Ikala mutuishibue ne: Yehowa neakukube

1-2. Mmalu kayi a dikema akadi pa kuenzeka?

TUDI ku ndekelu kua matuku a ku nshikidilu. Mu matuku makese emu, malu a dikema neenzeke. Yehowa neateke “lungenyi luende” mu mioyo ya bena mbulamatadi. Lungenyi alu ndua ne: ‘bafile bukalenge buabu kudi nyama wa luonji,’ mmumue ne: kudi Matunga masanga.a (Buak. 17:17) Pashishe, matunga masanga au ne mbulamatadi yonso idi imutua mpanda nebibutule bitendelelu bionso bia dishima butubutu. (Buak. 17:16) Atshi netshikale ntuadijilu wa dikenga dinene. Kadi ntshinyi tshienzeka pashishe?

² Pashishe, mbulamatadi ya pa buloba bujima neyidienze tshimuku bua kuluisha bantu ba Yehowa. (Yeh. 38:14-16) Bua tshinyi? Mukanda wa Ntendelelu mukezuke wa Yehowa mmujadikulula udi wamba ne: “Satana neasake bisamba bua kubutula batendeledi balelela ne kujimija ntendelelu mukezuke pa buloba.” Pashishe, bualu bunene menemene nebuenzeke, mmumue ne: mvita ya Armagedone neyituadije. Yezu ne bela manyi binunu 144 ne banjelu nebasungile bantu ba Nzambi, kadi nebabutule bantu babi. Pabutulabu bulongolodi bua Satana, bulongolodi bupiabupia nebupingane pa muaba wabu.​—Buak. 16:14-16; 19:11-21.

3. Mmalu kayi atuakuila mu tshiena-bualu etshi?

³ Tudi ne bua kumvua buôwa pikala Yezu ne tshiluilu tshiende mua kubutula ndongoluelu wa Satana eu ku mvita ya Armagedone anyi? Tòo! Bua tshinyi? Bualu Yehowa mmulaye bua kutukuba. Mmufundishe mulayi eu mu Misambu 91:7 udi wamba ne: “Bantu tshinunu nebakuluke ku luseke luebe ne bantu binunu 10 ku tshianza tshiebe tshia bakaji, kadi bualu nansha bumue bua buena ebu kabuakusemena pabuipi nebe.” Tukonkononayi Misambu 91 bua kuandamuna nkonko idi ilonda eyi: Mbukubi bua mushindu kayi budi Yehowa mutulaye mu musambu eu? Yehowa udi utukuba mushindu kayi lelu? Neatukube mushindu kayi matuku atshilualua? Tuanjayi kuakula bua tshidi muimbi wa misambu mufunde mu Misambu 91.

MUSAMBU EU UDI UTUSHINDIKILA NE: YEHOWA NEATUKUBE

4. Mmunyi mudi Misambu 91:1, 2 utujadikila ne: Yehowa neatukube?

⁴ Bualu bunene budi mu Misambu 91 budi ne: Yehowa neakube bonso badi bamueyemena. Ke tshidi mvese wa kumpala ne muibidi ileja. (Bala Misambu 91:1, 2.) Yehowa ngua Bukole Buonso. Ke bualu kayi tudi batuishibue ne: tuetu bamueyemene, udi utukuba. (Luta 2:12; Mis. 17:8) Miaku eyi: “tshinyemenu” ne “muaba mukolesha wa kusokomena” idi ituvuluija bimenga bia tshikondo tshia kale bivua bibaka ne bimanu bua kukuba benamu. Nansha bantu ba miaba mikuabu bavua banyemena mu bimenga abi bua baluishi babu kababenzedi bibi to. Mu mvese idi ilonda, muimbi wa misambu mmufile bilejilu bidi bitushindikila ne: Yehowa udi mua kukuba batendeledi bende nansha bobu kumpala kua njiwu ya mushindu kayi.​—Mis. 91:3-13.

