Bana ‘mbumpianyi bua kudi Yehowa’

NTSHINYI tshidi tshikuluila mu meji paudi umvua batela muaku “bumpianyi”? Udi mua kutuma meji ku makuta, lupangu, anyi bintu bikuabu bia mushinga bidibu banushile kudi bankambua benu kukadi bidimu bia bungi. Nansha bumpianyi bobu buikale tshintu tshia mushindu kayi, butu anu ne mushinga wa bungi ne bitu bilomba kubulama bimpe.

Bible utu ubikila bana ne: “Bumpianyi bua kudi Yehowa.” (Mis. 127:3) Baledi bena Kristo batu bangata bana babu bu mapa a mushinga mukole a kudi Tatu wabu wa mu diulu; batu benza tshionso tshidi tshikengela bua kubakuba, bua bikale ne makanda a mubidi mimpe ne disanka, ne batu babambuluisha bua bikale mu malanda mimpe ne Yehowa.

Nansha nanku, lelu eu kudi bamue baledi badi kabayi bamona bana babu bu bumpianyi bua kudi Nzambi to. (Yesh. 49:15; 2 Tim. 3:1-3) Bakuabu badi badienzeja ne muoyo mujima bua kutabalela bana babu, kadi badi bapangila bualu kudi ntatu ya bungi. Ngimue ntatu kayi itu ipangisha baledi bua kutabalela bana babu? Ntshinyi tshidi Yehowa musue bua baledi benzele bana babu? Ntshinyi tshidi baledi bena Kristo ne bua kuenza bua kukolesha bana babu bimpe?

NTATU

Mitoyi idibu batuela kudi bantu ba muaba utudi anyi kudi balela betu. Mu amue matunga, bantu batu banemeka bikole baledi badi ne bana ba bungi. Nunku, badi mua kuela bena dibaka mitoyi kudi bena mutumba anyi kudi balela babu bua balele bana ba bungi, badibu kabayi nansha mua kukokesha bua kukolesha to.
Disamisha mutu bua muikala nsombelu wabu pakulakajabu. Mu matunga mudi bana ba bungi bafua bua didia dibi, bua masama, ne bua dipangila luondapu luimpe, bamue baledi batu balela bana ba bungi ne meji a ne: nansha bamue bobu balue kufua, bakuabu nebashale ne muoyo. Baledi bakuabu batu basungula bua kulela bana ba bungi bua bana abu balue kubatabalela padibu bakulakaja. Bualu ebu butu buenzeka nangananga mu matunga mudi mbulamatadi kayi wambuluisha bakulakaje to.
Dilela bana. Bamue baledi ba mu amue matunga kabatu ne mushindu wa kupeta manga adi mua kubambuluisha bua kabatungunuki ne kulela to. Bakuabu bobu badi ne mushindu wa kuapeta, kadi badi babenga kuanua bualu adi mua kubakebela masama. Banga pabu kabena mua kuasumba to, bualu adi mushinga mukole.a

NTSHINYI TSHIDI YEHOWA MUSUE BUA BALEDI BENZELE BANA BABU?

Dîku kampanda dipitshisha dîba pamue mu lupangu lua bikunyibua. Tatu uteleja muanende wa bakaji utshidi tshitende ne ntema padiye umulondela idiye nayi munda, padi eku mamu unaya ndundu ne kana kabu ka balume. — Ikala upitshisha dîba pamue ne muana yonso

Babakumbajile majinga abu. Yehowa mmusue bua baledi bikale benza mudimu mukole bua kudiisha bana babu, kubavuadika, ne kubakebela muaba wa kulala too ne padi bana abu bakola. Mmubapeshe kabidi mudimu wa kubalongesha bua bakole bimpe. Nunku baledi bena Kristo kabena anu ne bua kutuma bana babu miaba mikuabu bua baye kulongelaku to. Kadi mbimpe badienzeje bua kudikoleshila bana babu bua babambuluishe bua kupeta mamanya ikala mua kubambuluisha pakolabu, ne bua bikale kabidi bapitshisha dîba pamue ne muana yonso bua amone ne: mbamunange ne adiumvue mu bukubi. Nansha nanku, Yehowa kena ne malu makole to, bualu kena ulomba baledi bua bikale babanji to. Tshilejilu, bantu bavuaye musungule bua kuikala baledi ba Yezu kabavua babanji to, kadi bavua benza mudimu mukole bua kumukumbajila majinga ende.—Mat. 13:55, 56; Luka 2:24.

Dîyi dinene dia mu Bible: “Bulelela, bikala muntu kayi ukumbaja majinga a bende yeye, nangananga a ba mu nzubu muende, yeye mmuvile ditabuja ne mmubi kupita muntu udi kayi ne ditabuja.”—1 Tim. 5:8.

Yehowa mmumanye ne: baledi nebikale pamuapa dijinga ne diambuluisha pikalabu benda bakulakaja. Umue mushindu udi bana mua kutua baledi babu mushinga ngua kubambuluisha bua bapete bidibu nabi dijinga padibu benda bakulakaja. (Ekes. 20:12; 1 Tim. 5:4) Nansha nanku, Yehowa udi usanka padi baledi bela meji nangananga a muikalabu mua kutabalela bana babu pamutu pa kuela meji a muikala bana mua kubatabalela.—2 Kol. 12:14.

