Mua kulama bulunda butudi badie ne bena Kristo netu

1. Nkuepi kutudi mua kupetela balunda balelela?

NSOMBELU mmukole mu matuku a ku nshikidilu atudi aa. Kadi bu tuetu katuyi ne balunda balelela, nsombelu uvua mua kulua kabidi mukole menemene. Bu muvua Yehowa mumanye bualu ebu, mmuenze bua tuikale ne mushindu wa kubapeta munkatshi mua batendeledi bende. (Mis. 119:63) Tudi mu dîku dia batendeledi ba Yehowa badi banangangane.

2. Mbulunda bua mushindu kayi butudi ne bua kudia ne bena Kristo netu?

² Bulunda butudi basue kudia ne bena Kristo netu ki mbua tshidingishilu anyi bua pamutu pamutu to, kadi tudi basue kudia nabu bulunda bushême ne bua pa muoyo. Tudi mu dîku dia batendeledi ba Yehowa badi bamunange ne banange Yezu. Dinanga adi ke didi dienza bua tuikale mu buobumue. (Yone 13:35) Katutu tudia bulunda ne bena Kristo netu ku mpukapuka to, bitu bilomba kudienzeja. Bu mutudi tuetu bonso bapange bupuangane, tudi anu mua kupeta ntatu idi mua kunyanga bulunda buetu.

3. Bua tshinyi bidi mua kutukolela bua kulama bulunda butudi badie ne bena Kristo netu?

³ Mu bulelela, tutu tulamata bamue bantu bikole kupita mutudi balamate bakuabu. Bua tshinyi? Pamuapa bualu tudi banange nabu bintu bia muomumue anyi bualu tudi tuela nabu meji ne tuenza malu mu mushindu wa muomumue. Kadi bidi mua kutukolela bua kulama bulunda butudi badie ne bamue bana betu mu tshisumbu. Imue misangu tudi mua kubenga kupetangana nabu ku amue malu, bienza bua bitukolele bua kunangangana. Pamuapa bu mutudi katuyi tuela meji ne tuenza malu bu bobu, tudi mua kumvua bibi patudi tusomba nabu. Misangu mikuabu padi bana betu basama bikole anyi padibu ne malu mabatonde, bidi mua kutukolela bua kulama bulunda butudi badie nabu. Mu tshiena-bualu etshi netumone mudi tshilejilu tshia Yezu mua kutuambuluisha bua kulama bulunda buetu patudi tutuilangana ne ntatu. Kadi tuanjayi kumona mudi kuidikija Yehowa mua kutuambuluisha bua kulama bulunda butudi badie ne bena Kristo netu.

KUIDIKIJA YEHOWA KUDI MUA KUTUAMBULUISHA BUA KULAMA BULUNDA BUETU

4. Mmunyi mutudi mua kukolesha bulunda buetu ne bena Kristo netu?

⁴ Bua kukolesha bulunda buetu ne bena Kristo netu, mbimpe tumanye ngikadilu yabu mimpe. Nunku bua tuetu kuyivuluka, mbimpe tuikale tusomba nabu. Mupostolo Paulo uvua ujinga ne muoyo mujima bua kusomba ne bena Kristo nende. Wakafundila bena ku Tesalonike ne: “Tuakadienzeja bikole bua kunumona mpala ne mpala.” (1 Tes. 2:17) Bana betu ba bungi mbamone ne: kusomba ne bena Kristo bua kuyukila nabu mpala ne mpala ke mushindu mutambe buimpe wa kukolesha bulunda buabu. Tudi ne mpunga ya bungi ya kuyukila nabu patudi tuyisha nabu, tubuela nabu mu bisangilu, mu mpuilu, ne mu mpungilu. Kadi tuetu tshilumbu ne muntu, kusomba nende pamue nkayaku kakuena mua kuenza bua malanda etu alengele to.

