Ikalayi bena dianyisha

1. Bualu bua muanetu John budi butulongesha tshinyi? (Tangila kabidi bimfuanyi.)

MUANETU wa balume mukuabu wa bidimu 95, diende John,a uvua usama bikole ne kuvua bantu bavua bamulama. Dituku dionso pavua muntu uya kumutangila anyi pavua muntu umuenzela bualu kampanda buimpe nansha bua bukese, uvua umuela tuasakidila, pashishe ufunda dîna diende mu kakanda. Pavua dilolo dikumbana, uvua ulomba muntu uvua umulama bua amuambuluishe bua atue binu ku bulalu buende bua amone mua kusambila. Uvua wela Yehowa tuasakidila bua muntu yonso uvua mumuenzele bualu buimpe dituku adi. Umue wa ku bana betu bavua bamulama wakamba ne: “Nansha muvua John utata amu, uvua anu ne disanka dia bungi ne kavua udiabakena to.” Bualu bua muanetu John budi butulongesha ne: kuikala bena dianyisha kudi kutuambuluisha bua kuikala ne disanka, nansha mu ntatu.

2. Ntshinyi tshidi bantu ba bungi bapangile lelu eu?

² Bia dibungama, lelu bantu ba bungi kabena ne dianyisha to. Bible ukavua muambe ne: mu matuku a ku nshikidilu atudi aa, bantu kabavua ne bua kuikala ne dianyisha to. (2 Tim. 3:1, 2) Bamue badi mua kupua muoyo bua kuela bakuabu tuasakidila bua bidibu babenzele. Kadi bua ba bungi, kuelangana tuasakidila kakuena ne mushinga to. Buabu bobu, bantu bakuabu mbenzejibue bua kubenzela malu mimpe. Atshi mbudinangi!

3. Mmalu kayi atuakuila mu tshiena-bualu etshi?

³ Batendeledi ba Yehowa badi ne bua kushilangana ne bantu badi kabayi ne dianyisha lelu. Mupostolo Paulo udi utuambila ne: ‘Nuikale bena dianyisha.’ (Kolos. 3:15) Nunku tuetu ne dianyisha bua tshidi muntu mutuenzele, mbimpe tukebe mishindu ya kumulejadi. Tuakulayi mpindieu bua malu asatu aa: 1) Tshidi tshitusaka bua kuikala ne dianyisha, 2) tshia kuenza bua kuikala ne dianyisha, ne 3) mua kuleja bakuabu dianyisha.

TSHIDI TSHITUSAKA BUA KUIKALA NE DIANYISHA

4. Kupanga kuikala ne dianyisha nkubi bua tshinyi?

⁴ Tudi tudienzela bibi patudi katuyi ne dianyisha. Bantu batu kabayi ne dianyisha kabatu ne disanka to. Bible udi wamba ne: “Matuku onso a muena dikenga mmabi.” (Nsu. 15:15) Kudi misangu itutu tuetu bonso tutuilangana ne malu adi atutekesha mu mikolo. Katuena mua kuajikija misangu yonso to, kadi tudi mua kusungula bua kuamona mu mushindu kampanda anyi kansanga. Tuetu tutuma anu meji ku malu au, dituku dionso nedikale anu ‘dibi’ ku mêsu kuetu, tudiumvua anu babungame. Dîba adi katuakumona ne: tudi ne bualu buimpe nansha bumue to, ne katuakuikala ne disanka to.

5. Mmunyi mudi dianyisha dituambuluisha bua kuikala ne disanka dia bungi?

⁵ Kuikala ne dianyisha nkuimpe buetu tuetu. Dianyisha didi dituambuluisha bua kuikala ne disanka dia bungi. Mêyi a ndekelu a Nsumuinu 15:15 adi amba ne: “Muntu udi ne muoyo musangale udi anu utshionkomoka.” “Muntu udi ne muoyo musangale” utu wimanyina pa malu mimpe adi amusaka bua kuikala ne dianyisha. Ke bualu kayi, katu utamba kutuma meji ku ntatu idiye nayi to. Nunku bidi bimuambuluisha bua kuikala anu ne disanka.

