Onego watem matek mondo wamany yore ma wanyalo nyisogo osiepe Jehova ng’wono kod duong’. (Rumi 12:10) E yo mane? Yo achiel ma wanyalo timogo kamano yudore e Zaburi 15:4 ma wacho ni joma gin welo e hema mar Jehova ‘timo gik ma gisesingore, kata ka timo kamano biro hinyogi.’ Tamruok timo gima wasesingore nyalo chwanyo jomamoko. (Mat. 5:37) Kuom ranyisi, Jehova dwaro ni wende orit singruok mar kend. Jehova bende bedoga mamor sama jonyuol temo matek mondo gichop singo ma gitimo gi nyithindgi. Hero Nyasaye kod jowetewa biro chwalowa mondo watim duto ma wanyalo e chopo singowa. Yo machielo ma wanyalo miyogo joma oluoro Jehova duong’ en kuom bedo joma ohero rwako welo kendo jochiwo. (Rumi 12:13) Bedo kanyachiel gi owetewa gi nyiminewa tego osiep manie kindwa kodgi kod osiep manie kindwa gi Jehova. Ka wan joma ohero rwako welo, waluwo ranyisi mar Jehova. w24.06 12 ¶15-16

Jehova eloga adiera ne joma obolore. (Mat. 11:25) Ne wapuonjore adiera nikech ne wabolore. (Tich 8:​30, 31) Kata kamano, onego wabed motang’ mondo kik wachak bedo gi sunga. Sunga nyalo miyo wachak neno ni pachwa ni kare mana kaka paro ma wuok e ndiko kata ma riwruok mar oganda Jehova miyowa. Mondo wadhi nyime bedo gi bolruok, onego wang’e ni wan joma tindo ahinya kopimwa gi Jehova. (Zab. 8:​3, 4) Bende, wanyalo kwayo Jehova mondo okonywa dhi nyime nyago kido mar bolruok kendo rwako puonj mimiyowa. Kar tiyo mana gi pachwa, dwarore ni wayie mondo Jehova okonywa rwako paro mochiwo kotiyo gi Wachne kod riwruok mar ogandane. E somo mari mar Muma, tem ane ng’iyo gik ma nyiso ni Jehova ohero joma obolore, to osin gi josunga, jo ng’ayi, kod joma tokgi tek. Bende, tem matek mondo isik kibolori sama iyudo migepe moko makende. w24.07 10 ¶8-9

Chakre higa mar 1919, Yesu nochako tiyo gi grup moro matin ma gin chwo mowal, e tayo tij lendo kendo chiwo chiemb chuny ne jolupne. (Luka 12:42) Nenore maler ni Jehova guedho tich ma joma nie grubno timo. (Isa. 65:​13, 14) Ka ok ochanwa e yo maber, nyalo bedo matek chopo migawo ma Yesu nomiyowa. (Mat. 28:​19, 20) Kuom ranyisi, ka ok omiwa alwora ma walendee, ng’ato nyalo lendo kamoro amora modwaro. Ka gima kamano otimore, mano nyiso ni nitie alwora moko minyalo lendee nyadinwoya, to moko inyalo jwang’. Be inyalo paro ber mamoko ma wayudo nikech itayowa e yo mochanore? Mana kaka Yesu notayo jolupne e yo mochanore e kinde mokalo, e kaka pod odhi nyime tayo Jokristo e yo mochanore e kindewagi. w24.04 8-9 ¶2-4