Ntshinyi tshidi Bible wamba bua budikadidi bua kudisunguila malu? Nzambi udi ne bukokeshi pa matuku etu atshilualua anyi?
Diandamuna dia mu Bible
Nzambi mmututue mushinga padiye mutupeshe budikadidi bua kudisunguila malu, mmumue ne: bukokeshi bua kudiangatshila mapangadika nkayetu pamutu pa Nzambi anyi makole adi kaayi amueneka alombola malu atudi tuenza. Tangila tshidi Bible ulongesha.
Nzambi wakafuka bantu mu tshimfuanyi tshiende. (Genese 1:26) Tudi bashilangane ne nyama itu yenza malu nangananga ne tshingenyingenyi, tuetu tudi bafuane Mufuki wetu mu mushindu wa ne: tudi mua kuleja ngikadilu bu mudi dinanga ne buakane. Anu bu Mufuki wetu, tudi ne budikadidi bua kudisunguila malu.
Misangu ya bungi, tudi mua kusungula tshituikala matuku atshilualua. Bible udi utukankamija bua ‘kusungula muoyo pa kuteleja dîyi dia Nzambi,’ mbuena kuamba ne: kusungula bua kutumikila mikenji yende. (Dutelonome 30:19, 20) Bu tuetu katuyi ne budikadidi bua kudisunguila malu, mubelu eu kawuvua mua kuikala ne mushinga to, uvua mene mua kuikala wa tshikisu. Pamutu pa Nzambi kutuenzeja bua kuenza disua diende, udi utulomba ne muoyo mujima ne: “Bu wewe nansha muteye ntema ku mêyi anyi! Nunku ditalala diebe divua mua kulua anu bu musulu.”—Yeshaya 48:18.
Dilubuluka dietu anyi dipangila dietu kabiena bileja ne: bikavua bimana kulongolola nanku to. Tuetu basue bua bualu kampanda bukumbane, tudi ne bua kudienzeja bikole. Bible udi wamba ne: “Tshionso tshidi tshianza tshiebe tshipeta bua kuenza, utshienze ne bukole buebe buonso.” (Muambi 9:10) Udi wamba kabidi ne: “Malu adi bantu badi benza mudimu ne muoyo mujima balongolola adi bushuwa afika ku dikumbana.”—Nsumuinu 21:5.
Budikadidi bua kudisunguila malu ndipa dia mushinga mukole dia kudi Nzambi. Budi butuambuluisha bua kumunanga ne ‘muoyo wetu wonso’ bualu tudi basungule bua kumunanga.—Matayi 22:37.
Nzambi ki mmumanye malu onso anyi?
Bible udi ulongesha ne: Nzambi ngua Bukole Buonso ne bukole buende kabuena ne mikalu to. (Yobo 37:23; Yeshaya 40:26) Kadi katu wenza malu ne bukole buende bua kumanya malu onso to. Tshilejilu, Bible udi uleja ne: Nzambi uvua “mudikande” bua kuluisha Babilona wa kale uvua muena lukuna wa bantu bende. (Yeshaya 42:14) Bia muomumue, bua mpindieu mmusungule bua kulekela bantu badi benza malu bibi ne budikadidi buabu bua kuenzela bakuabu bibi. Kadi Nzambi kakuenza nanku kashidi to.—Misambu 37:10, 11.