“Nenumvue bakula bua mvita”

“John Simpson mufundi wa ngumu ya malu a pa buloba bujima wa ku BBC (tuetu ke badi bambe) udi uleja ne: “Ndi mutuadije mudimu wa bukamona kamba kukadi bidimu 60. Katshia anu ku tshidimu tshimvua mutuadije mudimu eu too ne lelu, nkadi mumanyishe ngumu ya mvita mipite pa 40 ivua mienzeke pa buloba bujima. Mvua mumone muvua mvita ya muinshimuinshi ivua pankatshi pa ditunga dia États-Unis ne dia Union soviétique itua ipela, pashishe yoyi kujika mu mupodi wa dîsu. Kadi tshidimu tshia 2025 ntshinsamishe mutu bikole kupita bidimu bikuabu ebi, bualu mvita mibi menemene ya bungi idi yenzeka, ne kabidi bualu mvita eyi idi ikebela bantu ba bungi ntatu ne inyangakaja bintu pa buloba.

Bantu badi basamisha mutu bua mvita mibi idi yenzeka pa buloba. Ba bungi badi badiebeja bikala mvita mua kujika. Ntshinyi tshivua Yezu muambe?

Tshivua Yezu muambe

Yezu ukavua mumanyishe malu adi enzeka lelu eu. Wakambila bayidi bende ne: “Nenumvue bakula bua mvita.”—Matayi 24:6.

Nansha mudi mvita idi yenzeka lelu isamisha bantu mutu bikole, mbimpe tuikale anu ne ditekemena. Bua tshinyi? Bualu Yezu wakalongesha ne: mvita idi ikebela bantu ntatu pamue ne nsombelu mikuabu ne bikadilu bidi nabi bantu lelu, bivua ne bua kuenza “tshimanyinu” tshidi tshileja ne: tudi ku “nshikidilu wa ndongoluelu wa malu eu.” (Matayi 24:3; Luka 21:7) Bualu ebu budi buleja ne: kumpala eku Yezu neajikije mvita. Mushindu kayi?

Tshienza Yezu

Matuku makese kumpala eku, Yezu Mukalenga wa Bukalenge bua Nzambi ‘neajikije mvita pa buloba buonso bujima.’—Misambu 46:9.

Bua kumanya malu makuabu adi atangila ditalala dituikala nadi kumpala eku, ne muikala nsombelu tshikondo atshi, bala tshiena-bualu tshia “Muajika mvita.”