Nebabutule buloba ebu anyi?
Diandamuna dia mu Bible
Tòo. Dibulunge dia buloba kadiakubutudibua, kuoshika, anyi kabakupingaja dikuabu pa muaba wadi to. Bible udi ulongesha ne: Nzambi wakafuka buloba bua bantu basombapu bua kashidi.
“Bantu bakane nebapiane buloba, nebasombapu bua kashidi.—Misambu 37:29.
“[Nzambi] mmujadike buloba pa bishimikidi biabu, kabuakumbushibua pa muaba wabu kashidi ne tshiendelele.”—Misambu 104:5.
“Buloba budi bushalaku kashidi.”—Muambi 1:4.
“Yeye uvua muenze buloba, Mubuenji uvua mubujadike bikole, . . . kayi mubufuke anu bua tshianana, kadi uvua mubuenze bua bantu basombelapu.”—Yeshaya 45:18.
Bantu nebabutule buloba anyi?
Nzambi kakuitaba bua bantu babutule buloba kupitshila ku dinyanguka dia kapepe, ku mvita, anyi ne mishindu mikuabu kayi yonso to. Kadi ‘neabutule badi babutula buloba.’ (Buakabuluibua 11:18) Neakumbaje mêyi au mushindu kayi?
Nzambi neumbushe makalenge a bana ba bantu, adi kaayi makumbane bua kukuba buloba, ne neateke Bukalenge bupuangane bua mu diulu. (Danyele 2:44; Matayi 6:9, 10) Bukalenge abu nebabulombole kudi Muanende Yezu Kristo. (Yeshaya 9:6, 7) Pavua Yezu pa buloba, wakenza malu ne bukole buvuaye nabu bua kuenza bishima bia utumina bintu bifuka dîyi. (Mâko 4:35-41) Bu mudi Yezu Mulombodi wa Bukalenge bua Nzambi, neatabalele buloba ne bintu bidipu bimpe menemene. Neakajilule buloba bua bulue bupiabupia, ne neenze bua malu ikale anu muvuawu mu budimi bua Edene.—Matayi 19:28; Luka 23:43.
Bible utu ulongesha ne: neboshe buloba mu kapia anyi?
Tòo, kena ulongesha nanku to. Tshibuejakaji tshia mushindu au tshitu tshitamba kufumina ku ngumvuilu mubi udi nende bantu bua 2 Petelo 3:7, udi wamba ne: “Diulu ne buloba bidiku mpindieu mbilamibue bua kapia.” Tukonkononayi malu abidi a mushinga atuambuluisha bua kumvua tshidi mêyi au umvuija:
Bible udi utela muaku “diulu,” “buloba,” ne “kapia” bua kuakula bua bintu bia bungi. Tshilejilu, Genese 11:1 udi wamba ne: “Buloba bujima butshivua ne muakulu umue.” Muaba eu muaku “buloba” udi uleja bantu.
Mvese idi ku ntuadijilu kua 2 Petelo 3:7 idi ileja tshidi diulu, buloba, ne kapia bidibu batelamu biumvuija. Mvese 5 ne 6 idi imufuanyikija ne Mvula wa kabutu wa mu tshikondo tshia Noa. Mu tshikondo atshi, buloba buakabutudibua kadi dibulunge dia buloba diodi kadiakajimina to. Mvula wa kabutu wakabutula bantu babi bonso, anyi “buloba.” (Genese 6:11) Wakabutula kabidi “diulu,” mmumue ne: bantu bavua balombola buloba tshikondo atshi. Nunku bantu babi bakabutudibua, kadi ki ndibulunge dia buloba to. Noa ne dîku diende bakapanda ku kabutu ka buloba abu ne bakatungunuka ne kusomba pa buloba panyima pa Mvula wa kabutu au.—Genese 8:15-18.
Bia muomumue ne mâyi a Mvula wa kabutu, kabutu anyi “kapia,” kadibu bakuile mu 2 Petelo 3:7 nekabutule ndongoluelu wa bantu babi, kadi ki ndibulunge dia buloba to. Nzambi mmulaye “diulu dipiadipia ne buloba bupiabupia” muikala “buakane.” (2 Petelo 3:13) “Buloba bupiabupia,” anyi bantu bapiabapia, nebalombodibue kudi “diulu dipiadipia,” anyi balombodi bapiabapia, mmumue ne: Bukalenge bua Nzambi. Mu bukoleshi bua Bukalenge abu, buloba bujima nebulue Mparadizu wa ditalala.—Buakabuluibua 21:3, 4.