Malu a kusankila nansha padibu batukina

1. Mmêyi kayi avua Yezu muambe? Bua tshinyi adi atukemesha?

YEZU wakamba mu Muyuki wende wa pa mukuna ne: “Nudi ba diakalenga padi bantu banukina.” (Luka 6:22) Mêyi aa akakemesha bantu bavua bamuteleja bualu kakutu muntu utu musue bua bamukine to. Kadi bua tshinyi Yezu uvua muambe nanku? Tuandamunayi lukonko elu bualu bantu ba bungi lelu badi bakina bayidi ba Yezu. Netumone malu adi abasaka bua kubakina ne adi atusaka petu bua kuikala ne disanka padibu batukina.

TSHIDIBU BATUKINYINA

2-3. Mbumue bualu kayi butu busaka bantu bua kukengesha bena Kristo balelela? Bidi mua kutusaka bua kumona bantu abu mushindu kayi? (Yone 16:2, 3)

² Bantu badi batukina bualu tudi tutendelela Yehowa. Yezu wakamba bua bantu bavua ne bua kuluisha bayidi bende anyi mene kubashipa ne: “Ki mbafike ku dimanya Tatu anyi meme to.” (Bala Yone 16:2, 3.) Nnganyi udi usaka bantu bua kukengesha bena Kristo balelela? Satana. Yeye ke “nzambi wa ndongoluelu wa malu eu.” (2 Kol. 4:3, 4) Udi upangisha bantu bua kulongabu malu malelela adi atangila Yehowa ne udi ubasaka bua kuluisha bantu badi banange Nzambi ne bamumanye bimpe. (Yone 8:42-44) Kumanya bualu ebu kudi mua kutuambuluisha bua kumona baluishi betu mushindu kayi? Kudi kutuambuluisha bua kubenga kubakina pabu bualu Satana ke udi ubashimakaja au.

³ Tuangatayi tshilejilu tshia muanetu wa balume kampanda, diende Pavel,a udi musombele mu ditunga mudibu bakandike mudimu wetu. Bu muvuaye mutungunuke ne kutendelela Yehowa, bakamukuata, kumukumabu bibi menemene, ne kumuelabu mu buloko bua ngondo ndambu. Udi wamba ne: “Buanyi meme, Satana ne bademon bende ke badi batuluisha bua tulekele kutendelela Yehowa. Bidi bimueneka ne: bena mudimu ba bungi ba ku maloko kabatu batukine to. Batu benza anu mudimu wabu.” Muanetu mukuabu wa balume wa mu Croatie uvua munanukile pavuabu bamukengesha kudi baledi bende bavua kabayi Bantemu udi wamba ne: “Ndi mufike ku dimona ne: Satana ke muena lukuna wanyi, ki mbaledi banyi to.”​—Ef. 6:12.

4. Tshilejilu tshia Yezu ne tshia muyidi Stefano bidi bitulongesha tshinyi? (Tangila kabidi tshimfuanyi.)

⁴ Katutu tukina baluishi betu to. Tudi mene mua kusambila bua bualu buabu. (Mat. 5:44) Ke bualu budi tshilejilu tshia Yezu ne tshia muyidi Stefano bitulongesha. Pavuabu bapopele Yezu ku mutshi kudi basalayi bena Lomo, wakasambila, wamba ne: “Tatu, bafuila luse.” (Luka 23:34) Uvua ulomba Yehowa bua abuikidile basalayi abu. Pamuapa uvua mua kuikala ulombela kabidi bantu bakuabu bavua bena lukuna bende basaka bua kuela mbila, balomba bua bamushipe. Yezu wakajingulula ne: bantu abu kabavua bamanye menemene tshivuabu benza to. Bia muomumue, Stefano wakalomba pende Nzambi bua abuikidile bantu bavua bamushipa. (Bien. 7:58-60) Yehowa wakandamuna disambila dia Yezu ne dia Stefano. Bantu ba bungi bavua bakengesha Yezu ne basue kumushipa bakalua kumuitabuja, bobu kubatijibua. (Bien. 2:36-41) Nansha Shaula uvua muanyishe pende bua bashipe Stefano wakalua pende muena Kristo, ne wakumvua bibi menemene bua malu mabi avuaye muenze.​—1 Tim. 1:13.

