Konkonona Mifundu dituku dionso

1-2. Mmikanda kayi ivua bulongolodi bupatule bua kupetesha bena Kristo mvese wa kukonkonona ku dituku? Mmiaba kayi itudi kabidi mua kupeta mvese wa ku dituku lelu?

MU TSHIDIMU tshia 1905, bulongolodi bua Yehowa bua kapatula mukanda uvua ne tshiena-bualu tshia ne: La Manne céleste quotidienne pour la maison de la foi. Mu mukanda au muvua mvese ne mêyi a mu Tshibumba tshia Nsentedi tshia Siona avua amumvuija avua bena Kristo netu mua kubala dituku dionso munkatshi mua tshidimu tshijima. Bakatungunuka ne kukonkonona malu a mu mukanda au too ne mu 1927 pavua bulongolodi butuadije kupatula mvese wa ku dituku ne ku dituku mu mukanda wa Annuaire ne mêyi avua amumvuija.a Tuvua mpindieu ne mushindu wa kukonkonona mvese mishilashilangane ya mu Bible ne mêyi mimpe avuabu bangatshila mu Tshibumba tshia Nsentedi.

² Mu 1986, bulongolodi buakapatula kakanda ka Tukonkononayi Mifundu dituku dionso kikale ne mvese wa kukonkonona dituku dionso; lelu eu kadi mu miakulu mipite pa 300. Udi mua kupeta kabidi mvese wa ku dituku mu dibeji dia mbangilu dia mu JW Library^® ne mu TSHIBUTSHILU TSHIA MIKANDA TSHIA KU ENTERNETE^™ tshia Watchtower (wol.jw.org).

3. Bua tshinyi bidi mua kukolela bamue bana betu bua kukonkonona mvese wa dituku dionso? Nnkonko kayi ituandamuna?

³ Bu mutudi ne bia bungi bia kuenza, bitu bikolela bamue ba kutudi bua kukonkonona mvese wa dituku dionso. Ke bualu kayi netuandamune nkonko isatu eyi: Ntshilejilu kayi tshia mu Bible tshidi mua kutukankamija bua kukonkonona Mifundu dituku dionso? Bua tshinyi mbimpe kukonkonona mvese wa dituku dionso? Mmushindu kayi utudi mua kumukonkonona?

TSHILEJILU TSHIA MU BIBLE TSHIDI TSHITUKANKAMIJA

4. Ntshinyi tshivua bena Beloya benze pavua Paulo ubayisha? (Bienzedi 17:10, 11)

⁴ Mvese wetu wa nshindamenu udi utuleja ne: bena Beloya bavua mupostolo Paulo muyishe basue kumanya tshivua Mifundu yamba. (Bala Bienzedi 17:10, 11.) Kabavua bamuteleja ne meji a kubipisha bivuaye ulongesha to. Bible udi wamba ne: bavua ne “meji mimpe” ne “bakitaba dîyi” dia Nzambi divua Paulo mubayishe. Pavuabu bafuanyikije bivuabu babale mu Mifundu ne bivua Paulo ubayisha, bakamona ne: uvua ubalongesha malu malelela. Ke mudibi kabidi lelu patudi tuteleja muyuki mu bisangilu anyi mu mpungilu. Tutu tulondesha ngamba-malu padiye utubadila mvese mu Bible bua tuikale batuishibue ne: malu adiye utuambila mmalelela.

5. Mmunyi muvua kukonkonona Mifundu dituku dionso kuambuluishe bena Beloya?

⁵ ‘Bena Beloya ba bungi bakalua bena kuitabuja.’ (Bien. 17:12) Kadi bamue bena Yuda bavua bakengeshe Paulo mu Tesalonike bakalua ku Beloya, kutuadijabu kuakula bibi bua Paulo. Ke bualu kayi, bantu ba bungi ba mu Beloya bakatuadija kuluisha bena Kristo bapiabapia abu. (Bien. 17:13) Nansha nanku, bena Kristo abu kabakapeta buôwa to. Bu muvuabu bakonkonona Mifundu dituku dionso, bakafika ku dimona ne: bavua bapete bulelela; ke kubambuluishabi bua kushala ne lulamatu. Tuetu tukonkonona petu Mifundu dituku dionso, nebituambuluishe bua kuikala ne bukole patudi tutuilangana ne ntatu.

