Anyisha ‘diakalenga diudi nadi dia kuenza mudimu wa tshijila kuyi ne buôwa’

1. Dîyi dia buprofete dia Zekâya didi ditangila nganyi?

PAKAVUA Zekâya ne mukajende Elizabeta bakulakaje bikole, Yehowa wakenza tshishima, bobu kulela muana wa balume, diende divua Yone. Bantu bonso bavua bumvue bualu abu bavua badiebeja ne: “Muana eu nealue nganyi?” (Luka 1:57-66) Yehowa wakasaka Zekâya bua kubapesha diandamuna divua ne dîyi dia buprofete. Wakumvuija bantu ne: Masiya uvuabu bindile munkatshi mua bidimu bia bungi ukavua pa kulua. Nanku, Yone ke uvua ne bua kuambuluisha bantu bavua banyingalala bua mpekatu yabu bua bafike ku dimanya Masiya ne ku dimulonda. (Amo. 3:7; Luka 1:67-79) Kadi Zekâya wakabambila malu a bungi pa kumbusha anu mudimu uvua Yone ne bua kuenza.a Netumone mu tshiena-bualu etshi ne: mukenji wa Zekâya uvua dîyi dia buprofete ne udi ututangila petu lelu. Netulonge malu asatu a mu mukenji wende au atudi ne bua kuangata ne mushinga. Bualu bua 1) dipa dia lupandu, 2) diakalenga dia kuenza mudimu wa tshijila, ne 3) mudimu wa kuyisha udibu batupeshe.

DIPA DIA LUPANDU

2. a) Bilondeshile Luka 1:67-73, ndipa kayi divua Nzambi mulaye bantu bende? b) “Mupandishi wa bukole” udibu bakuile mu Luka 1:69 nnganyi?

² Bala Luka 1:67-73. Nzambi uvua mulaye bua kupesha bantu bende dipa dilenga dia dikema dia lupandu. Kadi bavua mua kupeta lupandu ku diambuluisha dia nganyi? Zekâya wakamba ne: “[Yehowa] mmutujudile mupandishi wa bukole mu nzubu mua Davidi.” (Luka 1:69) “Mupandishi wa bukole” au uvua ne bua kuikala Masiya. Bena Yuda ba mu matuku a Zekâya bavua bindile dilua dia Masiya mulaya ne bakavua bamanye ne: uvua ne bua kupatukila mu ndelanganyi ya Abalahama, kadi mu dîku dia mukalenge Davidi. (Gen. 22:17, 18; Mat. 22:42) Kadi bua tshinyi Yehowa wakasaka Zekâya bua kumanyisha dilua dia “mupandishi wa bukole” eu? Bualu Masiya uvua ne bua kufika mu matuku makese tshianana! Panyima pa ngondo isambombo nsongakaji mukuabu diende Mariya wakalela Yezu; muanjelu Gabaliele ukavua mumuambile ne: bavua ne bua kubikila Yezu ne: “Muana wa Nzambi” ne uvua ne bua kuikala Mukalenge mu “nkuasa wa bukalenge wa tatuende Davidi.” (Luka 1:30-35) Pavua Yezu mubatijibue ne bidimu 30 ke pavuabu bajule “Mupandishi wa bukole.” Tshikondo atshi, Yehowa wakamuela manyi a nyuma muimpe, kuluaye Masiya uvuabu balaye. (Mat. 3:16, 17) Bualu abu buvua busankisha be!

3. Bivua bikengela bua bena Yuda ba tshikondo tshia Yezu bapandishibue kudi nganyi? Nku tshinyi tshikuabu kuvuabu ne bua kubapandisha?

