Malu adibu baledile mu Mabeji a tshisangilu tshia Nsombelu ne mudimu wetu
© 2025 Watch Tower Bible and Tract Society of Pennsylvania
LUMINGU LUA DIA 2-8
BIUMA BIA MU DÎYI DIA NZAMBI YESHAYA 41-42
“Kutshinyi to”
Yehowa udi ukusamba
13 Nansha muvua Yehowa mupeshe bena Yuda abu ditekemena ditambe buimpe, uvua mumanye ne: bavua ne bua kupeta ntatu pavua tshikondo tshia kubapatula mu Babilona tshikumbana. Uvua muambe ne: pavua tshikondo atshi tshisemena, mukalenge kampanda wa bukole uvua ne bua kuluisha bisamba bivua binyunguluke Babilona, pashishe kulua kuluisha ne Babilona. (Yesh. 41:2-5) Bena Yuda abu bavua ne bua kumvua buôwa anyi? Yehowa ukavua mudianjile kukolesha bantu bende, wamba ne: ‘Kanutshinyi to, bualu ndi nenu. Kanupampakanyi to, bualu ndi Nzambi wenu.’ (Bala Yeshaya 41:10-13.) Pavuaye muambe ne: ‘Ndi Nzambi wenu’ uvua usua kuamba tshinyi? Kavua uvuluija bena Yuda bua kumutendelela to, bualu bakavua benza nanku konso eku. Kadi uvua ubavuluija ne: utshivua anu nabu.—Mis. 118:6.
Yehowa udi ukusamba
14 Yehowa uvua mujikije kabidi buôwa bua bena Yuda abu pavuaye mubavuluije ne: uvua ne bukole ne dimanya kabiyi mikalu. Wakabalomba bua kutangila mitoto muulu, kubambilaye ne: mmufuke mitoto ayi, ne mmumanye dîna dia mutoto wonso. (Yesh. 40:25-28) Bu mudi Yehowa mumanye dîna dia mutoto wonso, udi mua kupanga kumanya dîna dia mutendeledi wende yonso anyi? Nansha kakese! Anu mudi Yehowa ne bukole bua kufuka mitoto, udi kabidi ne bukole bua kuambuluisha bantu bende. Bushuwa, bena Yuda bavuabu bakuate baye nabu, kabavua ne bualu bua kumvuila buôwa to.
15 Yehowa wakalongolola kabidi lungenyi lua bantu bende bua malu avua mabindile kumpala. Mu tshitupa tshia kumpala tshia mukanda wa Yeshaya, Nzambi wakabambila ne: “Buelayi mu nzubu yenu ya munda, ne kangayi biibi panyima penu. Sokomayi bua mutantshi mukese too ne padi tshiji tshikole tshipita.” (Yesh. 26:20) Bidi bimueneka ne: mêyi aa akakumbana musangu wa kumpala pavua mukalenge Kolesha mubunde Babilona. Mumanyi kampanda wa malu a kale muena Greke udi wamba ne: “Pavua Kolesha mubuele mu Babilona, wakatumina [basalayi bende] dîyi bua kushipa bantu bonso bavua pambelu.” Bena mu Babilona bavua ne bua kuikala bumvue buôwa bua dikema! Kadi pamuapa bena Yuda bavuamu kabavua mua kushipibua to, bualu bavua batumikila mêyi a Yehowa.
16 Dilongesha: Mu matuku makese emu dikenga dinene ditu kadiyi dianji kuenzeka katshia bafuka bantu nedituadije. Patuadijadi, bantu nebapampakane pa buloba ne nebumvue buôwa bua bungi. Kadi tuetu batendeledi ba Yehowa katuakumvua buôwa to. Bualu tudi bamanye ne: Yehowa nNzambi wetu. Netuikale ne dikima, batuishibue ne: ‘dipikudibua dietu didi dienda disemena pabuipi.’ (Luka 21:28) Nansha patuluisha bisamba bidisange, netutungunuke anu ne kueyemena Yehowa. Neatume banjelu bende bua kutukuba ne neatuambile malu a kuenza bua kusungila mioyo yetu. Mmushindu kayi watuambilaye malu au? Katuena banji kumanya to. Kadi pamuapa neatuambilawu ku diambuluisha dia bisumbu bietu bia bena Kristo. Mu ngumvuilu kampanda, biobi ebi ke bikala nzubu yetu ya munda mutuasomba mu bukubi. Mmunyi mutudi mua kudilongolola bua malu adi matuindile kumpala eku? Tudi ne bua kuikala balamakanangane ne bena Kristo netu, kuikala badiakaje bua kutumikila buludiki butu bulongolodi butupesha, ne kuikala batuishibue ne: Yehowa udi ulombola bulongolodi buetu ebu.—Eb. 10:24, 25; 13:17.
‘Kutshinyi to. Nenkuambuluishe’
Mêyi a Yehowa aa adi akolesha. Teta kuela meji bua tshidi Yehowa utulaya etshi. Mvese kena wamba ne: udi wendela ku luseke lua Yehowa mukukuate ku tshianza to. Wewe muikale ku luseke lua Yehowa, tshianza tshiende tshia balume netshikuate tshianza tshiebe tshia bakaji. Kadi, Yehowa udi ukuoluela ‘tshianza tshiende tshia balume tshia buakane’ ne ukuata ‘tshianza tshiebe tshia balume,’ bienze bu udi ukukoka mu nsombelu mukole. Padi Yehowa ukuata tshianza tshiebe tshia balume, udi ukukolesha, ukuambila ne: ‘Kutshinyi to. Nenkuambuluishe.’
Udiku umona Yehowa bu Tatu webe wa dinanga ne Mulunda webe anyi? Udiku witaba ne: neakuambuluishe paudi upeta ntatu anyi? Yehowa udi bushuwa ukutabalela ne mmusue kukuambuluisha. Paudi mu ntatu ne mu nsombelu mikole, Yehowa mmusue bua udiumvue mu bukubi. Bua tshinyi? Bualu mmukunange bikole. Udi bushuwa ‘diambuluisha didi dipeteka lukasa bikondo bia ntatu.’—Musambu 46:1, NWT
Bubanji bua mu Dîyi dia Nzambi
Kuikala muena lulamatu kudi kumvuija tshinyi?
