Genesis

17 Abrama chu kum 99 mi a nihin a hnênah Jehova a rawn inlâr a, ani chuan: “Kei hi Pathian Engkimtitheia ka ni. Ka kawngte zawh la, sawisêl kai lovin awm rawh. 2 Nang nêna kan inkârah hian thu ka thlung dâwn a. I thlahte pawh nasa takin ka tipung ang,” a ti a.

3 Chu veleh, Abrama chu a bawkkhup a, Pathian chuan ani chu be zawm zêlin: 4 “En teh! I hnênah thu ka thlung a, hnam tam takte pa i la ni ngei dâwn a ni. 5 I hming pawh Abrama* a ni tawh lo vang; hnam tam takte paa ka siam dâwn che avângin Abrahama* a ni tawh zâwk ang. 6 I thlahte chu nasa takin ka tipung ang a, hnam tam tak thlahtu i rawn ni ang a, nangmah aṭangin lalte an rawn chhuak ang.

7 “Nang nêna kan inkâr leh, i thlahte leh an thlah lo la awm tûr zawng zawngte inkâra ka thuthlung chu ka vawng reng ang a, hei hi nang leh i thlah lo la awm tûrte tâna Pathian ka nih theihna tûra chatuan thuthlung chu a ni. 8 Nangmah leh i thlahte hnênah ram dang mi anga i chênna, he Kanaan ram pum pui hi chatuan ro atân ka pe ang che u a, i thlahte tân an Pathian ka ni bawk ang,” a ti a.

9 Pathian chuan Abrahama hnênah heti hian a sawi belh a: “Nang leh i thlahte leh an thlah lo la awm tûr zawng zawngte pawhin ka thuthlung hi in vawng tûr a ni a. 10 Hei hi kan inkâra thuthlung, nang leh i thlah zawng zawngte’n in zawm tûr chu a ni: In zînga mipa zawng zawngin serh in tan tûr a ni. 11 Kan inkâra thuthlung chhinchhiahna atân in serh hmâwr vun in tan tûr a ni. 12 In ina piang mipa tawh phawt chu ni riatnaah serh in tansak tûr a ni a, i thlahte zînga mi ni lo, hnam dang mi hnên aṭanga pawisaa i lei mipa zawng zawngte pawhin serh an tan tûr a ni. In thlah zawng zawngte’n chutiang chuan in ti tûr a ni. 13 I ina piang mipa zawng zawng leh pawisaa i lei mipa zawng zawngte chuan serh an tan tûr a ni a, in taksaa chhinchhiaha awm ka thuthlung chu chatuan daih thuthlung a ni ang. 14 Mipa tu pawhin a serh hmâwr vun a tan loh chuan ka thuthlung a bawhchhia a, ani chu tihhlum ngei tûr a ni,” a ti a.

15 Tin, Pathian vêk chuan Abrahama hnênah: “I nupui Saraii* chu Saraii tia koh a ni tawh lo vang a, Sari* tia koh a ni tawh zâwk ang. 16 Ani chu mal ka sâwm ang a, fapa a hrinsak ang che; mal ka sâwm dâwn avângin hnam tam tak thlahtu a rawn ni ang. Amah aṭangin lalte an rawn chhuak dâwn a ni,” a ti a. 17 Chu veleh, Abrahama chu bawkkhupin a nui a, a rilruin: “Mipa kum 100 miin fa a nei thei dâwn em ni? Kum 90 lai ni tawh Sari pawh hian fa a hring thei dâwn em ni?” tiin a ngaihtuah a.

18 Abrahama chuan Pathian dik hnênah: “Ismaela pawh hi malsâwm ang che!” a ti a. 19 Pathian chuan: “I nupui Sari’n fapa a hrinsak ngei che ang a, a hmingah chuan Isaaka* i sa tûr a ni. Amahah chuan ka thuthlung, a thlahte thlenga chatuan thuthlung tûr chu ka tinghet ang. 20 Ismaela chungchânga i ngenna pawh ka hria e. Ani chu mal ka sâwm ang a, a thlahte pawh nasa takin ka tipung ang. Amah aṭangin hruaitu 12 an lo chhuak ang a, hnam ropui takah ka siam dâwn a ni. 21 Chutih rualin, ka thuthlung erawh chu Sari’n nakum tûn ang huna a hrinsak tûr che Isaakaah zâwk chuan ka tinghet ang,” a ti a.

22 Pathianin thu a sawi zawh chuan Abrahama chu a chhohsan ta a. 23 Tichuan, Abrahama chuan a fapa Ismaela te, a ina piang leh pawisaa a lei mipa zawng zawng, a ina chêng mipa zawng zawngte chu chumi nî ngei chuan Pathian thupêk angin an serh hmâwr vun a tansak a. 24 Abrahama chu a serh hmâwr vun a tan lai chuan kum 99-a upa a ni a. 25 A fapa Ismaela erawh chu a serh hmâwr vun tansak a nih lai chuan kum 13-a upa a ni. 26 Chumi nî ngei chuan Abrahama leh a fapa Ismaela chuan an serh an tan a. 27 A ina chêng mipa zawng zawng, a ina piangte leh ram dang mi hnên aṭanga pawisaa a lei zawng zawngte pawhin a rualin an serh an tan bawk a ni.