Exodus
6 Jehova chuan Mosia hnênah: “Pharaoa chunga ka thiltih tûr chu i hmu ang. Ka mite chhuahtîr tûrin kut chak takin ani chu a nawr lui ang a, a ram aṭanga ka mite hnawt chhuak tûrin kut chak takin a nawr lui ang,” a ti a.
2 Tichuan, Pathianin Mosia hnênah: “Kei hi Jehova ka ni. 3 Abrahama te, Isaaka te, Jakoba te hnênah khân Pathian Engkimtitheia angin ka inlâr ṭhîn a, ka hming Jehova-in erawh chuan an hnênah ka inhriattîr lo.* 4 Ram dang mi anga an chênna Kanaan ram pe tûrin an hnênah thu ka thlung a. 5 Aigupta sala tâng Israel mite rûm thâwm chu ka lo hria a. Tin, ka thuthlung pawh ka la hre reng a ni.
6 “Chuvângin, Israel mite hnênah chuan: ‘Kei hi Jehova ka ni. Aigupta mite’n an chhawr luihna che u leh an sala in tânna ata hi ka chhuah zalên che u ang a, bân phara* chhan chhuak che uin, anni chu nasa takin ka hrem ang. 7 Ka mite in ni ang a, kei in Pathian ka ni ang. Tichuan, kei hi Aigupta mite chhawr luihna ata hruai chhuaktu che u in Pathian Jehova ka ni tih in hria ang. 8 Tin, Abrahama te, Isaaka te, Jakoba te hnêna chhechhama pêk ka tiam tawh ramah chuan ka hruai lût che u ang a, in rochan atân ka pe ang che u. Kei hi Jehova ka ni,’ tiin sawi rawh,” a ti a.
9 A hnuah, Mosia’n chûng thute chu Israel mite hnênah a hrilh a; mahse, an beidawn êm avâng leh sal anga nasa taka chhawr luih an nih avângin an bengkhawn duh lo va.
10 Tichuan, Jehova’n Mosia hnênah: 11 “Aigupta lal Pharaoa hnênah va kal la, ‘I ram aṭang hian Israel mite hi i chhuahtîr tûr a ni,’ tiin hrilh rawh,” a ti a. 12 Mahse, Mosia chuan Jehova hnênah: “Israel mite pawhin min bengkhawn duh lo a ni a, engtin nge Pharaoa chuan ka thusawi chu a bengkhawn tehlul ang? Thu sawi ka thiam si lo,” a ti a. 13 Nimahsela, Jehova chuan Aigupta ram aṭanga Israel mite a hruai chhuah theih nân, Mosia leh Arona chu Israel mite leh Aigupta lal Pharaoa hnêna a thupêkte hrilh tûrin a ti leh a.
14 Israel mite zînga chhûngkaw lûte chu hêngte hi an ni: Israela fa tîr Reubena fapate aṭangin Hanoka te, Palua te, Hezrona te, Karmia te an ni a. Chûngte chu Reubena thlahte an ni.
15 Simeona fapate aṭangin Jemuela te, Jamina te, Ohada te, Jakina te, Zohara te, Kanaan hmeichhe laka a fa Saula te an ni a. Chûngte chu Simeona thlahte an ni.
16 An chhûngkua ang zêla Levia fapate aṭangin Gersona te, Kohatha te, Meraria te an ni a. Levia chu kum 137 a dam a ni.
17 An chhûngkua ang zêla Gersona fapate aṭangin Libnia leh Simeia te an ni a.
18 Kohatha fapate aṭangin Amrama te, Izhara te, Hebrona te, Uziela te an ni a. Kohatha chu kum 133 a dam a ni.
19 Meraria fapate aṭangin Mahlia leh Musia te an ni a.
Chûngte chu an chhûngkaw inthlahchhâwn dân ang zêla Levia chi chhûngkuate chu an ni.
20 Amrama chuan a pa farnu Jokebedi chu nupuiah a nei a. Ani chuan Arona leh Mosia a hrinsak a. Amrama chu kum 137 a dam a ni.
21 Izhara fapate aṭangin Kora te, Nephega te, Zikria te an ni a.
22 Uziela fapate aṭangin Misaela te, Elizaphana te, Sithria te an ni.
23 Arona chuan Aminadaba fanu, Nasona nau Elisebi chu nupuiah a nei a. Ani chuan Nadaba te, Abihua te, Eleazara te, Ithamara te a hrinsak a ni.
24 Kora fapate aṭangin Asira te, Elkana te, Abiasapha te an ni a. Chûngte chu Kora thlah chhûngkuate chu an ni.
25 Arona fapa Eleazara chuan Putiela fanute zînga pakhat chu nupuiah a nei a. Ani chuan Phinehasa a hrinsak a.
Chûngte chu an chhûngkua ang zêla Levia chite zînga chhûngkaw lûte chu an ni.
26 Chûng mite zînga Mosia leh Arona chu Jehova’n: “Aigupta ram aṭangin Israel mite chu a pâwl pâwlin hruai chhuak rawh u,” tia a hrilhte kha an ni a. 27 Anni chu Aigupta ram aṭanga Israel mite hruai chhuak tûra Aigupta lal Pharaoa hnêna thu sawitute kha an ni.
28 Aigupta rama Jehova’n Mosia a biak nî chuan, 29 Jehova chuan a hnênah: “Kei hi Jehova ka ni. I hnêna ka sawi zawng zawng hi Aigupta lal Pharaoa hnênah sawi ang che,” a ti a. 30 Mosia chuan Jehova hnênah: “Thu sawi ka thiam si lo va, engtin nge Pharaoa chuan ka thusawi chu a bengkhawn tehlul ang?” a ti a.