Yehowa wakambila mulunda wende Abalahama ne: “Meme ndi ngabu webe.” (Genese 15:1; Yeshaya 41:8) Aa kaavua mêyi a tshianana to. Yehowa wakakuba ne wakapandisha Abalahama ne ba mu nzubu muende mu bianza bia Palô ne Abimeleke. Wakambuluisha Abalahama bua kusungila Lota mu bianza bia bakalenge banayi bavua badienze tshintu tshimue. Pavua Abalahama ne bidimu 100 ne Sala 90, Yehowa wakabapingajila lulelu bua se: Dimiinu dilaya dipatukile mu ndelanganyi yabu. Yehowa uvua umanyisha Abalahama malu pa tshibidilu mu bikena-kumona, mu bilota ne ku diambuluisha dia banjelo bavuaye utuma. Bushuwa, wakaleja Abalahama lulamatu pavuaye ne muoyo ne munkatshi mua matuku a bungi kunyima kua lufu luende. Yehowa wakakumbaja malu avuaye mulaye ndelanganyi ya Abalahama anyi tshisamba tshia Isalele munkatshi mua bidimu bia bungi, nansha muvuabu bamutombokela. Malanda avua Yehowa mudie ne Abalahama adi aleja tshidi lulamatu lulelela lumvuija: dinanga dimuenekela ku bienzedi.—Genese, nshapita wa 12 too ne wa 25.
LUMINGU LUA DIA 9-15/3
BIUMA BIA MU DÎYI DIA NZAMBI YESHAYA 43-44
Dîyi dia buprofete difunda bidimu bitue ku 200 kumpala kua kukumbanadi
Bible mmukanda wa kueyemena udi ne bulelela
Dîyi dia buprofete: Mu bidimu bia 700 kumpala kua Yezu, Yeshaya wakafunda ne: Babilona (uvua mulue kulua tshimenga tshikulu tshia bukokeshi bua pa buloba bujima) uvua ne bua kubutudibua, ne bantu kabavua mua kusombamu kabidi to. (Yeshaya 13:17-20) Yeshaya wakatela too ne dîna dia muntu uvua ne bua kukumbaja dîyi dia buprofete edi. Diende divua Kolesha. Wakaleja kabidi mayele a Kolesha, wamba ne: misulu ivua ne bua ‘kuma.’ Wakamanyisha ne: biibi bia tshimenga bivua ne bua kushala bikangula.—Yeshaya 44:27–45:1.
Dikumbana dia dîyi edi: Bidimu bitue ku 200 Yeshaya mumane kumanyisha dîyi dia buprofete edi, mukalenge wa Pelasa wakabunda Babilona. Diende uvua nganyi? Kolesha. Bu muvuabi bikole bua kubuela mu Babilona, lungenyi luakaluila Kolesha bua kubuelela ku musulu wa Pelata uvua upueka pabuipi ne tshimenga. Bantu bende bakumbula mukidi, kutshingululabu mâyi lua ku mutu kua musulu bua kuatuma mu tshisense. Mâyi akapueka bikole, kuambuluishabi basalayi ba Kolesha bua kusabukilabu ku makasa mu tshiadi tshia musulu mâyi mabakuatshile mu bibelu. Bualu bua dikema, bena Babilona bavua bashiye biibi bivua bitangilangane ne musulu buashi! Basalayi ba Kolesha bakabuelela mu Babilona ku biibi bivua buashi abi, bobu kumubutula.
dp dib. 149-152 kazubu §4
Mfumu wa muoyo wa luse
Mpindieu Kolesha wakadilongolola bua kuluangana ne Babulona wa bukole. Ne kubangila anu dîba adi, wakakumbanyina mudimu ukavuabu bamanyishe mu milayi ya mu Bible. Bidimu bitue ku nkama ibidi kumpala, Yehowa ukavua muambe mukana mua muprofete Yeshaya ne: Kolesha ke mukokeshi uvua ne bua kutonkola Babulona ne kupikula bena Yuda ku bupika. Bua didianjila kumusungula edi ke padi Bible umubikila ne: ‘muela manyi’ wa Yehowa.—Yeshaya 44:26-28
Udi umona pebe tshivua Zekâya mumone anyi?
1 BENA Yuda bavua mu disanka dia dikema! Yehowa Nzambi “wakasonsola lungenyi lua Kolesha mukalenge wa Pelasa” bua kulekelela bena Isalele bakavua benze bidimu bia bungi ku Babilona kuvuabu baye nabu pavuabu babakuate. Mukalenge wakafila dimanyisha dia ne: bena Yuda bavua mua kupingana mu buloba buabu bua ‘bibakulule nzubu wa Yehowa Nzambi wa Isalele.’ (Eze. 1:1, 3) Buvua bualu bua disanka dia dikema! Mmumue ne: bavua ne bua kujadikulula ntendelelu wa Nzambi mulelela mu buloba buvuaye mupeshe tshisamba tshiende.
lfb dilongesha di 63 §5
Mifundu ku tshimanu
Tshidimu katshiyi tshianji kukumbana, Kolesha wakafila dimayisha wamba ne: ‘Yehowa mungambile bua kuibakulula ntempelo wende ku Yelushalema. Muntu yonso wa mu tshisamba tshiende udi musue kuambuluisha, udi mua kuya.’ Nunku anu bu mukavua Yehowa mulaye, bena Yuda ba bungi bakapingana kuabu bidimu 70 panyima pa dibutuka dia Yelushalema. Kolesha wakapingaja makopo a or ne a arjan ne bintu bikuabu bivua Nebukadenesâ muangate mu ntempelo. Udi mumone muvua Yehowa mutume Kolesha bua kuambuluisha tshisamba tshiende anyi?