5. Bualu bua César budi bukulongesha tshinyi?

⁵ Nansha lelu eu Yehowa utu ututeleja patutu tusambila bua baluishi betu. Tuangatabi tshilejilu tshia César wa mu Venezuela. Tatuende uvua umuluisha ne tshikisu tshionso bua muvuaye mulue Ntemu wa Yehowa. Udi wamba ne: “Mamuanyi uvua muntu muimpe ne mukaji wa malu mimpe. Nansha muvuaye uteka malu a Bukalenge pa muaba wa kumpala, kavua ulengulula tatu to. Uvua utulongesha tuetu bana bua tunemeke tatu. Uvua utulongesha kabidi ne: tatu yeye mutuambile bua tuenze bualu budi kabuyi bubengangana ne disua dia Nzambi, mbimpe tumutumikile.” Bidimu ndambu pashishe, tatuende wakatuadija kushintuluka. César udi wamba ne: “Dimue dituku meme mumane kusambila ne muoyo mujima, ngakalomba tatu bua ntuadije kulonga nende Bible. Pakitabaye, ngakumvua disanka diyila ne panshi.” Panyima pa matuku, tatuende wakabatijibua. Bantu bonso badi batuluisha kabena mua kushintuluka anu mushindu au to, kadi padi bamue bamona mutudi ne ngakuilu muimpe ne bienzedi bimpe, badi anu mua kushintuluka. Tutu tumvua disanka dia bungi patubu bashintuluka. Tudi ne muoyo kuulu kuulu bua kumona muikala Yehowa, “Mulumbuluishi wa buloba bujima” udi ne luse mua kukoka bantu ba mushindu eu kudiye.​—Gen. 18:25.

6. Bilondeshile Mâko 13:13, mbualu kayi bukuabu butu busaka bantu bua kutukina?

⁶ Bantu batu batukina bualu tutu tunemeka Yezu. Yezu wakamba ne: bantu bonso bavua ne bua kukina bena Kristo balelela ‘bua dîna diende.’ (Bala Mâko 13:13.) “Dîna” dia Yezu didi dileja lumu luende ne bukokeshi budiye nabu bu Mukalenge wa Bukalenge bua Nzambi. Batu batukina kudi bantu badi beyemena bamfumu ba panu apa, badi kabayi beyemena Yezu Kristo udi Yehowa musungule bua kukokesha bantu. Yezu udi Mukalenge katshia ku 1914. Ukadi pa kubutula mbulamatadi yonso ya bantu.

7-8. Mbualu kayi bukuabu kabidi butu busaka bantu bua kupuekesha bantu ba Yehowa milongo? (Yone 15:18-20) (Tangila kabidi bimfuanyi.)

⁷ Bantu batu batukina bualu tutu tubenga kubuelakana mu malu a mu buloba bua Satana. Yezu wakamba ne: bantu bavua ne bua kukina bayidi bende bualu ‘kabena ba pa buloba’ to. (Bala Yone 15:18-20.) Tudi bafuanangane ne bena Kristo ba kumpala bualu tudi tubenga ngelelu mubi wa meji wa bena panu, bikadilu biabu bibi ne ngakuilu wabu mubi. Ke bualu kayi batu bakengesha bena Kristo netu ba bungi ku midimu ne mu tulasa. (1 Pet. 4:3, 4) Kadi tutu tumvua disanka patu bamue bantu batu batuluisha bashintuluka ne batuadija kutuanyisha.

⁸ Tuangate tshilejilu tshia Ignacio wa mu Amerike wa pankatshi. Mu tshilongelu tshiabu muvua mulongeshi mukuabu uvua ne tshibidilu tshia kumupuekesha milongo bualu uvua utumikila mikenji ya Nzambi. Kadi kumpala kua kukuataye dipoloma, mulongeshi au wakamuebeja bua amuambile tshivua tshimusaka bua kutumikila mikenji ya Nzambi nansha muvuabu bamupuekesha milongo kudi bantu ba bungi. Ignacio wakamuandamuna ne: bualu mikenji ya Nzambi ivua imukuba. Pashishe wakabikila mulongeshi au mu bisangilu. Pakaluaye mu bisangilu, biakakemesha Ignacio bikole. Pavua mulongeshi au mumone muvua bena mu tshisumbu banangangane, wakatungunuka ne kubuelamu. Panyima pa matuku, wakapeta pende buluishi bua muvuaye mutuadije kulonga Bible. Nansha nanku, wakatungunuka ne kushemesha bulunda buende ne Yehowa, ndekelu wa bionso yeye kubatijibua.

9-10. a) Mbualu kayi bukuabu butu buenza bua bena Kristo bikale bashilangane ne bena panu? b) Tshilejilu tshia mupostolo Paulo tshidi tshitulongesha tshinyi?

