Mmushindu kayi udi Yezu upandisha bantu?
Diandamuna dia mu Bible
Yezu wakapandisha bantu ba lulamatu pakafilaye muoyo wende bu mulambu wa tshia kupikulangana natshi. (Matayi 20:28) Ke bualu kayi Bible udi ubikila Yezu ne: “Mupandishi wa ba pa buloba.” (1 Yone 4:14) Udi wamba kabidi ne: “Kakuena lupandu mu muntu mukuabu, bualu kakuena dîna dikuabu muinshi mua diulu didibu bafile munkatshi mua bantu didi ne bua kutupandisha to.”—Bienzedi 4:12.
Yezu ‘uvua mulabule lufu bua muntu yonso’ udi uleja ditabuja kudiye. (Ebelu 2:9; Yone 3:16) Pashishe, “Nzambi wakamubisha ku lufu,” ne Yezu wakapingana mu diulu bu tshifukibua tshia mu nyuma. (Bienzedi 3:15) Ne muomu amu, Yezu udi ne bukole bua “kupandisha bantu badi basemena kudi Nzambi ku butuangaji buende mu malu onso, bualu udi anu ne muoyo bua kubakuila.—Ebelu 7:25.
Bua tshinyi tudi dijinga ne Yezu bua kutuakuila?
Tuetu buonso tudi bena mpekatu. (Lomo 3:23) Mpekatu utu ututapulula ne Nzambi, ne utu ufikisha ku lufu. (Lomo 6:23) Kadi Yezu udi bu “mulumbuluidi” wa badi baleja ditabuja mu mulambu wende. (1 Yone 2:21, dimanyisha) Udi ubakuila, ulomba Nzambi bua ateleje masambila abu ne abafuile luse bua mpekatu yabu ku diambuluisha dia lufu luende. (Matayi 1:21; Lomo 8:34) Nzambi udi wandamuna milombu yabu mienza kudi Yezu ayi bualu idi ipetangana ne disua diende. Nzambi wakatuma Yezu pa buloba bua “ba pa buloba bapandishibue ku butuangaji buende.”—Yone 3:17.
Kuitabuja Yezu nkayaku ke kudi mua kutupandisha anyi?
Tòo. Nansha mutudi ne bua kuitabuja Yezu bua kupandishibua, tudi ne bua kuenza malu makuabu kabidi. (Bienzedi 16:30, 31) Bible udi wamba ne: “Anu bu mudi mubidi udi kawuyi ne nyuma mufue, ke mudi ditabuja didi kadiyi ne bienzedi difue padi.” (Yakobo 2:26) Bua tuetu kupandishibua, tudi ne bua:
Kumanya Yezu ne Tatu wende Yehowa.—Yone 17:3.
Kuitabuja Yehowa ne Yezu.—Yone 12:44; 14:1.
Kutumikila mikenji yabu bua kuleja mutudi ne ditabuja. (Luka 6:46; 1 Yone 2:17) Yezu wakamba ne: ki mbantu bonso badi bamubikila “Mukalenge” bapandishibue to, kadi anu badi “benza disua dia Tatu [wende] udi mu diulu.”—Matayi 7:21.
Kutungunuka ne kuleja ditabuja nansha tuetu mu nsombelu mikole. Yezu wakumvuija bualu ebu patoke pakambaye ne: “Muntu udi munanukile too ne ku nshikidilu neapandishibue.”—Matayi 24:13.