Genesis

49 Jakoba chuan a fapate hnênah: “Nakin zêla in chunga thil thleng tûr ka hrilh theihna tûr che uin lo kal khâwm rawh u. 2 Jakoba fapate u, lo kal khâwm ula, ngaithla rawh u. In pa Israela thusawite hi ngaithla rawh u.

3 “Reuben, nang hi ka fa tîr, ka chakna leh mipa ka nih anga ka rah hmasa ber i ni a, zahawmna leh chaknaa ṭha chungchuang i ni. 4 Mahse, tui so but but ang maia thunun theih loh i nih avângin, a hmasa ber i ni reng lo vang. I pa khumah i lâwn si a. Chutih lai chuan ka khum i tibawlhhlawh a. Chu chu Reubena thiltih chu a ni.

5 “Simeona leh Levia hi unau an ni a. An hmanruate chu tharum thawhna leh tualthahna atân an hmang a ni. 6 Aw, ka nunna,* anni chu kâwm lo la. Aw ka ropuina,* an pâwl chu zâwm hek suh. An thinrim avângin mi an that a, an intihhlim nân bâwngpa ke thate chu an zai chat si a. 7 An thinrimna chu ânchhe lawhin awm rawh se, a râwng si a. An thinurna pawh ânchhe lawhin awm rawh se, a nasa si a. Anni chu Jakoba ramah chuan ka hnawt darh ang a, Israela ramah chuan ka tidarh ang.

8 “Juda, nang erawh chu i unaute’n an fak ang che. I kut chuan i hmêlmate nghâwng a rêk ang a. I hmaah i pa fapate an kûn ang. 9 Juda hi sakeibaknei no a ni. Ka fapa, i sa seh chu i ei ang a, i ding chhuak ngei ang. Ani chu sakeibaknei anga muin a châwl a. Sakeibaknei ang mai a nih avângin tuin nge titho ngam ang? 10 Lal tiang chuan Juda a chhuahsan lo vang a, hotu tiang pawh a ke bulah a awm reng ang; Silova lo kal hma loh chuan, mite chuan a thu an âwih ang. 11 A sabengtung chu grêp hruiah a thlung ang a, a sabengtung tuai chu grêp hrui rah duh takah a thlung ang. A thawmhnaw chu uain-ah a su ang a, a kawrfual pawh grêp tuiah a su ang. 12 A mitte chu uain avângin a sen ang a, a hâte pawh hnute tui avângin a vâr ang.

13 “Zebuluna hi tuipui kam, lawngte’n an thîrchakai an thlâkna hmunah a awm ang a, a ramrî chu Sidon ram lam thlengin a inzâr pharh ang.

14 “Isakara hi sabengtung chak tak a ni a, a ip phurh pahnih inkârah chuan a bawk a. 15 A chawlhna chu hmun ṭha tak a ni tih leh ram nuam tak a ni tih a hria ang. Rit phur tûrin a kokî a tihniam ang a, rim taka thawk tûrin a inpe ang.

16 “Dana hian Israelte zînga hnam khat a nih angin a mite ro a rêlsak ang. 17 Dana hi kawngsîra rûlpui, sakawr chunga chuang a hnung zâwnga tlâktîr tûra sakawr kêa chuktu rûl ki nei ni rawh se. 18 Aw Jehova, i chhandamna chu ka nghâk ang.

19 “Gada hi rûntute’n an bei ang a, ani erawh chuan an ke artuiah a bei thung ang.

20 “Asera hi ei leh inah a hnianghnâr hle ang a, lal tâna ei tlâk khawp ei tûr a thar chhuak ang.

21 “Naphtalia hi sazuk nu a ni a. Thu ṭha takte a sawi ṭhîn.

22 “Josefa hi thing rah duh tak zîk no, tuihna bula ṭo thingkûng zîk no a ni a, a zârte chuan bang a khuh a ni. 23 Mahse, thal kâptute chuan ani chu an hua a, nasa taka tibuaiin an kâp reng a. 24 Chuti chung chuan, a thalngul chu a hmunah a dah tlat a, Jakoba ṭanpuitu mi chakin a ṭanpui avângin a kutte chu a chakin a rang a ni. Ani chu berâm vêngtu, Israela lung a ni. 25 Ani* chu i pa Pathian aṭanga chhuak a ni a, Pathianin a ṭanpui ang che, Engkimtitheia bula awm a ni. Ani chuan vân malsâwmna te, tui thûk tak malsâwmna te, hnute leh chhûl malsâwmnatein mal a sâwm ang che. 26 I pa malsâwmna chu chatuana awm reng tlângte malsâwmna leh kumkhuaa awm mualte malsâwmna ai pawhin a ropui zâwk ang. Malsâwmnate chu Josefa lu chungah a awm reng ang a, a unaute zîng aṭanga thlan chhuaha chhîpah a awm reng ang.

27 “Benjamina hian chinghnia angin a pawt darh ṭhîn ang a. Zîngah a sa seh a ei ang a, tlaiah a râllâk thil a sem ang,” a ti a.

28 Chûng zawng zawng chu Israel hnam 12 an ni a, chûngte chu an pain mal a sâwm laia a sawite a ni. An vai chuan malsâwmna an dawn tûr ang tâwk ṭheuh a pe a.

29 Chumi hnu chuan, anni chu heti hian thu a pe a: “Ka mite hnênah hruaiin ka awm dâwn ta a.* Hit mi Ephrona lova min thlahtute an phûmna pûkah khân min phûm ve ang che u. 30 Chu pûk chu Kanaan rama Mamre bula Makpela lova awm a ni a. Chu lo chu Abrahama’n Hit mi Ephrona hnên aṭangin inphûmna hmun atân a lei a ni. 31 Chutah chuan Abrahama leh a nupui Sari an phûm a. Chutah chuan Isaaka leh a nupui Rebeki pawh an phûm bawk a. Chu hmunah vêk chuan Leaii ka phûm a ni. 32 Chu lo leh a chhûnga pûk awm chu Hetha fapate hnên aṭanga lei a ni,” tiin.

33 A fapate hnêna chûng kaihhruainate a pêk zawh chuan Jakoba chuan a kê chu khum chungah a hlâng a, a thi ta a. A mite hnênah hruaiin a awm ta a ni.*