​—Mushindu kayi?” (w23.10 14-15 §10-14)