Ikala umona ntatu yebe mu mushindu muimpe

1-2. Ntshinyi tshitudi ne bua kuenza bua kupita bimpe ne ntatu yetu? (Tangila kabidi tshimfuanyi.)

YEHOWA utu munange batendeledi bende bikole. Nansha nanku, ba bungi ba kudibu badi ne nsombelu muwule “tente ne ntatu ne tunyinganyinga.” (Mis. 90:10) Badi batatshisha bamue kudi bena mu mêku abu anu bua balekele kuenzela Yehowa mudimu. Badi bakengesha bakuabu anyi babela mu maloko bualu badi bayisha. Bakuabu ba bungi badi batata bua masama, bukulakaja, difuisha, ne bua malu makuabu mabi adi abafikila. Udi ne bualu budi bukutatshisha patudi tuakula apa anyi?

² Bua kutantamena ntatu, mbimpe tuikale tuyimona mudi Yehowa musue. Bua tshinyi bidi ne mushinga? Bualu tuetu katuyi tuyimona mudi Yehowa musue, katuakumanya mushindu mutambe buimpe utudi mua kuyitantamena to; mbienze anu bu kuendesha mashinyi. Mmuenu yawu yoyi mikale ne manyanu, katuakumona bimpe kutudi tuya to. Kadi yoyi kayiyi ne manyanu, netumone bimpe kutudi tuya. Mu tshiena-bualu etshi, netuakule bua 1) mushindu udi Yehowa musue bua tumone ntatu, 2) tshidi mua kutufikila tuetu katuyi tuyimona mudiye musue, ne 3) tshitudi mua kuenza padi ntatu itukuata.

MUSHINDU UDI YEHOWA MUSUE BUA TUMONE NTATU

3. Bua tshinyi ntatu idi anu itukuata lelu?

³ Bu mutudi mu bulongolodi bubi ebu, netupete anu ntatu. Bu mutudi bapange bupuangane eku Satana ukokesha buloba, netupete anu ntatu. Bualu bukuabu, bu mudi nshikidilu wenda usemena, netupete ntatu ya bungi bua bipupu bidi mua kuenzeka, bu mudi dikanka dia buloba, dipasalala dia mâyi, mêtu akuata mudilu, ne malu mabi adi bantu benza. (Mat. 24:8; 2 Tim. 3:13) Yehowa yeye mujikije ntatu eyi lelu, nebimueneke anu bu ne: udi wenda wambuluisha Satana bua kukokesha. Bu mutshidi Satana ukokesha buloba ebu, ‘bipupu’ nebitukuate anu dimue dituku.​—Muam. 9:12, dim.

4. Ndutatu kayi lukuabu ludi bena Kristo batuilangana nalu?

⁴ Badi batukengesha bualu tudi tutumikila Yezu. Yezu uvua wambila bayidi bende misangu ne misangu ne: bavua ne bua kubakengesha bua ditabuja diabu. (Mat. 24:9; Yone 16:2) Kumanya bualu ebu kudi kutuambuluisha bua kuikala anu ne ditabuja dikole nansha padibu batukengesha. (1 Tes. 3:3, 4) Patudi tushala ne lulamatu mu ntatu mikole, bidi anu mua kutujadikila ne: tudi mu njila udi ufikisha ku muoyo wa tshiendelele. Bidi bileja kabidi mutudi basungule bua kutendelela Yehowa bualu mmukokeshi mutambe buimpe, ne mudi Satana muena dishima. Satana wakashiminyina bantu, wamba mudibu kabayi banange Nzambi ne mudibu bamuenzela mudimu anu bualu udi ubapesha bintu. Ke bualu kayi utu uluisha batendeledi ba Yehowa bikole menemene bua kuleja ne: padi ntatu ibakuata, kabakushala ne lulamatu to. (Yobo 1:9-11) Nunku Yehowa udi usanka patudi tunanukila bualu tudi bamunange.​—Nsu. 27:11.

5. Muambi 7:13, 14 udi utulongesha tshinyi? (Tangila kabidi bimfuanyi.)

⁵ Yehowa utu ulekela ntatu itukuata. Yehowa katu wenza malu mabi anyi ututeta nawu to. (Yak. 1:13) Kadi bua tshinyi mukalenge Solomo wakafunda ne: “dituku dia dikenga” didi dileja “mudimu wa Nzambi mulelela”? (Bala Muambi 7:13, 14.) Kavua usua kuamba ne: Yehowa ke utu ukebesha malu mabi to, kadi adi enzeka bualu udi ualekela enzeka. Nanku Muambi 7:13, 14 udi utulongesha ne: mu bulongolodi bua Satana ebu, nekuikale matuku atuikala bimpe ne atuapeta ntatu. Nunku padi malu mimpe atuenzekela, mbimpe tuele Yehowa tuasakidila bualu bintu bimpe bionso mmapa a kudiye. Udi utulongesha kabidi ne: katuena mua ‘kumanya tshiatufikila matuku atshilualua’ to. Nunku mbikole bua tuetu kumanya dituku diatukuata ntatu anyi diatuenzekela malu mimpe. Malu adi kaayi matekemena atu akuata bantu bimpe ne bantu babi.

