Diambuluisha bua bampofu
Badi batshinka ne: pa buloba bujima bantu miliyo 43 mbampofu ne bakuabu miliyo 295 kabena ne lumonu luimpe to.a Bia dibungama, bamue bantu badi benzela bampofu anyi bantu badi kabayi ne lumonu luimpe malu mu mushindu mubi.
Mmunyi mutu Nzambi umona bampofu? Bible udi wamba tshinyi bua bualu buabu? Bantemu ba Yehowa badi bambuluisha bampofu mushindu kayi lelu eu?
Mutu Nzambi umona bampofu
Bible udi uleja ne: Yehowab utu utabalela bampofu bikole. Mmusue bua babenzele malu mimpe ne babalongeshe malu ende. Udi ubapesha kabidi ditekemena dimpe bua matuku atshilualua!
Mvese: “Mulawu wikale kudi muntu udi upambuisha mpofu mu njila wende.”—Dutelonome 27:18.
Diumvuija: Mukenji uvua Nzambi mupeshe bantu bende bikondo bia kale, uvua ukuba bampofu, kabavua mua kubenzela malu mu mushindu mubi to.
Mvese: “Nzambi kena ne kansungansunga to.”—Bienzedi 10:34.
Diumvuija: Nzambi mmunange bampofu anu mudiye munange bantu badi bamona.
Mvese: Yezu “wakapetesha bampofu ba bungi dipa dia kumona.”—Luka 7:21.
Diumvuija: Pavua Yezu pa buloba, wakatabeja bampofu mêsu. Bualu ebu budi buleja ne: mu Bukalenge buende bantu bonso nebikale bamona.
Mvese: “Mêsu a bampofu neatabale.”—Yeshaya 35:5.
Diumvuija: Yehowa mmulaye ne: Patuadija Bukalenge buende kukokesha matuku makese kumpala eku, bampofu bonso nebatuadije kumona.
Mudi Bantemu ba Yehowa bambuluisha bampofu
Tuetu Bantemu ba Yehowa tudi tuyisha bampofu mukenji udi ubapetesha ditekemena. Mona malu atutu tuenza bua kubambuluisha:
Tutu tupatula Bible, mikanda ya kulonga nayi Bible, ne filme bidi mua kuambuluisha bampofu ne bantu badi kabayi ne lumonu luimpe. Tutu tubapatuila mikanda mu muakulu wa bampofu, mikanda ya maleta manene, ne mêyi makuate.
Tutu tuenza bisangilu bua bantu bonso balue kubuela, too ne bampofu.
Tutu tupesha muntu yonso mpunga wa kulonga Bible ne Ntemu wa Yehowa.c
Tutu tuenza malu onso aa tshianana, katuyi tufutshisha makuta to. Bua tshinyi? Bualu Yezu wakatuma dîyi ne: “Nuvua bapete tshianana, nufile tshianana.”—Matayi 10:8.
Bantemu ba Yehowa batu baditatshisha bikole bua bampofu. Tutu tuambuluisha bantu bonso batu balue kutendelela Yehowa pamue netu. Mona malu a bamue Bantemu ba Yehowa badi bampofu.
Talita Alnashi, wa mu ditunga dia Suède, kavua umona bimpe katshia bamulela to. Keba bua kumanya muvua tatuende mufike ku dimulongesha Bible ne muvua balunda babu bamuambuluishe yeye ne dîku diabu ne babaleje muvuabu babanange.
James Ryan, wa mu États-Unis uvua mpudi matshi pavuabu bamulele, pashishe yeye kulue mpofu. Keba bua kumanya tshivua tshimuambuluishe bua kuikala ne disanka mu nsombelu wende.
Cynthia Pablo, wa mu Philippines, mmpudi matshi, eku muikala kabidi mpofu. Mmunyi muvua bena Kristo netu bamuambuluishe mu tshikondo tshikole tshia tshipupu tshia korona (COVID-19)? Bua kumanya muvuabu bamuambuluishe, bala tshiena-bualu tshia “Muvua tshisumbu tshia bena Kristo tshiambuluishe muanetu wa bakaji udi mpofu ne mpudi matshi mu tshipupu tshia korona.”
Bintu bia kulongeshangana nabi bitutu tupatula
Mikanda ya mu muakulu wa bampofu. Tudi bapatule Bible mujima wa mu muakulu wa bampofu anyi tshitupa tshiende mu miakulu ndambu. (Bua kuamanya bungi bua miakulu ayi, bala kazubu ka “Bible wa Nkudimuinu wa bulongolodi bupiabupia mu muakulu wa bampofu.”) Tutu tupatula kabidi mikanda ya mu muakulu wa bampofu. Bua badi basue kumanya muakulu wa bampofu, tudi bapatule broshire wa Longa mua kubala mfundilu wa bampofu (udiku anu mu Anglais). Tudi bapatule broshire eu bua muntu udi umona bimpe ambuluishe mpofu bua kumanya kubala muakulu wa bampofu.
