43 JOZEFE
Uvua tatu wa dikima
TATU muimpe utu wenza mudimu mukole bua kutabalela mukajende ne bana bende, ne bitu bimulomba dikima bua kubakuba. Jozefe, muena mabaya wa mu Nazaleta, uvua musue kuikala mulume muimpe ne tatu muimpe wa buena utudi batele eu. Kadi kumpala kua kuselaye, uvua mu nsombelu mukole uvua umulomba bua kuenza malu ne dikima. Mariya, mukaji uvuaye ne bua kusela, uvua ne difu. Kadi difu adi kadivua diende to. Mariya wakamumvuija muvuaye mupete difu adi. Kadi kabivua bipepele bua Jozefe kumvua tshivua Mariya umuambila ne kutshitaba to. Tumonayi tshiakenzaye.
Bible udi wamba ne: Jozefe uvua muntu muakane uvua utumikila mikenji ya Yehowa. Uvua kabidi ne bulenga ne luse. Pakamanyaye ne: Mariya uvua ne difu, wakela meji a kuenza tshivua tshimpe. Uvua musue kumukuba ne kubenga kumufuisha bundu; nunku wakapangadija bua kumubenga mu musokoko. (Mu matuku au, bavua bamona bantu bavua babangilangane anu bu mulume ne mukaji bakavua baselangane. Nanku, pavuabu bashipa dibangilangana diabu, bavua ne bua kulomba mukanda wa kushipa nawu dibaka.) Kadi Yehowa wakamupangisha bua kumubenga. Wakamutumina muanjelu, kumuambilaye mu tshilota ne: “Kutshinyi bua kuya ne mukajebe Mariya kuebe” to. Muanjelu au wakamujadikila ne: Mariya uvua wamba bulelela. Muana uvuaye muimite uvua muana wa Nzambi uvua ne bua kulua Masiya.
Jozefe uvua ne mudimu munene wa kukolesha muana wa Nzambi
Jozefe ‘wakenza muvua muanjelu wa Yehowa mumuambile bua kuenza.’ Uvua ne bua kuambula bujitu bua Mariya ne bua muana wa Nzambi uvua ne bua kuledibua. Biakamulomba dikima dia bungi bua kuambula bujitu buabu.
Panyima pa ngondo ndambu, Kaisa Augusto wakela mukenji bua muntu yonso aye mu musoko wabu bua kudifundisha ku mikanda. Jozefe uvua ne bua kuya ku Beteleheme. Pamuapa, mukenji au kauvua utangila Mariya to, kadi wakaya ne Jozefe. Bidi bimueneka ne: Jozefe uvua mudiambile ne: uvua mua kukuba Mariya bimpe anu yeye ku luseke luende. Nunku bakenza luendu lule, nansha mukavua Mariya “pabuipi ne kulela.” Pakafikabu mu Beteleheme, tshikondo tshia kulela Yezu tshiakakumbana, Mariya kumulelelaye mu tshikumbi tshia nyama.
Jozefe wakenza mudimu mukole bua kutabalela Mariya ne muana uvua muledibue, kadi bavua bapele. Pakayabu ne muana ku ntempelo mu Yelushalema bua kumuleja kudi Yehowa, bakafila mulambu uvuabu banyishile bapele bua kufila. Panyima pa matuku, pakavuabu mu nzubu muabu mu Beteleheme, bena lubuku lua mitoto bavua pamuapa bafumina mu Babilona, bakalua kudi Jozefe ne Mariya, babalombola kudi “mutoto” wa pa buawu. Bakabapesha mapa a mushinga bua muana au. Bobu bamane kuya, muanjelu wa Yehowa wakadimuija Jozefe bua banyemene mu Ejipitu bualu Helode mukalenge mubi uvua ukeba kushipa Yezu.
Jozefe wakenza malu ne dikima, kujukabu butuku butuku, kuyabu mu Ejipitu muvua muanjelu mumuambile bua kuya. Mmunyi muvua Jozefe mua kuambula bujitu buabu mu Ejipitu amu? Mapa avua bena lubuku lua mitoto babapeshe ke avua ne bua kuikala mabambuluishe. Pashishe Yehowa wakambila Jozefe bua bapingane kuabu. Kadi bu muvua tshimenga tshia Beteleheme ku bukokeshi bua mukalenge wa tshikisu, Jozefe kakapinganamu to. Wakaya mu Nazaleta bualu Yehowa uvua mumuambile mu tshilota bua ayamu.
