Malu a biamu adi mua kufila ditalala pa buloba anyi?

TSHIDI TSHISAKA BAMUE BUA KUITABA BUALU EBU

Badi bela meji ne: biamu bidiku lelu bidi biambuluisha bua kuyukila bipepele ne bua kuikala mu buobumue. Bantu ba mu matunga ne bilele bishilashilangane badi mua kuyukila bipepele ku diambuluisha dia Enternete, miaba ya kupetelangana ku Enternete, telefone ne programe idi yambuluisha bua kukudimuna miakulu kampanda. Imue misangu bantu badi mu bisumbu bidi biluishangana batu benza mudimu ne biamu abi bua kuyikila padibu kabayi ne mushindu wa kutuilangana mpala ne mpala anyi padi kuenza nanku kuikala ne njiwu.

Badi bela meji ne: malu a biamu adi mua kupangisha bantu bua kuluangana. Programe idi yidikija mushindu utu bantu bakula ne benza malu ne bindidimbi bidibu bakuata ne biamu muulu, bidi mua kuambuluisha bua kumanya muaba udi mvita mua kuenzekela. Bakokeshi bobu bumvue amue mêyi adi bantu bakula anyi malu makuabu adi akebesha mvita, nebamanye tshia kuenza bua mvita kayenzeki to.

Badi bela meji ne: malu a biamu adi mua kupetesha bantu makuta a bungi. Badi bamba nanku bualu malu a biamu mmambuluishe bua kuikale midimu ya bungi. Koku kuikale midimu ya bungi idibu bafuta bantu bimpe, kakuakuikala malu a bungi adi abapetesha tshiji ne abafikisha ku didimona bashadile to. Dîba adi kakuakuikala mvita to.

Tshilejilu, malu a biamu adi ambuluisha badi badima ne badi bamuna bua kuenza mudimu wabu bimpe ne kupeta bintu bia bungi. Ku diambuluisha dia biamu, bena biapu badi mua kuenza bintu bia bungi pa lukasa, bantu badi mua kulongela ku Enternete, ne kumanya mua kulama makuta ne mua kuatula. Malu aa adi ambuluisha bantu bua kudimona mu bukubi. Dîba adi, kakuakuikala malu a bungi adi mua kukebesha mvita to.

BUALU BUA KUELELA MEJI

Malu a biamu adi mua kufila ditalala anu pikala badi bakuata nawu mudimu banange ditalala.

• Ntshinyi tshidi mua kuenzeka biobi ne: badi benza mudimu ne malu a biamu kudi bantu badi banange mvita?

• Mmunyi mudi malu a biamu mua kufila ditalala padibu eku bakuata nawu mudimu bua kuenza bia mvita binene?

• Malu a biamu adiku mua kushintulula mioyo ya bantu idi miuwule tente ne lukuka, lukinu peshi kansungansunga anyi?

  

  Mutu tulonda tua dîba tuenda, kuulu: U.S. Air Force graphic; Creation Art/stock.adobe.com; Guido Mieth/DigitalVision via Getty Images; 3dsculptor/stock.adobe.com

  Malu a biamu adi mua kufila ditalala anu pikala badi bakuata nawu mudimu banange ditalala

TSHIDI BIBLE WAMBA

Anu mudi mvese eyi mileje, tshitu tshikebesha bilumbu mmeji adi mu mitu ya bantu ne mushindu wabu wa kuenza malu. Mu bulelela, bantu batu pa tshibidilu baluangana bualu badi ne lukuka, mukawu, peshi lutambishi. Malu a biamu nansha owu maye kumpala mushindu kayi, kaena mua kumbusha bikadilu bibi ebi to.

Biamu bidibu bapatule matuku etu aa, bantu badi mua kuenza nabi tshidibu basue. Badi mua kuenza nabi mudimu bua kuibaka bilamba bidi bisangisha bantu anyi bua kuenza bia mvita bidi mua kubabutula. Nansha biamu abi biobi bimpe, bantu badi mua kuenza nabi mudimu bibi bobu bikale ne meji mabi.

Bible udi ulongesha ne: ditalala nedilue pa buloba ku diambuluisha dia Bukalenge bua Nzambi, kadi ki nku diambuluisha dia malu a biamu adi enda aya kumpala to. (Matayi 6:10) Ku diambuluisha dia Bukalenge abu, Nzambi ‘neajikije mvita pa buloba buonso bujima’ ne neabutule bia mvita bionso bidi bantu benze. (Misambu 46:9) Bantu nebalonge bua kuikala bena ditalala bualu nebashintulule mushindu wabu wa kuela meji ne mudibu bamona bakuabu. (Yeshaya 54:13) Dimue dituku, malu adi afikisha bantu ku mvita kaakuikalaku kabidi to.​—Misambu 37:10, 11; Efeso 4:22-24, 31, 32.

Yan Dobronosov/Global Images Ukraine via Getty Images