Bubanji bua mu Dîyi dia Nzambi
Nkonko ya babadi
Tshilejilu tshibidi ntshia dîyi dia buprofete divua diakule bua Kolesha uvua ne bua kukuata tshimenga tshia Babilona. Uvua ne bua kupatula bena Yuda mu bupika ne kutuma dîyi bua bibakulule ntempelo wa Yehowa. (Yesh. 44:26–45:4) Kolesha mukalenge wa Pelasa wakakumbaja dîyi dia buprofete adi. (Eze. 1:1-4) Nansha nanku, kavua utendelela Nzambi mulelela to. Yehowa wakasaka Kolesha bua kukumbaja dîyi dia buprofete adi kayi umupangisha bua kuenza mudimu ne budikadidi buende bua kudisunguila uvuaye ne bua kutendelela to.—Nsu. 21:1.
LUMINGU LUA DIA 16-22/3
BIUMA BIA MU DÎYI DIA NZAMBI YESHAYA 45-47
“Meme ndi Nzambi, ne kakuena mukuabu bu meme to”
“Dîna diebe dijidibue”
14 Satana mmuenze tshionso tshidiye mua kuenza bua kupangisha Yehowa bua kukumbaja tshipatshila tshiende. Kadi mmupangile misangu ne misangu. Bible udi uleja tshidi Yehowa muenze, ne udi ujadika ne: kakuena muntu mukuabu bu Yehowa Nzambi to. Bushuwa, buntomboji bua Satana ne bonso badi ku luseke luende mbunyingalaje Yehowa bikole. (Mis. 78:40) Kadi yeye mmuenze malu ne meji ne lutulu ne buakane mu tshilumbu etshi. Mmuleje kabidi mudiye wa bukole buonso mu mishindu bungi kabuyi kubala. Kupita bionso, dinanga diende didi dimuenekela mu bionso bidiye wenza. (1 Yone 4:8) Yehowa mmuenze mudimu kayi utshioka bua kujidila dîna diende.
“Yehowa . . . udi ne bukole bua bungi”
14 Anu mutuabimona, Nzambi udi ukuata mudimu ne bukole buende bua kufuka, kubutula, kukuba, kujadikulula malu; mu tshikoso, mbua kuenza tshionso tshidiye musue tshidi tshiumvuangana ne disua diende. (Yeshaya 46:10) Mu imue nsombelu, Yehowa utu wenza mudimu ne bukole buende bua kusokolola ngikadilu yende ya mushinga ne mikenji yende. Kadi utu utamba kukuata nabu mudimu bua kukumbaja disua diende, mmumue ne: kubingisha bumfumu buende ne kutumbishisha dîna diende dia tshijila ku diambuluisha dia Bukalenge bua Masiya. Kakuena tshidi mua kumupangisha bua kukumbaja tshidiye mulongolole atshi to.
Didipuekesha dikusake bua kuitaba malu audi kuyi mumanye
15 Katuena bamanye tshidi mua kuenzeka dituku dionso to, kadi tudi bamanye ne: Yehowa mmutulaye muoyo wa tshiendelele, mu diulu anyi pa buloba. Tudi bamanye kabidi ne: kena mua kushima ne kakuena tshintu tshidi mua kumupangisha bua kukumbaja milayi yende yonso to. (Tito 1:2) Anu yeye ke udi mua ‘kudianjila kumanyisha ndekelu wa bualu, ne kumanyisha kumpala menemene malu adi kaayi manji kuenzeka.’ Malu onso avuaye mulaye kale akakumbana. Nansha adiye mutulaye petu neakumbane. (Yesh. 46:10) Tudi batuishibue ne: kakuena tshidi mua kumupangisha bua kutunanga to. (Lomo 8:35-39) Neatupeshe meji ne bukole bua tunanukile. Tuikalayi batuishibue ne: Yehowa neatuambuluishe ne neatubeneshe.—Yel. 17:7, 8.
Mukanda udi utuambuluisha bua kunanukila ne lulamatu too ne ku ndekelu
13 Bena Kristo bena Ebelu abu bavua ne bua kudienzeja kabidi bua kuepuka “dinanga dia makuta” ne kubenga kudikutakajija ne bintu bia bungi (Bala Ebelu 13:5.) Bamue ba kudibu bavua ne bupele ne nzala yamba kuya nabu. (Eb. 10:32-34) Nansha muvuabu badisuike kumpala bua kunanukila mu ntatu ayi bua bualu bua lumu luimpe, bidi bimueneka ne: bamue ba kudibu bakabanga kuditua mu dikeba makuta bua kudikuba ku njiwu ne kuepuka bupele. Kadi nansha bu bobu ne makuta bungi kayi, kaavua mua kubasungila ku kabutu kavua kalua to. (Yak. 5:3) Mu bulelela, bivua mua kukolela muntu yonso uvua munange bintu bia ku mubidi bua kunyema, kushiya nzubu wende ne bintu biende.
14 Tuetu ne ditabuja dikole, batuishibue ne: Yehowa ukadi pa kubutula ndongoluelu wa malu eu, nebitusake bua kulekela dinanga dia bintu. Mu dikenga dinene, bantu “nebimanshe arjan yabu mu misesu” bualu nebajingulule ne: “nansha arjan yabu anyi or yabu kabiakukumbana bua kubapandisha mu dituku dia tshiji tshikole tshia Yehowa to.” (Yeh. 7:19) Pamutu pa kudina ne kasuki mu dikeba makuta a bungi, mbimpe tuangate mapangadika atuambuluisha bua kuikala ne bintu bidi bikengela buetu tuetu, bua bena mu mêku etu ne bua tumone mua kuenzela Yehowa mudimu. Nunku katubuedi mabanza a patupu anyi katufidi meji etu onso ku bintu bitudi nabi to. Tudimuke kabidi bua bintu bitukadi nabi kabilu ne mushinga wa bungi menemene mu nsombelu wetu to. (Mat. 6:19, 24) Bu mutudi tuenda tusemena ku nshikidilu wa ndongoluelu wa malu eu, nebitulombe bua kueyemena Yehowa anyi bintu bitudi nabi.