6. Bua tshinyi Yehowa udi ulekela ntatu itukuata? (Ebelu 12:7, 11)

⁶ Patudi mu ntatu, Yehowa udi mua kutulongesha ne: mbimpe tumueyemene pamutu pa kudieyemena. Yehowa katu upanga kumona ntatu yetu to, utu anu ututabalela patudi nayi. Nansha yeye mutulekele tuendela mu “tshibandabanda tshia mîdima mikole,” udi utungunuka ne kutulombola, utujadikila mudiye mutunange ne utupesha bukole bua tunanukile. (Mis. 23:4) Ntatu idi ituambuluisha kabidi bua tumanye butekete butudi nabu ne tulengeje bumuntu buetu ne diambuluisha dia Yehowa. (Bala Ebelu 12:7, 11.) Tshilejilu, Yobo uvua ne bua kudienzeja bua ikale ne budipuekeshi. Yehowa kavua mukebele Yobo makenga to, kadi uvua mualekele bua amukuate; kubuelelaye pa makenga au bua kumulongesha malu a bungi a mushinga. (Yobo 42:1-6) Tuikalayi batuishibue ne: Yehowa yeye mulekele lutatu kampanda lutukuata, neatuambuluishe bua tushale anu bamulamate ne neatufute.​—Lomo 8:35-39.

7. Bua tshinyi udi ne bua kuikala anu ne disanka padibu bakukengesha bua muudi wenzela Nzambi mudimu?

⁷ Tudi mua kuikala ne disanka padibu batukengesha. Bobu bakukengesha bua ditabuja diebe, kuedi meji ne: Yehowa mmukulekele to. Kadi bidi bileja ne: udi ukuanyisha. (Mat. 5:10-12) Wewe umona malu mushindu au padibu bakukengesha bua muudi muena Kristo, newikale ne disanka ne neudiumvue anu ne mushinga bu bapostolo. (Bien. 5:40-42) Udi kabidi mua kufikisha bantu bakuabu ku dilonga bulelela ne ku “ditumbisha Nzambi.” (1 Pet. 2:12) Yehowa neakuambuluishe paudi mu ntatu anu muvuaye muambuluishe Jozefe ne mumufute pavuaye mu buloko ne pakavuabu bamulekele.​—Gen. 39:3, 23.

8. Mbualu kayi bukuabu budi butusaka bua kunanukila mu ntatu?

⁸ Ntatu yetu neyijike. Bualu bua Yobo budi butujadikila nanku, bualu “Yehowa wakabenesha matuku a ndekelu a muoyo wa Yobo kupita ku ntuadijilu.” (Yobo 42:12) Bia muomumue, Yehowa neatubeneshe mu bulongolodi bupiabupia mu mushindu wa dikema. Muoyo udi muwule ne ntatu utudi nawu lelu eu ngua tshitupa tshîpi, kadi utuapeta matuku atshilualua ngua tshiendelele. Ebu mbualu bukuabu budi mua kusaka yonso wa kutudi bua kunanukila too ne ku nshikidilu.​—Mat. 24:13.

TSHIDI MUA KUTUFIKILA TUETU KATUYI TUMONA NTATU MUDI YEHOWA MUSUE

9. Nngelelu kayi wa meji utudi ne bua kuepuka patudi ne ntatu? Bua tshinyi?

⁹ Tuetu tuitaba malu a dishima patudi ne ntatu, malu adi mua kunyanguka kabidi bikole. Tshilejilu, tudi mua kufika ku diela meji ne: Yehowa ke udi utukengesha. Pavua ntatu mikuate Yobo, wakanji kuela meji ne: Yehowa ke uvua mumukebele ntatu, ke bualu kayi uvua uteta “kuleja muvuaye yeye muakane pamutu pa Nzambi.” (Yobo 32:2) Naomi pende wakanji kuela Nzambi tshilumbu pambidi bua makenga avuaye mupete. (Luta 1:13, 20, 21) Bu Yobo ne Naomi batungunuke anu ne kumona malu mushindu au, malanda abu ne Yehowa avua anyanguka. (Nsu. 19:3) Kadi Yehowa wakabambuluisha bua bamone ne: kavua ubanyoka to, uvua ubatabalela. Nunku bu muvuabu bashale bamulamate, wakabafuta.