5. Ntshinyi tshidi mua kutuambuluisha bua kulama bulunda buetu patudi tutuilangana ne malu adi mua kubunyanga? Fila tshilejilu. (Kolosayi 3:12)

⁵ Tuetu bidikije Yehowa nebituambuluishe bua kulama bulunda buetu ne bena Kristo netu patudi tutuilangana ne malu adi mua kubunyanga. (Bala Kolosayi 3:12.) Tuetu ne ngikadilu bu mudi budipuekeshi, lutulu, bulenga, ne luse, netupite bimpe ne bilumbu bidi mua kumueneka pankatshi petu ne kulama bulunda buetu. Tshilejilu, anu mutu mafuta ambuluisha motere bua kuenzawu mudimu bimpe, ke mudi kuikala ne ngikadilu ya Yehowa mua kutuambuluisha bua kusomba bimpe ne bakuabu. Tuakulayi mpindieu bua malu asatu adi mua kunyanga bulunda butudi badie ne bena Kristo netu. Mu bualu buonso, netumone mudi kuidikija ngikadilu ya Yezu bu mudi: budipuekeshi, lutulu, bulenga, ne luse mua kutuambuluisha bua kutungunuka ne kulama bulunda buetu.

PADI NGENYI YENU IBENGANGANA

6. Mmunyi mudi dibenga kupetangana mua kunyanga bulunda buetu?

⁶ Lutatu ludi mua kumueneka. Pa tshibidilu patu bantu babidi bakokangana, yonso wa kudibu utu wela meji ne: mukuabu ke udi mu tshilema. Tshilejilu, bana betu ba balume babidi badi mua kubenga kupetangana bua mushindu mutambe buimpe udibu mua kuyisha mu teritware wa tshisumbu tshiabu. Yonso wa kudibu mmutuishibue ne: lungenyi ludiye mufile nduimpe lupite lua mukuabu. Dîba dia buena adi, mbipepele bua dibenga kupetangana bua kabualu kakese dilue tshilumbu tshinene tshidi mua kunyanga bulunda buabu. Badi mua kulekela lutambishi lubanyanga. Bobu kabayi bayukile bua kukeba tshia kuenza, badi mua kushala balaminangane munda. Padi matuku enda apita, badi mua kubanga kuepukangana ne bulunda buabu bufuane kufua; bionso abi anu bua kabualu kakese patupu.

7. Mmushindu kayi uvua Yezu mulongeshe bayidi bende bua bamanye ne: budipuekeshi ke buvua mua kubambuluisha bua kujikija bilumbu?

⁷ Budipuekeshi bua Yezu bukulongeshe. Yezu wakalongesha bayidi bende ne: budipuekeshi ke buvua mua kubambuluisha bua kujikija bilumbu. Bayidi bende bavua bakokangana misangu ne misangu bua kumanya uvua munene munkatshi muabu. Bavua basamisha mutu bikole bua bualu abu. Nunku bua Yezu kubambuluisha bua kushintululabu lungenyi luabu, wakambila yonso wa kudibu bua kikadi udimona mupite bakuabu to. (Mat. 20:25-28) Uvua ubalongesha mua kuikala ne budipuekeshi. Nansha butuku kumpala kua Yezu kufua, wakadipuekesha kuoweshaye bayidi bende mâyi ku makasa, mudimu uvua bena mudimu ne bua kuenza; ‘kubashilaye tshilejilu.’ (Yone 13:3-5, 12-16) Pavuaye muenze nanku, wakabaleja muvuabu mua kulama bulunda buabu. Bobu bamona bakuabu bu babapite, bivua ne bua kuikala bipepele bua bobu kuitaba lungenyi ludi bakuabu bafile nansha biobi ne: bavua mua kuikala ne mmuenenu mukuabu. Dîba adi bivua ne bua kuikala bipepele bua kulama bulunda buabu nansha pavuabu kabayi bapetangana mu amue malu.

8. Mmunyi mudi budipuekeshi mua kunuambuluisha bua kulama bulunda buenu panudi nukokangana? (Kolosayi 3:13) (Tangila kabidi bimfuanyi.)

⁸ Tshia kuenza bua kulama bulunda buenu. Budipuekeshi ke budi mua kunuambuluisha bua kulengulula tubilema tunudi mua kuenzelangana ne kufuilangana luse ne muoyo mujima. (Bala Kolosayi 3:13.) Nuenu ne budipuekeshi, nebinuambuluishe bua kubenga kufiika munda panudi nukokangana, ne nenulame anu bulunda buenu. (Mis. 4:4) Nansha biobi ne: nuvua bambangane mêyi mabi, vulukayi ne: tuetu bonso tutu anu tutupakana mu diakula. (Muam. 7:21, 22) Yonso wa kunudi udi mua kudiebeja ne: ‘Dilama bulunda buetu ke didi ne mushinga wa bungi anyi ndikeba bua kudibingisha?’ Udi nansha mua kuitaba bua kutua ku tshia mukuebe. Wewe kuyi mulue kupingana kabidi ku bualu abu panyima pa matuku, nebikuambuluishe bua kuikala ne ditalala mu lungenyi.

