Yone 3:16​—“Bualu Nzambi uvua munange ba pa buloba bikole menemene”

“Bualu Nzambi uvua munange ba pa buloba bikole menemene, kufikaye ne ku difila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.”​—Yone 3:16, Nkudimuinu wa bulongolodi bupiabupia.

‘Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’​—Yone 3:16, Mukanda wa Nzambi.

Diumvuija dia Yone 3:16

Nzambi mmutunange, mmusue bua tushale ne muoyo kashidi. Ke bualu kayi, wakatuma Muanende Yezu Kristo pa buloba. Pavua Yezu pa buloba wakenza malu a bungi. Tshilejilu, wakalongesha bayidi bende malu a Tatuende Nzambi. (1 Petelo 1:3) Bualu bukuabu, wakafila muoyo wende bua bukua bantu. Bua tuetu kupeta muoyo wa tshiendelele, tudi ne bua kuitabuja Yezu.

Mêyi a ne: ‘wakafila Muanende mulela umuepele’a adi aleja mudi Nzambi munange bantu bikole. Yezu uvua Muana wa Nzambi wa pa buende. Mushindu kayi? Anu yeye nkayende ke uvua Nzambi mufuke buludiludi. (Kolosayi 1:17) Udi “muanabute wa bifukibua bionso.” (Kolosayi 1:15) Bifukibua bikuabu bionso, nansha banjelu bakafukibua ku diambuluisha diende, anyi ku butuangaji buende. Kadi Yehowab Nzambi wakitaba bua kutuma Muanende munanga bua “kuenzela bakuabu mudimu ne kufila muoyo wende bu tshia kupikulangana natshi pa muaba wa bantu ba bungi.” (Matayi 20:28) Yezu wakakenga ne wakafua bua kutupikula ku mpekatu ne lufu bituvua bapiane kudi Adama muntu wa kumpala.​—Lomo 5:8, 12.

Kuleja ditabuja kudi Yezu kudi kumvuija malu a bungi kupita kumuitabuja anyi kumanya tshivuaye mutuenzele. Tudi ne bua kuleja ditabuja mu Muana wa Nzambi patudi tumutumikila ne tulonda mu makasa ende. (Matayi 7:24-27; 1 Petelo 2:21) Bible udi wamba ne: “Muntu udi uleja ditabuja kudi Muana udi ne muoyo wa tshiendelele; muntu udi ubenga kutumikila Muana kakumona muoyo.”​—Yone 3:36.

Malu adi Yone 3:16 wakuila

Yezu wakamba mêyi au pavuaye uyukila ne mfumu wa tshitendelelu tshia bena Yuda diende Nikodemo. (Yone 3:1, 2) Mu muyuki au, Yezu wakaleja malu makuabu a Bukalenge bua Nzambic ne ‘kuledibua tshiakabidi.’ (Yone 3:3) Wakadianjila kuleja kabidi muvuaye ne bua kufua. ‘Badi ne bua kubandisha Muana wa muntu kuulu [kumukudika ku mutshi], bua muntu yonso udi umuitabuja amone mua kupeta muoyo wa tshiendelele.’ (Yone 3:14, 15) Pashishe wakaleja patoke ne: Nzambi udi upesha bantu mpunga wa kupeta muoyo au bualu mmubanange bikole. Jezu wakajikija umvuija ne: bua tuetu kupeta muoyo wa tshiendelele, tudi ne bua kuleja ditabuja pa kuenza malu adi asankisha Nzambi.​—Yone 3:17-21.