Genesis

18 A hnuah, chhûn khaw lum lai takin Abrahama chu a puan in kawngka bulah a ṭhu a. A puan in chu Mamre hmuna thing lian tak takte zînga awm a ni. Chutih lai chuan a hnênah Jehova a rawn inlâr a. 2 Abrahama chu a han hawi chhuak a, hla taka mipa pathum ding a hmu a. Tichuan, anmahni lam panin puan in kawngkâ aṭang chuan a tlân a, an hmaah chuan a bawkkhup a. 3 Ani chuan: “Jehova,* i lâwm zâwng ka nih chuan, khawngaihin i chhiahhlawh hnênah hian lo châwl rawh. 4 In ke silna tûr tui ka rawn lâktîr ang a; tichuan, thingkûng hnuaiah hian in ṭhu hahdam dâwn nia. 5 In chhiahhlawh chênna hmunah in rawn kal si a, in chak thar lehna tûrin ei tûr ka rawn lâk ang che u. Tichuan, in kal zêl dâwn nia,” a ti a. Anni chuan: “A ṭha alâwm. I sawi ang chuan va ti ta che,” an ti a.

6 Abrahama chu puan ina awm Sari hnêna rang taka kalin: “Hmanhmawh takin chhang phut tehkhâwng* thum kha la la, hmet la, chhangpêrte siam rawh,” a ti a. 7 Abrahama chu ran rual zîngah a va tlân a, bâwngpa tuai ṭha tak a thlang a. Rang taka buatsaih tûrin a chhiahhlawh hnênah a pe a. 8 Abrahama chuan bâwnghnute khal te, bâwnghnute te, bâwng tuai sate chu rawn lain an hmaah a chhawp a. Thing hnuaia an ei lai chuan an bulah a lo ding a.

9 Anni chuan: “Khawiah nge i nupui Sari?” tiin an zâwt a. Ani chuan: “Puan in chhûngah sâwn a awm,” a ti a. 10 An zînga pakhat chuan: “Nakum tûn ang hunah hian ka rawn kal leh ngei ang a, chutih hunah chuan i nupui Sari’n fapa a hring ang,” a ti a. Chu thu sawitu hnunga awm puan in kawngka bul aṭang chuan Sari’n a lo ngaithla a. 11 Abrahama leh Sari chu an upain an tar tawh hle a. Sari chuan fa neih theih hun a pêl tawh bawk. 12 Chuvângin, Sari chu a rilruin a nui a: “Ka tar tawh hnuah leh ka lalpa pawh a upat tawh hnuah hian, hetiang hlimna hi ka nei thei tak tak dâwn em ni?” tiin a ngaihtuah a. 13 Jehova chuan Abrahama hnênah: “Engvângin nge Sari’n nui chunga, ‘Ka upat hnu hian fa ka hring tak tak ang maw,’ a tih? 14 Jehova tân thil harsa lutuk a awm em ni? Nakum tûn ang hunah hian ka rawn kal leh ang a, chutih hunah chuan Sari’n fapa a hring ang,” a ti a. 15 Sari chuan a hlauh avângin, “Ka nui lo!” tiin a pha a. Mahse, Pathian chuan: “I nui ngei alâwm!” a ti a.

16 A mikhualte kal tûra an thawh chuan Abrahama’n Sodom khua a lan theihna thlengin a kalpui a. 17 Jehova chuan: “Ka thil tih tum hi Abrahama ka han hrilh ang e. 18 Abrahama hi hnam ropui leh thiltithei tak a la ni ngei ang a, amah avâng hian khawvêla hnam tin malsâwm an la ni dâwn a ni. 19 A fapate leh a thlah zawng zawngte’n thil dik leh ṭha tia Jehova kawng an zawh reng theih nân, an hnêna thu pe tûrin ani hi ka thlang tawh si a. Chutiang chuan, Abrahama chungchânga a thutiam chu Jehova’n a thlen famkimtîr thei ang,” a ti a.

20 Jehova chuan: “Sodom leh Gomorra khaw chungchâng mite’n an sawisêlna tam tak ka lo hria a, an sualna chu a nasa hle a ni. 21 Mite sawisêlna ka hnêna lo thleng hi a dik leh dik loh en tûrin ka zuk chhuk teh ang. A dik loh chuan, ka hre mai ang,” a ti a.

22 Mi dang pahnih chu Sodom lam panin an kal a, Jehova erawh chu Abrahama bulah a la awm reng a. 23 Abrahama chuan Pathian chu va hnaihin: “Mi sualte rualin mi felte i tiboral dâwn em ni? 24 Khaw chhûngah chuan mi fel 50 awm ta se, chûng mi fel 50-te avâng chuan ngaidam lovin i tiboral vek dâwn em ni? 25 Mi suaksualte ruala mi felte tihboral chu i tân thil theih a ni hauh lo vang a, mi suaksualte anga mi felte hrema an awm i phal ngai hek lo vang. Chutiang chuan i ti ngai âwm si lo va. Lei chung zawng zawnga rorêltu chuan thil dik lo i ti dâwn em ni?” a ti a. 26 Jehova chuan: “Sodom khuaa mi fel 50 ka hmuh chuan, anmahni avângin khaw pum pui chu ka ngaidam ang,” a ti a. 27 Abrahama chuan: “Jehova, vut leh vaivut mai ni mah ila, khawngaihin ka han sawi belh leh ang e aw. 28 Mi fel chu pangain 50 tling lo ta se, pangate avâng chuan khaw pum pui chu i tichhe dâwn em ni?” a ti a. Pathianin ani chu: “Mi fel 45 ka hmuh chuan ka tichhe lo vang,” tiin a chhâng a.

29 Abrahama chuan: “Mi fel 40 chauh awm ta se,” a ti leh a. Pathian chuan: “Mi fel 40 avâng chuan ka tichhe lo vang,” tiin a chhâng a. 30 Abrahama chuan: “Jehova, khawngaihin thinrim lo hrâm la, ka han sawi belh leh ang e: Khuaah chuan mi fel 30 chauh awm ta se,” a ti a. Pathian chuan: “Mi fel 30 chauh ka hmuh pawhin ka tichhe lo vang,” tiin a chhâng a. 31 Abrahama chuan: “Jehova, khawngaihin ka han sawi belh leh ang e aw: Mi fel 20 chauh awm ta se,” a ti a. Pathian chuan: “Mi fel 20 avâng chuan ka tichhe lo vang,” tiin a chhâng a. 32 A tâwp nân Abrahama chuan: “Jehova, khawngaihin thinrim lo hrâm la, vawi khat chiah ka han sawi leh ang e: Mi fel sâwm chauh awm ta se,” a ti a. Pathian chuan: “Mi fel sâwm avâng chuan ka tichhe lo vang,” tiin a chhâng a. 33 Abrahama hnêna thu a sawi zawh chuan Jehova chu a kal ta a, Abrahama pawh ama awmna lamah a lêt leh a.