³ Tshikondo atshi, bena Yuda bavua dijinga ne kupandishibua. Kadi nnganyi uvua mua kubapandisha? Bua tshinyi bivua bikengela kubapandisha? Zekâya wakandamuna ne: “Bua kutupandisha kudi bena lukuna betu ne ku tshianza tshia bantu bonso badi batukine.” (Luka 1:71) Bualu ebu buvua bumvuija ne: Yezu uvua ne bua kulua kubapandisha ku bukokeshi bua bena Lomo bavua babakengesha anyi? Tòo. Kadi bavua dijinga ne kupandishibua kudi Satana, udi mpokolo wa dikengeshibua. (Eb. 2:14, 15) Satana ke udi ufikisha bantu bonso ku dienza mpekatu ne ku difua; too ne bena Yuda ba kale abu. Bualu bukuabu, bena Yuda kabavua bakumbana bua kulonda Mikenji ya Mose muvuabi bikengela to. Ke bualu kayi Bible udi uleja ne: bavua bedibue mulawu ne bivua bikengela kubapandisha. (Lomo 3:20; Gal. 3:10, 13) Nunku, bavua dijinga ne tshivua Yehowa mubalaye kupitshila kudi Zekâya, mmumue ne: “lupandu ku dibuikidibua dia mpekatu yabu.”​—Luka 1:77.

4. Bidi bikengela tupandishibue petu lelu eu kudi banganyi? Nku tshinyi tshikuabu kudibu ne bua kutupandisha?

⁴ Tudi basue bua batusungile kudi bena lukuna kayi lelu? Anu bu bena Yuda ba mu matuku a Yezu, tuetu petu tutu tuenza mpekatu ne tutu tufua. (Lomo 5:12) Bualu bukuabu, Satana ne bademon bende ke badi batukebela ntatu lelu. Badi bakeba bua katutumikidi Yehowa ne tulekele kumutendelela. Badi mene basaka malongolodi kampanda anyi bamue bantu, mmumue ne: bantu “badi batukine,” bua kuluisha ntendelelu wetu. Tudi petu dijinga ne kupandishibua kudi bena lukuna ba buena aba.

5. Mmunyi mudi Yezu utupikula ku mulawu wa mpekatu?

⁵ Mmunyi mudi mupandishi wetu utupandisha petu kudi bena lukuna aba? Tuanji kumonayi mudi Yezu mutupikule ku mpekatu. Pavua Yezu pa buloba, wakalongesha bayidi bende mushindu muimpe wa kutendelela Yehowa. Pashishe wakafila muoyo wende bu tshia kupikulangana natshi “bua muntu yonso udi uleja ditabuja kudiye kabutudibu, kadi apete muoyo wa tshiendelele.” (Yone 3:16; Mat. 20:28) Tutu tuenza muetu muonso bua kutumikila malu avua Yezu mulongeshe bua kutendelela Nzambi mu mushindu udiye wanyisha. Kadi bu mututshidi bapange bupuangane, mbimpe tulombe Yehowa luse patudi tuenza malu mabi. Nunku bu muvua Yezu mufue bua bualu buetu, Yehowa neanyishe ntendelelu wetu. (1 Yone 2:1, 2) Mu mushindu eu ke udi Mupandishi wetu utupikula ku mulawu wa mpekatu.

6. Mmalu kayi akumbaja Yezu Mukalenge udi mu “nkuasa wa bukalenge wa Davidi”? (Tangila kabidi tshimfuanyi.)

⁶ Mmunyi muatupandisha Yezu ku mpekatu ne ku lufu bua kashidi, kudi Satana ne bademon bende, ne kudi bonso “badi batukine”? Katshia ku tshidimu tshia 1914, Yezu wakatuadija kukokesha mu “nkuasa wa bukalenge wa tatuende Davidi.” (Luka 1:32, 33) Bu mudiye Mukalenge wa Bukalenge bua Nzambi, yeye ne bela manyi binunu 144 badiye ulombola nabu, ne banjelu, nebabutule bena lukuna bonso ba Yehowa badi pa buloba ku mvita ya Armagedone. Mu bukokeshi bua bidimu tshinunu, Yezu neabishe bantu ku lufu, pashishe yeye ne bantu 144000 bakokesha nende nebavuije bantu bapuangane ku kakese ku kakese. (Yone 5:28; Buak. 22:1, 2) Pa kuamba bidimu tshinunu bijike, nebikale bamane kumbusha mpekatu ne lufu. (1 Kol. 15:26, 55-57) Pashishe, ku ndekelu kua bidimu tshinunu, neabutule Satana ne bademon bende ne bantu bonso badi ku luseke luabu. (Buak. 20:7-10) Batendeledi ba Yehowa ba lulamatu nebadie nende bulunda busheme budi mpekatu, lufu anyi buluishi, kabiyi mua kunyanga to. Netutumbishe Nzambi wetu bua kashidi ne netuanyishe “dipa diende difila tshianana didi kadiyi kuamba,” mmumue ne: lupandu lutuapeta ku butuangaji bua Yezu.​—2 Kol. 9:15.

