Yehowa utu utuambuluisha patutu tumueyemena

Emma uvua wenza mudimu ku nzubu wa tshilala benyi matuku asatu ku lumingu, ne mêba tshitema ku dituku. Wakalomba mfumuende wa mudimu dituku dia dikisha bua aye kubuela mu mpungilu wabu wa rejon. Kadi pamutu pa mfumuende kumupesha dituku dia dikisha, wakashintulula programe wende wa mudimu; kumuambilaye bua ikala wenza matuku atanu ku lumingu. Wakamuambila ne: yeye kayi mulonde programe au, uvua umuipata ku mudimu. Bu muvua Emma weyemena Yehowa, wakitaba bua kulekela mudimu bua amone mua kuya mu mpungilu.

Pavua Emma muye kufila mukanda wende wa dilekela nawu mudimu, mutangidi wa nzubu wa tshilala benyi uvua muaba au. Pavua mutangidi au mumvue muvua bualu, wakambila Emma ne: neatangile tshilumbu atshi. Kadi mbingu ibidi pashishe, bakambila Emma ne: bavua bamuipate ku mudimu. Emma wakakuatshila mutangidi wa nzubu wa tshilala benyi au bualu abu, ne mutangidi au kumvua tshiji bua muvua mfumuende au kayi mulonde bivuaye muambe. Wakenza bua bapingaje Emma ku mudimu diakamue, kumupeshabu programe mukuabu. Uvua mpindieu ne bua kuenza mudimu matuku atanu ku lumingu, kadi uwenza mu mêba anayi ku dituku. Programe mupiamupia au uvua muimpe bikole bua Emma, bualu uvua umuambuluisha bua kuikala ne dîba dia kuenza mudimu wende wa bumpanda-njila ne dia kuenza malu makuabu a mu nyuma. Yehowa uvua umukumbajila majinga ende kupita ne mushindu uvuaye welela meji.