Bubanji bua mu Dîyi dia Nzambi
Nkonko ya babadi
Yehowa utu wenzeja malu bua disua diende dikumbane. Mmunyi mudi bualu ebu bupetangana ne bukole buende bua kuamba malu atshilualua? Yeshaya 46:10 udi wamba ne: “Ndi ndianjila kumanyisha ndekelu wa bualu ku tshibangidilu tshiabu, ne mmanyisha kumpala menemene malu adi kaayi manji kuenzeka. Ndi ngamba ne: ‘Dipangadika dianyi nedikumbane, ne nengenze tshindi musue kuenza.’”
Bumue bualu budi busaka Yehowa bua kutumanyisha malu enzeke kumpala eku budi ne: udi ne bukole bua kuenzeja malu. Yehowa katu dijinga ne kulondesha bualu too ne ku ndekelu bua kushisha kumanya ndekelu wabu bu mututu imue misangu tumona filme too ne ku ndekelu kuende bua kushisha kumanya mudiye ujika to. Kadi tudi tumona mpindieu ne: Yehowa udi ne mushindu wa kuamba bua bualu buenzeke mu tshikondo tshisunguluke, ne pashishe kuenza bua bualu abu buenzeke padi tshikondo atshi tshikumbana. Ekes. 9:5, 6; Mat. 24:36; Bien. 17:31.
Bua bualu ebu, Bible udi utela miaku bu mudi “kulongolola” ne “kuenza,” bua kuleja tshidi Yehowa wenza bua amue malu atshilualua. (2 Bak. 19:25; dim.; Yesh. 46:11) Miaku eyi mbayikudimuine ku muaku wa mu tshiena Greke udi umvuija “mufumbi.” (Yel. 18:4) Anu mutu mufumbi wa diima mupiluke wangata diima bua kudienza dibungu dimpe, Yehowa udi ne mushindu wa kuenza bua amue malu enzeke bua kukumbaja disua diende.—Ef. 1:11.
LUMINGU LUA DIA 23-29/3
BIUMA BIA MU DÎYI DIA NZAMBI YESHAYA 48-49
Ikala udilongela malu adi Yehowa ukulongesha ne uatumikile
lff dilongesha dia 35, kamutu ka bualu 1
Mua kuangata mapangadika mimpe
Kumpala kua kuangata dipangadika, sambila bua Yehowa akuambuluishe, ne bala Bible bua kumanya mudiye umona malu. (Balayi Nsumuinu 2:3-6.) Mu imue nsombelu, Yehowa utu uleja tshia kuenza patoke. Dîba adi, kutumikila tshidiye muleje atshi ke dipangadika ditambe buimpe diudi mua kuangata.
Kadi tshia kuenza ntshinyi Bible yeye kayi muleje tshia kuenza patoke? Yehowa neakulombole anu “mu njila uudi ne bua kuendela.” (Yeshaya 48:17) Mushindu kayi? Udi mua kupeta mêyi manene adi mua kukulombola. Mêyi manene a mu Bible mbulelela bua nshindamenu budi buleja meji a Nzambi ne mudiye umvua. Misangu ya bungi, tudi tumanya mudi Yehowa umona amue malu patudi tubala bualu kampanda mu Bible. Patudi tujingulula mudiye umvua, tudi mua kuangata mapangadika adi amusankisha.
lff dilongesha dia 34 kamutu ka bualu 6
Mutudi mua kuleja Yehowa ne: tudi bamunange
Kutumikila Yehowa kutu anu kuimpe misangu yonso. Balayi Yeshaya 48:17, 18, pashishe nuandamune nkonko eyi:
● Buebe wewe, mbimpe tuitabe ne: Yehowa mmumanye misangu yonso tshidi tshitambe buimpe buetu tuetu anyi? Bua tshinyi?
● Katshia watuadija kulonga, mmunyi mudi malu a mu Bible ne a Yehowa Nzambi mulelela makuambuluishe?
‘Nudibake pa ditabuja dienu ditambe tshijila’
8 Yehowa udi utuvuluija ne: patudi tutumikila mikenji yende, tudi tupeta diakalenga. Udi utulaya ne: tuetu bamutumikile netupete malu abidi. Bua kumpala, ditalala dietu nedikale bu musulu udi ne mâyi a bungi matalala adi atungunuka anu ne kupueka. Buibidi, buakane buetu nebuikale bu mavuala a mâyi manene. Wewe muimane ku mpenga kua mâyi manene, neumone ne: mavuala kaatu ajika to, atu anu atungunuka ne kujuka. Yehowa udi wamba ne: buakane buebe nebuikale anu bu mavuala, kabuakujika to. Wewe udienzeja bua kushala anu mumulamate, kakuitaba bua ukuluke to. (Musambu 55:22) Malu adi Yehowa utulaya aa kaenaku akolesha ditabuja diebe kudiye ne akusaka bua kutumikila mikenji yende anyi?
Bubanji bua mu Dîyi dia Nzambi
it “Tshikondo tshidi tshianyishibue” §1-3
Tshikondo tshidi tshianyishibue
Mu 2 Kolinto 6:2, mupostolo Paulo udi utela mêyi a mu dîyi dia buprofete didi mu Yeshaya 49:8, didi diamba ne: “Mona tshidi Yehowa wamba:“Mvua mukuandamune mu tshikondo tshia diakalengele, ne mvua mukuambuluishe mu dituku dia lupandu; mvua mutungunuke ne kukulama bua kukufila bu tshipungidi bua bantu, bua kuakajilula buloba, bua kuenza bua bapiane bumpianyi buabu buvua bushale munda mutupu.’” Mu mifundu ya ntuadijilu, mêyi aa avua atangila Yeshaya bienze bu ne: uvua wimanyina tshisamba tshia Isalele. (Yes 49:3) Kakuyi mpata, dîyi dia buprofete edi divua ditangila diakajilula dia malu, ne diakakumbana bua musangu wa kumpala pavua Tshisamba tshia Isalele tshipatuke mu bupika mu Babilona, pavuabu bambile bena buloko bena Isalele ne: “Patukayi!” Ke bobu kulua kupingana mu mu ditunga diabu dikavua disunsuke ne kudiakajilulabu.—Yes 49:9.
