Genesis

29 Chumi hnuah, Jakoba chu a kal zêl a, khawchhak lam ram a thleng ta a. 2 Chutah chuan lova tuichhunchhuah leh a bula berâm rual thum lo bawk a hmu a, chu tuichhunchhuaha tui chu berâm rualte an intîr ṭhîn a ni. Tuichhunchhuah chu lung lian taka chhin a ni a. 3 Berâm rualte an khalh khâwm hnu chuan lung chu lum sawnin tui an intîr ṭhîn a, chumi hnuah lung chuan tuichhunchhuah chu an chhîn leh ṭhîn a ni.

4 Jakoba’n chuta mite chu: “Ṭhiante u, khawi aṭangin nge in lo kal?” tiin a zâwt a, anni chuan: “Haran aṭangin,” tiin an chhâng a. 5 Jakoba chuan: “Nahora tupa Labana in hria em?” a ti a. “Hria e,” an ti a. 6 “A dam ṭha em?” tia a zawh chuan, anni chuan: “Dam ṭha e. Saw, a fanu Rakili pawh a berâmte nên a lo kal saw!” an ti a. 7 Jakoba chuan an hnênah: “Chhûn lai chauh a la nih avângin ran rual khalh khâwm hun pawh a la ni lo va. Chuvângin, in berâmte kha tui intîr ula, tlattîr leh rawh u,” a ti a. 8 Anni chuan: “Berâm rual zawng zawng khalh khâwm an nih a, tuichhunchhuah chhinna lung hi an lum sawn hma loh chuan i sawi ang chuan kan ti thei lo. An lum sawn hnuah chauh berâmte hi tui kan intîr thei ang,” an ti a.

9 An la inbiak lai mêk chuan Rakili chu a pa berâmte nên a lo kal a, ani chu berâm vêngtu a ni. 10 Jakoba’n a nu u Labana fanu Rakili leh Labana berâmte a hmuh chuan tuichhunchhuah chu a pan vat a, a chhinna lung chu lum sawnin Labana berâmte chu tui a intîr a. 11 Tichuan, Rakili chu fâwpin mittui tla zawih zawihin ring takin a ṭap ta a. 12 Jakoba chuan a pa lama an chhûngkhat a nih thu leh Rebeki fapa a nih thu a hrilh a. Tichuan, Rakili chuan inah tlân hawin a pa a va hrilh a.

13 Labana’n a unaunu fapa Jakoba chungchâng a hriat chuan amah hmu tûrin a va tlân ta nghâl a. Ani chu kuaha fâwpin, a inah a hruai haw a. Jakoba chuan Labana chu a chunga thilthleng zawng zawng a hrilh a. 14 Labana chuan: “Ka thisen zawmpui ngei i ni,” a ti a. Tichuan, a hnênah Jakoba chu thla khat a châm a.

15 Labana chuan a hnênah: “Ka chhûngkhat i nih avâng maiin a thlâwnin hna min thawhsak tûr a ni lo. Hlawh atân eng nge i duh min hrilh rawh?” a ti a. 16 Labana chuan fanu pahnih a nei a, a upa zâwk chu Leaii a ni a, a naupang zâwk chu Rakili a ni. 17 Rakili chu hmêlṭha tak a ni a, Leaii erawh chu Rakili angin a hmêlṭha lo. 18 Jakoba chuan Rakili chu a hmangaih êm avângin Labana hnênah: “Kum sarih hna ka thawhsak che ang a, i fanu naupang zâwk hi min neihtîr ta che,” a ti a. 19 Labana chuan: “Mipa dang neihtîr aiin nangmah neihtîr che chu ka tân a ṭha daih zâwk alâwm. Ka hnênah hian awm reng rawh,” a ti a. 20 Jakoba chuan Rakili nei tûrin kum sarih hna a thawk a, a hmangaih êm avângin a tân chuan ni rei lo tê ang lek a ni.

21 Jakoba chuan Labana hnênah: “Kan intiam hun chhûng a zawh tâk avângin, Rakili kha nupuia ka neih theih nân* min pe tawh rawh,” a ti a. 22 Tichuan, Labana chuan a ṭhenawm zawng zawng sâwm khâwmin ruai a buatsaih a. 23 Mahse, zânah chuan Jakoba’n a lo mutpui theihna tûrin a fanu Leaii zâwk chu a pe ta a. 24 Labana chuan a chhiahhlawh Zilpaii chu a fanu Leaii chhiahhlawh atân a pe bawk a. 25 Tin, a tûk zîngah a bula mu chu Leaii zâwk a ni tih Jakoba’n a hriat chuan Labana hnênah: “Eng thil nge i tih tâk hi? Rakili nei tûrin a ni lâwm ni i hna ka thawh? Engati nge min bum?” a ti a. 26 Labana chuan: “Kan ramah hi chuan a naupang zâwk pasal kan neih hmasaktîr ngai lo. 27 Leaii hi inneih lawmna chawlhkâr hman zawhpui phawt la, chumi hnuah Rakili hi ka pe ang che; mahse, kum sarih dang ka hna i thawh leh a ngai ang,” a ti a. 28 Jakoba’n Leaii chu inneih lawmna chawlhkâr a hman zawhpui hnu chuan, Labana’n a fanu Rakili chu a nupui atân a pe ta a. 29 Chu bâkah, Labana chuan a chhiahhlawh Bilhaii chu a fanu Rakili chhiahhlawh atân a pe bawk a.

30 Jakoba chuan Rakili pawh chu a mutpui a, ani chu Leaii aiin a hmangaih zâwk a; tichuan, Labana chu kum sarih dang hna a thawhsak leh a. 31 Jehova’n Leaii chu a pasalin a hmangaih lo tih a hmuh chuan nau a paitîr a, Rakili erawh chu a ching thung a ni. 32 Tin, Leaii’n fapa a han hrin chuan: “Jehova’n ka lungngaihna a hmuh vâng a ni; tûnah chuan ka pasalin min hmangaih tawh ang,” tia sawiin a hmingah Reubena* a phuah a. 33 Leaii’n fapa dang a hrin leh chuan: “Jehova’n ka ṭawngṭaina a ngaithla a, ka pasalin min hmangaih lo tih a hriat avângin ani pawh hi min pe a ni,” tia sawiin a hmingah Simeona* a phuah a. 34 A rai leh a, fapa hringin: “Fapa pathum ka hrinsak tâk avângin tûnah chuan ka pasalin min hnaih tawh ang,” tia sawiin a hmingah Levia* a phuah a. 35 Vawi khat dang rai leha fapa a hrin chuan: “Tûnah chuan Jehova ka fak tawh ang,” tia sawiin a hmingah Juda* a phuah a. Chumi hnu chuan fa a hring zawm ta rih lo va.