Yeshaya 42:8​—“Meme ndi MUKALENGE”

“Meme ndi Yehowa. Adi ndîna dianyi; tshiena mfila butumbi buanyi kudi muntu mukuabu, anyi kutumbishibua kuanyi kudi mpingu misonga.”​—Yeshaya 42:8, Nkudimuinu wa bulongolodi bupiabupia.

“Meme ndi MUKALENGE: adi ndîna dianyi: tshiakufila butumbi buanyi kudi muntu mukuabu, anyi kutumbishibua kuanyi kudi mpingu misonga to.”​—Yeshaya 42:8, Bible wa King James Version.

Diumvuija dia Yeshaye 42:8

Nzambi udi utuambila dîna diende, udi tuambila kabidi ne: katuena mua kumutendelela ne mpingu to.

Nzambi nkayende wakadinyika dîna didibu batamba kukudimuna mu Tshiluba ne: “Yehowa.”a (Ekesode 3:14, 15) Nansha mudi dîna dia Nzambi disanganyibua mu Dipungila Dikulukulu (Mifundu ya mu tshiena Ebelu ne mu tshiena Alama) misangu mitue ku 7 000, nkudimuinu ya bungi mmipingaje muanzu “MUKALENGE” (mu maleta manene) pa muaba wadi. Tshilejilu tshia bualu abu tshidi mu Misambu 110:1 mudibu bakula bua Yehowa ne Yezu mu ngakuilu wa buprofete. Mu Bible wa King James Version, tudi tubalamu ne: “MUKALENGE [Yehowa] wakambila Mukalenge [Yezu] wanyi.” (Bienzedi 2:34-36) Mu nkudimuinu wa bulongolodi bupiabupia mbafunde dîna dia Nzambi pa muaba wadi menemene bua kumbusha tshibuejakaji pankatshi pa “Bakalenge” babidi abu. Badi bambamu ne: “Yehowa wakambila Mukalenge wanyi ne: ‘Somba ku tshianza tshianyi tshia balume too ne pangateka bena lukuna bebe bu kabasa ka kutekela makasa ebe.’”

Bamanyi ba malu a mu Bible ba bungi badi bitaba ne: dîna dia Nzambi didi diumvuija “Yeye udi uvuija.” Anu Nzambi mulelela ke udi mua kudinyika dîna dia nanku, bualu anu yeye ke udi mua kudivuija anyi kuvuija tshifukibua tshiende bua kulua tshionso tshidi tshikengela bua kukumbaja disua diende.

Bu mudiye Mufuki wetu ne Nzambi umuepele mulelela, mmukumbane bua tumulamate anu yeye. Katuena ne bua kutendelela muntu mukuabu anyi tshintu tshikuabu, bu mudi mpingu peshi bimfuanyi to.​—Ekesode 20:2-6; 34:14; 1 Yone 5:21.

Malu adi Yeshaya 42:8 wakuila

Mu mvese ya kumpala ya Yeshaya nshapita wa 42, Yehowa wakadianjila kuleja mudimu wa “muntu [wende] musungula.” Nzambi wakamba bua muena mudimu wende udiye muanyishe eu ne: “Neatuadile bisamba kulumbuluisha kuakane.” (Yeshaya 42:1) Nzambi wakamba bua mulayi au ne: “Mpindieu ndi nnuambila malu mapiamapia. Kumpala kua kupatukawu, ndi nnuambilalawu.” (Yeshaya 42:9) Mulayi wa buprofete uvua utangila “muntu musungula” au wakapatuka, anyi wakakumbana bidimu nkama ya bungi pashishe pakafika Masiya, anyi Kristo ne pakakumbajaye mudimu wende wa kuyisha pa buloba.​—Matayi 3:16, 17; 12:15-21.

Yeshaya 42:8 mu nkudimuinu mikuabu ya Bible

‘Meme ndi Yehowa, adi ndîna dianyi; tshiena mpa mukuabu butumbi buanyi, anyi kutendelela kuanyi kudi mpingu misonga.’​—Mukanda wa Nzambi.

‘Dîna dianyi meme ndi [Yahweh]! Tshiena mpesha bakuabu butumbi buanyi, tshiena mua kupesha mpingu lumu luanyi.’​—Mukanda wa Mvidi Mukulu (Katolike).