“Nzambi wa bulelela” utu anu ukumbaja tshidiye mulongolole

1. Bilondeshile Misambu 31:2-5, bua tshinyi Yehowa mmukumbane bua tuetu kumueyemena?

TUDI mu buloba budi Satana ukokesha mudi bantu ba bungi bashimangana ne belangana mâyi ku makasa. Ke bualu kayi mbikole bua kumanya wa kueyemena. Bantu ba bungi mbapange bululame mu midimu yabu. Bakuabu badi batamba kuenza madisuisha a dishima bua bintu bidibu bapana anu bua babasumbe. Imue misangu too ne balunda betu ba pa muoyo batu bapanga kuenza bidibu balaya. Kadi tudi mua kueyemena Yehowa misangu yonso bualu yeye udi “Nzambi wa bulelela.” (Bala Misambu 31:2-5.) Katu ushima nansha kakese. Ke bualu kayi tudi batuishibue ne: neakumbaje bionso bidiye mulaye.

2. Ntshinyi tshituakuila mu tshiena-bualu etshi?

² Mu tshiena-bualu etshi netuakule bua amue malu adi mua kutusaka bua kueyemena Yehowa ne muoyo mujima. Pashishe netumone muikala Nzambi wa bulelela mua kubutula Satana ne ndongoluelu wende mubi eu. Netumone kabidi Nzambi wenza lelu bua kukumbaja bidiye mulongolole. Abi nebitusake bua kuambila bantu malu ende ne dikima dionso.

MALU ADI MUA KUTUSAKA BUA KUEYEMENA NZAMBI WA BULELELA

3. Bua tshinyi tudi mua kueyemena Yehowa ne muoyo mujima?

³ Tudi mua kueyemena Yehowa bualu udi Mufuki wetu. Yeye ke Mufuki wa diulu ne buloba ne wa bintu bionso bidi ne muoyo. (Gen. 1:1; Mis. 36:9; Buak. 4:11) Mmutupeshe bionso bidi bikengela bua tuikale anu ne muoyo, bu mudi kapepe ne mâyi. Udi ne bukokeshi pa tshintu tshionso. Bu mudiye mutufuke, mumanye malu onso, ne muikale ne bukole budi kabuyi ne mikalu, tudi mua kumueyemena ne muoyo mujima bua atulombole, batuishibue ne: neatupeteshe malu mimpe matuku atshilualua.

4. Ntshinyi tshidi tshitujadikila ne: Yehowa mmutunange?

⁴ Tudi mua kueyemena Yehowa bualu mmutunange. Yehowa wakafuka bantu bualu uvua musue bua bikale pabu ne muoyo anu bu yeye. Wakaleja tshivua disua diende pakambaye ne: “Tuenze muntu mu tshimfuanyi tshietu, mufuanangane netu.” (Gen. 1:26) Mmutupeshe budikadidi bua kudiangatshila mapangadika. Mmutufukile buloba, muaba mulenga wa kusombela. (Mis. 115:16) Wakapesha baledi betu ba kumpala mudimu muimpe wa kubuvuija mparadizu. (Gen. 1:28; 2:15) Wakabapesha bintu bionso bimpe bidipu bua bikale ne disanka. Bionso ebi bidi bileja ne: “dinanga dia lulamatu dia Yehowa ndia kashidi ne tshiendelele.”​—Mis. 103:17.

5. a) Pavua Adama ne Eva batombokele Yehowa, ntshinyi tshiakenzaye bua kukumbaja tshivuaye mulongolole? b) Ngimue milayi kayi ivua Yehowa mukumbaje? (Tangila kazubu ka ne: “Nzambi utu anu wamba bulelela.”)

⁵ Tudi mua kueyemena Yehowa bualu utu anu ukumbaja mêyi ende. Yehowa kavua mufuke buloba ‘anu bua tshianana to, kadi uvua mubuenze bua bantu basombelapu.’ (Yesh. 45:18, 19) Pavua Adama ne Eva bamutombokele, bakapeta tshibawu tshia lufu. Nunku biakamueneka anu bu ne: Diabolo uvua mupangishe Yehowa bua kuenza tshivuaye mulongoluele bantu ne buloba. Kadi Yehowa yeye utu anu ukumbaja bionso bituye ulaya. (Yesh. 46:10, 11) Utshivua anu ne dijinga dia kuwuja buloba ne bantu bakane. Ke bualu kayi wakanyishila Adama ne Eva bua kulela bana. Wakatuma kabidi Muanende bua afile muoyo wende bua tupete ditekemena dia kushala ne muoyo kashidi.​—Yone 3:16.