6. Bua tshinyi tudi tuamba ne: kuela Yehowa tuasakidila kudi kutuambuluisha bua kubenga “kusamisha mutu”? (Filipoyi 4:6, 7)

⁶ Bala Filipoyi 4:6, 7. Kuela Yehowa tuasakidila mu disambila kudi kutuambuluisha bua kubenga ‘kusamisha mutu.’ Bua tshinyi tudi tuamba nanku? Bualu patudi tumuleja mutudi ne dianyisha bua bitudi nabi, netutambe kutuma meji ku malu adiye muenze bua kutuambuluisha. Dîba adi katuakusamisha mutu bikole bua tshituikala malaba to. Tuetu tuela meji a mudiye mututabalele too ne lelu, netupete dishindika dia ne: neatutabalele kabidi matuku adi kumpala. Dîba adi katuakusamisha mutu to. (Mat. 6:25-34) Bualu bukuabu, patudi tuela Yehowa tuasakidila mu disambila ne tumulomba diambuluisha, udi umona binsonji bietu ne dikenga dietu. Nunku udi utupesha “ditalala dia Nzambi” didi dituambuluisha bua kushala batukije.

7. Mmushindu kayi udi kuikala ne dianyisha kukolesha bulunda buetu ne Yehowa? (Yakobo 1:17)

⁷ Kuikala ne dianyisha kudi kukolesha bulunda buetu ne Yehowa. Bintu bionso bitudi nabi mbifumine kudi Yehowa. (Bala Yakobo 1:17.) Mmutupeshe bintu bimpe bia bungi, bu mudi tshia kupikulangana natshi ne ditekemena dia kushala ne muoyo kashidi. Ki mmutupeshabi bualu tudi babikumbanyine to, kadi mmutupeshabi bualu mmutunange. (Lomo 3:24; Ef. 2:8) Tuetu tumuela tuasakidila bua bualu abu, bulunda buetu nende budi bukola ne netumumone bu Tatu wetu ne Mulunda wetu.

TSHIA KUENZA BUA KUIKALA NE DIANYISHA

8. Kuelangana meji a malu mimpe akadi Yehowa mutuenzele kudi kutuambuluisha mushindu kayi? (2 Kolinto 4:7)

⁸ Elangana meji a malu mimpe akadi Yehowa mukuenzele. Tshilejilu, ela meji a lutatu kampanda lukole luuvua mutantamene. Pamuapa uvua mufuishe, musame bikole anyi bavua bakukengeshe bua muudi wenzela Yehowa mudimu. Tshivua tshikuambuluishe tshikondo atshi ntshinyi? Udi mumanye bimpe ne: kuvua mutantamene ntatu ayi ku bukole buebe nkayebe to. Kadi udi mutuishibue ne: Yehowa ke uvua mukupeshe bukole buuvua nabu dijinga bua umone mua kuyitantamena. (Bala 2 Kolinto 4:7.) Wewe muele meji a mukadi Yehowa mukuambuluishe, neudiumvue musakibue bua kumuela tuasakidila.​—Mis. 103:2.

9-10. Mmalu kayi mimpe adi Yehowa ukuenzela dituku dionso edi? (Tangila kabidi tshimfuanyi.)

⁹ Elangana meji a malu mimpe adi Yehowa ukuenzela lelu. Bible udi utuambila ne: “Nuele Nzambi tuasakidila bua malu onso.” (1 Tes. 5:18) Ikala uvuluka malu mimpe audi nawu dituku dionso. Wewe uavuluka mu dinda, neupitshishe dituku dijima bimpe. Wewe uavuluka dilolo, neulale bimpe kuyi usamisha mutu to. (Mis. 92:1, 2) Anu bu John utukadi batele, udi mua kufunda malu mimpe adi makuenzekele munda mua dituku. Ngamue malu kayi mimpe audi mua kufunda?

¹⁰ Tuadija kuela meji a malu audi mua kuelela Yehowa tuasakidila dituku dionso. (Mis. 40:5) Udi mua kumuela tuasakidila bua mudiye uteleja masambila ebe, bua malu a mu dîyi diende adi akukolesha ne bua diambuluisha didiye ukupetesha ku butuangaji bua mikanda yetu anyi filme yetu idi mu jw.org. (Mis. 65:2; Mat. 24:45; Lomo 15:4) Ela kabidi meji bua bintu bilenga biudi nabi, bu mudi kamunya kalenga ka dilolo, biakudia bia muenya, ne bua mulunda kampanda muimpe uudi nende utu ukutabalela. Tudi tuela Yehowa tuasakidila bua mudiye mutupeshe muoyo bua tusanke ne bintu bimpe bionso ebi. (Bien. 17:25) Mmalu kayi makuabu mimpe atudi mua kuelela Yehowa tuasakidila lelu eu?​—Ef. 5:20.