Babalongeshe malu a Yehowa. Baledi bena Kristo badi kabidi ne mudimu wa kulongesha bana babu bua banange Yehowa ne bikale bamutendelela. Mudimu eu ke udi Yehowa wangata ne mushinga wa bungi menemene.—Dut. 6:6, 7.

Dîyi dinene dia mu Bible: ‘Tungunukayi ne kukolesha bana benu ne mibelu ne didimuija bia Yehowa.’—Ef. 6:4.

YEHOWA MMUSUE KUNUAMBULUISHA

Mulume ne mukajende bayukila mu nzubu muabu. Badi ne Bible mubulula muteka pa mêsa. — Yukilayi kumpala kua dîba bua bungi bua bana banualela

Elayi meji a bungi bua bana banualela. Binuikale nujinga kulela bana, elayi meji bimpe a nsombelu unudi nende. Tshilejilu, nenuikale ne makuta bungi bukumbane bua kudiisha bana ba bungi, kubavuadika ne kubalongeshisha tulasa anyi? Nuenu kanuyi nawu, yukilayi bua nudikosele bungi bua bana banualela, bua numone mua kutabalela muana yonso mudi Yehowa musue. Bushuwa, Yehowa mmumanye ne: malu adi mua kupanga kuenda munuvua balongolole. (Muam. 9:11) Kadi neanubeneshe bua munudi nudienzeja bua kuikala baledi bimpe.

Mêyi manene a mu Bible: “Malu adi bantu badi benza mudimu ne muoyo mujima balongolola adi bushuwa afika ku dikumbana.”—Nsu. 21:5.

“Nnganyi wa kunudi udi musue kuibaka tshibumba kayi wanji kusomba, ubadika bungi bua makuta adiye ne bua kutula bua kumona ni udi ne bintu bikumbane bua kutshijikija?”—Luka 14:28.

Tekayi malu a Yehowa pa muaba wa kumpala mu dîku dienu. Tekayi kuenzela Yehowa mudimu pa muaba wa kumpala mu dîku dienu. Biobi ne: nukadi ne bana, disuikayi bua kulongesha muana yonso bua kunanga Yehowa. Bambuluishayi bua bikale bateya ntema padibu mu bisangilu. Ikalayi ne tshibidilu tshia kuenza ntendelelu wa mu dîku. Balongeshayi mua kuyisha. Kanulekeedi bana benu bakadi bakole anyi balela benu mudimu wenu wa buledi to. Kulongesha bana bua kunanga Yehowa kudi kulomba dîba ne bikengela kudienzeja, kadi newikale ne disanka dia kumona bana bebe benzela Yehowa mudimu ne disanka.

Dîyi dinene dia mu Bible: “Tshiena ne disanka dinene kupita edi: bua meme kumvua ne: bana banyi badi batungunuka ne kuenda mu bulelela.”—3 Yone 4.b

Eyemenayi Yehowa. Nuenu nuela meji bua kulela bana anyi biobi ne: nukadi nabu, ikalayi batuishibue ne: mikenji ya Yehowa idi ne mushinga wa bungi kupita bilele ne mikiya ya muaba unudi basombele.

Foto: 1. Baledi basombe pamue ne muanabu mu tshisangilu. Muana au mmuele tshianza kuulu bua kuandamuna. 2. Bena mu dîku bayisha pamue. Tatu udi uya ne muanende wa bakaji utshidi tshitende padi eku mamu uya ne bana babu babidi batshidi bapuekele. — Bitu bilomba dîba ne bikengela kudienzeja bua kuambuluisha bana bua bamanye mua kutendelela Yehowa ne mua kuenza malu adi amusankisha

Nansha nuenu bapangadije bua kulela bana bakese, ikalayi batuishibue ne: Yehowa neanutabalele panuakulakaja. Bantu bobu banuela mitoyi bua nuikale ne mmuenenu udibu nende pa bidi bitangila bana, kanuitabi bidibu bamba abi to. Kanusamishi mutu musangu nansha umue nuela meji ne: kanuakuikala ne muntu wa kunutabalela ku bukulakaja to. Yehowa mmulaye bua kunutabalela ne neakumbaje anu milayi yende.—Yosh. 23:14.

Mêyi manene a mu Bible: “Eyemena Yehowa ne muoyo webe wonso, kueyemenyi dijingulula diebe dia malu. Umumanye mu njila yebe yonso, ne yeye nealulamije njila yebe.”—Nsu. 3:5, 6.

“Mvua nsonga, mpindieu nkadi mukulakaje, kadi tshiena muanji kumona muntu muakane mulekelela, peshi bana bende benda bakeba tshiakudia to.”—Mis. 37:25.

“Nunku, tungunukayi ne kukeba tshia kumpala Bukalenge ne buakane buende, ne nebanusakidile bintu bikuabu bionso ebi.”—Mat. 6:33.