10. Mmeji kayi adi mua kutuluila patudi ne ntatu?

¹⁰ Nansha tuetu batuishibue ne: Yehowa ki ngudi mutukebele ntatu itudi nayi, tudi mua kubanga kuela meji ne: kena ututabalela kabidi to. Kuela meji mushindu eu, kudi mua kututekesha mu mikolo. (Nsu. 24:10) Pavua mukalenge Davidi ne muprofete Habakuka batuilangane ne ntatu, bakapeta dielakana, kutuadijabu kudiebeja bikale Nzambi ni uvua uteleja masambila abu. (Mis. 10:1; Hab. 1:2) Nansha nanku, kabakalekela kusambila to. Yehowa wakabajadikila ne: neabakuatshishe. Nunku wewe ne ntatu, neakukuatshishe pebe.​—Mis. 10:17.

11. Ntshinyi tshidi mua kutufikila tuetu katuyi tumona ntatu mudi Yehowa musue?

¹¹ Tuetu katuyi tumona ntatu mudi Yehowa musue, tudi bafuane kuela meji ne: Yehowa kena ne bua kutulekela tukenga to. Dîba adi ntatu yoyi mitukuate tudi mua kumvua bibi menemene. (1 Pet. 4:12) Ke tshiakenzekela bayidi ba Yezu. Kabivua bipepele bua kuitababu ne: bavua ne bua kukengesha Yezu ne kumushipa to. (Luka 18:33, 34) Tshilejilu, nansha muvua Yezu mubumvuije bimpe tshivua tshimuindile, mupostolo Petelo wakaleja ne: Nzambi kavua mua kulekela Yezu ukenga mushindu au to. Yezu uvua mumanye ne: ngelelu wa meji uvua nende Petelo au, uvua mua kumupangisha bua kuenza disua dia Yehowa, ke bualu kayi wakamutandisha. (Mâko 8:31-33) Nansha pakavuabu bamushipe, bayidi bende kabavua anu bumvue tshivuabu bamushipele to. Nansha nanku Yezu uvua anu mubanange ne wakatungunuka anu ne kubambuluisha. Ke bualu kayi pavuaye mutuilangane nabu panyima pa dibishibua diende ku lufu, ‘wakababuluila Mifundu bimpe,’ kubumvuijaye tshivuabu bamukengeshile. (Luka 24:25-27, 32, 44-48) Pavuabu belangana meji a malu avua Yezu ubalongesha, bivua bilongolola lungenyi luabu bua buluishi bukavuabu pa kupeta bua muvuabu bayidi bende. Tuetu tukonkonona malongesha a mu Bible adi akula bua ntatu ne buluishi, nebituambuluishe bua kuikala balongolole lungenyi luetu bua kuyitua tshiadi.

12. Tuetu katuyi tumona nsombelu wetu mudi Yehowa musue, ntshinyi tshidi mua kutufikila?

¹² Tuetu katuyi tumona nsombelu wetu mudi Yehowa musue, tudi mua kuela meji ne: tudi ne nsombelu mubi menemene, pabi kabiyi nanku to. Yezu wakafila tshilejilu tshia bantu bavua benze mudimu mu budimi bua mvinyo bua kuleja mudi muntu mua kufika ku diela meji nanku. Bamue bena mudimu bakadiabakena, bualu bakela meji ne: kabavua babafute muvuabi bikengela to. Kadi mfumuabu wakambila umue wa kudibu ne: “Mukuetu, tshiena nkuenzela bualu bubi to.” (Mat. 20:10-13) Bena mudimu abu bavua bela meji ne: mfumuabu uvua mubenzele bibi, kadi kabivua nanku to. Bavua badiabakena bualu bavua batekemena tshivuabu kabayi ne bua kutekemena to. Lelu eu, kudi bena Kristo netu bakuabu badi pabu ne meji a buena au. Tshilejilu, padibu kabayi babapeshe midimu mu tshisumbu anyi padibu babalomba bua kulekela idibu nayi, batu bumvua bibi. Mmalu kayi atudi mua kuenza bua kuikala kumona ntatu anu mudi Yehowa musue?

MALU A KUENZA PADI NTATU ITUKUATA

13. Ntshinyi tshidi mua kuenzeka padi ntatu itukuata?

¹³ Pamuapa udi mumanye malu atu Bible wamba bua ntatu, ne udi mua kuikala ukadi muambile muntu uvua lutatu lukuate malu au bua kumukankamija. Kadi padilu lukukuata wewe, bidi mua kukukolela bua kuela meji mudi Yehowa musue. Tshilejilu, udi mua kuela meji ne: Yehowa udi ukunyoka bua bualu kampanda buudi muenze anyi ne: kena uteleja masambila ebe to. Dîba adi ntshinyi tshiudi mua kuenza?