⁹ Tudi bashilangane ne bena panu bualu katutu tubuelakana mu mvita ne mu malu a tshididi to. (Yone 18:36) Tutu tutumikila mubelu udi mu Lomo 13:1 ne tudienzeja bua kutumikila mikenji ya mbulamatadi. Kadi bu mutudi katuyi tubuelakana mu malu a tshididi, katutu tufila mpala bua batusungule anyi tuelela bantu tukanda to. Bua tshinyi? Bualu tudi balamate Yehowa ne Bukalenge buende budi Yezu ulombola. Mbele Bantemu ba Yehowa ba bungi mu maloko bua ditabuja diabu. Nansha nanku, bana betu abu mbatungunuke anu ne kuyisha. Badi bidikija mupostolo Paulo uvua pende muenze bidimu bia bungi buloko ne mu nzubu kampanda muvuabu bamulame kudi musalayi. (Bien. 24:27; 28:16, 30) Wakatungunuka ne kuyisha bantu bonso bavua mua kuteleja lumu luimpe. Mu bantu abu muvua balami ba buloko, bena mudimu ba mu lubanza lua mukalenge, banguvena, bakalenge, ne pamuapa too ne bena mudimu ba Néron, mfumu munene wa bena Lomo.​—Bien. 9:15.

¹⁰ Bia muomumue, bana betu badi mu maloko badi bayisha bantu bonso badi mua kubateleja. Mu bantu abu mudi banzuji, banene ba mbulamatadi ne balami ba maloko. Muanetu wa balume kampanda uvua muenze bidimu bipite pa bisambombo mu buloko bua muvuaye mubenge kubuelakana mu malu a tshididi, wakamba ne: kavua umona kuikala mu buloko bu dinyoka to, kadi uvua ukumona bu mpunga uvua Yehowa mumupeshe bua kupeta bantu badi bu mikoko. Yehowa yeye muenze netu mudimu bua kuyisha bantu ba nunku, tudi tumvua disanka dia bungi be! (Kolos. 4:3) Tuakulayi kabidi bua malu makuabu atudi mua kusankila nansha padi bantu batukina bua mutudi tuenzela Yehowa mudimu.

MALU A KUSANKILA NANSHA PADIBU BATUKINA

11. Mmunyi mudi ditabuja dietu mua kukola padibu batukengesha? Fila tshilejilu.

¹¹ Ditukina dia bena panu didi dikumbaja dîyi dia buprofete. Dîyi dia buprofete dia kumpala divua Yehowa mufundishe mu Bible divua dileje ne: Satana ne bonso bavua mua kumulonda bavua ne bua kukina bantu badi bananga Yehowa ne bamuenzela mudimu. (Gen. 3:15) Yezu uvua ne tshibidilu tshia kuamba ne: bantu badi benzela Yehowa mudimu badi ne bua kubakina. (Mat. 10:22; Mâko 13:9-12; Luka 6:22, 23; Yone 15:20) Nansha bayidi bakuabu ba Yezu mbambe pabu bualu abu. (2 Tim. 3:12; Yak. 1:2; 1 Pet. 4:12-14; Yuda 3, 17-19) Nunku padibu batukengesha, kabiena bitusama ku muoyo bikole to, kadi tudi tusanka bua mudi dîyi dia buprofete adi dienda dikumbana. Bidi bitujadikila ne: tudi tuenzela Nzambi mulelela mudimu. Muanetu wa bakaji kampanda udi mu ditunga mudibu bakandike midimu yetu udi wamba ne: “Pamvua mudilambule kudi Yehowa mvua mumanye ne: ku tototo nansha ku ndandanda, nebankengeshe. Ke bualu kayi pantu mpeta buluishi, tshitu ngumvua buôwa ne kabitu binkemesha to.” Bayende uvua munkatshi mua bantu ba bungi bavua bamuluisha. Uvua umukengesha, umuoshela Bible ne mikanda yetu mikuabu. Kadi pamutu pa kumvua buôwa ne kupingana tshianyima, ditabuja diende diakakola. (Eb. 10:39) Udi wamba ne: “Ndi mumanye mukavua dîyi dia buprofete dileje ne: tudi mua kupeta buluishi. Nunku buluishi bundi mupete ebu mbujandikile ne: ndi mu tshitendelelu tshilelela.”

12. Ntshinyi tshivua tshiambuluishe muanetu wa balume kampanda bua kunanukila pavuabu bamukengesha?

¹² Nansha mutudi bamanye ne: nebatukengeshe, bidi anu mua kutukolela bua kunanukila. Muanetu wa balume mukuabu wakafunda bua tshikondo tshivuaye mu buloko, wamba ne: “Kuvua misangu imvua ngumvua bibi menemene, ndila ne kudila.” Tshiakamuambuluisha bua kunanukila ntshinyi? Wakamba ne: “Mvua nsambila mu dinda dionso pamvua njuka, nansha mu munya dîba dionso divua nsombelu ukola. Pavuabu bangenzela malu avua amfiikisha munda, mvua nya kudikangila mu tshiowedi bua kusambila.” Muanetu wa balume eu wakelangana kabidi meji a bilejilu bia bana betu ba kale ne ba lelu bavua bananukile pavuabu babakengesha. Biakamuambuluisha bua kunanukila, yeye kupeta ditalala divua Yezu mulaye bayidi bende.​—Yone 14:27; 16:33.

