Upate chuan kohhran aṭanga chhuahtîrte an cheibâwl dânah Jehova khawngaihna chu entawn an tum tlat a. Entîr nân, Pathian chuan thuawih lo, a mi Israelte’n sima amah an rawn pan hun chu a nghâk lo va. Sim duhna an neih hma pawhin ṭanpui tumin hma a la hmasa zâwk ṭhîn a ni. He thuziak inzawm pahnihnaa kan zir tawh angin, a khawngaihna ngahzia entîrna atân zâwlnei Hosea chu a nupui a uirê lai rengin hruai haw leh tûrin a hrilh a. (Hos. 3:1; Mal. 3:7) Upate chuan Jehova entawnin thil sual titu a rawn kîr leh chu an duh tak zet a, awlsam taka a kîr leh theih nân an ṭanpui bawk a ni. Isua sawi fapa tlân bo tehkhin thu kha han ngaihtuah leh teh. Hla tak aṭangin a pa chuan a fapa rawn haw a hmuh chuan “a tlân a, a kuah a, a fâwp ta ngawih ngawih a.” (Lk. 15:20, NWT) A fapain ngaihdam a dîl hmasak chu a nghâk lo tih chhinchhiah ang che. Chu aiin, a hmangaih êm avângin a va pan zâwk a ni. w24.08 28 ¶7-8

Vawiin ni chângin a târ lan angin, Jehova’n a finna chu a roh tlat lo va. Mi dangte hnênah phal takin a pe ṭhîn a ni. Chu bâkah, a finna a pêk hunah, ‘hau lovin’ a pe ṭhîn tih chhinchhiah bawk ang che. A ṭanpuina kan mamawh tih pawm inthlahrung tûrin min siam ngai lo. Dik tak chuan, a ṭanpuina dîl tûrin min fuih zâwk a ni. (Thuf. 2:1-6) Keini pawhin Jehova entawnin kan finna chu mi dangte hnênah kan pe chhâwng thei ang em? (Sâm 32:8) Jehova mite chuan an thil zir tawhte chu mi dangte hnêna hrilh theihna hun remchâng tam tak an nei a. Rawngbâwlnaa kan chhuah hunah mi tharte chu thu hrilh dân tûr kan zirtîr ṭhîn a. Upate chuan kohhranho rawngbâwltute leh baptisma chang tawh unaupate chu kohhrana an mawhphurhnate an hlen theih dân tûr dawhthei takin an zirtîr a. Chu bâkah, in sakna leh thawm ṭhatna lama tawnhriat nei tawhte chuan chutiang lama tawnhriat nei tlêm zâwkte chu Pathian biakna atâna hman in saknatea an thawh theih nân an ṭanpui a ni. w24.09 28-29 ¶11-12

Kohhran upa ni thei tûr chuan “sawisêl bo” i nih a ngai a. A awmzia chu fel taka thil i tih avângin kohhran chhûngah hming ṭha i nei tihna a ni. (1 Tim. 3:2) Chu bâkah, ‘pâwn lama mite fak hlawh’ i nih a ngai bawk. Jehova be lotute chuan i Kristian rinna chu an sawisêl pawh a ni thei a; mahse, i thiltih leh i nungchangah sawisêlna tûr chhan tling tak an nei tûr a ni lo. (Dan. 6:4, 5) Chuvângin, ‘Kohhran chhûng leh pâwn lamah hming ṭha ka nei em?’ tiin inzâwt ang che. “Thil ṭha duh” mi i nih chuan, mi dangte ṭhatna lai chu zawngin an mize ṭhate chu i fak ang a. An tâna thil ṭha tih chu nuam i tiin, an beisei aia nasain i tihsak ṭhîn dâwn a ni. (Tit. 1:8, C.L. Re-edited.) Engvângin nge chu mizia chu upate neih atâna a pawimawh êm êm? Kohhran enkawlin an mawhphurhnate hlen nân an hun hlu tam tak an hman ṭhin vâng a ni a. (1 Pet. 5:1-3) Chutiang chuan thawh tûr tam tak nei mah se, mi dangte rawngbâwlsakna aṭangin hlimna nasa tak an hmu a ni.—Tirh. 20:35. w24.11 20-21 ¶3-5