Kadi mêyi a mu mvese wa 8 a ne: “Bua kukufila bu tshipungidi bua bantu,” ne a mu mvese 6 a ne: “muena mudimu” wa Yehowa uvua ne bua kufidibua bu “butoke bua bisamba, bua [Nzambi] kupatula bena lukanu mu buloko bua muinshi mua buloba,” adi aleja muvua dîyi dia buprofete adi ditangila Masiya ne muvuadi dikumbena Yezu Kristo bu “muena mudimu” wa Nzambi (Fuanyikija ne Yes 42:1-4, 6, 7 ne Mat 12:18-21.) Bu muvua “tshikondo tshia diakalengele” tshikale tshikondo tshivua Yehowa ne bua ‘kuandamuna’ muena mudimu wende ne ‘kumuambuluisha,’ tshikondo atshi tshivua ne bua kuikala tshikumbena Yezu ‘pakasengelelaye, kulombaye kabidi kudi Yeye uvua ne bukole bua kumusungila ku lufu ne mbila mikole ne binsonji, ne wakamumvuila bua ditshina diende dia Nzambi.’ (Eb 5:7-9; fuanyikija Yne 12:27, 28; 17:1-5; Luk 22:41-44; 23:46.) Nunku tshivua “dituku dia lupandu” lua Muana wa Nzambi, dituku divuaye muleje lulamatu mu mushindu mupuangane; ne bua bualu abu “wakalua mufidi wa lupandu lua tshiendelele kudi bantu bonso badi bamutumikila.”—Eb 5:9.
Bualu bukuabu, padi Paulo mutele mêyi a mu dîyi dia buprofete edi bidi bileja ne: divua ne bua kukumbena kabidi bena Kristo badiye ukankamija bua ‘kabitabi ngasa wa Nzambi bua kupangila tshipatshila tshiende nansha,’ badiye mulue kuambila kabidi (panyima pa yeye mumane kutela Yes 49:8) ne: “Monayi! Mpindieu ke tshikondo menemene tshidi tshianyishibue. Monayi! Mpindieu ke dituku dia lupandu.” (2Ko 6:1, 2) Bena Kristo abu bakalua ‘Isalele wa mu nyuma wa Nzambi’ mu Pentekoste wa mu 33 B.B. (Gal 6:16); kadi bivua bikengela baleje mushinga wa ngasa wa Nzambi bua ‘tshikondo tshidi tshianyishibue’ tshikale bushuwa “dituku dia lupandu” luabu.
LUMINGU LUA DIA 6-12/4
BIUMA BIA MU DÎYI DIA NZAMBI YESHAYA 50-51
Teleja bantu badi Nzambi mulongeshe
Dilongesha bamanyishi ba Bukalenge
5 Mu tshikondo tshiakanyine, Yehowa wakalongesha Muanende mudimu uvuaye ne bua kuenza pa buloba. Tukonkononayi mulayi wa buprofete udi uleja malanda avua pankatshi pa Muyishi munene ne Muanende muanabute. (Bala Yeshaya 50:4, 5.) Mulayi wa buprofete eu udi uleja ne: Yehowa uvua ujula Muanende “ku dinda ku dinda.” Difuanyikija edi didi difila lungenyi lua mulongeshi udi ujula mulongi wende ne dinda dinda bua kumulongesha. Mukanda kampanda udi umvuija Bible udi wamba ne: “Mbienze anu bu ne: Yehowa . . . udi umubueja mu kalasa bu mulongi, ne umulongesha tshidiye ne bua kuyisha ne mushindu wa kuyisha.” Mu kalasa ka mu diulu aka, Yehowa wakalongesha Muanende “tshia kuamba ne tshia kuakula.” (Yone 12:49) Tatu uvua mua kuikala kabidi muleje Muanende mushindu wa kulongesha. Pavua Yezu pa buloba, wakenza mudimu bimpe ne malu avuabu bamulongeshe bua kukumbaja mudimu wende wa kuyisha ne wa kulongesha bayidi bende bua kukumbajabu mudimu wabu wa diyisha
‘Ndi munange Tatu’
13 Kumpala kua Yezu kuluaye pa buloba, uvua mulonge malu kudi Tatuende ne muoyo mujima. Mulayi udi mu Yeshaya 50:4-6 udi uleja ne: Yehowa wakalongesha Muanende mu mushindu wa pa buawu bua mudimu wende wa Masiya. Nansha muvua amue malu avua Muana mulonge atangila ntatu ivua muela manyi wa Yehowa ne bua kupeta, wakaalonga ne muoyo umue. Pakaluaye pa buloba ne kuluaye muntu mukole, wakatungunuka ne kuya ku nzubu wa Tatuende bua kumutendelela ne kulonga malu avua Yehowa musue bua bikale balongesha mu nzubu wende. Nunku Bible udi uleja muvua Yezu ne tshibidilu tshia kuya ku ntempelo ne mu nsunagoga. (Luka 4:16; 19:47) Tuetu basue petu bua dinanga ditudi banange Yehowa dikale anu dikole, tudi ne bua kuikala tubuela mu bisangilu bionso bualu ke muaba utudi tutendelela Yehowa ne tukolesha dimanya ne dianyisha dietu kudiye.
