Exodus

16 Elim an chhuahsan hnuah, Israel mipuite chuan Aigupta ram an chhuahsan aṭanga thla hnihna, a ni 15-naah Elim leh Sinai inkâra awm Sin thlalêr an thleng a.

2 Israel pung khâwmho zawng zawng chu thlalêrah Mosia leh Arona chungah an phunnawi ṭan a. 3 Israel mite chuan an hnênah: “Aigupta rama sa bêl bula kan ṭhut lai leh kham khawpa chhang kan ei laite khân, Jehova’n min lo tihlum se a ṭha zâwk tûr. Nangni hian rilṭâma thi tûrin thlalêrah min hruai chhuak a nih hi,” an ti a.

4 Tichuan, Jehova’n Mosia hnênah: “Vân aṭangin chhang ka rawn sûrtîr dâwn a, mi tinin mahni ei khawp ṭheuh nî tin an chhar tûr a ni; chutiang chuan, ka dânte an zawm dâwn leh dâwn loh ka fiah thei ang. 5 A ni ruknaah chuan ni danga an chhar zât lêt hnih chharin ei tûr atân an buatsaih tûr a ni,” a ti a.

6 Tichuan, Mosia leh Arona’n Israel mi zawng zawngte hnênah: “Aigupta ram aṭanga hruai chhuaktu che u chu Jehova a ni tih vawiin tlaiah in hria ang. 7 Jehova’n a chunga in phunnawina a hriat avângin, naktûk zîngah Jehova ropuina in hmu ang. Keini hi eng mah kan ni lo, kan chungah phunnawi suh u,” an ti a. 8 Mosia chuan: “Jehova’n tlai lamah in ei tûr sa a pe che u ang a, zîng lamah puar khawpa in ei tûr chhang a pe bawk ang che u. Chutih hunah chuan, Jehova’n a chunga in phunnawina a hria tih in hmu ang. Keini hi eng mah kan ni lo va, kan chungah ni lovin Jehova chungah in phunnawi a ni,” tiin a sawi zawm a.

9 Mosia’n Arona hnênah: “Israel pung khâwmho zawng zawng chu, ‘Jehova’n in phunnawina a lo hriat tâk avângin a hmaah lo kal khâwm rawh u,’ tiin hrilh ang che,” a ti a. 10 Arona’n Israel pung khâwmho zawng zawng hmaa thu a sawi zawh rualin, mipuite chu thlalêr lam enin an lehhawi a. Chu veleh, Jehova ropuina chu chhûmah a lo lang a.

11 Tin, Jehova chuan Mosia hnênah: 12 “Israel mite phunnawina chu ka lo hria a. Anni chu, ‘Tlaiah sa in ei ang a, zîngah in kham khawp chhang in ei bawk ang. Tichuan, kei hi in Pathian Jehova ka ni tih in hria ang,’ tiin hrilh rawh,” a ti a.

13 Chumi nî tlai lamah vahmîm rual lo thlâwkin awmhmun an khuarnaah chuan an lo khat ta vek a, zîngah chuan awmhmun an khuarna chhehvêlah dai a lo tla khat vek bawk a. 14 Dai a hul chuan, thlalêr chu thil them te tak tê tê, vûr ang maia vârin a lo tuam chhuak vek a. 15 Israel mite’n chu chu an hmuh chuan eng nge a nih an hriat loh avângin, ‘Eng thil nge ni?’ tiin an inzâwt hlawm a. Mosia’n an hnênah: “Hei hi Jehova’n in ei tûr atâna chhang a pêk che u a nih hi. 16 Hei hi Jehova thupêk a ni, ‘Mi tinin mahni ei khawp ṭheuh an chhar tûr a ni a, in puan ina chêng zât azir zêlin mi pakhat tân omer tehkhâwng* khat zêl in chhar tûr a ni,’ tih hi,” a ti a. 17 Chutiang chuan Israel mite chuan an ti a, a ṭhenin an chhar tam a, a ṭhenin an chhar tlêm thung a. 18 An chhar sate chu omer tehkhâwnga an han teh chuan a chhar tamin an nei tam bîk lo va, a chhar tlêmin an nei tlêm bîk chuang lo. Mi tinin mahni ei khawp ṭheuh an chhar a ni.