11-12. Mmalu kayi mimpe adi bena Kristo netu batuenzela lelu?

¹¹ Ela kabidi meji a malu mimpe audi nawu anu bualu udi mu dîku dia batendeledi ba Yehowa badi bakunange. (Mis. 133:1; Nsu. 18:24) Pamuapa muena Kristo nebe ukadi mukuenzele bualu buimpe anyi mukuambile mêyi avua makukankamije. (Nsu. 12:25; 16:24) Ikala ne dianyisha nansha bua tumalu tukese tudibu bakuenzela. Tuangatabi tshilejilu tshia muanetu wa bakaji kampanda uvua mufuishe kana kende ka bakaji. Pavuaye mu bisangilu, bivua bimukolela bua kuimba misambu. Udi wamba ne: “Umue musangu, muanetu wa bakaji mukuabu uvua mu mulongu mukuabu wa nkuasa wakamona mumvua ndila patuvua tuimba musambu. Ke yeye kulua muaba umvua au kungelaye diboko, pashishe tuetu kuimba nende pamue musambu au too ne ku ndekelu. Biakansaka bua kuikala ne dianyisha dia bungi kudi bena Kristo nanyi.” Tshilejilu etshi tshidi tshileja ne: tudi mua kuikala ne dianyisha bua tumalu nansha tukese tudi bena Kristo netu batuenzela.

¹² Patudi tuvuluka malu mimpe akadi Yehowa mutuenzele ne adiye utungunuka ne kutuenzela, bidi bituambuluisha bua kuikala ne dianyisha. Kadi mmunyi mutudi mua kuleja dianyisha bua malu onso adi Yehowa ne bantu bakuabu batuenzela?

MUA KULEJA DIANYISHA

13. Mmunyi mutudi mua kuleja dianyisha ditudi nadi?

¹³ Mmunyi mutudi mua kuleja dianyisha ditudi nadi? Mupostolo Paulo mumane kutulomba bua tuikale bena dianyisha anu mudi mvese wetu wa nshindamenu uleja, wakamba kabidi ne: “Malu onso anudi nuenza mu mêyi ne mu bienzedi, nuenze malu onso mu dîna dia Mukalenge Yezu, nuela Nzambi Tatu tuasakidila ku butuangaji buende.” (Kolos. 3:15, 17) Tudi mua kuleja muntu dianyisha mu mêyi ne mu bienzedi. Mu mvese wa 17 eu Paulo udi wakula bua kuleja Yehowa dianyisha. Kadi Nzambi wetu utu usanka kabidi patudi tuleja bantu bakuabu dianyisha bua bidibu batuenzele. Tumonayi imue mibelu idi mua kutuambuluisha bua kuleja dianyisha ditudi nadi mu mêyi ne mu bienzedi.

14. Mmushindu kayi utudi mua kuleja bakuabu dianyisha? (Tangila kabidi bimfuanyi.)

¹⁴ Leja dianyisha mu mêyi. Ikala ne tshibidilu tshia kuela bakuabu tuasakidila padibu bakuenzela kabualu kimpe nansha kakese, bu mudi padi muntu ukukanguila tshiibi, ukuela kalumbandi anyi padiye ukukankamija ne mêyi kampanda. Imue misangu, udi nansha mua kufundila muntu mesaje anyi mukanda bua kumuela tuasakidila. Tshilejilu, biobi ne: mukulu kampanda uvua mulue kukukumbula wewe ne bena mu dîku diebe anyi dienu bua kunukankamija, udi mua kumufundila mesaje bua kumuela tuasakidila. (1 Tes. 5:12, 13) Mbimpe wikale kabidi ne tshibidilu tshia kuela bakaji ba bakulu tuasakidila, bualu batu badipangisha dîba dia kusomba ne babayabu badi bakulu abu, babalekela bua baye kuambuluisha bena Kristo nabu.