5-6. a) Ntshinyi tshidi Yehowa utulaya mu Misambu 91:14-16? b) Bua tshinyi tudi mua kuitaba mulayi au?

⁵ Mu Misambu 91:14-16 mudi mêyi adi atukolesha bikole. Bualu mu mvese eyi, ki mmuimbi wa misambu udi wakula kabidi to, kadi Yehowa nkayende ke udi wakula, ulaya bua kukuba batendeledi bende. (Bala Misambu 91:14-16.) Yehowa udi ulayamu bua kukuba bantu bende bualu mbamueyemene, mbamanye dîna diende, ne batu bamusambila. Tudi batuishibue ne muoyo mujima ne: Yehowa katu ushima nansha kakese. Nunku, bionso bidiye ulaya neabikumbaje.​— Yosh. 23:14; Nom. 23:19.

⁶ Yehowa uvua musake muimbi wa misambu bua kufunda Misambu 91 bua diakalenga dietu. (Lomo 15:4) Tudi petu mua kuambila Yehowa ne dishindika dionso anu bu mufundi wa musambu eu ne: “Wewe udi tshinyemenu tshianyi ne muaba wanyi mukolesha wa kusokomena.” (Mis. 91:2) Kadi mbukubi bua mushindu kayi butudi mua kulomba Yehowa?

MISAMBU 91 UDI WAKULA BUA BUKUBI KAYI?

7. Misambu 91 udi wakula bua bukubi kayi?

⁷ Kumpala mikanda yetu ivua iumvuija ne: Misambu 91 udi wakula anu bua bukubi bua mu nyuma. Tudi batuishibue ne: Yehowa neikale utupetesha bitudi nabi dijinga bua kudikuba mu nyuma ne kukuba bulunda bua mushinga butudi badie nende. Kadi musambu eu udi wakula anu bua bukubi bua mu nyuma anyi? Tòo. Udi uleja kabidi ne: Yehowa neakube bantu bende mu tshibungi ku mubidi, mmumue ne: padi bena lukuna babu bakeba kubashipa; ne neabapeshe ditalala dia mu muoyo padibu mu ntatu. Bua tshinyi tudi tuamba ne: Misambu 91 udi wakula kabidi bua bukubi bua ku mubidi?

8-9. Ntshinyi tshivua Yezu muambe pavua Satana mutete? Bidi bitulongesha tshinyi? (Matayi 4:5-7)

⁸ Tumonayi tshivua Yezu muenze pavua Satana mumutete ne mumutelele mêyi adi mu Misambu 91. (Bala Matayi 4:5-7.) Satana uvua mumanye ne: Misambu 91:11, 12 udi wakula bua bukubi bua ku mubidi. Ke bualu kayi wakateta Yezu, umuambila bua adiele panshi bua kumona bikala banjelu ni bavua mua kumukuba. Ntshinyi tshiakenza Yezu? Kavua muambe ne: ‘Tòo, Satana udi mudishime. Mu musambu au Nzambi ki mmulaye bua kukuba bantu ku mubidi to.’ Kadi uvua mumuandamune ne: “Kuena ne bua kuteta Yehowa Nzambi webe” to. Diandamuna dia Yezu edi didi ditulongesha tshinyi?

⁹ Yezu uvua mumanye bimpe ne: kuvua misangu ivua Tatu wende utuma banjelu bua kukuba bantu bende pavuabu bakeba kubenzela bibi kudi bena lukuna babu. (2 Bak. 6:15-17; 19:34, 35; Dan. 3:19, 20, 26-28; 6:16-22) Kadi Yezu uvua mumanye ne: yeye muenze malu bu muntu kayi ne lungenyi, uvua ulomba Yehowa bua amukube ku mubidi, pabi kabivua bimpe kuteta Yehowa nanku to. Nunku pavua Satana mutele mêyi adi mu Misambu 91, dijinga diende kadivua dia kuleja mudi Yehowa ukuba batendeledi bende ku mubidi to. Kadi divua dia kusaka Yezu bua kuenza bualu bua dibula lungenyi bua kuteta Yehowa.b Mêyi avua Yezu muambe adi atuambuluisha bua kumvua ne: mu Misambu 91, Yehowa mmulaye bua kukuba bantu bende mu tshibungi ku mubidi ne mu nyuma.