Wewe dijinga ne mikanda yetu ya pa mabeji ya mu muakulu wa bampofu, udi mua kuyilomba Ntemu wa Yehowa anyi kulomba bua alue kukutangila bua kuyukila nebe malu a mu Bible.
Mikanda idi ne maleta manene ne mushindu wa kudiundisha bintu bia mu site wetu. Mikanda yetu ya maleta manene mmipatule bua bantu badi ne lutatu lua kumona. Mbenze site wetu wa jw.org mu mushindu wa ne: bintu bidimu bikale bimueneka bimpe ne bibadika bimpe nansha muntu yeye mubidiundisha. Programe wa JW Library udi pende ne mushindu wa kudiundisha mifundu ya mu mikanda yetu ne kuyiteka bunene buudi musue.
Wewe dijinga ne mikanda yetu ya pa mabeji ya maleta manene, udi mua kuyilomba Ntemu wa Yehowa anyi kulomba bua alue kukutangila bua kuyukila nebe malu a mu Bible.
Buela mu jw.org, wambule mikanda ya maleta manene ya mu biamu idi mifuanangane ne ya pa mabeji.
Mikanda idi ne mêyi makuate. Tudi bapatule Bible wa Nkudimuinu wa bulongolodi bupiabupia wa mêyi makuate mu miakulu mipite pa 200. Mikanda yetu ya bungi itutu tupatula tutu tuyikuata kabidi mu mêyi. Tutu tumvuija bimfuanyi bidimu mu mêyi makuate.
Teleja mêyi makuate a bintu bietu mu jw.org ne mu programe wa JW Library anyi biambula.
Udi mua kuambula bintu bietu jw.org bidi ne mushindu wa kubadika mu tshiamu tshidi tshipatula mêyi.d
Filme idi ne diumvuija dia bindidimbi.e Bantemu ba Yehowa batu bapatula filme idi ne diumvuija dia bindidimbi mu miakulu mipite pa 100. Filme eyi idi yambuluisha bantu bua kumvua bimpe mibelu ya mu Bible ne kuyitumikila.
Udi mua kubuela mu site wetu ne kutangila filme idi ne diumvuija dia bindidimbi idi mu bitupa bidi bilonda ebi:
Bisangilu ne bibilu binene. Tutu ne bisumbu pa buloba bujima ne tutu tudisangishamu lumingu luonso bua kulonga ne bua kutendelela Nzambi. Tutu tulongolola bibilu binene tshidimu tshionso bua kulonga malu a mu Bible. Mu bibilu abi, tutu tulejamu filme, tutu tudienzeja kabidi bua filme ayi ikale ne diumvuija dia bindidimbi bua bana betu badi ne lutatu lua kumona. Patuku mushindu, tutu tulongolola bua kuikale bantu badi mua kukuata bampofo badi bikale kabidi bampudi matshi ku bianza benda babakuisha muakulu wa tumama bua bumvue bidibu bamba mu bisangilu anyi mu bibilu binene ebi. Tutu tuakidilamu bantu bonso katuyi tusunguluja to.
Manya malu a bungi adi atangila mpungilu itutu tuenza tshidimu tshionso.
Buela mu Tshivulukilu tshia lufu lua Yezu. Ntshibilu tshia mushinga tshia ku tshidimu.
José Luis Ayala, mmusombele mu Mexique. Bavua bamulele mpofu, pakakumbajaye bidimu 29, wakalua mpudi matshi. Keba bua kuamanya muvua bisangilu bietu bimuambuluishe ne muvuabu bamuambuluishe bua kulua mulongeshi muimpe wa Dîyi dia Nzambi.
a Muntu udi kayi ne lumonu luimpe mmuntu udi ne lutatu lua mêsu ludibu kabayi mua kuondopa to. Lutatu lua mêsu alu ludi lumupangisha bua kuenza malu bimpe dituku dionso. Muaku “mpofu” utudi bakuile mu tshiena-bualu etshi udi uleja muntu udi kayi umona tshintu nansha tshimue ne udi kayi ne lumonu luimpe.
b Yehowa ke dîna dilelela dia Nzambi. (Misambu 83:18) Tangila tshiena-bualu tshia “Yehowa nnganyi?”
d Programe wa ordinatere udi ubadila malu mu tshiamu utu uabala ne dîyi didibu bakuate muntu belamu anyi dia ordinatere muine. Muntu udi ukuata mudimu ne tshiamu etshi udi mua kufika musangu umue muaba kampanda udiye ukeba mu mukanda wetu.
e Diumvuija dia bindidimbi, mmêyi adibu bakumbaje mu filme bua kumvuija malu adi enda enzekamu.