Rinna nei tûra i fate ṭanpui tûr chuan thil dik leh dik lo hrilh mai chu a tâwk lo. Hêng zawhna ang chi: ‘Thil duhawm nia langte chu engvângin nge Bible-in a khap? Bible tehnate chu ka tân a ṭha reng tih engtin nge ka chian theih?’ tihte hi chhût tûrin kan ṭanpui a ngai a ni. (Is. 48:17, 18) I fate’n baptisma chan an duh a nih chuan baptisma channain a kentel mawhphûrhnate chu ngun taka ngaihtuah tûrin ṭanpui ang che. Chûng mawhphûrhnate chu engtin nge an ngaih? Eng nge a hlâwkna? Harsatnate chu eng nge ni? Engvângin nge harsatnate aia hlâwknate a tam zâwk? (Mk. 10:29, 30) Chûngte chu baptisma chan hmaa ngun taka ngaihtuah tûr thil pawimawh tak a ni. I fate chu chûng thilte ngun taka ngaihtuah tûrin ṭanpui rawh. Tichuan, Bible tehnate zawm chu an tân a ṭha reng tih an ring lehzual ngei ang. w17.12 18-19 ¶14-15

Kan unau tam tak chuan natna khirh tak takte an tuar a. Puitling tawh kan unau dangte chuan an chhûngkhat târte chu an enkawl a ngai a. Unau dang lehte chuan an chhûngkaw mamawhte phuhru tûrin theih tâwp an chhuah bawk. Kan zînga a tam zâwkte chuan chûng harsatnate zînga pakhat mai ni lovin, a vai deuhthawin an tawng tih kan hria a ni. Nunna neilo arsi-te mah Jehova’n a ngaihsak a nih chuan a ngaihsak dân tûr che chu han ngaihtuah teh! Tih tûr a nih vâng ni lovin, amah i hmangaih vângin a rawng i bâwl a. (Sâm 19:1, 3, 14) Kan Pa duh tak chuan i chungchâng engkim a hria a ni. Bible chuan: “In samzaite lam pawh hi chhiar vek a ni asin,” tiin a sawi a. (Mt. 10:30) Jehova chuan “mi ṭha famkim nite chu a hria” tih hre tûrin min duh a. (Sâm 37:18) Ani chuan i harsatna zawng zawng chu a hmu a, chûng harsatnate tuar chhuak thei tûrin i mamawh chakna a pe thei che tih a chiang a ni. w18.01 3 ¶1; 4 ¶4

Petera’n hmeichhe naupang Tabith a kai tho va, chu chuan mite rilru a khawih êm avângin chumi khuaa mi tam tak chuan “Lalpa chu an ring ta a.” Chûng zirtîr tharte chuan mite hnênah Isua chungchânga chanchin ṭha an hrilh bâkah Jehova’n mitthite a kaitho thei tih pawh an hrilh bawk a ni. (Tirh. 9:36-42) Mitthi tho leh dang hmutute pawh an awm a. Ni khat chu, Troas khuaa inkhâwmna in pakhatah tirhkoh Paula pawh a awm ve a, chu hmun chu tûnah chuan Turkey chhimchhak lama awm a ni. Paula chuan zan lai thlengin thu a sawi a. Tlangvâl pakhat Eutuka chuan tukverhah ṭhuin a ngaithla a. A mutthlûk avângin in chhâwng thum aṭang chuan a tla thla ta a. Eutuka va en hmasa bertu chu Luka a ni mai thei. Doctor a nih angin Eutuka chu inhliam satliah mai leh thidang mai a ni lo tih a hria a. A thi ngei a ni! Paula pawh chu a rawn chhuk ve a. Eutuka chu a pawm a: “A hnuk a lo la chat lo ve,” tia a’n sawi chuan mite’n mak an ti hle a. He thilmak hian a hmutu zawng zawngte chungah nasa takin nghawng a nei a ni. Tlangvâl chu a thi a, a tho leh tih an hriat chuan “thlamuan namênin an thlamuang ta lo va.”—Tirh. 20:7-12. w17.12 5-6 ¶10-11