BUA TSHINYI MBIMPE KUKONKONONA MVESE WA DITUKU DIONSO?

6. Bua tshinyi mbimpe kukonkonona mvese wa dituku dionso? (Tangila kazubu ka ne: “Bilejilu bia mu Bible bia bantu bavua batendelela dituku dionso.”)

⁶ Tutu tukonkonona mvese wa ku dituku bualu tudi basue kuleja Yehowa mutudi bamunange ne tumunemeka. Bu mudiye Nzambi wetu, mmukumbane bua tuetu kumuleja mutudi bamunange ne tumunemeka dituku dionso. Mmutunange ne mmusue bua tupete muoyo wa tshiendelele. (Yone 3:16) Mu Bible mudi malu adi aleja mutu Yehowa usanka patudi tumutendelela dituku dionso. Bantu ba bungi mbamone ne: patubu bakonkonona mvese wa ku dituku, bitu bibambuluisha bua kuenza malu makuabu a mushinga bu mudi kusambila, kubala Bible, ne kuelangana meji bua malu adibu babala.

7-8. Mmalu kayi makuabu adi atusaka bua kukonkonona Mifundu dituku dionso? (Efeso 5:15, 16)

⁷ Tudi tukonkonona mvese wa ku dituku bualu mmushindu muimpe wa kuenza malu bimpe ne dîba dietu. (Bala Efeso 5:15, 16.) Kakuena mushindu mukuabu mutambe buimpe utudi mua kuenza malu bimpe ne dîba dietu pa kumbusha kuangata minite ndambu dituku dionso bua kukonkonona malu a Tatu wetu wa mu diulu to.

⁸ Tudi tukonkonona mvese wa ku dituku bualu udi utuambuluisha bua kutantamena ntatu ya ku dituku. Yezu wakamba ne: dituku dionso didi ne “yadi ntatu.” (Mat. 6:34) Tshivuaye muambe atshi ntshilelela. Kadi Yezu uvua muleje kabidi mu mvese umue umue au ne: Yehowa mmumanye bimpe ntatu itudi nayi ne bitudi nabi dijinga. (Mat. 6:25-32) Dikonkonona mvese wa ku dituku didi dienza bua tutume meji etu ku mushindu udi Yehowa utuambuluisha. Dîba adi katuakutamba kuimanyina pa malu adi atutonda to. (Mis. 68:19; 1 Pet. 5:6, 7) Tshilejilu, muanetu wa bakaji mukuabu wa bidimu 19 uvua utungunuka ne kudipisha bua bualu bubi buvuaye muenze, ne uvua udiebeja bikala Yehowa uvua mumubuikidile. Ke kusambilaye Yehowa bua amufikishe ku dituishibua ne: uvua mumubuikidile. Pashishe wakabala mvese wa dituku adi wa Misambu 86:5 udi wamba ne: “Wewe, Yehowa, udi muimpe ne udi mudiakaje bua kubuikidilangana; udi muwule tente ne dinanga dia lulamatu kudi bonso badi bakubila.” Wakamba ne: “Diakamue ngakumvua ditalala mu muoyo, meme kuela Yehowa tuasakidila bua muvuaye mumpeteshe busambi bumvua nabu dijinga. Kubangila anu dîba adi, ntu ngenza muanyi muonso bua kubala mvese wa ku dituku.”