9. Mmunyi mudi budipuekeshi mua kunuambuluisha padibi bikole bua kujikija bilumbu bienu? (Nsumuinu 17:9)

⁹ Budipuekeshi budi kabidi mua kunuambuluisha padibi bikole bua nuenu kujikija bilumbu bienu. Kukokianganyi ne mulunda webe bua kuleja ne: wewe udi mubinge yeye mmupile to. (Bala Nsumuinu 17:9; 1 Kol. 6:7) Wewe uvuluka anu ne: tshipatshila tshienu ntshia kulama bulunda buenu, nebikuambuluishe bikole. Kudi bena Kristo ba bungi badi bajikije bilumbu biabu anu bualu bavua bayukidilangane bimpe. (Mis. 34:14) Udi mua kuambila mulunda webe ne: ‘Tudi balunda kukadi matuku a bungi; tudiku mua kuyukila bua tumone tshia kuenza bua tshidi tshienzeke etshi anyi?’ Ikala mudiakaje bua kuitaba tshilema tshiudi pebe mua kuikala muenze, muudi mumunyingalaje, ne bua kumulomba luse. Muena Kristo nebe yeye mukulombe luse, dipuekesha ne mufuilalu. (Luka 17:3, 4) Vuluka ne: tshipatshila tshiebe ki ntshia kumanya udi mubinge ne udi mupile to, kadi ntshia kujikija bilumbu ne kulama bulunda buenu.​—Nsu. 18:24.

PANUDI NE BIKADILU BISHILANGANE

10. Mmalu kayi adi mua kuenza bua bitukolele bua kulama bulunda buetu?

¹⁰ Lutatu ludi mua kumueneka. Bidi mua kutukolela bua kudia bulunda ne bena Kristo badi ne ngikadilu mishilangane ne yetu. Bamue badi mua kuikala ne ngikadilu itudi katuyi banange to. Bakuabu badi mua kuikala benza malu mu mushindu kampanda bualu muntu uvua mubenzele bibi ku kale anyi bualu mbakolele muaba utu bantu kabayi bakula badilekelele peshi muaba utu bantu bakula bikole. Misangu mikuabu tudi mua kuikala bashilangane anu bualu eu mmusue kuikala muaba udi bantu, kadi mukuabu yeye katu musue nanku to.

11. Ntshinyi tshivua tshiambuluishe Yezu bua kulama bulunda buvuaye mudie ne bantu bavua ne bikadilu bishilangane ne biende?

¹¹ Lutulu lua Yezu lukulongeshe. Yezu wakalama bulunda buvuaye mudie ne bantu bavua ne bikadilu bishilangane ne biende. Tshilejilu, mupostolo Yakobo ne mupostolo Yone bakaleja muvuabu basue kupeta miaba mibandile mu Bukalenge bua Nzambi. (Mâko 10:35-37) Kadi Yezu yeye uvua ne budipuekeshi, bualu wakashiya muaba wa butumbi uvuaye nawu mu diulu ne mudimu wa mushinga uvuaye nawu bua kulua pa buloba. (Filip. 2:5-8) Mushindu uvua Yezu umona malu uvua mushilangane bikole ne uvua mupostolo Yakobo ne mupostolo Yone baamona. Nansha nanku, uvua anu ubenzela bobu ne bantu bakuabu malu ne lutulu.

12. Ntshinyi tshivua tshiambuluishe Yezu bua kuenzela bayidi bende malu ne lutulu?

¹² Yezu uvua mumanye ne: kuvua misangu ivua bayidi bende mua kupanga kumona malu mu mushindu muimpe. Uvua mumanye kabidi ne: bayidi bende ba bungi bavua banange pabu miaba mibandile anu bu Yakobo ne Yone. (Mâko 9:34) Yezu uvua mukolele pende muaba uvua bantu ne lungenyi lua buena alu. Tshikondo atshi, bamfumu ba bitendelelu bavua bakankamija bantu bua kukeba miaba mibandile; nunku uvua umvua tshivua tshienza bua bayidi bende bikale ne lungenyi alu. Nansha nanku, uvua anu nabu lutulu, kubapeshaye dîba dia kudienzeja bua kulekela lutambishi ne lungenyi lua kukeba miaba mibandile luvuabu babueje mu mioyo yabu munkatshi mua bidimu bia bungi.​—Mâko 10:42-45.

