Exodus

12 Aigupta ramah chuan Jehova’n Mosia leh Arona hnênah: 2 “Tûn thla hi in tân thla chhiar ṭanna a ni ang a. In tân kum khata thla hmasa ber a ni ang. 3 Israel pung khâwmho zawng zawng hnênah, ‘Tûn thla ni sâwmnaah mi tinin mahni chhûngkua azir zêlin berâm pakhat ṭheuh, in khat tân berâm pakhat zêl in la tûr a ni. 4 Chhûngkaw khatin berâm pakhat in ei zawh sên dâwn loh chuan, in ṭhenawm hnai ber nên in chhûngkuaa mi awm zât azirin berâm chu inei ṭâwm ula. Chutianga in tih hunah chuan mi pakhatin a ei zât tûr chu chhût ang che u. 5 Berâm chu kum khata upa, hrisêl ṭha tak a ni tûr a ni a. Berâm pa tuai aiah kêl pa tuai pawh in thlang thei ang. 6 Tûn thla ni 14 thleng in enkâwl tûr a ni a, ni 14-na tlai ni tlâk hnuah Israel chhûngkaw tinte chuan an ran enkawl ṭheuh chu an talh tûr a ni. 7 A thisen chu lain, a sa in eina tûr in kawngka biangah leh kawngka lu chungah in tât tûr a ni.

8 “‘Chumi zân ngei chuan in ei tûr a ni a. Meiah hemin, chhang dawidim telh loh leh thlai hnah kha chi nên in ei tûr a ni. 9 A helin emaw, chhum hminin emaw in ei tûr a ni lo va, a lû te, a kê te, a kawchhûngte chawpin in hem hmin tûr a ni. 10 A tûk zîng thlengin eng mah in dah tûr a ni lo, a tûk zîng thlenga la bâng chu meiin in hâl tûr a ni. 11 Tin, in ei hunah chuan kâwnghrên hrêng a, pheikhawk bunin, in tiang in keng tûr a ni a, hmanhmawh takin in ei tûr a ni. Chu chu Jehova Kalhlên Kût a ni si a. 12 Chumi zân chuan Aigupta ramah ka rawn kal ang a, fa tîr zawng zawng, mihring aṭanga ramsa thlengin ka tihlum vek ang a, Aigupta rama pathian zawng zawngte chu rorêlsakin ka hrem ang. Kei hi Jehova ka ni. 13 Tin, thisen in tahna chu in chênna chhinchhiahna a ni ang a, thisen chu ka rawn hmuh hunah ka kal kân che u ang a; chutiang chuan, Aigupta ram ka hrem hunah nangni chuan in tuar ve lo vang.

14 “‘Chu nî chu in tân hriatrengna nî a ni ang a, in thlah lo la awm tûr zawng zawngte thlengin Jehova tân kût angin in hmang tûr a ni. Chu chu kumkhaw dân a ni ang. 15 Ni sarih chhûng chhang dawidim telh loh in ei tûr a ni a. Chu ni sarih chhûnga chhang dawidim telh ei apiang chu Israel mite zîng aṭanga tihhlum tûr an nih avângin, a ni khat nî aṭangin chhang dawidim telh rêng rêng chu in in aṭangin in paih tûr a ni. 16 A ni khatnaah leh a ni sarihnaah inkhâwmpui thianghlim in hmang tûr a ni a. Chûng ni hnih chhûng chuan, in mamawh tâwk ei tûr siam chauh lo chu hna dang rêng rêng in thawk tûr a ni lo.

17 “‘Aigupta ram aṭangin nangni mipui tam tak hi ka hruai chhuak dâwn che u a, chumi nîah chuan Chhang Dawidim Telh Loh Kût in hmang tûr a ni. Chu nî chu in thlah lo la awm tûr zawng zawngte thlengin in hre reng tûr a ni a, in tân kumkhaw dân a ni ang. 18 Thla khatna, ni 14 tlai lam aṭanga ni 21 tlai lam thlengin chhang dawidim telh loh in ei tûr a ni. 19 Ram dang mi an ni emaw, Israel mi an ni emaw chûng ni sarih chhûnga chhang dawidim telh ei apiang chu Israel pung khâwmho zîng aṭanga tihhlum tûr an nih avângin, chumi hun chhûng chuan in inah chhang dawidim telh rêng rêng a awm tûr a ni lo. 20 Dawidim telh rêng rêng in ei tûr a ni lo va, in tinin chhang dawidim telh loh chauh in ei tûr a ni,’ tiin sawi ang che u,” a ti a.

21 Mosia chuan Israel upate chu ko nghâlin an hnênah: “Kal ula, chhûng tinin in ran rual zînga pakhat thlang ula, Kalhlên Kût atân talh ang che u. 22 A thisen chu chawhtawlhah dah ula, chutah chuan husop hnimin kawngka lu chungah leh kawngka biang lehlam lehlamah in tât tûr a ni a, a tûk khua a vâr hma loh chuan tu mah in aṭangin in chhuak tûr a ni lo. 23 Tichuan, Aigupta mite hrem tûra Jehova a lo kal a, kawngka lu chung leh kawngka biang lehlam lehlama thisen tah chu a hmuh hunah Jehova’n kawngkâ chu a kal kân ang a, in ina thihna hri a luh chu a phal lo vang.