9. Mmunyi muvua mvese wa dituku kampanda muambuluishe bana betu ba mu Ukraine?

⁹ Mvese wa dituku utu utuvuluija malu adi atusaka bua ‘kueyemena Yehowa’ padi ntatu itukuata. (Nsu. 3:5, 6) Tshilejilu, dituku divua mvita mituadije pankatshi pa ditunga dia Russie ne dia Ukraine, mvese wa dituku adi uvua mu Yeshaya 30:15, udi wamba ne: “Bukole buenu nebuikale mu dishala talalaa ne dikala ne dieyemena.” Mvese eu wakakolesha bena Kristo netu ba mu Ukraine. Teleja tshivua muanetu wa balume kampanda, diende Eduard, muambe: “Mvese eu wakampetesha disulakana ne ditalala mu muoyo. Meme ne mukajanyi tuvua bamukonkonone dituku adi mu dinda menemene. Pashishe patuakasambila, tuakadiumvua ne bukole buvua mua kutuambuluisha bua kutantamena tunyinganyinga tutuvua natu.” Muanetu mukuabu wa bakaji, diende Svitlana, wakamba pende ne: “Mvese eu wakatuambuluisha bikole menemene. Tuvua anu tumuvuluka tshikondo tshionso tshivua mvita ayi itua ipela.”

10. Bua tshinyi bidi bikengela tuikale ne dikima? Ntshinyi tshitudi mua kuenza bua kuikala nadi dia bungi? (Yoshua 1:6-9) (Tangila kabidi bimfuanyi.)

¹⁰ Tudi tukonkonona mvese wa ku dituku bualu udi ukolesha dipangadika dietu dia kushala ne lulamatu. Bidi bikengela tuikale ne dikima bua kubenga kuenza malu adi balongi betu ne bena mudimu netu benza, bua kuyisha, ne bua kushala ne lulamatu padi bantu batuluisha. Pavua Yehowa muteke Yoshua mulombodi wa tshisamba tshia Isalele, wakamuambila misangu isatu bua ikale ne dikima ne bukole. Yehowa wakamuambila kabidi bua ikale ubala Mikenji ya Mose dituku dionso bua apete dikima dia bungi. (Bala Yoshua 1:6-9.) Kukonkonona mvese wa dituku ne kubala Bible dituku dionso nekutuambuluishe bua kuikala ne dikima dia bungi ne kushala ne lulamatu.

11. Mmunyi mudi kukonkonona mvese wa ku dituku kutuambuluisha bua kuya kumpala mu nyuma?

¹¹ Tudi tukonkonona mvese wa ku dituku bualu udi utuambuluisha bua kuya kumpala mu nyuma. Paulo wakambila nsonga Timote bua atungunuke ne kuakaja ngakuilu wende, bienzedi biende, anange bantu bikole, akoleshe ditabuja, ne atungunuke ne kuikala mukezuke. (1 Tim. 4:12, 15) Mvese wa ku dituku udi utupesha mpunga wa kumanya mushindu muimpe wa kuenzela Yehowa mudimu. Muntu wa mu nyuma utu umona malu mutu Yehowa uamona ne utu udienzeja bua kumusankisha mu malu onso.​—Lomo 8:5, 6.

12. Bulongolodi buetu budi ne dijinga kayi? Mpindieu ntshinyi tshitudi ne bua kuenza?

¹² Tudi tukonkonona mvese wa ku dituku bualu udi utupetesha ngikadilu idi ikengela bua midimu idibu mua kutupesha mu bulongolodi. Bulongolodi bua Yehowa budi dijinga ne bana betu ba balume ne ba bakaji badi mu malanda mimpe ne Yehowa badi pabuipi bua kuambuluisha mu midimu kampanda. Tshilejilu, bulongolodi buetu budi dijinga ne bampanda-njila, bamisionere, bana betu badi mua kuenza mudimu ku Betele, mu mudimu wa luibaku lua nzubu yetu, ne ku biro bia dikudimuna mikanda yetu. Budi kabidi dijinga ne bana betu ba balume batshidi bansonga badi ne didipuekesha badibu mua kuteka basadidi ba mudimu, bakulu anyi batangidi ba bijengu. Yehowa udi dijinga ne bantu ba bikadilu bimpe badiye mua kueyemena bua abapeshe mudimu wa kulombola malu mu bulongolodi buende. (Dut. 1:13-15) Kukonkonona mvese wa ku dituku kudi kuenza bua tuikale ne programe udi utulongesha mêyi manene ne udi utupetesha ngikadilu idi ikengela bua midimu idibu mua kutupesha mu bulongolodi.