15. Mmunyi mutudi mua kuleja Yehowa dianyisha mu mêyi etu?

¹⁵ Yehowa ke muntu wa kumpala utudi ne bua kuleja dianyisha mu mêyi etu. Mushindu kayi? Patudi tumusambila ne muoyo mujima. Kadi vuluka ne: kudi mishindu mishilashilangane ya disambila. (Ef. 6:18) Patutu tusambila, tutu tulomba Yehowa tshintu kampanda anyi tutu tumusengelela bua atuambuluishe, pamuapa bua tutantamene lutatu kampanda, bua atupeshe meji bua tumone mua kuangata dipangadika dimpe anyi bua atubuikidile tshilema tshituvua benze. Kadi tudi ne bua kuvuluka bua kuela Yehowa tuasakidila bua malu mimpe a bungi adiye utuenzela. (Mis. 95:2) Abi bidi bitulongesha ne: katuena ne bua kuikala anu tulomba Yehowa bua atuambuluishe patupu to, mbimpe tuikale kabidi tumuela tuasakidila misangu ya bungi.

16. Bua tshinyi mbimpe tuenzele petu bakuabu malu mimpe bua kuleja mutudi ne dianyisha kudibu?

¹⁶ Leja dianyisha mu bienzedi. Muntu yeye mukuenzele bualu buimpe, mbimpe ukebe tshia kuenza bua kumuleja ne: udi ne dianyisha bua bualu budiye mukuenzele abu. Paudi wela bantu tuasakidila ne wenza bualu kampanda bua kuleja muudi ne dianyisha kudibu, neumvue disanka dia bungi. (Bien. 20:35) Nansha bantu abu nebumvue pabu disanka bualu nebamone ne: udi mubanange. Dîba adi bulunda buena nabu budi bushemakana.

17-18. Mmunyi mutudi mua kuleja ne: tudi ne dianyisha kudi Yehowa? (Lomo 12:1)

¹⁷ Mmunyi mutudi mua kuleja ne: tudi ne dianyisha bua bionso bidi Yehowa mutupeshe? Mpatudi tudifila ne muoyo mujima bua kuenza tshidiye musue. (Bala Lomo 12:1.) Bidi biumvuija ne: tudi tutungunuka ne kudifila ne meji etu onso ne bukole buetu buonso bua kuenza malu adi amusankisha. Nngamue malu kayi adi asankisha Yehowa?

¹⁸ Dianyisha ditudi nadi kudi Yehowa bua bionso bidiye mutuenzele ke didi ditusaka bua kudilambula kudiye ne kubatijibua. Tudi tutungunuka ne kufila dîba dietu, makanda etu ne bintu bitudi nabi bua kumuenzela mudimu ne muoyo mujima. Ke bualu kayi tutu tuenza muetu muonso bua kubala dîyi diende dituku dionso ne kuelangana meji a bitudi tubala, kuyisha bantu lumu luimpe, kubuela mu bisangilu lumingu luonso ne kuandamunamu, ne kufila kabidi bintu bietu bua kutua malu a Bukalenge mpanda. (Mis. 1:2, 3; 2 Kol. 8:4; Eb. 10:24, 25; 13:15) Patudi tuenzela Yehowa mudimu ne muoyo wetu wonso, bidi bileja mutudi ne dianyisha dia bungi kudiye.​—Kolos. 3:23, 24.

19. Bua tshinyi udi mudisuike bua kuleja Yehowa ne bantu bakuabu dianyisha?

¹⁹ Nansha mutudi mu buloba mudi bantu kabayi ne dianyisha, tuetu tudi ne malu adi atusaka bua kuikala nadi. Tudi bamanye ne: dianyisha didi diambuluisha bua kuikala ne disanka dia bungi, didi dikepesha tunyinganyinga tutudi natu, ne didi nangananga dikolesha bulunda buetu ne Yehowa. Patudi tuelangana meji a malu mimpe akadi Yehowa mutuenzele ne adiye utuenzela lelu, dianyisha dietu kudiye didi divula. Tudisuikayi bua kuleja bakuabu dianyisha ditudi nadi mu mêyi ne mu bienzedi, kadi tutambe kudileja Yehowa. Dîba adi, bu mudi Nzambi wetu ne dianyisha, neatufute malu mimpe a bungi ashala kashidi.​—Mis. 106:1; Eb. 11:6.