13. Mmunyi mudi lutulu lutuambuluisha bua kulama bulunda buetu? (Efeso 4:2)

¹³ Tshia kuenza bua kulama bulunda buenu. Dienzejayi bua kuikala ne lutulu lua bungi luanuambuluisha bua kubenga kufiika munda padi bena Kristo nenu ne bikadilu bidi binutonda. (Nsu. 14:29) Muntu yonso udi ne muenda mudiye, ne ngikadilu ya bungi itutu nayi kayitu anu mibi to. Tutu tusanka patu bakuabu batuitaba anu ne ngikadilu yetu ayi. (Bala Efeso 4:2.) Nunku mbimpe tuetu petu tuikale tuitaba bakuabu ne ngikadilu idibu nayi ayi. Tshilejilu, tufuanyikijayi mutubi bilomba muntu utu ne bundu ne lumamamama bua kudienzeja bua kuikala kusomba ne bakuabu ne kuyukila nabu. Kadi bitu bilomba kabidi kuikala lutulu ne muntu utu musue anu kuikala muaba udi bantu ne kuakula bikole. Katukebi bua kudia bulunda bushême ne bantu bonso to, kadi mbimpe tuikale anu bamanye ne: nansha bantu badi ne bikadilu bishilangane badi anu mua kuenza mudimu pamue bimpe.

14. Tuetu ne lutulu, netutambe kukeba malu kayi kudi bakuabu?

¹⁴ Lutulu ke ludi mua kutuambuluisha bua kutamba kumona ngikadilu mimpe ya bena Kristo netu. Patudi tuenza nanku, katuakumona dishilangana dietu dia bikadilu bu bualu budi butupangisha bua kulama bulunda buetu to. Tshilejilu, Yakobo ne Yone bakakeba ne lutambishi luonso bua kumanyika ne kupeta miaba mibandile; bivua bileja muvuabu batuishibue ne: Bukalenge bua Nzambi buvua ne bua kulua. Yezu wakamona muvuabu ne ditabuja, kubalejaye dianyisha. Patudi tukeba malu mimpe adi kudi balunda betu, tudi tuidikija Yezu ne Tatu wende Yehowa.

15. Nnganyi udi mua kutuambuluisha bua kulama bulunda butudi badie ne bena Kristo netu badi ne bikadilu bishilangane ne bietu?

¹⁵ Tshidi ne mushinga wa bungi kupita bionso ntshiotshi etshi: tudi mua kusambila, kulomba Yehowa atuambuluishe bua tulame bulunda butudi badie ne bena Kristo netu badi ne bikadilu bishilangane ne bietu. Dianjila kuela meji a nsombelu idi mua kuenza bua ukuatshile muena Kristo nebe tshiji, ne sambila kumpala kua dîba bua wikale anu mutukije. Vuluka ne: Yehowa Mufuki wetu mmumanye ne: tuetu bonso tudi bashilangane. Nunku paudi usambila, ikala mutuishibue ne: Yehowa mmumanye biudi nabi dijinga bua kutungunuka ne kunanukila. Wewe mumone ne: mbikole bua wewe kuikala ne lutulu, lomba Yehowa nyuma wende bua akuambuluishe bua kutukija.​—Luka 11:13; Gal. 5:22, 23.

PADI BENA KRISTO NETU BAKENGA

16. Ndutatu kayi lutudi mua kutuilangana nalu padi bena Kristo netu bakenga?

¹⁶ Lutatu ludi mua kumueneka. Padi bena Kristo netu bakenga anyi padibu ne tunyinganyinga, badi mua kupatula dîyi anyi kuenza bualu budi mua kutubungamija anyi kutufiikisha munda. Tshilejilu, badi mua kuikala kabatshiyi basue kuyukila ne bantu, bakadi bafiika munda ne bua tumalu tua patupu, anyi bakadi benza malu bishilangane ne mutubu kuonso eku. Badi pamuapa mua kutuamba dîyi dibi anyi kutuenzela bualu bubi. (Yobo 6:2, 3) Bu mutudi katuyi bamanye ntatu idi bena Kristo netu abu mua kuikala nayi, tudi mua kujinga bua benze malu mu mushindu utudi tuetu basue.