Bubanji bua mu Dîyi dia Nzambi
it “Tshina tshia mabue” §2
Tshina tshia mabue
Yehowa wakapesha Yeshaya ngakuilu mukuabu wa dikema, kulejaye bua tshina tshia mabue ne mudimu uvua ne bua kuenjibuamu. (Yes 51:1) Mvese udi ulonda udi pamuapa uleja ne: “dibue” adi didi Abalahama udi ntuadijilu wa tshisamba ne “tshina tshia mabue” tshivua Sala, uvuabu bafuamyikije difu diende divua diambule Izaka, nkambua wa Isalele ne tshina. (Yes 51:2) Kadi bu muvua dimita dia Izaka dienzeke ku bukole bua Nzambi ne mu tshishima, ngakuilu wa Yeshaya eu udi mua kuikala ne dikumbana dia mu nyuma dia katshia ne katshia. Nunku, Dutelonome 32:18 udi wamba mudi Yehowa muikale ‘Dibue divua dilele’ Isalele, ne ‘Yeye uvua mukupatule [mbakule bua muaku wa pa muanda umue umue eu bua Sala mu Yes 51:2] ne bimusama pa kulela.’
LUMINGU LUA DIA 13-19/4
BIUMA BIA MU DÎYI DIA NZAMBI YESHAYA 52-53
Yezu uvua muleje dinanga dia bungi
Nuenu bansonga, kandamenayi balunda babi
2 Malu adi bena mulongo nebe benza adiku akulenga anyi? Bikalabi nanku, mbua tshinyi? Bidiku mua kuikala ne: udi musue bua bakuanyishe anyi? Dijinga edi kaditu anu dibi to, bualu nansha bantu bakulumpe batu basue bua balunda babu babanyishe. Kakuena muntu nansha umue, mukulumpe anyi muana utu musue bamubenge to. Nunku umanye ne: nekuikale anu bantu bakubenga paudi wenza malu mimpe. Bakabenga Yezu muana wa Nzambi nansha muvuaye wenza anu malu mimpe. Pavua bamue bantu bamulonde ne balue bayidi bende, bakuabu bakamulengulula ne ‘kabakamuanyisha nansha.’—Yesh. 53:3.
Keba bupuekele ne sankisha Yehowa
15 Mu ngondo ya ndekelu ivua mishadile Yezu pa buloba, malu akamutonda bikole. Uvua mumanye ne: bavua ne bua kumukengesha bibi menemene ne kumushipa. (Yone 3:14, 15; Gal. 3:13) Ngondo mikese kumpala kua lufu luende, wakamba muvua malu mamutonde bikole. (Luka 12:50) Matuku makese kumpala kua kufuaye, wakamba ne: “Ndi ne dipampakana.” Tudi tumona muvuaye udipuekesha ne ukokela Nzambi pakamusambilaye uleja muvuaye umvua, wamba ne: “Tatu, umpandishe ku dîba edi. Nansha nanku, bua bualu ebu ke bundi mufikile ku dîba edi. Tatu, utumbishe dîna diebe.” (Yone 12:27, 28) Pakafika dîba dia Yezu kufua, wakadifila ne dikima dionso mu bianza bia bena lukuna ba Nzambi; bakamushipa mu mushindu mubi wa dimupuekesha milongo. Yezu wakenza disua dia Nzambi ne bupuekele buonso nansha muvua malu mamutonde ne bamukengeshe bikole. Kakuyi mpata, tudi mua kuamba ne: Yezu udi tshilejilu tshitambe buimpe bua muvuaye muleje bupuekele pavua malu mamutonde!—Bala Yeshaya 53:7, 10.
Bubanji bua mu Dîyi dia Nzambi
Tuikale ne “lukunukunu lua kuenza midimu mimpe”
14 Basadidi ba Yehowa badi ne bua kuikala bakezuke bua Yehowa kuitabaye ntendelelu wabu. Yeshaya wakamba ne: ‘Umukayi, umukayi, nulopoke mu muaba wawa, kanulengi tshintu tshidi tshibipe! Nulopoke munkatshi mua musoko au; nudilengeje, nuenu badi batuala malongo a Yehowa.’ (Yesh. 52:11) Bidimu bia bungi kumpala kua Yeshaya kufundaye mêyi aa, mukalenge muimpe Asa ukavua muenze mudimu munene wa kumbusha tshiendenda mu Yuda. (Bala 1 Bakelenge 15:11-13.) Bidimu bia bungi pashishe, mupostolo Paulo wakambila Tito ne: Yezu wakafila muoyo wende bua kulengeja bayidi bende ne kubavuija ‘bantu bende, bikale ne lukunukunu lua kuenza midimu mimpe.’ (Tito 2:14) Mu buloba ebu budi bantu kabayi ne bundu, ki mbipepele nangananga bua bansonga kulama bikadilu bimpe to. Tshilejilu, basadidi ba Nzambi bonso, bansonga ne bakulumpe badi ne bua kuluangana bua kubenga kudinyanga ne ditangila dia malu a bantu butaka adibu baleja mu bikandakanda, ku televizion, mu filme ne nangananga ku Internet.
LUMINGU LUA DIA 20-26/4
BIUMA BIA MU DÎYI DIA NZAMBI YESHAYA 54-55
Udi mudiakaje bua kudipangisha malu kayi bua Yehowa akulongeshe?
Dilongesha dia Nzambi nditambe malongesha makuabu
3 Bua bulenga buende, Yehowa mmusue kulongesha bantu bena mapanga. Bible ukavua muakule bua bena Kristo bela manyi mu Yeshaya 54:13 wamba ne: “Bana bebe bonso nebikale bayidi ba Yehowa; ditalala dia bana bebe nedikale dinene.” Mêyi aa adi akumbanyina kabidi “mikoko mikuabo” ya Kristo. (Yone 10:16) Bualu ebu budi bumueneka patoke mu mulayi mukuabu udi wenda ukumbana lelu eu. Yeshaya wakamona mu tshikena kumona bantu ba mu bisamba bionso balua kubuela mu ntendelelu mulelela. Udi wamba mudibu bende bambilangana ne: ‘Luayi bienu, tubande ku mukuna wa Yehowa, tubuele mu nzubu wa Nzambi wa Yakoba; bua yeye atuyishe bienzedi biende, ne bua tuetu tuende mu njila yende.’ (Yesh. 2:1-3) Ndiakalenga dinene dia kulongeshibua kudi Nzambi.