14. Ntshinyi tshiudi mua kulomba Yehowa padi lutatu lukukuata? (Filipoyi 4:13)

¹⁴ Lomba Yehowa bua akuambuluishe. Mukuatshila dikenga diebe ne umuleje mudidi dikutatshisha. Wewe musue ne: akuenzele bualu kampanda budi mua kukuambuluisha, mutelelabu. Udi mua kumulomba nyuma wende muimpe bua upete meji ne bukole biakuambuluisha bua kunanukila. Kadi manya ne: Yehowa udi mua kuandamuna masambila ebe mu mushindu uvua wewe kuyi mutekemene to. (Ef. 3:20) Udi kabidi mua kutuambuluisha ku butuangaji bua banjelu ne bua bena Kristo netu. (Mis. 34:7) Nunku teya ntema ku mushindu udi Yehowa ukuambuluisha ne umuele tuasakidila bua bualu abu. Ikala mutuishibue ne: mmusue kukupesha nyuma wende muimpe bua unanukile mu lutatu luonso ludi mua kukukuata.​—Bala Filipoyi 4:13.

15. Ntshinyi tshiakuambuluisha bua kunanukila mu ntatu? (Tangila kabidi tshimfuanyi.)

¹⁵ Ikala wenza malu adi akolesha bulunda buebe ne Yehowa. Paudi mu ntatu, bidi mua kukukolela bua kuenza malu au bu kumpala. Kadi atshi ke tshikondo tshia wewe kutamba kudienzeja bua kuela meji bu Yehowa. (Mis. 119:143) Nunku ikala ubala Bible dituku dionso, udilongelaye, welangana meji a malu audi ubala, ne wenza makebulula. Dienzeja bua kuikala kuyisha, kubuela mu bisangilu ne kuandamunamu. Ikala upitshisha dîba pamue ne bena Kristo nebe, kuikadi uditola to.​—Nsu. 18:1.

16. Paudi mu lutatu, mmeji kayi adi mua kukuluila? Ntshinyi tshiudi ne bua kuenza? (2 Kolinto 10:4, 5)

¹⁶ Bible akuambuluishe bua kuakaja meji ebe. Padi lutatu lukukuata, bidi mua kukulomba bua utonkole ngenyi ya dishima ‘idi miele miji bikole menemene.’ Ngenyi ayi idi mua kuikala ikutangila wewe anyi Yehowa. (Bala 2 Kolinto 10:4, 5.) “Dimanya dia Nzambi” didi mu Bible ne mu mikanda ya bulongolodi buende didi mua kukuambuluisha bua kuakaja meji ebe. Tshilejilu, biwikala wela meji ne: Yehowa kena kabidi ukuanyisha, konkonona malu avua menzekele mupostolo Paulo. Tshikondo tshivuaye uyisha, uvua mupete ntatu mikole; kadi ntatu ayi yakakolesha dishindika divuaye nadi dia ne: Yehowa ne Yezu bavua bamuanyisha. (2 Kol. 11:23-27) Wewe udiebeja bua kumanya bikala Yehowa mukubuikidile mpekatu iuvua muenze kale, enza liste wa mvese idi ileja ne: Yehowa utu ubuikidila bantu mpekatu ne muoyo mujima. (Yesh. 43:25) Bala mvese ayi ne welangane meji a tshidiyi yamba. (Mis. 119:97) Lutatu lukole luolu lukukuate, pashishe utuadija kudiebeja bikala Yehowa ukuba batendeledi bende, bala biena-bualu bidi biakula bua tshidi Nzambi mulekeele makenga ne mudiye utuambuluisha nansha padi bualu kayi butufikila. (Mis. 91:9-12) Bala kabidi malu a bena Kristo netu bavua bananukile mu ntatu mikole ivuabu bapete.a

17. Ntshinyi tshitudi ne bua kuenza padi ntatu itukuata?

¹⁷ Wewe kuyi ne ntatu mikole patudi tuakula apa, ela Yehowa tuasakidila ne mutumbisha bua malu mimpe adiye mukuenzele. (Muam. 7:14) Kadi lutatu lukole luolu lukukuate, vuluka tshidi Yehowa ukuambila mu Dîyi diende ne utungunuka ne kumueyemena ne muoyo mujima. Dîba adi Yehowa ‘nealongolole njila wa kupatukila, bua umone mua kunanukila mu diteta adi.’ (1 Kol. 10:13) Kadi mmunyi mutudi mua kuambuluisha bena Kristo netu padibu ne ntatu mikole? Netuandamune lukonko elu mu tshiena-bualu tshialonda.