MMUSHINDU KAYI UTUDI MUA KUKONKONONA MVESE WA KU DITUKU?

13. Leja umue mushindu wa kukonkonona mvese wa ku dituku.

¹³ Mmushindu kayi utudi mua kukonkonona mvese wa ku dituku? Mona mutu bena mu dîku dia Betele benza mu Dimue too ne mu Ditanu kumpala kua kutuadija mudimu: batu babanga ne disambila dîpi, pashishe bakonkonona mvese wa ku dituku. Wewe pebe udi mua kutuadija ne disambila bua Yehowa akuambuluishe bua biwakonkonona abi bikuambuluishe. (Yak. 1:5) Pashishe, ubale mvese wa dituku ne mêyi a mu Tshibumba tshia Nsentedi adi amumvuija. Wewe mumane kuenza nanku, diebeja ne: ‘Mmunyi mudi mvese eu ukolesha ditabuja dianyi? Mmunyi mudi kuelangana meji a mvese eu kungambuluisha bua kusemena pabuipi menemene ne Yehowa? Mmunyi mudi mvese eu mua kungambuluisha bua kutua ntatu ya dikutu edi tshiadi?’ Biwikala ukonkonona mvese eu pamue ne bena mu dîku dienu anyi balunda bebe, yukidilanganayi bua kukankamijangana. (Lomo 1:12) Bamue bena Kristo netu batu bakuata bualu nansha bumue budi bubasankishe budibu mua kuelela meji munda mua dituku dijima.

14-15. Mmalu kayi makuabu atudi mua kuenza? Ntshinyi tshidi mua kutuambuluisha bua kuvuluka mvese wa dituku?

¹⁴ Mona malu makuabu a kuenza bua mvese wa ku dituku kukuambuluishayi bikole: 1) Ela mishonyi pa malu manene adi mu mêyi a mu Tshibumba tshia Nsentedi adi amumvuija ne welangana meji a malu au. 2) Bala mvese mikuabu idi mu mêyi a mu Tshibumba tshia Nsentedi. 3) Bala nshapita mujima wa mukanda wa mu Bible mudibu bangatshile mvese wa dituku adi. 4) Bala Mukanda wa makebulula wa Bantemu ba Yehowa bua upete biena-bualu biudi mua kubala mu mikanda yetu bua kumanya malu makuabu. 5) Bala bikoso bikuabu bia mu tshiena-bualu tshia kulonga tshidibu bangatshile mêyi adi umvuija mvese wa dituku adi. Biwikala ne telefone anyi tshiamu tshikuabu, tuta pa Tshibumba tshia Nsentedi tshidibu baledile ku ndekelu kua mêyi au bua bakupatuile tshiena-bualu tshia kulonga atshi.b

¹⁵ Muanetu wa bakaji wa bidimu 19, diende Mackenzie, udi utuleja tshitu tshimuambuluisha bua kubenga kupua muoyo mvese wa ku dituku. Udi wamba ne: “Ntu ngangata tuminite tukuabu, nansha tuotu tutanu tshianana, bua kubala mvese wa dituku ne mêyi adi amumvuija au bitekete bitekete, eku ngenda ngelangana meji a bindi mbala. Kuenza nanku kutu kungambuluisha bua kuvuluka bimvua mukonkonone.”

16. Ndîba kayi diudi mua kukonkonona mvese wa ku dituku?

¹⁶ Ndîba kayi diudi mua kukonkonona mvese wa ku dituku? Sungula dîba didi dikumbane bimpe buebe wewe ne bua bena mu dîku diebe. Tshilejilu, bamue bena mu mêku batu bamukonkonona kumpala anyi panyima pa tshiakudia tshia mu dinda peshi kumpala kua kuyabu kufila bana mu kalasa. Bua kubenga kupua muoyo, batu bateka kakanda ka Tukonkononayi Mifundu dituku dionso pa mêsa anyi muaba udi muntu yonso mua kukamona. Bushuwa, bualu buobu bunukuate budi bunupangishe bua kukonkonona mvese wa ku dituku dîba dinudi bateke, dienzejayi bua kumukonkonona tshikondo tshikuabu dituku adi.