DIAKALENGA DIA KUENZA MUDIMU WA TSHIJILA

7. Bilondeshile Luka 1:74, 75, ndiakalenga kayi didi Yehowa mupeshe bantu bende?

⁷ Bala Luka 1:74, 75. Dipa dia tshia kupikulangana natshi didi Yehowa mutupeshe nditupeteshe tshintu tshia pa buatshi. Zekâya wakatshibikila ne: ‘diakalenga dia kuenza mudimu wa tshijila kakuyi buôwa.’ “Mudimu wa tshijila” udi ukongoloja mishindu mishilashilangane ya midimu itudi tuenzela Yehowa. Tuetu tuyisha, tusambila, tudilongela Dîyi diende, tuya mu bisangilu, ne tubuela mu mpuilu ne mu mpungilu, tudi tuenzela Yehowa mudimu wa tshijila. Mudimu wetu wa tshijila udi wangata kabidi midimu mikuabu ya mu ntendelelu wetu, bu mudi kuenza mudimu ku Betele, mu luibaku, ne wa dilama Nzubu ya Bukalenge ne Nzubu ya mpuilu.

8. Mmalu kayi atudi katuyi ne bua kumvuila buôwa?

⁸ Kuenzela Yehowa mudimu wa tshijila kakuyi buôwa kudi kumvuija tshinyi? Tshia kumpala, mpatudi katuyi tutshina lufu to. Bu mutudi ne ditekemena dikole dia muoyo wa tshiendelele, tudi mua kutuma meji anu kudi Yehowa pamutu pa kuatuma anu ku malu etu tuetu; bualu muoyo utudi nawu mu ndongoluelu eu ngua tshitupa tshîpi. Nansha badi batukengesha bobu batufunyina bua kutushipa, katulekedi kuenzela Nzambi mudimu bua buôwa to. Tudi tushala anu ne lulamatu kudi Yehowa bualu tudi bamanye ne: nansha tuetu bafue, Yezu neatubishe ku lufu. (Yone 6:39, 40) Tshibidi, katuena ne bua kumvua buôwa tudiambila ne: Yehowa kakutuanyisha bualu tudi bena mpekatu to. Yehowa mmutunange ne udi utuanyisha, tudi kabidi batuishibue ne: neatufuile luse kupitshila ku mulambu wa Muanende Yezu.​—1 Yone 4:9, 10.

9. Bitu bikolela bamue bena Kristo bua kuitaba tshinyi?

⁹ Bitu bikolela bamue bena Kristo netu bua kuitaba ne: Yehowa utu wanyisha mudimu udibu bamuenzela. Badi mua kuikala bamona ne: ki mbakumbane bua Yehowa kubanyisha to; pamuapa mbua malu kampanda avua mabafikile ku kale. Badi mua kuikala badiumvua bapile bua mpekatu ivuabu benze kale nansha mukadibu balombe Yehowa luse ne babambuluishe kudi bakulu. Biobi ne: ke muudi udiumvua pebe, ntshinyi tshiudi mua kuenza?

10-11. Ntshinyi tshitudi mua kuenza tuetu tudiumvua bazengele bikole menemene? Fila tshilejilu.

