Genesis

6 Leia mihringte an lo pun zêl chuan fanute an nei a, 2 Pathian dik fapate* chuan mihring fanute chu hmêl ṭha an ti hle a. Tichuan, an duh apiang nupuiah an nei ta a. 3 Jehova chuan: “Tisa dâna thil an tih ṭhin avângin, mihringte hi ka thlarauvin kumkhuain a dawh reng lo vang. Chuvângin, kum 120 chauh an dam ang,” a ti a.

4 Chûng hun lai leh a hnuahte chuan leiah hian Nephilim* an awm a. Chutih hun lai vêk chuan, Pathian dik fapate chuan mihring fanute chu an mutpui ṭhîn a. Anni chuan fapate an hring a, an fate chu hmân laia mi chak leh hmingthangte an ni.

5 Jehova chuan leia mihringte sualna nasatzia leh an thinlunga an ngaihtuahnate chu sual lam hlîr a ni tih a hmu a. 6 Leia mihringte a siam avângin, Jehova chu a inchhîrin* a rilru a na hle a. 7 Chuvângin, Jehova chuan: “Leia ka mihring siamte hi ka tiboral ang a, an rualin ran te, thil nung bawkvâka kal chî te, vâna savate pawh hi ka tiboral ang, anmahni ka lo siam hi ka va inchhîr tak êm!” a ti a. 8 Mahse, Nova chuan Jehova lawm a hlawh a.

9 Hei hi Nova chanchin a ni.

Ani chu mi fel tak a ni a. A dam rualpuite zîngah chuan sawisêl bo a ni a. Pathian dik nên an lêng dûn ṭhîn a ni. 10 Nova chuan fapa pathum Sema te, Hama te, Japhetha te a nei a. 11 Lei erawh chu Pathian dik mit hmuhah a lo chhe ta hle a, tharum thawhna hlîrin a khat a. 12 Pathianin lei a han en chuan a lo chhe zo ta a; leia chêng mihring zawng zawngte nun dân pawh a lo chhe zo ta bawk a.

13 Chumi hnu chuan, Pathianin Nova hnênah: “Lei hi anmahni avânga tharum thawhnaa a khah avângin tisa zawng zawng tihboral ka tum ta a ni; anni chu lei chawpin ka tiboral ang. 14 Chuvângin, thing hnai nei chîin i tân lawng tuk la.* Lawngah chuan pindante siamin, a chhûng lam leh pâwn lamah alkatra hnawih chhuak vek ang che. 15 Hei hi i sak dân tûr chu a ni: Lawng chu tawng* 300-a sei, tawng 50-a zau leh, tawng 30-a sâng a ni tûr a ni. 16 Lawng chung aṭanga tawng khatah êng luhna tûr tukverh* i siam tûr a ni a. Lawng pangah chuan kawngkâ siamin, a chhûng chu chhâwng thum neiin i siam bawk tûr a ni.

17 “Kei erawh chuan, vân hnuaia nunna nei tisa zawng zawng tiboral tûrin leiah hian tui ka lêttîr dâwn a. Lei chunga nunna nei zawng zawngte hi an boral vek ang. 18 Thu ka thlunpui dâwn che a, nang leh i nupui leh i fapate leh an nupuite chu lawngah chuan in lût tûr a ni. 19 Tin, lawngah chuan thil nung tinrêng pahnih zêlin, a nu leh a pa an dam khawchhuah theih nân i hruai lût tûr a ni a; 20 sava te, ransa te, bawkvâka kal chî thil nung tinrengte chu anmahni chi awm dân ang zêlin pahnih ṭheuh an dam khawchhuah theih nân i hruai lût tûr a ni. 21 Chu bâkah, i tân leh lawng chhûnga nungchate ei atân chaw tinrêng i la khâwm bawk tûr a ni,” a ti a.

22 Nova chuan Pathian thupêk ang zawng zawng chuan a ti ta vek a. Pathian thupêk ang chiahin a ti a ni.