NZAMBI WA BULELELA UTU UKUMBAJA MILAYI YENDE

6. Ntshinyi tshivua Yehowa muambe pavua Adama ne Eva bamutombokele?

⁶ “Nyoka wa ku tshibangidilu, udibu babikila ne: Diabolo ne Satana”a ke wakafikisha Adama ne Eva ku ditombokela Nzambi. (Buak. 12:9; Gen. 3:4, 5; Yone 8:44) Ke bualu kayi Nzambi wakamba ne: uvua ne bua kulua kubutudibua. (Gen. 3:15) Kadi kumpala kua kumubutulabu, bantu ba bungi bavua ne bua kumulonda ne kuenza malu anu bu yeye. Nansha nanku, bamue bantu bavua anu ne bua kushala balamate Yehowa.

7. Mbanganyi badi bidikija Diabolo? Tshiabafikila ntshinyi?

⁷ Banjelu bavua batombokele Yehowa ne bantu bakuabu badi kabayi basue kumutumikila ke badi bidikija Diabolo. Bu mudibu baluisha Nzambi, mbadivuije nkayabu bana ba Satana. Kadi pakumbana tshikondo tshikadi Nzambi mulongolole, neabutule Satana ne bana bende abu.​—Dan. 2:44; Lomo 16:20.

8. Ntshinyi tshivua Yezu muenze mu 1914? (Tangila kabidi bimfuanyi.)

⁸ Ntshinyi tshidi tshitujadikila ne: Nzambi neabutule Satana ne bantu babi badi bamulonda? Mu 1914, Yezu wakela Satana ne bademon bende mvita, yeye kubela pa buloba. (Buak. 12:7-9) Nansha muvua mvita eyi mienzekele mu diulu, yakakengeshisha bantu bavua pa buloba. Bible udi wamba ne: “Diakabi bua buloba ne bua mbuu, bualu Diabolo mmupueke kunudi, muikale ne tshiji tshikole, mumanye ne: udi ne tshikondo tshîpi.” (Buak. 12:12) Katshia ku 1914, Satana udi wenda ukoka bantu ba bungi mu nyima muende, ke bualu kayi malu adi anu enda anyanguka bikole. Kadi Yezu ukadi pa “kumana ditshimuna diende” ne neabutule Satana ne bantu bonso badi bamutua mpanda. (Buak. 6:2) Yezu nealeje ne: Satana ke mubi ne uvua mushiminyine Yehowa malu. (Mis. 45:4-6) Muntu yonso neamanye ne: Yehowa ke Nzambi wa bulelela.​—Yeh. 38:23.

Mvita ya kumpala ya buloba bujima: U.S. National Archives photo; bombe: USAF photo; tshipupu tshia disama: blvdone/stock.adobe.com; ndululu: inhauscreative/E+ via Getty Images

NZAMBI WA BULELELA UDI USANGISHA BANTU BADI BANANGA BULELELA

9. Mbanganyi badi Yehowa wenda usangisha lelu?

⁹ Yehowa udi wenda usangisha “bintu bionso mu Kristo, bintu bidi mu diulu ne bintu bidi pa buloba.” (Ef. 1:10) “Bintu bidi mu diulu” bidi bileja bela manyi badi Yehowa musungule bua kukokesha ne Kristo mu diulu. “Bintu bidi pa buloba” bidi bileja bantu basomba kashidi mu Mparadizu pa buloba. Batendeledi ba Yehowa bonso aba mbadifile bua kuela mashimi a Satana patoke, ne badi bambuluisha bantu bua bamanye bulelela.

10. Mmushindu kayi udi Yehowa wambuluisha bantu bua bamanye bulelela? (Buakabuluibua 14:6, 7)

¹⁰ Ku ndiambuluisha dia mudimu munene wa diyisha udi wenzeka pa buloba, Yehowa udi wenda usangisha bantu badi basue kumanya bulelela. (Bala Buakabuluibua 14:6, 7.) Nansha mudi Yehowa ukuata mudimu ne bantu bua kuambila bakuabu lumu luimpe, banjelu batu bambuluisha bantu bua kubuela mu tshisumbu tshia bena Kristo. Mudimu wa kuyisha eu udi wela mashimi a Babilona Munene patoke. Padi bantu ba Nzambi bayisha, badi bambuluisha kabidi bantu bua kumvua ne: Diabolo mmuenze mudimu ne bitendelelu bia dishima bua kushiminyina Yehowa malu bikole. (Buak. 18:2, 4) Bakadi pa kubutula bitendelelu bionso bia dishima, ne bantu bonso badi banange Nzambi wa bulelela nebamupeshe butumbi buonso budi bumuakanyine.​—Buak. 17:16.

11. Mmunyi mutudi mua kumanya batendeledi balelela ba Yehowa?

¹¹ Yehowa utu ukoka bantu ba mishindu yonso ne ba miaba yonso mu tshisumbu. (Buak. 7:9, 10) Patu bantu abu bumvua “lumu luimpe,” batu bafika ku dimona bipepele ne: malu adibu babalongesha au mmalelela ne batu bitaba bua kudisanga ne bantu ba Yehowa. (Mâko 13:10) Lelu eu, mbipepele bua kumanya bantu badi batendelela Yehowa mu mushindu udiye wanyisha. Muprofete Malaki ukavua muambe ne: “Nenumone kabidi dishilangana pankatshi pa muntu muakane ne muntu mubi, pankatshi pa muntu udi wenzela Nzambi mudimu ne udi kayi umuenzela mudimu.” (Mal. 3:18) Bienzedi bia bantu ba Yehowa ne mudimu wa kuyisha udibu benza, bidi bileja mudibu batendelela Nzambi wa bulelela.

