Exodus
13 Jehova’n Mosia chu be lehin: 2 “Israel mite zînga fa tîr mipa zawng zawngte chu ka tân tithianghlim rawh.* Mipa fa piang hmasa berte leh ran zînga a pa piang hmasa berte chu ka ta an ni,” a ti a.
3 Mosia’n mipuite hnênah chuan: “In sal tânna Aigupta ram aṭanga Jehova’n kut chak taka a hruai chhuah che u avângin, he nî hi in hre reng tûr a ni. Chuvângin, dawidim tel rêng rêng in ei tûr a ni lo. 4 Abib* thla vawiin nîah hian Aigupta ram aṭangin in chhuak ta a. 5 Jehova’n in pi leh pute hnêna pêk a lo tiam tawh khawizu leh hnute tui luanna ram, Kanaan mi te, Hit mi te, Amor mi te, Hiv mi te, Jebus mite rama a hruai luh hunah che u chuan, Abib thla apiangin he kût hi in hmang ṭhîn tûr a ni. 6 Ni sarih chhûng chhang dawidim telh loh in ei tûr a ni a, a ni sarihnaah chuan Jehova tân kût in hmang tûr a ni. 7 Chhang dawidim telh loh chu ni sarih chhûng in ei tûr a ni a; dawidim telna rêng rêng in kawl tûr a ni lo va, in ram chhûngah pawh chhang dawidim telh rêng rêng a awm tûr a ni hek lo. 8 Chumi nî chuan in fate chu, ‘Aigupta ram aṭanga kan chhuah laia kan tâna Jehova thiltih avânga he kût hi hmang kan ni,’ tiin in hrilh tûr a ni. 9 Jehova dân chu in kâa a awm reng theihna tûrin, he kût hi in kut atân chhinchhiahna leh in chal atân hriatrengna a ni ang. Jehova’n Aigupta ram aṭangin kut chak takin a hruai chhuak si che u a. 10 Chuvângin, he kût hi kum tin a hun ngaiah in hmang ziah tûr a ni.
11 “Jehova’n nangmahni leh in pi leh pute hnêna chhechhama pêk a lo tiam tawh Kanaan rama a hruai luh hunah che u chuan, 12 Jehova hnênah fa tîr mipa zawng zawng leh ran zînga a pa piang hmasa ber zawng zawngte chu in hlân tûr a ni; Jehova ta an ni si a. 13 Sabengtung piang hmasa ber chu berâmin in tlan tûr a ni a, in tlan loh chuan a nghâwng in titliak tûr a ni. Chutiang bawkin, in fa tîr mipa zawng zawngte chu in tlan tûr a ni.
14 “In fate’n, ‘Engvângin nge hetianga in tih?’ tia an zawh che u chuan, ‘Jehova’n kan sal tânna Aigupta ram aṭangin kut chak takin min hruai chhuak a. 15 Pharaoa’n luhlul chhuaha min kaltîr a duh loh khân, Jehova chuan Aigupta rama fa tîr zawng zawng, mihring aṭanga ramsa thlengin a tihlum vek a. Chuvângin, kan ran piang hmasa ber zînga a pa zawng zawngte chu Jehova hnênah kan hlân a, kan fa tîr mipa zawng zawngte pawh kan tlan bawk a ni,’ tiin in sawi tûr a ni. 16 Hei hi in kut atân leh in chal atân chhinchhiahna a ni ang, Jehova chuan Aigupta ram aṭangin kut chak takin min hruai chhuak si a,” a ti a.
17 Pharaoa’n mipuite a kaltîr khân, Pathian chuan: “Indona lo chhuak palh ta se, mipuite hian an rilru thlâkin Aigupta ramah an lêt leh mai ang,” tia sawiin, kawng hnai zâwk Philistia ram pal tlangtu kawngah chuan a hruai duh lo va. 18 Tichuan, Pathianin mipuite chu Tuipui Sen bul thlalêr kawngah chuan a hruai kual ta zâwk a. Israel mite chuan sipai ang maia felfai taka inremin Aigupta ram chu an chhuahsan a ni. 19 Josefa’n Israela thlahte chu: “Pathianin a la rawn ngaihsak ngei ngei ang che u. Tin, he hmun aṭanga in chhuah hunah ka ruhte in keng tel tûr a ni,” tia chhia a lo chhamtîr tawh avângin Mosia chuan Josefa ruhte chu a keng tel bawk a. 20 Tichuan, Sukkoth aṭanga chhuakin thlalêr tawntirha awm Etham-ah awmhmun an khuar a.
21 Chhûnah leh zânah an kal theihna tûrin, Jehova chuan chhûnah chhûm ding hmangin a kaihruai a, zânah mei alh ding hmanga an kawng tiêngin an hma a hruai zêl a. 22 Chhûna chhûm ding leh zâna mei alh ding chuan mipuite chu a kalsan ngai lo.