8 JOZEFE
Wakatantamena diteta
PATSHIVUA Jozefe nsonga, uvua munangibue kudi tatuende Yakoba ne kudi Yehowa, Nzambi wende, uvua kabidi umutabalela. Nansha nanku, ntatu yakamukuata. Bu muvua tatuende mumunange bikole, batutuende bakamumvuila mukawu, kumukinabu, ne kutuadijabu kumukengesha. Pakalondelaye bena mu dîku diabu tshilota tshivua Yehowa mumulotesha tshivua tshileja ne: dimue edi bavua ne bua kumuinamina, batutuende abu bakamukina kabidi bikole.
Pakavua Jozefe ne bidimu 17 anyi 18, Yakoba wakamutuma bua enze luendu lua matuku ndambu, aye muaba uvua batutuende abu badishila nyama yabu bua kumanya muvuabu. Pakafikaye kuvuabu, bakamukuata, kumuelabu mu tshina tshia mâyi tshivua munda mutupu. Bakabenga kumuteleja nansha muvuaye ubadidila muadi. Nansha mukavuabu ne meji a kumushipa, bakalua kumvuangana bua kumupanyisha kudi bangenda mushinga bavua bapitshila muaba au. Pakaluabu kupingana kuabu, bakafikisha Yakoba ku diela meji ne: nyama wa tshisuku uvua mudie Jozefe, muanende munanga. Pabi mu bulelela, bavua baye nende mu Ejipitu ditunga divua kule lua ku sud. Bavua bamupanyishamu bu mupika kua Potifâ, munene wa mu mbulamatadi wa Palô.
Bivua bipepele bua Jozefe kumona ne: kuende kuvua kujike. Kadi wakenza malu ne muoyo mujima ne dikima. Bible udi wamba ne: “Yehowa uvua nende.” Yehowa uvua wenza bua tshionso tshivua Jozefe wenza tshitute diakalengele. Potifâ wakamuteka ku mutu kua nzubu wende mujima.
Jozefe wakatuilangana ne ntatu ya bungi. Mukaji wa Potifâ wakatuadija kumualakana bualu “Jozefe wakakola, kuluaye muntu wa mubidi mupatakane, muikale muimpe kumona.” Wakamuambila patoke muvuaye mumunange, kufikaye ne ku dimulomba ne: “Lala nanyi.” Ntshinyi tshiakenza Jozefe? Dîku diabu divua kule nende. Uvua mupika wetu wa tshianana eu uvua bamfumu bende mua kuenzela malu muvuabu basue. Mukaji au uvua ne bukole bua kumukengeshisha bibi. Bionso abi bivuaku bimufikishe ku dilala nende anyi? Peshi wakabenga ne dikima dionso bua kulala nende?
Jozefe uvua mumanye ne: mukaji wa mfumuende uvua mua kumukengeshisha bibi, nansha nanku ntshinyi tshiakamupetesha bukole bua kubenga kulala nende?
Bible udi wamba ne: “Wakabenga.” Jozefe wakamuambila ne: kavua mua kuenzela bayende uvua mumueyemene ne muoyo mujima bibi to. Jozefe wakamuela lukonko lua mushinga lua ne: “Mmunyi mundi mua kuenza bualu bubi bunene nunku, ne bushuwa kuenzela Nzambi mpekatu?” Jozefe uvua ne dikima, kubengaye diakamue bua kulala nende bualu uvua munange Tatuende Yehowa. Kadi mukaji wa Potifâ wakatungunuka ne kumuambisha “ku dituku ku dituku.” Dimue edi pavuabu nkayabu mu nzubu, wakakuata Jozefe mu tshilamba kumuambilaye ne: “Lala nanyi!” Jozefe kumudiapuka, kudiasa lubilu. Kadi wakashala ne tshilamba tshia Jozefe mu tshianza. Kuluaye kutshileja Potifâ umuambila ne: Jozefe uvua usua kulala nende ku bukole. Bu muvua Potifâ wamba kutayika ne tshiji, wakatuma dîyi, kuelabu Jozefe mu buloko.