¹⁰ Tuangatabi tshilejilu. Muntu mmutshibuke mukolo ne mmuye kua munganga. Munganga yeye mumane kuondopa mukolo udi mutshibuke, udi mua kuambila mubedi bua ikala unyungisha mukolo mu mishindu kampanda, bua mufuba ukolakane ne atuadije kuenda bu pa tshibidilu. Kadi ntshinyi tshidi mubedi mua kuenza yeye umvua buôwa, wela meji ne: kakukumbana bua kuende kabidi to? Mbimpe ikale ne lutulu, eyemene munganga wende ne muoyo mujima ne atumikile bionso bidiye umuambila bua kuenza. Nunku mu tshikondo tshiakanyine, mukolo wende newumvue bimpe ne neatuadije kuenda bimpe anyi mene kunyema.

¹¹ Bia muomumue, wewe udiumvua muzengele bua mpekatu uuvua muenze, eyemena Yehowa. Manya ne: ngasa wende ne luse luende nebikuambuluishe bua kupetulula bukole anyi kumvua bimpe ku diambuluisha dia mulambu wa tshiakupikulangana natshi. (Yone 1:16, 17; Lomo 3:23, 24; 1 Yone 3:19, 20) Ikala wenza malu onso adi Yehowa ukuambila bua upetulule bukole. Tshilejilu, ikala usambila, udilongela Bible, ne ubuela mu bisangilu. (Mis. 1:2; 1 Tes. 5:17; Eb. 10:25) Anu bu mutubi biangata matuku bua mukolo udi mutshibuke kumvuawu bimpe, ke mutubi kabidi biangata matuku bua kutuishibua ne: Yehowa mmutunange. Kadi ikala anu mutuishibue ne: Yehowa neakuambuluishe. Nunku, kulekedi Yehowa anyi kudiedi tshilumbu pa mbidi to. Ikala anu wenza malu a mu nyuma. (Filip. 3:16) Ikala wela Yehowa tuasakidila dituku dionso bua mudiye ukupesha bukole bua kutungunuka ne kumuenzela mudimu ne lulamatu. Tuetu bonso tudi mua kuleja Yehowa ne Yezu Kristo dianyisha bua mudibu batupeshe diakalenga dia pa buadi dia kuenza mudimu wa tshijila katuyi ne buôwa.

MUDIMU WA KUYISHA UDIBU BATUPESHE

12. Mmunyi muvua Yone Mubatiji mulongolole njila ya Yehowa? (Luka 1:76-79)

¹² Bala Luka 1:76-79. Zekâya wakalua kuambila muanende wa katoto ne: “Neudianjile kumpala kua Yehowa bua kulongolola njila yende.” Mmunyi muvua mêyi aa makumbanyine Yone Mubatiji? Pakakolaye, wakalua muyishi wa lumu luimpe wa tshisumi. Uvua ukankamija bena Yuda bonso bua banyingalale bua mpekatu yabu, babatijibue, ne bitabe Masiya. Pavua Yone mubatize Yezu, wakaleja bantu patoke muvua Yezu muleji mpala wa Yehowa, kuambaye ne: “Monayi, Muana wa mukoko wa Nzambi udi umbusha mpekatu wa ba pa buloba!” Yone wakankamija too ne bayidi bende bua kulonda Yezu.​—Yone 1:29, 34-36, 40, 41.

13. Mmunyi muvua dilua dia Masiya dikale “butoke bua patshiatshia” bua bantu ba Nzambi?

¹³ Pavua Yone muleje bantu bonso ne: Yezu ke Masiya, kuakamueneka dijinga dia bayidi ba bungi. Bua tshinyi? Bilondeshile Zekâya, dilua dia Masiya divua ne bua kuikala “butoke bua patshiatshia,” mmumue ne: ntuadijilu wa tshikondo tshipiatshipia. Bidi biumvuija ne: bu muvua Yezu Masiya, uvua ne bua kushintulula nsombelu wa bantu bonso. Kakuyi mpata, bivua bikengela bantu ba bungi bua kumanyisha lumu luimpe alu bualu Yone nkayende kavua mua kukumbana to. Nnganyi mukuabu uvua mua kuyisha lumu luimpe ludi lusungila mioyo ya bantu elu?

