Genesis

12 Jehova chuan Abrama hnênah: “I chhûngte leh i pa in awmna he ram aṭang hian chhuak la, ka la hmuh tûr che ramah kal ang che. 2 Hnam ropui takah siam chein, mal ka sâwm che ang a, i hming ka tiropui ang a, nangmah avângin mi dangte pawh mal ka sâwm ang. 3 Malsâwmtu che chu mal ka sâwm ang a, ânchhe lawhtu che chu ânchhia ka lawh ang a, nangmah avângin leia chhûngkua zawng zawng malsâwm an la ni ang,” a ti a.

4 Tichuan, Abrama chu Jehova’n a hnêna a sawi ang chiah chuan a kal chhuak a, Lota pawh a hruai tel a. Haran a chhuahsan lai chuan Abrama chu kum 75-a upa a ni. 5 Abrama chuan a nupui Saraii te, a unaupa fapa Lota te, Haran khuaa bungrua leh chhiahhlawh a neih zawng zawngte chu Kanaan ram lam panin a chhuahpui ta a. Kanaan ram an thlen chuan, 6 chu rama More thing lian tak takte awmna bul Sekem khaw thlengin a kal a. Chutih lai chuan, chu ramah chuan Kanaan mite an chêng a ni. 7 Tin, Jehova chu Abrama hnênah inlârin: “He ram hi i thlahte hnênah ka pe dâwn a ni,” a ti a. Tichuan, Abrama chuan a hnêna inlâr Jehova tân chu hmunah chuan maichâm a siam a. 8 A hnuah, chu hmun aṭang chuan Bethel chhak lama awm tlâng rama insawnin puan in a kaih a, a puan in kaihna khawthlang lamah chuan Bethel khua a awm a, khawchhak lamah chuan Ai khua a awm a ni. Chu hmunah chuan Jehova tân maichâm siamin, Jehova hming a lam ṭan ta a. 9 A hnuah, Abrama chu Negeb lam pana kal zêlin hmun hrang hrangah awmhmun a khuar a.

10 Chu ramah chuan ṭâm nasa tak a tlâk avângin Abrama chu Aigupta ramah hun eng emaw chen awm tûrin a chhuk a. 11 Aigupta ram a thlen dâwnin a nupui Saraii hnênah: “Khawngaihin min ngaithla teh! Hmeichhe hmêlṭha tak i ni a. 12 Aigupta mite’n an hmuh hunah che, ‘A nupui a nih hi,’ tiin nang chu an zuah che ang a, kei erawh chu min that mai ang. 13 Chuvângin, nangmah avânga ṭha taka min cheibâwl a, ka nun an zuah theih nân, ka unaunu angin insawi ang che,” a ti a.

14 Aigupta rama Abrama a thlen a, Aigupta mite’n a nupui an hmuh chuan hmêlṭha an ti hle a. 15 Pharaoa hnuaia thuneitute pawhin an hmu a, Pharaoa hnênah a hmêlṭhatzia an hrilh a; tichuan, Saraii chu Pharaoa ina hruai a ni ta a. 16 Saraii avângin Pharaoa chu Abrama chungah a lo ṭha hle a, berâm te, bâwng te, sabengtung nu leh pa te, chhiahhlawh mipa leh hmeichhia te, sanghâwngseite a lo pe a. 17 Tichuan, Jehova’n Abrama nupui Saraii avângin Pharaoa leh a chhûngte chu hri nasa takin a hrem a. 18 Pharaoa chuan Abrama chu kovin: “Ka chungah eng nge i tih tâk? Engvângin nge i nupui a ni tih min hrilh loh? 19 Engati nge, ‘Ka unaunu a ni,’ i tih? Chuvâng chuan alâwm nupuia neih ka tum. I nupui hi hruai la, kal bo rawh!” a ti a. 20 Tichuan, Pharaoa’n a mite chu Abrama leh a nupui chu hruai tûrin thu a pe a. Anni chuan Abrama chu a nupui leh a neih zawng zawng nên Aigupta ram aṭangin an hruai chhuak ta a.