Bakamuela mu buloko muvua muîdima wa bungi. Bakasuika makasa ende ne nkanu, kuelabu nshingu wende mu milonda tshikondo bule kampanda. (Mis. 105:17, 18) Bivua bipepele bua yeye kuela meji ne: kuende kuvua kujike. Kadi Yehowa uvua mumulekele anyi? Tòo! Jozefe pende uvua anu mueyemene Nzambi wende. Ke Yehowa kumubenesha. Mu kupita kua matuku, mfumu munene wa buloko wakamuteka ku mutu kua bena buloko bakuabu bonso. Jozefe wakenza tshionso tshivuaye mua kuenza ne dikima, kutungunukaye ne kunanukila mu buloko amu ku tshidimu ne ku tshidimu.
Bu muvua Jozefe ne ditabuja ne dikima, wakashala muntu wa mushinga mukole kudi Yehowa. Yehowa wakalua kulotesha Palô bilota bibidi, kuambuluishaye Jozefe bua kumumvuijabi. Jozefe wakamuleja ne: bilota biende bibidi abi bivua biumvuija muvuaku ne bua kulua bidimu muanda mutekete bia biakudia bia bungi, babilonda kudi bidimu bikuabu muanda mutekete bia tshiyole tshia nzala. Palô wakakema bikole bua muvua Nzambi mupeshe Jozefe bukole bua kumumvuija bilota abi ne bua mubelu muimpe uvuaye mumupeshe, ke kumutekaye bua alongolole bena Ejipitu ku tshiyole tshia nzala tshivua ne bua kulua atshi. Wakamuteka ku mutu kua Ejipitu, muntu muibidi panyima pende. Bua bualu abu, Jozefe wakabasungila ku tshiyole tshia nzala atshi, kusungilaye ne bena mu dîku diabu. Pakalua batutuende mu Ejipitu bua kukeba biakudia, bakamuinamina nansha muvuabu kabatshiyi bamumanye to. Tshilota tshivua Yehowa muloteshe Jozefe patshivuaye muana tshiakakumbana. Kadi malu akenza batutuende abu akaleja ne: bakavua balue bantu bimpe. Muanabu uvuabu bakine ku kale, wakabapandisha, kupandishaye tatuabu, kupandishaye ne tshisamba tshivua ne bua kulua kuenjibua tshia Isalele. Bionso ebi bualu uvua ne dikima ne mushale ne ditabuja kudi Yehowa.
Bala bualu ebu mu:
Lukonko lua kuelela meji:
Mmushindu kayi uvua Jozefe muenze malu ne dikima?
Buela mu buondoke
1. Mmalu kayi adi aleja ne: muyuki wa bualu bua Jozefe mu Ejipitu mmulelela? (g 11/10 15 §2-wcgr)
2. Mmunyi muvua Jozefe mumanye ne: Yehowa uvua mua kumona dilala ne mukaji wa bende au bu “bualu bubi bunene”? (Gen. 39:9; w22.08 26 §2)
3. Bua tshinyi Yehowa wakalekela Jozefe ulua ministre kavulambedi wa Ejipitu? (w96 1/5 11 §4) A
Tshimfuanyi tshia A
4. Ntshinyi tshidi tshileja ne: ditabuja dia Jozefe kadiakatenkakana nansha pakavuaye ne bidimu 110? (Gen. 50:25, 26; w07 1/6 27 §10-11) B
Tshimfuanyi tshia B
Keba malongesha
Mmunyi muudi mua kuidikija Jozefe padi muena Kristo nebe mukuenzele tshilema? (Gen. 45:4, 5; 50:19-21)
Nansha muvua Jozefe kule ne dîku diabu, wakashala anu mulamate Yehowa. Mmunyi mutudi mua kumuidikija . . .
patudi mu kalasa? C
Tshimfuanyi tshia C
patudi mu luendu? D
Tshimfuanyi tshia D
patudi tutua minu mu telefone ya minene anyi mu biamu bikuabu? E
Tshimfuanyi tshia E
Mmunyi muudi pebe mua kuenza malu ne dikima bu Jozefe?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Jozefe pabishibuaye ku lufu?
Bia kutangila kabidi
Nansha muvua Yehowa kayi mukube Jozefe ku ntatu, wakamuambuluisha bua kunanukila mu ntatu ayi. Mona mudiye mua kukuambuluisha pebe.
“Yehowa udi ukuambuluisha bua utute diakalengele” (w23.01 14-19)
Mmunyi mudi bana mua kuidikija Jozefe padi bana nabu babakengesha?