14. Mmudimu kayi wa mushinga uvua Yezu ne bayidi bende benze? (Yeshaya 61:1, 2)

¹⁴ Yezu uvua pende muyishe lumu luimpe elu. Wakakumbaja mêyi a Zekâya pavuaye ‘mutokeshe badi basombe mu mîdima ne mu mundidimbi wa lufu.’ Yezu uvua umvuila bantu bavuabu bakengesha luse lua bungi. Uvua mubambile mukenji uvua ubakolesha anyi ufila butoke wa “tshidimu tshia muoyo mulenga wa Yehowa.” (Bala Yeshaya 61:1, 2; Luka 4:16-21) Wakamanyisha ne tshisumi lumu luimpe wamba ne: “Bukalenge bua mu diulu mbusemene pabuipi.” Nansha nanku, uvua mumanye ne: nekuikale dijinga dia bamanyi ba lumu luimpe ba bungi menemene. Ke bualu kayi wakalongesha bayidi bende bua bayishe pabu lumu luimpe alu.​—Mat. 4:16, 17; 10:7; 28:19, 20.

15. Bua tshinyi bidi ne mushinga wa bungi bua kuyisha lumu luimpe lelu?

¹⁵ Bu mutudi petu bayidi ba Kristo lelu, tudi tuanyisha mudimu udibu batupeshe wa kutungunuka ne kumuangalaja lumu luimpe lua Yehowa ludi lupandisha bantu. Nunku, mudimu wa kuyisha lumu luimpe lua mulambu wa Yezu wa tshiakupikulangana natshi ne lua Bukalenge bua Nzambi udi ne mushinga wa bungi matuku etu aa. Bua tshinyi? Tuakulayibi bua malu adi matuindile kumpala eku. Bantu bonso bakadi pa kutuilangana ne “dikenga dinene dia buena ditu kadiyi dianji kuenzeka katshia ku tshibangidilu tshia buloba.” (Mat. 24:21) Tshikondo atshi, bantu ba bungi nebitabe pamuapa lumu luimpe lua lupandu ne kusungula bua kuikala ku luseke lua Yehowa bualu nebavuluke malu avuabu babayishe. Pashishe Yezu nealombole bantu bakokeshaye nabu ne banjelu bua kuluangana ne bantu bonso badi batuluisha ne nebafikishe batendeledi balelela ba Nzambi mu bulongolodi bupiabupia muikala buakane. (Mat. 25:34; Buak. 16:16; 19:19) Nunku tudi tumona mudibi ne mushinga wa bungi bua kuyisha lumu luimpe lelu eu.​—Mat. 24:14; Mâko 13:10.

16. Udi mudisuike bua kuenza tshinyi? (Tangila kabidi bimfuanyi.)

¹⁶ Mêyi a Zekâya adi mu Luka 1:68-79 adi atuvuluija malu asatu atudi ne bua kuanyisha: dipa dilenga dia lupandu didi Yehowa utupesha, diakalenga dia kuenza mudimu katuyi ne buôwa, ne mudimu wa kuyisha mukenji udi ukolesha udibu batupeshe. Udi muitabuje mulambu wa Yezu wa tshia kupikulangana natshi ne mulaye Yehowa bua kumuenzela mudimu bua kashidi anyi? Udi wangata diakalenga diudi nadi dia kumuenzela mudimu ne mushinga anyi? Biobi nanku, ikala uyisha ne tshisumi “tshidimu tshia muoyo mulenga wa Yehowa.” Ikala uyisha bantu lumu luimpe lua dilua dia “dituku dia disombuela,” dituku dikala Bukalenge bua Nzambi ne bua kubutula baluishi ba Nzambi ne betu petu ne ubambile mukadi bulongolodi bupiabupia pabuipi. Ambila bantu bonso badi banange Nzambi bua badisange kutudi bua ‘tumuenzele nabu mudimu wa tshijila kakuyi buôwa ne lulamatu ne buakane kumpala kuende matuku etu onso.’​—Luka 1:74, 75.