10. Ndishindika kayi ditudi nadi?

¹⁰ Mulayi wa Nzambi udi mu Misambu 91 udi utuambuluisha bua kumueyemena. Tudi batuishibue ne: Yehowa utu ukuba bantu bonso badi bamueyemena. Ke bualu kayi, katuena ne bua kumvua buôwa bua malu a dikema akadi pa kuenzeka mu bulongolodi bua Satana ebu to. Tuakulayi mpindieu bua mudi Yehowa utukuba lelu ne muatukubaye matuku atshilualua.

MUDI YEHOWA UTUKUBA LELU

11. Mmunshindu kayi utu Yehowa utukuba mu nyuma?

¹¹ Yehowa utu utukuba mu nyuma. Bidi biumvuija ne: udi utupesha bintu bidi bituambuluisha bua kutshimuna mvita ya mu nyuma, bu mudi mvita itudi tuluangana ne dipanga bupuangane dietu, bua malanda etu nende kaanyanguki to. Yehowa mmumanye bimpe bukole budi nabu mpekatu kutudi. (Lomo 6:16; 7:21-23) Tumonayi imue mishindu ituye utuambuluisha mu mvita eyi.

12-13. Ntshinyi tshitudi mua kuenza bua kutshimuna majinga mabi? (Matayi 5:28, 29)

¹² Dîyi diende. Yehowa mmutuleje mu Dîyi diende malu mabi atudi mua kuepuka ne mushindu wa kuepuka malu au. Tshilejilu, mona tshivua Yezu muambe mu Matayi 5:28, 29. (Bala.) Yezu udi wakula bua muntu “udi utungunuka ne kutangila mukaji mu mushindu wa kumualakana.” Yezu udi wamba bua muntu eu ne: “ukadi muende nende masandi mu muoyo wende.” Bidi bitulongesha tshinyi?

¹³ Tuetu tutungunuka ne kutangila bimfuanyi bia malu a masandi, netutuadije kumvua majinga mabi. Dîba adi mpunga yeye mumueneke, tudi mua kuenda masandi. (Yak. 1:14, 15) Tuetu basue kuepuka majinga mabi au, mbimpe tutumikile mubelu wa Yezu au diakamue. Yezu udi utuambila ne: tudi ne bua kudienzeja bikole bua kushintulula malu. Wakamba ne: “Mpindieu, bikala dîsu diebe dia balume dikulenduisha, uditule, udimanshe kule nebe.” (Mat. 5:29) Nunku bua kulekela majinga mabi, bidi mua kutulomba bua kudienzeja bikole bua kushintulula malu bua kuepuka tshintu tshionso tshidi mua kutupeteshawu. Tshilejilu, mbimpe tudienzeje bua katutangidi bimfuanyi bia malu a masandi to. (Kolos. 3:5) Patudi tutumikila mubelu eu, bidi bituambuluisha bua kukuba bulunda buetu ne Yehowa.

14. Nyuma muimpe utu utukuba mushindu kayi?

¹⁴ Nyuma wende muimpe. Yehowa utu utuambuluisha ne nyuma wende bua tutshimune majinga mabi a mubidi. Tuetu tutungunuka ne kumulombayi, neatupeshayi. (Luka 11:9-13) Nyuma eu udi utukuba mushindu kayi? Mupostolo Paulo udi wamba ne: “Tungunukayi ne kuenda mu diumvuangana ne nyuma, nunku kanuakukumbaja majinga a mubidi nansha.” (Gal. 5:16) Mvese eu udi wakula bua muntu udi wenza muende muonso bua kutumikila Nzambi mu nsombelu wende yonso. Tuetu tumutumikila, neatupeshe nyuma wende muimpe; ne nyuma eu neatuambuluishe bua kuela meji bimpe ne kuenza malu mu mushindu muimpe. Nunku patudi tumvua majinga mabi, nyuma wa Nzambi udi mua kutuambuluisha diakamue bua kubenga kutumaku meji. Nyuma muimpe wa Yehowa katu utujikijila majinga mabi atudi nawu to. Kadi udi mua kutupesha bukole ne dijinga dia kuenza malu mimpe ne kuepuka malu mabi. Dîba adi, tudi tupeta bukubi bua mu nyuma.