Bana mbumpianyi bua mushinga mukole budi Yehowa mupeshe baledi. Padi baledi bena Kristo batabalela bana babu mudiye musue, udi usanka bikole be! Batu bangata malu adi Yehowa ubalomba bua kuenza ne mushinga wa bungi kupita atu bantu ba muaba udibu benza. Ke bualu kayi batu bayukila bua bungi bua bana balelabu. Dîba adi, badi mua kupesha muana yonso bidiye nabi dijinga, kuenza bua akole ne disanka ne kumuambuluisha bua kunanga Yehowa. Padi baledi bena Kristo benza malu aa, badi baleja mudibu banange bana babu bikole ne mudibu babangata bu ‘mbumpianyi bua kudi Yehowa.’

Kabena banyingalala bua mapangadika abu to

Baledi batu bapeta ntatu bualu kabena ne bana ba bungi anyi? Baledi ba bungi badi basombela mu matunga adi ne ntatu ya malu a makuta batu badiela lukonko elu. Mona tshivua batatu ba mu amue a ku matunga au bambe.

Bavua bakuele mutoyi bua kulela bana ba bungi anyi?

“Eyowa, bavua bawungele too ne kudi bamue bantu ba mu tshisumbu tshietu. Muanetu mukuabu ne mukajende bakatuebeja ne: ‘Bua tshinyi nudi ne muana wa balume anu umue? Muetu mu Afrike emu muntu yeye ne muana umue, mbienze anu bu ne: ki mmulele to. Yeye mulele bana babidi, mbienze anu bu ne: udi ne muana umue.’ Nansha patuakalela muanetu muibidi uvua wa bakaji, bantu bavua anu batuela mutoyi.”—Jeremias

Uvua mupete ntatu bua muudi kuyi mulele bana ba bungi anyi?

“Tòo. Bualu tuetu ke bavua basungule bua kuikala ne bana bakese; nunku meme ne mukajanyi tuvua tukokesha bua kubakebela bivuabu nabi dijinga, ne kupita bionso tuvua tuenza malu a Yehowa kakuyi lutatu to. Ndi mukolele mu dîku dia bana ba bungi ne ngakamona ntatu ya bungi ivua baledi betu batuilangana nayi bua kutukebela bituvua nabi dijinga ne kutulongeshisha kalasa.”—Jeremias

Mmunyi mudi bana bebe bumvua bua muudi mubalele bakese?

“Bana betu badi ne disanka bualu kabena batuilangana ne ntatu idi bana bakuabu batuilangana nayi bualu baledi babu mbabalele ba bungi to. Bidi nanku bualu baledi babu kabatu babatabalela mudibi bikengela to.”—Filipe

“Patuvua tuenda tukulumpa, bana betu bavua badiumvua mu bukubi, bamona mutudi tubatabalela ne babanange. Tuvua ne tshibidilu tshia kusomba ne bena Kristo netu badi banange Yehowa bikole. Bena Kristo netu abu bavua batukankamija bua kuenzela Yehowa mudimu bikole. Tudi tumona mudi bana betu babidikija lelu eu.”—Carlos

Dipangadika diebe dia kulela bana bakese ndikuambuluishe mushindu kayi?

“Bu mutuvua ne bana bakese, bivua bipepele bua kubakumbajila majinga abu. Mudimu wanyi uvuabu bamfuta bimpe mmufue kukadi bidimu bisatu. Kabiakatusamisha mutu bikole to, bualu tuvua ne bana bakese ne kabivua bitulomba makuta a bungi bua kukumbaja majinga a dîku dijima to.”—Jeremias

“Kulela bana bakese nkutuambuluishe kabidi bua kubalongesha malu a Yehowa bimpe. Tuvua kabidi ne mushindu wa kuambuluisha miaba ivuabu dijinga ne bamanyishi ba bungi, ne mushindu wa kusomba ne muana yonso bua kumutabalela. Bana betu bonso badi benzela Yehowa mudimu ne mbadifundile bipatshila bia kuenza bia bungi mu mudimu wa Yehowa.”—Lenadi

Mmubelu kayi uudi musue kupesha baledi?

“Ndi mudimuenene mudi mêyi adi mu Misambu 34:10b malelela. Mvese eu udi wamba ne: ‘Bantu badi bakeba Yehowa kabakupangila tshintu tshimpe nansha tshimue.’ Yehowa mmutuambuluishe bua kupeta bintu bionso bituvua nabi dijinga mu dîku dietu.”—Rafael

a Mulume ne mukajende ke badi ne bua kuangata mapangadika a tshilumbu tshia dilela bana. Badi ne bua kupangadija nkayabu bungi bua bana balelabu, dîba dia kubalela, ne tshidibu mua kuenza bua kuanji kubenga kulela. Muntu kena ne bua kubalumbuluisha to. (Lomo 14:4, 10-13) Bualu bukuabu, badi ne bua kuvuluka mubelu udi mu 1 Kolinto 7:3-5 padibu bangata mapangadika.

b Bana badibu bakuile mu mvese eu mbena Kristo bavua Yone mulongeshe. Baledi bena Kristo batu bumvua pabu disanka bua bana babu badi benzela Yehowa mudimu.