Exodus

8 Jehova chuan Mosia hnênah: “Pharaoa hnênah va kal la, ‘Jehova’n: “Ka rawng an bâwl theih nân ka mite hi kaltîr rawh. 2 I kaltîr duh loh reng chuan i ram pum pui hi chungua tikhatin ka hrem ang. 3 Nile Lui chu chunguin a khat ang a, i inah te, i mut pindanah te, i chhiahhlawhte inah te, i thukah te, i chhang hmehna thlêngahte an lût ang a, i khumah leh i mite zîngah an awm nuaih nuaih ang. 4 Chungute chu nang leh i mite leh i chhiahhlawh zawng zawngte chungah an sawt noh noh ang,” a ti,’ tiin sawi ang che,” a ti a.

5 A hnuah, Jehova’n Mosia hnênah: “Arona hnênah khân, ‘I tiang kha lui te, Nile Lui tui lâkna tui luan kawr te, dûm hmun chungahte chuan lek chhuak la, Aigupta ram pumah hian chungute chhuahtîr rawh,’ tiin hrilh ang che,” a ti a. 6 Arona chuan Aigupta rama tuite chungah a kut chu a lek chhuak a; tichuan, chungute chu lo chhuakin Aigupta ramah chuan an lo khat ta a. 7 Amaherawhchu, mitdawivaih thiamte pawhin an dawi hmangin Aigupta ram pumah chungute an ti chhuak ve a. 8 Tichuan, Pharaoa’n Mosia leh Arona a ko va, an hnênah: “Jehova hnêna inthawi tûrin in mite chu kaltîr ka remti tawh e. Chuvângin, kei leh ka mite hnên aṭanga chungute la bo tûrin Jehova hnênah min ngensak rawh u,” a ti a. 9 Mosia chuan Pharaoa hnênah: “Nang leh i chhiahhlawhte leh i mite bâkah, i inte aṭanga chungute la bo tûrin engtikah nge ka ngensak ang che min hrilh rawh. Chutichuan, Nile Luiah chauh chungute chu an awm tawh ang,” a ti a. 10 Pharaoa chuan: “Naktûkah,” tiin a chhâng a. Mosia chuan: “Kan Pathian Jehova ang hi tu mah an awm lo tih i hriat theihna tûrin i sawi ang chiah chuan a thleng ang. 11 Chungute chu nang leh i inte bâkah, i chhiahhlawhte leh i mite lak aṭangin lâk bo an ni ang a. Nile Luiah chauh an awm tawh ang,” a ti a.

12 Tichuan, Mosia leh Arona chu Pharaoa hnên aṭang chuan an chhuak a. Mosia chuan chungu hmanga Pharaoa chunga a thlentîr hremna chu ti tâwp tûrin Jehova hnênah a ngensak a. 13 Jehova chuan Mosia ngen ang chuan a tihsak a; tichuan, in te, kawtlai te leh, lova awm chungute chu an thi ta vek a. 14 Chungu thite chu chhiar sên loh khawpa tam an dah khâwm a; tichuan, ram chu a lo uih zo ta vek a. 15 Mahse, Pharaoa’n hremna chu a kiang ta tih a hmuh chuan, Jehova’n a lo sawi tawh ang chiah khân, a thinlung tisakin anni chu a ngaithla duh lo va.

16 Jehova chuan Mosia hnênah: “Arona kha, ‘I tiang khân leia vaivut hi vua la, Aigupta ram pum puiah vaihmitêah* a lo chang ang,’ tiin hrilh rawh,” a ti a. 17 Chutiang chuan an ti a. Arona chuan a tiang chu lek chhuaka leia vaivut a han vuak chuan, Aigupta rama vaivut zawng zawng chu vaihmitêah a lo chang a. Tichuan, vaihmitête chuan mihring leh ramsate chu an bâwm a. 18 Mitdawivaih thiamte pawhin an dawi hmangin vaihmitê tihchhuah an tum ve a; mahse, an thei lo. Tichuan, vaihmitête chuan mihring leh ramsate chu an bâwm ta mur mur a. 19 Mitdawivaih thiamte chuan Pharaoa hnênah: “Hei hi Pathian kutzungṭang* ngei a ni!” an ti a. Mahse, Jehova’n a lo sawi tawh ang chiah khân, Pharaoa chuan a thinlung tikhauh zawm zêlin, anni chu a ngaithla duh lo va.

20 Jehova chuan Mosia hnênah: “Zîng takah tho la, Pharaoa hmaah va inlan rawh. Ani chu Nile Luiah a kal dâwn a, a hnênah, ‘Jehova chuan: “Ka rawng an bâwl theih nân ka mite hi kaltîr rawh. 21 I kaltîr duh loh chuan, nang leh i chhiahhlawhte leh i mite hnênah leh i inahte tlip* ka rawn tîr ang a, Aigupta mite in leh an chênna hmun rêng rêng chu tlipin a khat vek ang. 22 Chumi nîah chuan, ka mite chênna Gosen chu ka vênghim ang a, chutah chuan tlip pakhat mah a awm lo vang. Chutiang chuan, kei Jehova hi he ramah hian ka awm tih i hria ang. 23 Tin, ka mite leh i mite ka thliar hrang ang. Chu thil mak chu naktûkah a lo thleng dâwn a ni,” a ti,’ ti ang che,” a ti a.

24 Chutiang chuan Jehova’n a ti a. Pharaoa leh a chhiahhlawhte in bâkah, Aigupta ram pum pui chu tlip rualin a lo khat ta vek a. Chûng tlip rualte chuan ram chu nasa takin an tichhia a. 25 A tâwpah, Pharaoa chuan Mosia leh Arona chu kovin: “Kal ula, in Pathian hnênah chuan va inthawi rawh u. Mahse, he ramah hian ni rawh se,” tiin a hrilh a. 26 Mosia erawh chuan: “Chutianga tih chu a ṭha lo vang, kan Pathian Jehova hnêna inthawina kan hlan tûr chu Aigupta mite tân thil tenawm a ni si a. An mit hmuha thil tenawm kan hlân a nih chuan min dêng hlum mai dâwn asin. 27 Chuvângin, kan Pathian Jehova’n min hrilh ang chiahin thlalêrah ni thum kan va thang ang a, chutah chuan a hnênah kan va inthawi zâwk ang e,” a ti a.

28 Pharaoa chuan: “In Pathian Jehova hnêna inthawi tûrin thlalêrah chuan ka kaltîr ang che u. Mahse, in kal hla lutuk tûr a ni lo. Tlipte hi la bo tûrin in Pathian hnênah chuan min ngensak rawh u,” a ti a. 29 Mosia chuan: “Tûnah hian ka kal chhuak ang a, Jehova hnênah ka ngensak ang che. Tichuan, naktûkah tlipte chuan Pharaoa leh a chhiahhlawhte leh a mite chu a kiansan ang. Mahse, Pharaoa pawhin min bum tawh lo sela, Israel mite hi Jehova hnêna inthawi tûrin kaltîr tawh ngei rawh se,” a ti a. 30 Tichuan, Mosia chu Pharaoa hnên aṭang chuan kal chhuakin Jehova hnênah a ngensak a. 31 Jehova chuan Mosia ngenna ang chuan a tihsak a, tlipte chuan Pharaoa leh a chhiahhlawhte leh a mite chu a kiansan ta a. Pakhat mah a awm ta lo va. 32 Mahse, Pharaoa chuan a thinlung tisak lehin, Israel mite chu a kaltîr duh leh ta chuang lo.