19 Tichuan, Mosia’n an hnênah: “A tûk atân tu mahin in khêk tûr a ni lo,” a ti a. 20 Mahse, mi ṭhenkhatin Mosia thusawi zâwm lova a tûk zînga ei atâna an khêk chuan a lo lung a, a lo rimchhe ta a. Chuvângin, Mosia chu an chungah a thinrim hle a. 21 Tûk tin an ei khawp zêlin an chhar ṭhîn a. Nî a lo sat chuan an chhar bângte chu a tui ral ṭhîn.

22 A ni ruk nî chuan, mi tinin chhang chu ni danga an chhar zât lêt hnih, omer tehkhâwng hnih ṭheuh an chhar a. Israel mite zînga hruaitu zawng zawngte chu lo kalin Mosia hnênah chu thil chu an hrilh a. 23 Mosia chuan an hnênah: “Hei hi Jehova lo sawi tawh kha a ni. Naktûk hi chawlh hmakna nî, Jehova tâna Sabbath ni thianghlim a ni ang a. Chuvângin, in duh chuan hem ula, in duh chuan chhûm rawh u. A bâng chu naktûk zîng thlengin dah ang che u,” a ti a. 24 Mosia thupêk ang chuan zîng thlengin an dah a, a lung lo va, a rimchhe hek lo. 25 Tichuan, Mosia chuan: “Vawiinah hian chhar tûr in hmu lo vang; chuvângin, in dah ṭhat kha ei rawh u. Vawiin hi Jehova tân Sabbath a ni si a. 26 Ni ruk chhûng in chhar ang a; mahse, a ni sarihna Sabbath nîah chuan chhar tûr eng mah a awm lo vang,” a ti a. 27 Amaherawhchu, a ni sarihnaah chuan mi ṭhenkhat chhang chhar tûrin an va chhuak a; mah se, chhar tûr eng mah an hmu lo.

28 Chuvângin, Jehova’n Mosia hnênah: “Engtia rei nge ka thupêkte leh ka dânte zâwm lova in awm dâwn? 29 Sabbath hi Jehova pêk che u a ni tih hre reng rawh u. Chuvâng chuan alâwm a ni ruknaah ni hnih daih chhang a pêk che u. Ni sarihnaah chuan in awmna hmunah in awm reng tûr a ni a, tu mah in kal chhuak tûr a ni lo,” a ti a. 30 Tichuan, a ni sarih nîah chuan Sabbath an hmang ta a.*

31 Israel mite chuan chhang chu “manna”* an ti a. Dania chî anga vâr, khawizua siam chhang anga tui a ni. 32 Mosia chuan: “Hei hi Jehova thupêk a ni, ‘Aigupta ram aṭanga ka hruai chhuah lai che u a, thlalêra chhang ka pêk che u hi in thlah lo la awm tûrte pawhin an hmuh ve theihna tûrin omer tehkhâwng khat dah ṭha rawh u,’ tih hi,” a ti a. 33 Tichuan, Mosia’n Arona hnênah: “Bêl pakhatah Israel chhuan lo la awm zêl tûrte tâna dah ṭhat tûr manna omer tehkhâwng khat thun la, Jehova hmaah dah ang che,” a ti a. 34 Jehova’n Mosia thu a pêk angin, Arona chuan manna awmna bêl chu vawn ṭhat a nih theihna tûrin Thuhriattîrna Bâwm hmaah chuan a dah a. 35 Israel mite chuan manna chu kum 40 chhûng an ei a, hnam dangte luah ram, Kanaan ramrî an thlen thlengin an ei a ni. 36 Omer khat chu epha tehkhâwng* hmun sâwma ṭhena hmun khat nên a intluk a ni.