17. Mushindu uvua Yezu muenzele Bâtimayo malu udi ukulongesha tshinyi?

¹⁷ Bulenga ne luse bia Yezu bikulongeshe. Yezu uvua umvuila bantu bavua bakenga luse ne uvua ubenzela malu ne bulenga, wenza nanku too ne bua bantu bavuaye kayi mumanye. Tuakulayi bua muvuaye muenzele mpofu kampanda malu, diende Bâtimayo. Pavuaye mumvue ne: Yezu uvua upitshila muaba uvuaye musombe, wakatuadija kuela mbila, ujinga bua Yezu amumone. Bamue bantu bavua mu musumba wa bantu bakambila Bâtimayo bua kupuwa. Kadi bu muvuaye ujinga ne muoyo mujima bua bamuondope, wakatungunuka ne kuela mbila mikole. Pamuapa bamue bantu bavua mu musumba au bakafiika munda bua mbila yende ayi. Kadi “luse luakakuata Yezu,” bileja muvuaye uditeka pa muaba wa Bâtimayo ne muvuaye musue kumuambuluisha. (Mat. 20:34; Mâko 10:46-52) Yezu wakayukila nende ne bulenga buonso, kumuelaye kalumbandi bua ditabuja diende. Wakenza tshishima, Bâtimayo kutuadijaye kabidi kumona.

18. Mmunyi mutudi mua kuenzela balunda betu badi bakenga malu? (1 Tesalonike 5:14)

¹⁸ Tshia kuenza bua kulama bulunda buenu. Ikala ne bulenga ne luse. Ngikadilu eyi neyikuambuluishe bua “kuakula ne mêyi a busambi” kudi bena Kristo nebe badi basama anyi badi ne tunyinganyinga. (Bala 1 Tesalonike 5:14.) Vuluka ne: mulunda mulelela utu anu pabuipi bua kuambuluisha bakuabu, nangananga mu “bikondo bia dikenga.” (Nsu. 17:17) Mulunda wa nunku utu uditeka pa muaba wa badi bakenga ne wenza muende muonso bua kubakankamija ne wenza malu kampanda bua kubambuluisha.

19. Mmunyi mutudi mua kuenzela bakuabu malu ne bulenga ne kubaleja luse? (Tangila kabidi bimfuanyi.)

¹⁹ Ngimue mishindu kayi itudi mua kuenzela bakuabu malu ne bulenga ne kubaleja luse? Mu bulelela, katuena mua kujikijila bena Kristo netu ntatu yabu to. Kadi tudi mua kuteta kumvua ntatu idibu nayi ne mudibu badiumvua. (Mat. 7:12; 1 Pet. 3:8) Bateleja ne ntema padibu bakulondela lutatu luabu, ne koku mushindu mbimpe ubakankamije. (Nsu. 12:25) Dimuka bua kuedi meji ne: ukadi mumanye lutatu luabu bimpe menemene to. (Nsu. 18:13) Dienzeja bua kuikala nabu lutulu ne kukebi bua benze malu bu bantu bapuangane to.​—Ef. 4:32.

20. Mbimpe tuikale balunda ba mushindu kayi?

²⁰ Tutu banange balunda batudi nabu mu bulongolodi bua Yehowa. Kadi tuetu bonso tudi bantu bapange bupuangane ne kudi misangu ikadi malu mabi mafikile ba bungi ba kutudi. Ke bualu kayi tutu imue misangu tuenza malu anyi tuamba mêyi adi anyingalaja bakuabu. Nunku tutu ne dianyisha bua mudi bena Kristo netu ne budipuekeshi, batuenzela malu ne lutulu ne bulenga, batufuila luse ne bitaba bua tutungunuke anu ne kuikala balunda. Ke bualu kayi, mbimpe tuetu petu tuikale balunda ba nunku kudi bakuabu ne tubaleje petu ngikadilu eyi.