“Sumba bulelela, kubupanyi nansha”
6 Bala Yeshaya 55:1-3. Mêyi a Yehowa adi Yeshaya mufunde adi aleja kabidi bimpe tshidi kusumba bulelela kumvuija. Mu mvese eyi, Yehowa udi ufuanyikija dîyi diende ne mâyi ne mabele ne mvinyo. Anu bu mutu mâyi matalale a mimpe apeshilula muntu bukole, ke mudibi kabidi bua mêyi a Nzambi a bulelela. Kabidi anu mutu mabele atupesha bukole ne ambuluisha bana bua kukola, mêyi a Yehowa adi adiisha adi pawu atukolesha ne atuambuluisha bua kukola mu nyuma. Bualu bukuabu, mêyi a Yehowa adi kabidi bu mvinyo. Mushindu kayi? Bilondeshile Bible, mvinyo mmusuikakaja ne disanka. (Mis. 104:15) Nanku padi Yehowa wambila bantu bende bua ‘kusumba mvinyo,’ udi utujadikila ne: kuikala ne nsombelu udi upetangana ne mêyi ende nekutupeteshe disanka. (Mis. 19:8) Mmushindu kayipu mulenga nunku wa kutuleja mudi kulonga mêyi a bulelela ne kuatumikila kutuambuluisha! Diditatshisha dietu edi ndifuanangane ne bintu bitudi mua kufila bua kusumba tshintu kampanda. Tumonayi mpindieu bintu bitanu bitudi mua kufila bua kusumba bulelela.
MMALU KAYI AUDI MUDIPANGISHE BUA KUSUMBA BULELELA?
7 Dîba. Etshi ntshintu tshidi muntu yonso udi usumba bulelela ne bua kudipangisha. Bitu bilomba dîba bua kuteleja mukenji wa Bukalenge, kubala Bible ne mikanda yetu, kudilongela Bible, kulongolola bisangilu ne kubuelamu. Tudi ne bua ‘kudisumbila’ dîba, anyi kuangata dîba dia amue malu a mushinga mukese atutu tuenza. (Bala Efeso 5:15, 16 ne dimanyisha dia kuinshi kua dibeji.) Bua kupeta dimanya dijalame dia malongesha a nshindamenu a mu Bible, nebituangate dîba bungi kayi? Bidi bilondeshila nsombelu wa muntu ne muntu. Kakuena mikalu bua kulonga meji a Yehowa, njila yende, ne midimu yende nansha. (Lomo 11:33) Tshibumba tshia Nsentedi tshia nzanzanza tshiakafuanyikija bulelela ne “tshilongo tshikese,” kuambatshi ne: “Kushikidi anu pa tshilongo tshimuepele tshia bulelela to. Bu tshimuepele tshikumbanyine kakuvua mua kuikala bia bungi nansha. Tungunuka ne kukungija, tungunuka ne kukeba bia bungi.” Tudi mua kudiebeja ne: ‘Tshianyi tshisumbu tshia bilongo tshia bulelela tshidi bunene kayi?’ Nansha bobu batupeshe muoyo wa tshiendelele, netulonge anu kulonga malu a bungi adi atangila Yehowa. Lelu, mbimpe tuenze mudimu ne dîba dietu ne meji bua kusumba bulelela bua bungi bilondeshile nsombelu wetu. Tuangatayi tshilejilu tshia muntu uvua ne dijinga dikole dia kulonga bulelela.
“Nuikale ne ntema, nuteleje bimpe!”
Kudi bintu bia bungi bidi mua kutupangisha mua kuteleja ne ntema mu bisangilu. Tshilejilu: malu adi matutonde, mitoyi ya pambelu anyi dipatuka ne dibuela dia badi munda, dibenga kudiumvua bimpe, ne mukodi wa bana batekete. Kadi ntshinyi tshidi mua kutuambuluisha bua kushala ne ntema?
Mêsu atu atuambuluisha bikole bua kushala ne ntema. Nanku tangila muntu udi wakula. Padiye ufila mvese (nansha wewe mumumanye bimpe), bulula Bible, nubale nende pamue. Wadimuka, kuikadi ukenzakana dîba dionso ukeba bua kumanya kudi ka-mutoyi konso kafumina to! Bualu wewe ukenzakana eku ne eku, kuakulonda muntu udi ulongesha bimpe to.
Pikala “ntatu” ikupangisha bua kulonda bidibu balongesha bimpe, ulombe Yehowa bua abatamije meji ebe ne akupe muoyo wa kuteleja bilenga. (Mus. 94:19; Filip. 4:6, 7) Ikala usambila bikole padibi bikengedibua. (Mat. 7:7, 8) Yehowa ke udi mulongoluele basadidi bende bisangilu. Umanye ne: mmusue bua bikuambuluishe.—1 Yone 5:14, 15.
Bubanji bua mu Dîyi dia Nzambi
“Kupampakanyi to, bualu ndi Nzambi webe”
14 Bualu bua kumpala, bu mutudi bayidi ba Kristo, tudi bamanye ne: nebatukine. (Mat. 10:22) Yezu ukavua muambe ne: bayidi bende bavua ne bua kukengeshibua bikole menemene matuku a ku nshikidilu. (Mat. 24:9; Yone 15:20) Buibidi, mêyi a buprofete a Yeshaya adi adianjila kutudimuija ne: bena lukuna betu kabakutukina anu tshianana to, kadi nebatuluishe ne bia mvita bishilashilangane. Mu bia mvita abi mudi ditushiminyina malu muinshi muinshi, ditushiminyinawu patoke, ne ditukengesha ne tshikisu tshikole. (Mat. 5:11) Yehowa kakukanda bena lukuna betu bua kutuluisha ne bia mvita ebi to. (Ef. 6:12; Buak. 12:17) Kadi ki mbimpe tuikale ne buôwa to. Bua tshinyi?