12. Mmunyi mudi mudimu wa kuyisha wambuluisha bua kukumbaja tshivua Yehowa mulongolole?

¹² Patudi tuyisha ‘lumu luimpe lua Bukalenge,’ tudi tutumikila dîyi divua Yezu mutume, eku tuenda tukumbaja mulayi wa buprofete. (Mat. 24:14; 28:18-20) Mudimu eu udi wambuluisha bantu ba bungi pa buloba bujima bua kulua bayidi ba Kristo ne bua kupetabu mpunga wa kulua kumutendelela bua kashidi. Edi ndiakalenga dia dikema ditudi nadi bua mudiye ukuata netu mudimu bua kukumbaja malu adiye mulongolole.

TUIKALAYI BATUISHIBUE NE: YEHOWA NEAKUMBAJE MILAYI YENDE

13. Mbanganyi badi Satana utamba kuluisha? Bua tshinyi?

¹³ Satana Diabolo udi ne tshiji tshikole bualu bu mukadibu pa kubutula ndongoluelu wa malu eu, mmumanye ne: “udi ne tshikondo tshîpi.” (Buak. 12:12, 13) Udi uluisha nangananga bela manyi badi Yehowa musungule bua kukokesha mu Bukalenge buende. Bobu ke “badi batumikila mikenji ya Nzambi ne badi ne mudimu wa kufila bumanyishi bua Yezu.” (Buak. 12:17; 14:12) Satana udi uluisha kabidi muntu yonso udi ubambuluisha ne ubelesha diboko mu mudimu udibu benza.

14. Ntshinyi tshienzeka pikala Satana mua kubunda bantu ba Yehowa? (Tangila kabidi tshimfuanyi.)

¹⁴ Pikalabu bamane kubutula Babilona Munene, bena dia Satana nebakebe bua kubutula bantu ba Yehowa. Dîba adi ke diatuadija mvita ya Armagedone. (Buak. 16:13, 14, 16) Yezu ne biluilu bia mu diulu nebasungile batendeledi ba Yehowa ne nebabutule bishadile bionso bia mu buloba bua Satana ebu. (Buak. 19:19-21) Bantu babi ne bena mashimi bonso kabakuikalaku kabidi to. (Buak. 21:8) Muntu yonso neamanye ne: Yehowa utu anu wenza malu makane ne wamba bulelela.

15. Ntshinyi tshidi tshitujadikila ne: Yehowa neakumbaje milayi yende? (Yeshaya 65:16, 17) (Tangila kabidi tshimfuanyi.)

¹⁵ Bantu ba bungi pa buloba lelu badi belangana mvita ne bashimangana bikole. Kadi Yehowa utu wambuluisha batendeledi bende bua bikale anu mu buobumue. Udi wenda usangisha bantu bonso badi basue kulonga bulelela mu dîku diende. Kakuena tshidi mua kumupangisha bua kubenesha bantu bende ne mudimu udibu bamuenzela to. (Bala Yeshaya 65:16, 17.) Tudi batuishibue ne: Yehowa neakumbaje milayi yende. Mêyi a mupostolo Paulo adi mu Lomo 8:38, 39 adi atujadikila ne: “Ni ndufu, ni mmuoyo, ni mbanjelu, ni mmbulamatadi, ni mmalu a mpindieu, ni mmalu atshilualua, ni mmakokeshi, ni mbutumbuke, ni nndondo, ni ntshifukibua kayi tshikuabu tshionso, kabiena mua kutupandulula ku dinanga dia Nzambi didi mu Kristo Yezu Mukalenge wetu nansha.”

16. Bua tshinyi tudi tueyemena Yehowa ne muoyo mujima?

¹⁶ Tudi tueyemena Yehowa, Nzambi wa bulelela, bualu udi Mufuki wetu, mmutunange bikole, ne udi wenda usangisha bantu ba pa buloba bujima mu dîku diende bua bamuenzele mudimu. (Yesh. 60:22; Zek. 8:23) Tudi bamanye ne: utu anu ukumbaja malu atuye wamba, ne ukadi pa kubutula Satana bua mashimi onso ajike pa buloba. Tudi tusambila anu bu Davidi ne: ‘Yehowa Nzambi atumbishibue, udi wenza malu a kukema yeye nkayende. Dîna diende dia butumbi ditumbishibue kashidi, Butumbi buende buwuje buloba bujima.’​—Mis. 72:18, 19.