15. Mmushindu kayi utu bulongolodi bua Yehowa butukuba mu nyuma? (Tangila kabidi bimfuanyi.)

¹⁵ Bulongolodi buende. Yehowa utu utulongesha malu mu tshikondo tshiakanyine ku diambuluisha dia bulongolodi buende bua kutukuba mu nyuma. Tshilejilu, bu mutudi bantu bapange bupuangane, kudi misangu itutu tumvua bibi menemene bua bilema bitudi benze anyi itutu tumona bu ne: kakuena muntu udi ututabalela, peshi itutu tumvua malu matutonde. Kadi tuadimuka, Satana, “mutetshianganyi” udi mufuane kubuelela pa mushindu utudi tudiumvua au bua atufikishe ku dilekela kuenzela Yehowa mudimu. (Mat. 4:3; 6:13) Bulongolodi bua Yehowa butu butupesha biakudia bia mu nyuma bua kutujadikila ne: Yehowa udi ne luse, tudi ne mushinga ku mêsu kuende, ne neakumbaje mulayi wende wa kutupetesha bitudi nabi dijinga. (Mis. 86:5; Mat. 10:29-31; Luka 12:28; Eb. 13:5) Ukadi pamuapa mubale bualu kampanda mu mikanda yetu buvua bukulenge bikole ku muoyo, bikufikishe ku diamba ne: ‘Ebu mbabumfundile meme’ anyi? Bidi bileja ne: Yehowa utu utulongesha malu mu tshikondo tshiakanyine bua kutukuba mu nyuma.

16. a) Ntshinyi tshidi tshifikile bamue batendeledi ba Yehowa? Bua tshinyi? b) Yehowa neenzele batendeledi bende tshinyi?

¹⁶ Yehowa kakuitaba bua bena lukuna bende bashipe batendeledi bende bonso mu tshibungi to. Kadi kudi misangu ikadiye mulekele bakengesha bamue batendeledi bende, muntu pa nkayende, anyi mene babashipa. Yehowa utu ulekela nanku bua kujadika mudi Satana muena dishima. (Buak. 2:10; 6:9) Kadi Satana utu musue bua bena lukuna bashipe batendeledi ba Yehowa ba bungi. Patubu babashipa bakese tshianana, katu usanka to. Udi ne tshiji tshikole, musue bua bena lukuna bashipe batendeledi ba Yehowa bonso. (Mat. 24:9; Buak. 12:9-12) Kadi abu bualu kabuakuenzeka nansha kakese! Tudi batuishibue ne: Yehowa udi wenza mudimu ne banjelu bua kukuba bantu bende mu tshibungi bua batungunuke ne kumutendelela ne kuyisha malu ende.​—Eb. 1:7, 14.

17. Mbualu kayi budi butusaka bua katutekemenyi ne: Yehowa neatukube ku tshintu tshionso tshidi mua kutuenzela bibi ku mubidi lelu eu?

