Genesis

43 Kanaan ramah chuan ṭâm tla chu a nasa ta hle a. 2 Aigupta ram aṭanga an buh hawnte an ei zawh hnu chuan, Israela chuan a fapate hnênah: “Buh tlêm azâwng tal lei tûrin zuk kal leh ta che u,” a ti a. 3 Juda chuan a pa hnênah: “Ani chuan: ‘In nau in rawn hruai hma loh chuan ka hmêl rawn hmu leh tawh suh u,’ tiin chiang takin min hrilh a. 4 Benjamina hi min hruaitîr chauhvin ei tûr lei tûr chuan kan zuk kal ang. 5 Ani chuan: ‘In nau in rawn hruai hma loh chuan ka hmêl rawn hmu leh tawh suh u,’ a tih avângin min hruaitîr loh chuan kan zuk kal lo vang,” a ti a. 6 Israela chuan: “Engvângin nge nau dang in la nei tih in sawi kher? Buaina min thlen tâk hi,” a ti a. 7 A fapate chuan: “Ani chuan keimahni leh kan chhûngte chungchâng ngaihvenin, ‘In pa chu a la dam em? Unaupa dang in la nei em?’ tia chîk taka min zawh avângin thu dik kan hrilh ta mai a ni. Kan nau hi a hnêna hruai tûrin min ti ang tih engtin nge kan hriat tehlul ang,” an ti a.

8 Juda chuan a pa Israela chu ngênin: “Kan nau hi min hruaitîr la, nang leh keini leh kan fate hi rilṭâma kan thih loh nân kan zuk kal ang e. 9 A him theihna tûrin eng pawh ka ti ang. Ka kutah dah rawh. I hnêna ka rawn hruai kîr theih loh va, ka pe lêt lo che a nih chuan, kumkhuain i chungah thil ka tisual tihna a ni ang. 10 Hun khawh ral lo ila chuan vawi hnih lai kalin kan lo lêt leh hman tawh tûr,” a ti a.

11 An pa Israela chuan an hnênah: “Chutiang a nih dâwn chuan heti hian ti rawh u: He ramin a thar chhuah thil ṭha ber ber balsam tlêm azâwng te, khawizu tlêm azâwng te, labdanum thing hnai te, thing hnai rimtui chî te, pistachio* te, almond-te hi Aigupta ram lal tân chuan thilpêkah keng thla rawh u. 12 A lêta tam pawisa keng ula, in ipa pawisa lo awm pawh kha keng lêt leh rawh u. An lo thun sual palh a ni mai thei asin. 13 In nau hi hruaiin a hnênah chuan zuk kal rawh u. 14 Simeona leh Benjamina in hruai kîr a phal theih nân Pathian Engkimtitheia chuan Aigupta ram lal khawngaih hlawhtîr che u rawh se. Kei erawh chu ka fate nên kan inṭhen a ngai a nih pawhin kan inṭhen mai a ni ang chu!” a ti a.

15 Tichuan, thilpêkte leh a lêta tam pawisa chu an keng a, Benjamina chu hruaiin Aigupta ramah chuan an chhuk thla a, Josefa hmaah chuan an ding leh ta a. 16 Josefa’n a ute ruala Benjamina a hmuh chuan a in chhûng enkawltu chu: “Hêng mite hi ka inah hruai la, sa talhin ei tûr buatsaih rawh. Anni hian chhûn chaw min eipui dâwn a ni,” tiin a hrilh nghâl a. 17 Ani chuan Josefa sawi anga ti nghâlin, Josefa inah chuan a hruai a. 18 Chu hmuna hruai an nih avâng chuan an hlau hle a, “Ṭum hmasaa kan ipa pawisa lo awmte avâng khân he hmunah hian hruai kan ni. Tûnah chuan min bei ang a, salah min siamin kan sabengtungte hi an la ngei ang!” an ti hlawm a.

19 Josefa in kawngka bul an thlen chuan, in chhûng enkawltu chu an bia a. 20 A hnênah: “Ka pu, i phal chuan thil sawi lawk kan duh a. Ṭum hmasa khân ei tûr lei tûrin kan lo kal a. 21 Mahse, kan riahhmun kan thlen a, kan ip kan han hawn chuan kan pawisate chu a kimin kan ipah ṭheuh a lo awm a. Chuvângin, pêk lêt leh vek che kan duh a ni. 22 Kan ipa kan pawisate dahtu kha tu nge a nih kan hre si lo va. Chu bâkah, ei tûr lei tûrin pawisa kan rawn ken belh bawk asin,” an ti a. 23 Ani chuan an hnênah: “A pawi lo. Hlau duh suh u. In pawisa chu ka dawng tawh alâwm. In Pathian, in pa Pathianin in ipah pawisa a lo dah a nih kha,” a ti a. A hnuah Simeona chu an hnênah a rawn hruai chhuak a.

24 Tichuan, anni chu Josefa inah hruai lûtin, an ke silna tûr tui a pe a, an sabengtungte ei tûr pawh a pe bawk a. 25 Chutah chuan chaw an ei dâwn tih an hriat avângin, chhûna Josefa lo haw huna pêk tûr thilpêkte an buatsaih a. 26 Ina Josefa a lo luh chuan thilpêkte chu an pe a, bawkkhupin chibai an bûk a. 27 Chumi hnuah Josefa chuan an chanchin zâwtin: “A chungchâng in sawi, in pa upa tawh tak kha eng nge a an? A la dam em?” a ti a. 28 Anni chuan: “I chhiahhlawh kan pa chu a dam ṭha e,” tiin an chhâng a. Tichuan, kûnin chibai an bûk a.

29 A han hawi kuala a nu fapa a nau Benjamina a hmuh chuan: “Hei hi in unau zînga naupang ber, a chanchin in sawi kha a ni em?” tiin a zâwt a. Tichuan, Benjamina hnênah: “Ka fapa, Pathianin malsâwm che rawh se,” a ti a. 30 A nau a hmuh chuan Josefa chu a lungchhe ta hle a, hmanhmawh taka chhuakin ṭahna tûr hmun a zawng a. Pindan chhûngah lûtin a ṭap ta a. 31 Chumi hnuah chuan a hmai a phih a, a kal chhuak a. Insûm hrâm hrâm chungin: “Chaw ei siam rawh u,” a ti a. 32 Tichuan, Josefa chu a hrangin chaw ei an siamsak a, a unaute pawh a hrangin an siamsak bawk a. Aigupta mite pawh chuan a hrangin an ei a, a chhan chu Hebrai mite bula ei chu an tân thil tenawm a nih vâng a ni.

33 A unaute chu a hmaah a ṭhuttîr a, a upa ber chu a fa tîr nihna chanvo angin, a hmasa berah a ṭhuttîr a, a naupang ber thlenga an upat dân indawta a ṭhuttîr zêl avângin mak ti takin an inen hlawm a. 34 Josefa chuan ei tûrte chu a dawhkân aṭangin a unaute dawhkânah a chhawptîr zêl a, Benjamina chanpual chu mi dangte chanpual aiin a lêt ngain a titam a. Tichuan, Josefa ho chuan hlim taka eia inin an puar ta hle a.