17-18. Bua tshinyi mbimpe kuteka dîba dia kukonkonona mvese wa ku dituku? Ntshinyi tshianuambuluisha bua kumukonkonona dituku dionso? (Tangila kabidi bimfuanyi.)

¹⁷ Mbimpe uteke dîba dia kukonkonona mvese wa ku dituku, tshianana kuakumubala nansha to. Muanetu wa balume wa bidimu 16, diende John, wakamba ne: “Wewe kuyi muteke dikonkonona mvese wa ku dituku pa muaba wa kumpala, pamuapa kuakuvuluka bua kumukonkonona to.” Muanetu wa bakaji wa bidimu 25, diende Sierra, wakamba ne: “Dikonkonona mvese wa ku dituku ke bualu buntu ngenza kumpala kua malu makuabu onso.” Muanetu wa balume wa bidimu 21, diende Rogelio wakamba ne: “Ntu muenze bua telefone wanyi ikala wela kangonga dîba dianyi dia kukonkonona mvese wa ku dituku bua tshipu muoyo to.”

¹⁸ Dienzeja bua kuikala ukonkonona mvese wa ku dituku dîba diudi mulongolole bua kumukonkonona. Kulekedi tshintu nansha tshimue tshikubueja mu ditanaji to. Muanetu wa bakaji wa bidimu 19, diende Isabelle, mmufile mubelu eu: “Paukadi ukonkonona, disuika bua kubenga kutangila bintu bikuabu bidi mu telefone anyi bua kubenga kuenza bualu bukuabu. Wewe mumone ne: telefone udi ukubueja mu ditanaji, muteka ku luseke; wangate kakanda ka Tukonkononayi Mifundu dituku dionso.” Muanetu wa bakaji wa bidimu 19, diende Olivia, wakamba ne: “Pantu nkukonkonona mvese wa ku dituku pamue ne bakuabu, bu mudi bena mu dîku dietu anyi balunda banyi, bitu bingambuluisha bikole. Wewe ne muntu udi ukuvuluija bua nukonkonone nende mvese wa ku dituku, nebikale bipepele bua kumukonkonona dituku dionso.”

AMBULUISHAYI BANSONGA BUA BAKONKONONE MIFUNDU DITUKU DIONSO

19. Bua tshinyi mbimpe bua bana benu kuikalabu ne tshibidilu tshia kukonkonona mvese wa ku dituku? Fila tshilejilu. (Filipoyi 1:9, 10)

¹⁹ Nuenu baledi, konkononayi Mifundu dituku dionso pamue ne bana benu, dîba adi nebatungunuke ne tshibidilu atshi too ne pakolabu. Nansha bobu batshidi bana, kabayi mua kumvua mvese kampanda wa dituku bimpe, kukonkonona nabu pamue nekubambuluishe bikole. Tshilejilu, bua tshikunyibua kampanda tshidi munkatshi mua mitshi minene kukolatshi, mbimpe tshikoke mâyi mu buloba dituku dionso. Bia muomumue, bua bana benu kuluabu bena Kristo bashindame mu nyuma, mbimpe kubambuluisha bua kuangata minite mikese dituku dionso bua kukonkonona mvese wa ku dituku ne mêyi adi amumvuija.​—Bala Filipoyi 1:9, 10.

20. Kukonkonona Dîyi dia Nzambi dituku dionso kudi ne mushinga kayi?

²⁰ Yezu wakamba ne: “Muntu udi ne bua kuikala ne muoyo, kabuyi anu bua diampa nkayadi, kadi bua dîyi dionso didi dipatuka mukana mua Yehowa.” (Mat. 4:4) Nnganyi wetu udi mua kupitshisha dituku dijima kayi muelaku tshintu wa bujitu munda? Bu mudibi nanku bua biakudia bia mubidi, tuvulukayi bua kukonkonona Mifundu dituku dionso bua kudia biakudia bidi bifila muoyo.