13. Ntshinyi tshidi mua kutuambuluisha bua kunanukila padibu batukina?

¹³ Dinanga didi dituambuluisha bua kunanukila padibu batukina. Nansha pakavua Yezu pa kufua uvua anu munange Tatu wende ne muoyo mujima. Uvua munange kabidi balunda bende. (Yone 13:1; 15:13) Tuetu banange Yehowa ne bena Kristo netu anu bu Yezu, netunanukile petu padibu batukina. Mushindu kayi? Tuakulayi bua mupostolo Paulo.

14. Ntshinyi tshiakambuluisha Paulo bua kushala mulamate Yehowa pavuabu bakeba kumushipa?

¹⁴ Matuku makese kumpala kua kushipabu Paulo, wakafundila muena diende Timote, wamba ne: “Nzambi kavua mutupeshe nyuma wa buôwa to, kadi wa bukole, wa dinanga, ne wa meji majalame.” (2 Tim. 1:7) Ntshinyi tshivuaye usua kuamba? Uvua usua kuamba ne: muena Kristo udi munange Yehowa bikole utu unanukila padi ntatu mikole imukuata. (2 Tim. 1:8) Nansha muvua Paulo mumanye ne: bavua ne bua kumushipa bua muvuaye wenzela Yehowa mudimu, wakashala anu mumulamate bualu uvua mumunange bikole.​—Bien. 20:22-24.

15. Mmunyi muvua bena Kristo netu ba matuku etu aa baleje ne: bavua banangangane? (Tangila kabidi tshimfuanyi.)

¹⁵ Tutu banange bena Kristo netu badi bashala ne lulamatu nansha padibu babakengesha. Bamue ba kudibu batu bateka mioyo yabu mu njiwu bua bena Kristo nabu, bu mudi Akila ne Pisika bakateka muoyo wabu mu njiwu bua Paulo. (Lomo 16:3, 4) Tshilejilu mu Russie, bana betu ba bungi bakaya ku tubadi bua kukankamija bena Kristo nabu bavuabu bakuate. Pavua muanetu wa bakaji mukuabu uvuabu bakuate mumone bena Kristo nende ba bungi menemene balue ku kabadi kuvuaye, biakamukankamija bikole, kuanjiye kushala mupuwe kayi ne tshia kuamba. Mushindu uvua bena Kristo nende bamuleje dinanga au wakamukolesha, bualu ke tshivuaye natshi dijinga menemene dîba adi. Bushuwa, tudi ne disanka bua mudi dinanga dituambuluisha bua kunanukila padibu batukina.

16. Bua tshinyi mupostolo Petelo wakamba ne: bantu badibu bakengesha bua mudibu benzela Nzambi mudimu badi mua kuikala ne disanka? (1 Petelo 4:14)

¹⁶ Tuetu tunanukila padibu batukina, Nzambi udi utuanyisha. (Bala 1 Petelo 4:14.) Mupostolo Petelo wakamba ne: bantu badibu bakengesha bua mudibu benzela Nzambi mudimu badi mua kuikala ne disanka. Bua tshinyi? Bualu bidi bileja ne: ‘nyuma wa Nzambi, udi pambidi pabu.’ Petelo uvua mumanye mutu muntu umvua padi Nzambi umuanyisha ne padiye unanukila mu dikenga. Matuku makese panyima pa Pentekoste wa mu 33 B.B., bakatuma bampuluishi ba ku ntempelo bua kukuata Petelo ne bapostolo bakuabu bua muvuabu bayisha. Kadi Petelo wakakuila ditabuja diende ne dikima dionso. (Bien. 5:24-29) Nansha pakamuelabu yeye ne bapostolo bakuabu mfimbu, bakatungunuka anu ne kuyisha bikale ne disanka bualu ‘bavua babadibue bu bantu bakumbane kufuishibua bundu bua dîna Yezu.’ Tuikalayi petu ne disanka patudi tunanukila mu ntatu.​—Bien. 5:40-42.

17. Ntshinyi tshivua Yezu muambile bayidi bende butuku kumpala kua kumushipabu?

¹⁷ Yezu wakambila bayidi bende butuku kumpala kua kumushipabu ne: “Muntu yonso udi munnange, Tatu wanyi neamunange pende, ne meme nemmunange.” (Yone 14:21) Tudi bindile ne muoyo kuulu kuulu tshikondo tshiatunanga bantu bonso bua mutudi tuenzela Yehowa mudimu, kakuyi muntu utukina bua bualu abu. (2 Tes. 1:6-8) Mu dindile tshikondo atshi, tuikalayi badisuike bua kuvuluka malu atudi ne bua kusankila padibu batukina.