Yesu nogoyo ngero moro ma nyiso ni ng’at ma timo kinda mondo okan pesa mang’eny to “ok en jamwandu e wang’ Nyasaye,” en ng’at mofuwo. (Luka 12:​16-21) Onge ng’at mong’eyo kaka weche biro chalo kiny. (Nge. 23:​4, 5; Jak. 4:​13-15) Nitie pek moro ma waromogago nikech wan jolup Kristo. Yesu nowacho ni nyaka waikre ‘weyo gigewa duto’ mag ringruok ka wadwaro bedo jopuonjrene. (Luka 14:33) Mano e gima Jokristo ma nodak Judea noyie timo. (Hib. 10:34) E kindewagi, osema owetewa gi nyiminewa mwandugi mana nikech ne gitamore riwo lwedo weche siasa mag pinyni. (Fwe. 13:​16, 17) Ang’o mosekonyogi chung’ motegno e kinde kaka mago? Gin gadier chuth gi singo ma Jehova chiwo ma wacho niya: “Ok anaweu, kendo ok anajwang’u.” (Jo-Hibrania 13:5) Watimoga duto ma wanyalo mondo wachan kaka wabiro konyore e kinde mabiro. Ka masiche ma timore apoya oyudowa, wan gadier ni Jehova biro konyowa. w25.03 29 ¶13-14

Jehova ok dwar ni watim dongruok ma wabed Jokristo motegno gi tekowa wawegi. Jokristo ma gin jokwath kod jopuonj oikore konyowa mondo wabed Jokristo motegno ma chop kama “wasedongoe chuth e okang’ ma romre gi Kristo.” (Efe. 4:​11-13) Bende, Jehova miyowa rohone ma konyowa bedo gi “pach Kristo.” (1 Kor. 2:​14-16) E wi mano, Nyasaye osemiyowa buge mag Injili ma konyowa ng’eyo pach Kristo, weche ma nowacho, kod gik ma notimo ka ne en e piny ka. Ka waluwo ranyisi mar Yesu e yo ma noparogo kod gik ma notimo, to wabiro bedo Jokristo motegno. Kata kamano, mondo wadhi nyime bedo Jokristo motegno, nyaka wadong ma wachop kama koro ok waten yiewa mana kuom “puonj ma gin mana mise mag ng’eyo Kristo,” tiende ni adiera ma ne wakwongo puonjore. w24.04 4-5 ¶11-12

Pile ka pile dwarore ni watim yiero. Nitie yiero moko ma yot timo, kaka gima wabiro chamo gokinyi, kata seche ma wabiro nindoe. Yiero moko to ok yot timo, ginyalo mulo ngimawa, mor ma wan-go, osiepewa, wedewa, kata lamowa. Wadwaro ni yiero ma watimo okelnwa ber kaachiel gi joodwa to moloyo duto, wadwaro ni yiero ma watimo omor Jehova. (Rumi 12:​1, 2) Achiel kuom gik ma biro konyi timo yiero maber en ng’eyo weche duto. Ang’o momiyo mano dwarore? Par ane ni jatuo moro odhi ir laktar kotuo ahinya. Be laktar biro chako thiedhe ka ok okwongo opime kata penje penjo moko? Ooyo! Mana kaka laktar ma nono jatuo ka pok ochako thiedhe, in bende inyalo timo yiero maber ka ikwongo inono weche duto motudore gi wach midwaro timoe yierono. w25.01 14 ¶1-3