15 Mona bualu buisatu butudi ne bua kuvuluka. Yehowa wakamba ne: “Tshia mvita tshionso” tshidibu batuluisha natshi “katshiakutshimuna to.” Anu bu mudi tshimanu tshitukuba ku tshipepele tshikole tshia mvula wa tshipupu, Yehowa udi utukuba pende ku “ditayika dia bena tshikisu.” (Bala Yeshaya 25:4, 5.) Bena lukuna betu kabakukokesha bua kutuenzela bualu nansha bumue budi butukengesha buashala kashidi to.—Yesh. 65:17.
LUMINGU LUA DIA 27/4–3/5
BIUMA BIA MU DÎYI DIA NZAMBI YESHAYA 56-57
Tudi ne disanka bualu Yehowa n’Nzambi wetu
ip-2 269 §14-16
Yehowa utu upeshilula bapuekele nyuma wa bukole
14 Lutulu lua Yehowa nelushikile. Yehowa udi wamba bua tshikondo atshi ne: “Nemmanyishe ‘buakane’ buebe ne midimu yebe, ne kabiakukuambuluisha to. Paudi udila bua kulomba diambuluisha, mpingu yebe iudi musangishe kayakukusungila to. Lupepele nelupite nayi yonso, mupuya wetu eu newuyipepule.” (Yeshaya 57:12, 13a) Yehowa nealeje mudi buakane bua Yuda buikale bua tshidingishilu. Bienzedi biende bia lubombo kabiakuambuluisha tshisamba nansha. ‘Mpingu yende idiye musangishe’ anyi idiye muenze kayakumusungila to. Palua dikenga anyi ntatu, nzambi idiye weyemena neyijimine ne neyipepuke ne dituta dia lupepele tshianana.
15 Mêyi a Yehowa aa akakumbana mu 607 K.B.B. pavua Nebukadenesâ mukalenge wa Babilona mubutule Yelushalema, muoshe ntempelo, ne mukuate bantu ba bungi muye nabu mu bupika. “Nunku bakumbusha Yuda mu buloba buende kuyabu nende ku babende.”— 2 Bakalenge 25:1-21.
16 Bia muomumue, disangisha dia mpingu bungi tshianana kudi badi badiamba mudibu bena Kristo kadiakubasungila ku dituku dia tshiji tshia Yehowa to. (Yeshaya 2:19-22; 2 Tesalonike 1:6-10) Nansha “Babilona munene” udi nsangilu wa bitendelelu bia dishima neabutudibue. Nyama wa luonji mukunze wa mu tshimfuanyi ne nsengu yende dikumi “nebimupawule [Babilona munene] nebimushiye butaka, nebidie mubidi wende ne nebimubutule butubutu ne kapia.” (Buakabuluibua 17:3, 16, 17) Tudi ba diakalenga bua mutudi batumikile dîyi dituma dia ne: “Patukayi munkatshi muende binuikala kanuyi basue kubuelakana nende mu mpekatu yende, ne binuikala kanuyi basue kupeta tshitupa tshia bipupu biende.” (Buakabuluibua 18:4, 5) Katupinganyi koku kudiye anyi ku njila yende nansha kakese.
“Bukalenge buanyi ki mbua pa buloba ebu to”
16 Mbimpe tushintuluke petu anu bu bobu! Bible udi ufuanyikija bukua bantu ne mbuu udi usampuka kayi mua kubatama, bualu kabena ne ditalala to. (Yesh. 17:12; 57:20, 21; Buak. 13:1) Padi eku malu a tshididi ajula bantu luonji, abatapulula, ne abafikisha ku dienza malu ne tshikisu, tuetu tudi balame ditalala ne buobumue buetu. Padi Yehowa umona mudi bena panu batapuluke, udi usanka bikole bua mudi bantu bende mu buobumue.—Bala Sefanya 3:17.
‘Tshikondo tshia kushikama talalaa’ tshikadi pabuipi!
Bu mudi Yehowa muikale “Nzambi wa ditalala,” anu bantu badi banange Nzambi ne banemeka bikole mêyi ende makane ke badi mua kupeta ditalala. Bushuwa, Yehowa katu ufila ditalala kudi muntu yonso patupu. ‘Nzambi wanyi udi wamba ne: Kakuena ditalala [bua] bantu babi.’ Bidi nanku bualu bantu babi badi babenga bua spiritu munsantu wa Nzambi kubalombola, pabi ditalala ndimue dia ku mamuma a spiritu eu.—Lomo 15:33; Yeshaya 57:21; Galatia 5:22.
Bubanji bua mu Dîyi dia Nzambi
Malu manene a mu mukanda wa Yeshaya: Tshitupa II
56:6—“Bantu ba bende” aba mbanganyi, ne badi ‘balamata tshipungidi tshia Yehowa bikole’ mu mishindu kayi? “Bantu ba bende” aba ‘mmikoko mikuabu’ ya Yezu. (Yone 10:16) Mbalamate tshipungidi tshipiatshipia, mbuena kuamba ne: badi batumikila mikenji ya tshipungidi etshi, bitaba malu onso adibu balongolole mu tshipungidi etshi, balonga malu a Nzambi a muomumue ne adi bena Kristo balonga, ne babakuatshisha mu mudimu wa kuyisha lumu luimpe lua Bukalenge ne kuvuija bantu bayidi.
Tuikalayi ne kanemu bua bisangilu bietu bia tshijila
YEHOWA mmusangishe bantu bende bena Kristo bela manyi ne balunda babu bua bamutendelele ku ‘mukuna wende wa tshijila.’ Udi ubavudijila disanka munda mua ‘nzubu wende wa kutendelela,’ ntempelo wende wa mu nyuma, udi muikale ‘nzubu wa tshitendelelu tshia bisamba bionso.’ (Yeshaya 56:7; Mâko 11:17) Malu aa adi aleja ne: ntendelelu wa Yehowa udi wa tshijila, mmukezuke ne udi ne mushinga wa bungi. Patudi tunemeka bisangilu bitudi tuenza bua kulonga ne kutendelela Nzambi, tudi tujadika mutudi tumona bintu bia tshijila mudi Yehowa ubimona.