24 “He kût hi nangmahni leh in thlahte’n kumkhaw dân anga neiin in hmang ṭhîn tûr a ni. 25 Jehova’n a lo sawi tawh anga a pêk tûr che u rama in luh hunah pawh in hmang chhunzawm zêl tûr a ni. 26 In fate’n, ‘Engvângin nge he kût hi kan hman?’ tia an zawh che u chuan, 27 an hnênah, ‘Hei hi Jehova Kalhlên Kût a ni a, ani chuan Aigupta rama Aigupta mite a hrem lai khân, Israel mite in chu kal kânin min chhanhim a ni,’ tiin in sawi tûr a ni,” a ti a.

Tichuan, mite chuan kûnin Pathian chibai an bûk ta a. 28 Israel mite chu an kal a, Jehova’n Mosia leh Aarona hnêna thu a pêk ang chuan an ti a. Pathian thupêk ang chiahin an ti a ni.

29 Tichuan, zan laiah Jehova’n Aigupta rama rorêltu Pharaoa fa tîr aṭanga tân ina tâng fa tîr thlengin Aigupta rama fa tîr zawng zawng a tihlum a, ran zînga piang hmasa berte pawh a tihlum vek a ni. 30 Chumi zân chuan, Pharaoa leh a chhiahhlawh zawng zawngte bâkah, Aigupta mi zawng zawngte chu an tho va. In tinah mitthi an awm avângin Aigupta mite chu nasa takin an ṭap a. 31 Chumi zân la la chuan, Mosia leh Arona chu kovin: “Nangni leh Israel mi zawng zawngte hi ka mite zîng aṭang hian chhuak nghâl ula, in sawi ang khân Jehova rawng chu va bâwl rawh u. 32 In sawi tawh ang ngei khân, in berâm rualte leh in ran rualte hruaiin kal rawh u. Mahse, ka tân pawh malsâwmna min dîlsak tûr a ni,” a ti a.

33 Aigupta mite chuan, “Kan thi zo takngial dâwn!” tia sawiin Israel mite chu an ram aṭanga a rang thei ang bera chhuak tûrin a nawrin an nawr a. 34 Mipuite chuan dawidim telh loh an chhang hmeh sate chu a hmehna thlêng chawpa puana tuamin an pû a. 35 Mosia’n a hrilh angin, Israel mite chuan Aigupta mite chu tangkarua leh rangkachaka siam thilte bâkah, thawmhnawte an dîl a. 36 Jehova chuan an dîl apiang an pêk theihna tûrin Aigupta mite duhsak a hlawhtîr a, chutiang chuan Aigupta mite chu an rawk ta a ni.

37 Tichuan, Israel mite chu Rameses aṭang chuan Sukkoth lam panin an chhuak ta a, naupang chhiar tel lohvin patling ringawt pawh 6,00,000 dâwn lai an ni. 38 Mipui inchawhpawlh tam takin* an zui bâkah, berâm leh ran rual tam tak an hruai tel bawk a. 39 Kawng lakah chuan Aigupta ram aṭanga an ken dawidim telh loh chhang hmeh sate chu an ur a. Hmanhmawh taka chhuahtîr an nih avâng leh ei tûr dang an buatsaih hman loh avângin, dawidim telh loh chhang hmeh sa chauh chu an nei a ni.

40 Aigupta rama Israel mite awm hun chhûng chu kum 430 a ni a. 41 Kum 430 a tâwpna nî ngeiah chuan, Jehova mi zawng zawngte chu Aigupta ram aṭang chuan an kal chhuak ta a. 42 Chu zân chu, Jehova’n Aigupta ram aṭanga a hruai chhuah avânga an lâwmzia lantîrna tûr zân a ni a. Chu zân vêk chu, Israel mi zawng zawngte’n an thlah lo la awm tûrte thlenga Jehova tâna an lawm ṭhin tûr zân chu a ni.

43 Tin, Jehova’n Mosia leh Arona hnênah, “Kalhlên Kût atâna dân chu hei hi a ni: Ram dang mi tu mahin Kalhlên Kût sa an ei tûr a ni lo. 44 Tu emawin pawisaa a lei bâwih a neih chuan, a serh a tansak tûr a ni a. Chutiang chauh chuan, Kalhlên Kût sa chu a ei ve thei ang. 45 In zînga chêng ram dang mite leh hnathawka in rawihte chuan an ei tûr a ni lo. 46 In khatah berâm pakhat zêl in ei tûr a ni a. A sa chu pâwnah in keng chhuak tûr a ni lo va, a ruh pakhat mah in titliak tûr a ni lo. 47 Israel mi zawng zawng chuan kût chu an hmang tûr a ni. 48 In zînga chêng ram dang miin Jehova tâna Kalhlên Kût hman ve a duh chuan, a chhûngkuaa mipa zawng zawngin serh an tan tûr a ni a. Chutiang chuan, Israel mi ang a lo ni ang a, kût chu a hmang ve thei ang. Mahse, serh tan loh tu mahin Kalhlên Kût sa chu an ei tûr a ni lo. 49 Chu dân chu Israel mite leh in zînga chêng ram dang mite chuan an zâwm tûr a ni,” a ti a.

50 Israel mi zawng zawng chuan Jehova’n Mosia leh Arona hnêna thu a pêk ang chuan an ti a. Pathian thupêk ang chiahin an ti a ni. 51 Chumi nî ngei chuan, Jehova’n Israel mi zawng zawng chu Aigupta ram aṭangin a hruai chhuak ta a.