Exodus

23 “Thuthang dik lo in theh darh tûr a ni lo va. Mi dang chunga chhiatna thlen tûr zâwngin mi suaksual tân thuhretu derah in ṭang tûr a ni lo. 2 Thil sual ti tûrin a tam lam in zui tûr a ni lo va, rorêlna hmaa in din hunah a tam zâwk tihlungawi tumin dâwt in sawi tûr a ni lo. 3 Rorêlnaah mi rethei in duhsak bîk tûr a ni lo.

4 “In hmêlma bâwng pa emaw, sabengtung emaw bo ta se, in hmuh chuan in khalh hawsak tûr a ni. 5 Nangmahni hawtu che u sabengtung chu a phurin a delh beh lai in hmuh chuan, en liamin in kalsan mai tûr a ni lo. Ran thil phurhte chu in hlân thlâkpui tûr a ni.

6 “Mi retheite chu dik lo takin ro in rêlsak tûr a ni lo.

7 “Dâwta inpuhna lakah in inthiar fihlîm tûr a ni a. Mi dik pawisawi lo chu in tihlum tûr a ni lo, mi suaksual chu mi felah ka puang dâwn si lo va.*

8 “Thamna in la tûr a ni lo; thamna chuan mi fing mit a tidelin, mi dik tak pawh thu dik lo a sawitîr thei si a.

9 “Ram dang mite in hnuaichhiah tûr a ni lo. Aigupta ramah khân ram dang mi anga in awm tawh avângin ram dang mi nih awmzia in hriat kha.

10 “Kum ruk chhûng thlai in tuhin in seng tûr a ni a. 11 A kum sarihnaah erawh chuan in lovah eng mah in chîng tûr a ni lo va, in dah âwl tawp tûr a ni. Chutiang chuan, in lova thil ṭote chu mi retheite’n an ei thei ang a, an ei bângte chu ramsate’n an tlân thei ang. Chutiang bawk chuan, in grêp huan leh oliv huante pawh in dah âwl tûr a ni.

12 “Ni ruk chhûng hna in thawk thei ang a. A ni sarihnaah erawh chuan in bâwng pate leh in sabengtungte an chawlh hahdam a, in chhiahhlawhte leh in zînga chêng ram dang mite pawh an intihchak thar leh theihna tûrin in hna in chawlhsan tûr a ni.

13 “Ka thusawite hi fîmkhur takin in zâwm vek tûr a ni. Pathian dang hming rêng rêng in lam tûr a ni lo va, in kâ aṭangin chhuah pawh a chhuak tûr a ni lo.

14 “Kum khatah vawi thum ka tân kût in hmang ṭhîn tûr a ni. 15 Chhang Dawidim Telh Loh Kût in hmang ang a. Aigupta ram aṭanga in lo chhuah hun, Abib* thlaa ka hun ruatah chuan in hnêna thu ka pêk tawh ang che u khân, ni sarih chhûng chhang dawidim telh loh in ei ang a. Ka hmaah kut ruakin tu mah in rawn inlan tûr a ni lo. 16 Chu bâkah, lova in thil chîn, in thil thar chhuah hmasak berte hmangin Buh Seng Kût* in hmang tûr a ni a; kum tâwpa lova in thawhrim rah zawng zawng in seng zawhah Pâwl Kût* in hmang bawk tûr a ni. 17 Mipa zawng zawngte chu kum khatah vawi thum Lalpa dik tak, Jehova hmaah an inlan ṭhîn tûr a ni.

18 “Ka hnêna thil in hlan hunah ran thisen leh chhang dawidim telh in hlân kawp tûr a ni lo va. Ka kûtte in hman laia thil thau in hlante chu a tûk zîng thlengin in dah tûr a ni lo.

19 “Lova in thar chhuah hmasa ber zînga a ṭha ber berte chu in Pathian Jehova inah in rawn keng tûr a ni.

“Kêl no sa chu a pui hnute tuiin in chhûm tûr a ni lo.

20 “In tâna ka hmun ruat in panna kawnga vênghim tûr che u leh chuta hruai lût tûr che uin in hmaah vântirhkoh pakhat ka tîr a. 21 A thusawi ngaithlain zâwm ula, amahah chuan ka hming a awm avângin a lakah hel suh ang che u. Chuti lo chuan, in bawhchhiatnate a ngaidam lo vang. 22 A thu in zawm tlata ka sawi anga in tih erawh chuan, in hmêlmate chu ka hmêlmate an ni ang a, nangmahni dotute chu ka do vang. 23 Tichuan, ka vântirhkoh chu in hmaah a kal ang a, ani chuan Amor mi te, Hit mi te, Periz mi te, Kanaan mi te, Hiv mi te, Jebus mite chênna ramah a hruai lût che u ang a, anni chu ka tiboral vek ang. 24 An pathiante chibai bûkin an rawng bâwl tûra thlêm thlûkin in awm tûr a ni lo va, an thiltih angte chu in ti ve tûr a ni lo. An milem pathiante leh an lungphunte chu in tichhe vek zâwk tûr a ni. 25 Kei, in Pathian Jehova rawng hi in bâwl tûr a ni a. Tichuan, in chhang leh tuite mal ka sâwm ang a, in zîng aṭangin natna zawng zawng ka la bo vang. 26 In rama hmeichhiate zîngah nau chhiat leh ching an awm lo vang a, in dam chhûng nîte chu ka tihseisak ang che u.

27 “In va tawh tûr in hmêlmate zîngah min hlauhna ka awmtîr ang a, anni chu ka timangang ang a, in hmaah ka tlânchhiattîr vek ang. 28 In hmaah thlabâr manganna* ka tîr ang a, chu chuan Hiv mi te, Kanaan mi te, Hit mite chu a hnawt bo vang. 29 Ram chu luah lohva a awm reng loh nân leh ram sakawlhte pawh in tâna hlauhawm khawpa an inthlah pun loh nân, a kum khatnaah chuan ka hnawt chhuak vek lo vang. 30 Ram pum luah thei khawpa in lo pun hma loh chuan zawi zawiin ka hnawh chhuahsak zâwk ang che u.

31 “In ram chin chu Tuipui Sen aṭanga Philistia mite tuipui* thleng leh thlalêr aṭanga Euphrates Luipui thleng a ni ang a. Chu rama chêngte chu in kuta ka pêk dâwn avângin in hnawt chhuak vek ang. 32 Anmahni leh an pathiante chu thu in thlunpui tûr a ni lo. 33 Ka chunga thil sual an tihtîr loh nân che u, anni chu in ramah an chêng tûr a ni lo; an pathiante rawng bâwl chu in tân thang a ni ngei dâwn si a,” a ti a.