¹⁷ Yehowa katu utukuba, muntu pa nkayende, ku tshintu tshionso tshidi mua kutuenzela bibi ku mubidi to. Tuetu tutumikila mêyi manene a mu Bible, netuepuke malu ne nsombelu bidi mua kutukebela njiwu ya ku mubidi. (Nsu. 14:29, 30; 22:3; 2 Kol. 7:1) Kadi katutekemenyi ne: Yehowa neatukube ku tshintu tshionso tshidi mua kutuenzela bibi ku mubidi lelu eu to. Bualu yeye utukuba mushindu au, bantu mbafuane kuitaba dishima dia Satana dia ne: tudi tuenzela Yehowa mudimu anu bualu udi utukuba. (Yobo 1:10, 11) Kadi patudi tushala ne lulamatu kudi Yehowa nansha padibu batukengesha, tudi tuleja mudi Satana muena dishima ne mutudi tuenzela Yehowa mudimu bualu yeye ke Nzambi mulelela ne tudi bamunange. (Lomo 9:22) Mu matuku makese emu, Yehowa kakulekela kabidi bua batendeledi bende bakengeshibue to. Lelu eu, neatungunuke anu ne kutuambuluisha bua tumutumikile ne tushale balunda bende banene too ne pabutulaye bena lukuna bende bonso.​—1 Kol. 10:13; 1 Pet. 5:10.

MUATUKUBA YEHOWA MATUKU ATSHILUALUA

18. Yehowa neakube bantu bende mushindu kayi matuku atshilualua?

¹⁸ Mu tshikondo tshia dikenga dinene, Yehowa neatungunuke ne kutukuba mu nyuma. Kadi bua ku mubidi? Pikala mbulamatadi ya pa buloba apa mua kubunda bantu ba Nzambi, Yehowa kakulekela bashipa batendeledi bende bonso to. (Yeh. 38:1, 2, 10-16) Neatume Yezu ne tshiluilu tshiende tshia mvita bua kukuba bantu bende. Ke dîba diatuadija mvita ya Armagedone adi. Yezu ne tshiluilu tshiende etshi nebaluangane ne bena lukuna ba Nzambi. (Buak. 17:12-14; 19:11, 14, 15) Yehowa neakube bantu bende mushindu kayi mu mvita ya Armagedone?

19-20. Bua tshinyi katuena ne bua kuikala ne buôwa bua muikalabu mua kubutulabu bulongolodi bubi ebu ku mvita ya Armagedone? (Tangila kabidi tshimfuanyi.)

¹⁹ Katuikadi ne buôwa bua muikalabu mua kubutulabu bulongolodi bubi ebu ku mvita ya Armagedone to. Bua tshinyi? Bualu tudi beyemene Yehowa, batuishibue ne: neatukube. Kadi tudi batuishibue kabidi ne: muena lukuna wa Nzambi nansha umue kakushala ne muoyo to. (Yel. 25:33; Zek. 14:12) Mu mvita ya Armagedone ayi, bena lukuna ba Nzambi, nansha bobu bantu anyi bademon, kabakushipa mutendeledi wa Yehowa nansha umue to.​—Luka 21:28; 2 Pet. 2:9.

²⁰ Anu mu Mvita ayi, netudimuenene ne etu abidi mudi mêyi avua muimbi wa Misambu mufunde ku bukole bua nyuma aa akumbana: “Bantu tshinunu nebakuluke ku luseke luebe ne bantu binunu 10 ku tshianza tshiebe tshia bakaji, kadi bualu nansha bumue bua buena ebu kabuakusemena pabuipi nebe. Neubumone anu ne mêsu ebe pawamona dinyoka dia bantu babi. Bu muuvua muambe ne: ‘Yehowa udi tshinyemenu tshianyi,’ udi muvuije Mutambe Bunene muaba webe wa kusombela.” (Mis. 91:7-9) Patuadija mvita ya Armagedone, tudi batuishibue ne: Yehowa neatukube ku mubidi ne mu nyuma mu tshibungi ne muntu pa nkayende. Bu muudi wamba ne: “Yehowa udi tshinyemenu tshianyi,” yeye pende udi ukulaya ne: “Bualu nansha bumue bua buena ebu kabuakusemena pabuipi nebe.” Nunku katuikadi ne buôwa bua malu enzeka matuku atshilualua to. Tueyemenayi anu Yehowa, batuishibue ne: neatukube.