Jozefe ne Mariya bakalela bana bakuabu mu Nazaleta amu, bobu bakese mbasambombo. Jozefe wakatungunuka ne kuenza mudimu mukole wa mabaya bua kukumbaja majinga abu. Bualu bua mushinga mukole buakenzaye buvua bua kulongesha bana bende malu a Yehowa ne kuenza bua bamutendelele. Bavua ne tshibidilu tshia kuya mu nsunagoga bua kulonga malu a Yehowa, ne benza kabidi luendu ku Yelushalema bua kutendelela ne kubuela mu bibilu bia tshijila. Musangu wa ndekelu udi Bible utela Jozefe, mpavuaye muye ne dîku dijima ku Yelushalema. Tshikondo atshi Yezu uvua ne bidimu 12. Pakavuabu mu njila bapingana kuabu, Jozefe ne Mariya kabakamumona to. Jozefe uvua ne bua kuikala mupampakane bikole. Kadi ndekelu wa bionso, bakamupeta mu ntempelo bualu bubi kabuyi bumufikile to; pashishe kupinganabu nende kuabu. Bible udi wamba ne: Yezu “wakatungunuka ne kubakokela.”
Bible kena uleja bidimu bivua nabi Yezu pavua Jozefe mufue to. Kadi bidi bimueneka ne: Jozefe uvua mumulongeshe bua kuikala muenji wa mabaya muimpe. Nansha muvua bantu bamubikila ne: “muana wa muena mabaya,” bavua bamubikila kabidi ne: ‘muena mabaya.’ Jozefe mmushile batatu tshilejilu tshimpe tshia kulonda. Yehowa mmusue bua batatu bikale bu Jozefe. Uvua muntu wa dikima, wa lulamatu, ne wa bulenga. Wakakuba bena mu dîku diende, kubatabalelaye, ne kubalongeshaye malu a Yehowa.
Bala bualu ebu mu:
Lukonko lua kuelela meji:
Mmushindu kayi uvua Jozefe muenze malu ne dikima?
Buela mu buondoke
1. Mariya uvua muana wa Heli. Bua tshinyi Luka 3:23 udi wamba ne: Jozefe uvua “muana wa Heli”? (w17.08 32 §4)
2. Tshivua mua kuikala tshisake Jozefe bua kubenga kusangila ne Mariya too ne pakalelaye Yezu ntshinyi? (w03 15/12 5 §5)
3. Bible udi wamba ne: Jozefe uvua muena mabaya. Bua tshinyi mudimu au uvua mudimu mukole? (ia 166-167 §15-18) A
Tshimfuanyi tshia A
4. Ntshinyi tshidi tshitufikisha ku diamba ne: Jozefe uvua mua kuikala mufue patshivua Yezu muana? (w17.07 13 §8, dim.)
Keba malongesha
Jozefe wakatumikila Yehowa too ne pavuabi bikole bua kumutumikila. Tshilejilu tshiende tshidi tshilongesha baledi tshinyi? (Mat. 1:20, 24; 2:13-15, 19-21)
Jozefe uvua uteka Yehowa pa muaba wa kumpala mu dîku diende. Mmunyi mutudi mua kumuidikija? (Luka 2:41) B
Tshimfuanyi tshia B
Mmu mushindu kayi mukuabu muudi mua kuenza malu ne dikima bu Jozefe?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Jozefe pabishibuaye ku lufu?
Bia kutangila kabidi
Mona mu filme eu muvua Jozefe muenze tshivua Yehowa mumulombe bua kuenza.
‘Wakenza muvua muanjelu wa Yehowa mumuambile bua kuenza’ (4:39)
Mmunyi mutudi mua kuidikija Jozefe ne Mariya mbulamatadi yeye muele mukenji mukole anyi udi kawuyi utusankisha?